1. ¿Tlen moneki tikchiuaskej akinmej tikchiuaj ken Cristo?

¿TECHPAKTISKIA timotlaloskej maski timokokouaj noso tisotlauaj? Xamo amo. Pero Pablo okijto akinmej tikchiuaj ken Cristo yetoskia ken timotlalouaj (Heb. 12:1). Tinochtin moneki titlaxikoskej tla tiknekij tikseliskej tlen Jehová techiluia techmakas (Mat. 24:13).

2. ¿Tleka Pablo okijto tlen kijtoua 2 Timoteo 4:7, 8, TNM?

² Pablo okijto: “Yotlanki onimotlalo” (xiktlajtolti 2 Timoteo 4:7, 8, TNM). Pero ¿tleka Pablo okijto tejuan yetoskia ken timotlalouaj?

3. ¿Tleka Pablo okijto yetoskia ken timotlalouaj?

³ Pablo okijto ken omauiltiayaj ompa Grecia uan ijkon ma tikajsikamatikan tlen okinekiaya kijtos (1 Cor. 9:25-27; 2 Tim. 2:5). Miak uelta okijto akin kichiua ken Cristo yetoskia ken motlaloua (1 Cor. 9:24; Gál. 2:2; Filip. 2:16). Ijkon peua tikchiuaj ijkuak timotemakaj ixpan Jehová uan timoapolaktiaj (1 Ped. 3:21, TNM). Jehová techmakas yolilistli tlen amo keman tlamis ijkuak  titlatlaniskej (Mat. 25:31-34, 46; 2 Tim. 4:8, TNM).

4. ¿Tlen timomachtiskej?

⁴ Miak tlamantli tlen kichiuaj akinmej motlalouaj noijki ijkon kichiuaj itekipanojkauan toTajtsin Dios. Ma tikitakan eyi tlamantli. Ma tiakan itech ojtli tlen moneki, ma tikilnamiktokan moneki titlatlaniskej uan amitlaj ma techtsakuili.

5. ¿Tlen moneki tikchiuaskej uan tleka?

⁵ Akinmej motlalouaj moneki kichiuaskej ken kinnauatiaj uan ijkon uelis tlatlaniskej. Tejuan noijki tla tiknekij tiyoltoskej nochipa, moneki tikpiaskej tonemilis ken technauatia toTajtsin Dios (Hech. 20:24; 1 Ped. 2:21). Pero Satanás uan akinmej kipaleuiaj, amo kinekij ma titlatlanikan uan kinekij ma tikchiuakan tlen yejuan kinpaktia (1 Ped. 4:4). Miakej techpinauiaj uan kijtouaj amo moneki ikaj technauatis. Pero san tlakajkayauaj (2 Ped. 2:19).

6. ¿Tlen techmachtia tlen okipanok Brian?

⁶ Akin kineki kichiuas tlen Satanás kipaktia, san niman kitas amo uelis san iselti monauatis (Rom. 6:16). Ma tikitakan tlen okipanok se tokni itoka Brian. Ijkuak omoskalti, itatajuan okimachtijkej ma moyekana ika principios bíblicos. Pero ijkuak otelpochtik opejki mokuayejyekoua kox melauak yolpakiskia. Opejki kichiua ken akinmej kiyolpaktiaj Satanás. Brian okijto: “Amo onimokuayejyekouaya san nechtlajyouiltiskia tlen oniknekiaya nikchiuas”. Opejki kintekitiltia drogas, opejki tlauana uan auilnemi. Noijki okijto: “Satepan opejki nikintekitiltia drogas uan opejki nikinnemaka uan ijkon uelis nikinmokouiskia drogas”. Satepan opejki kintlakamati itlanauatiluan Jehová. Okipatlak inemilis uan omoapolakti itech 2001. Axkan kichiua tlen toTajtsin Dios kineki uan yolpaki. *

7. Ijkon ken kijtoua Mateo 7:13, 14, ¿tlen moneki tikchiuaskej?

⁷ Miak ipati ma tikchiuakan tlen kineki toTajtsin Dios. Pero Satanás amo kineki ma tikchiuakan tlen techpaleuis nochipa ma tiyoltokan uan kineki ma tikchiuakan tlen oksekimej kichiuaj. Pero  non san techixpolos (xiktlajtolti Mateo 7:13, 14). Tla tiknekij tikchiuaskej tlen Jehová kineki, moneki ma tikneltokakan uan ma tikkakikan tlen techiluia.

8. ¿Tlen kichiuaj tla uetsij akinmej motlalouaj?

⁸ Akinmej motlalouaj nochipa tlachixtiuij tlayekapan. Pero uelis mokxitlanuiskej noso ikaj kinmikxitlanuis maski amo okinekiayaj. Tla uetsij, moketsaj uan oksepa motlalouaj. Amo kitaj tlen okinmikxitlanui. Mokuayejyekojtiuij tlen kiseliskej tla tlatlaniskej.

9. ¿Tlen tikchiuaskej tla techkualaniaj tokniuan?

⁹ Akinmej tikchiuaj ken Cristo yetoskia ken timokxitlanuiaj ijkuak tikchiuaj noso tikijtouaj itlaj amo kuali noso se tokni otechyolkoko. Ijkon techpanoua porque titlajtlakolejkej uan tinochtin timochijchikajtokej tiyoltoskej nochipa. Ik non, ualeua timokualaniaj. Noijki Pablo okijto ualeua tokniuan techchiuiliskej tlen amo kuali (Col. 3:13). Pero amo ma tikitakan tlen techchiuiliaj, okachi kuali ma timokuayejyekokan tlen tikseliskej. Tla tiuetsij, ma timoketsakan uan oksepa ma timotlalokan. Ijkuak ijkon techpanos amo ma tikualanikan nion ma timoyolkokokan. Tlamo amo titlatlaniskej nion tikseliskej tlen toTajtsin Dios techmakas. Noijki tikintsakuiliskej akinmej mochijchikauaj nochipa yoltoskej.

10. ¿Tlen tikchiuaskej tla amo tiknekij tikintsakuiliskej oksekimej?

¹⁰ Tla amo tiknekij tikintsakuiliskej tokniuan, amo ma tikchiuakan tlen san tejuan tiknekij (Rom. 14:13, 19-21; 1 Cor. 8:9, 13). Tejuan amo tikchiuaj ken akinmej motlalouaj. Yejuan san motlatlanij uan kinekij tlatlaniskej. Amo kintekipachoua tlen kinpanoua oksekimej porque san kinekij tlatlaniskej. Pero tejuan amo timotlatlanij iuan tokniuan (Gál. 5:26; 6:4). Tejuan tiknekij tikinpaleuiskej uan san  sekan titlatlaniskej uan ijkon nochipa tiyoltoskej. Ik non, timochijchikauaj tikinpaleuiskej oksekimej ijkon ken okijto Pablo (Filip. 2:4).

11. ¿Tlen mokuayejyekouaj akinmej motlalouaj uan tleka?

¹¹ Akinmej motlalouaj mokuayejyekouaj ken tlatlaniskej uan amo san tlachixtiuij tlayekapan. Maski ayamo kitaj tlen kitlaniskej mokuayejyekouaj tlen kinmakaskej tla tlatlaniskej. Non kinpaleuia okachi ma motlalokan.

12. ¿Tlen techmakas Jehová porque techtlasojtla?

¹² Jehová techtlasojtla, ik non, techiluia tla titlatlaniskej nochipa tiyoltoskej iluikak noso nikan tlaltikpak. Biblia techiluia ken yetos tlen tikseliskej. Ijkon uelis timokuayejyekoskej ken tiyetoskej. Non techpaleuis amitlaj ma techtsakuili tla tiknekij titlatlaniskej.

13. ¿Akin techpaleuia ma titlaxikokan?

¹³ Yiuejkika akinmej omotlalouayaj ompa Grecia sapanoua osotlauayaj. Pero kinpaleuiskia tla mochijchikauaskiaj kichiuaskej ken okinmachtijkej motlaloskej. Ijkon ken yejuan kinmachtiaj, toTajtsin Dios noijki techmachtia ken tiktekichiuiliskej uan techpaleuia ma titlaxikokan porque techmaka chikaualistli. Tla tikkauiliskej ma techmachti ye techpaleuis ma titlaxikokan (1 Ped. 5:10).

14. ¿Ken techpaleuia 2 Corintios 12:9, 10 ma tikixnamikikan ouijkayotl?

¹⁴ Pablo okixnamik sapanoua miak ouijkayotl. Okiuijuikaltijkej, okitlajyouiltijkej uan ualeua osotlauaya porque okimachiliaya ken okipiaya se uitstli itech itlalnakayo (2 Cor. 12:7). Pero amo keman osotlauak uan okineltokak Jehová kipaleuiskia (xiktlajtolti 2 Corintios 12:9). Ik non, Jehová nochipa okipaleui.

15. ¿Ken timomachiliskej tla tikchiuaskej ken Pablo?

¹⁵ Axkan tejuan noijki techuijuikaltiaj uan techtlajyouiltiaj porque tikneltokaj toTajtsin Dios. Noijki ualeua timokokouaj noso tisotlauaj. Pero ma tikchiuakan ken Pablo uan ijkon tikitaskej ken techtlasojtla Jehová uan ken techpaleuia.

16. ¿Tlen uelis kichiuaskej akinmej mokokouaj?

¹⁶ Sekimej tokniuan amo ueli meuaj, amo ueli nejnemij noso amo kuali tlachiaj. Pero, ¿uelis kitekichiuiliskej toTajtsin Dios ijkon ken kichiuaj akinmej ayamo kipiaj miak xiuitl? Kema. Miakej tokniuan tlen yikipiaj miak xiuitl uan akinmej mokokouaj kitekichiuiliaj toTajtsin Dios porque ye kinpaleuia. Kinpaleuia ma kikakikan uan ma kitakan tlen timomachtiaj ijkuak timonechikouaj. Kintlapouiaj infamiliares uan akinmej tlapajtiaj.

17. ¿Ken kinmita Jehová akinmej mokokouaj?

¹⁷ Amo ma tikijtokan timokokouaj uan amo uelis tiktekichiuiliskej toTajtsin Dios uan amo titlaxikoskej. Jehová techtlasojtla porque tikneltokaj uan kipatioita tiktekichiuiliaj. Ye amo keman techkaua ijkuak titlajyouiaj (Sal. 9:10). Ye nochipa touan yetos. Ma tikitakan tlen okijto se tokni tlen mokokoua. “Okachi nimokokojti, ik non, ayakmo ueli okachi nitetlapouia. Pero nikmati Jehová kipatioita  tlen nikchiua uan non nechpaleuia ma niyolpaki”. Tla timoyolkokouaj ma tikilnamikikan Jehová nochipa touan yetos. Noijki ma timokuayejyekokan tlen okichi Pablo uan tlen okijto: “Para mamota n weletílistli amo toaxka, yej wits de Dios” (2 Cor. 4:7).

18. ¿Tlen kinpanoua oksekimej tokniuan?

¹⁸ Sekimej tokniuan kixnamikij okseki ouijkayotl. Sekimej moyolkokouaj pero tejuan amo tikitaj tlen kinpanoua uan amo tikinmajsikamatij. ¿Tleka sapanoua tlajyouiaj? Porque ijkuak ikaj momaposteki noso amo ueli nejnemi nochtin kitaj uan kipaleuiaj. Pero amo tikitaj tlen kinpanoua akinmej moyolkokouaj. Yejuan tlajyouiaj ijkon ken ijkuak ikaj momaposteki. Pero oksekimej amo kitaj kox moneki okachi kintlasojtlaskej uan kinpaleuiskej.

19. ¿Tlen techmachtia tlen okichi Mefibóset?

¹⁹ Ualeua timokuayejyekouaj amikaj techajsikamatij uan ayakmo ueli itlaj tikchiuaj. Pero uelis techpaleuis tlen okipanok Mefibóset (2 Sam. 4:4). Ye omokokouaya uan okixiko maski tekiua David okixnamik uan okichiuili tlen amo kuali. Amo okatka itlajtlakol nochi tlen okipanok pero amo keman omokuayejyeko ayakmo uelis itlaj kichiuaskia. Ye okipatioitaya tlen okipiaya uan omotlasojkamatki porque achto David okitlasojtlaya (2 Sam. 9:6-10). Ik non, ijkuak David okixnamik ye amo san omokuayejyeko tleka ijkon okichiuili. Amo omoyolkoko uan amo okitlajtlakolti Jehová tlen okipanouaya. Ye okipaleui David porque okimatiaya Jehová okitlali ma yeto tekiua (2 Sam. 16:1-4; 19:24-30). Jehová okichi ma kijkuilokan tlen okipanok Mefibóset uan ijkon ma techpaleui (Rom. 15:4).

20. ¿Tlen kinpanoua akinmej moyolkokouaj uan tlen moneki kilnamiktoskej?

²⁰ Sekimej tokniuan momojtiaj uan amo kinekij mouikaskej iuan oksekimej porque moyolkokouaj. Maski amo kuali momachiliaj yetoskej iuan oksekimej, monechikouaj uan yauij uejueyij nechikolmej. Tetlapouiaj maski ualeua momojtiaj motlapouiskej iuan akinmej amo kinmixmatij. Amo ma motekipachokan porque miakej ijkon kinpanoua. Ma tikilnamiktokan Jehová kipatioita tla tiktekichiuiliaj ika nochi toyolo. Ye techteochiuas  uan techpaleuis ma titlaxikokan tla amo timosotlauaj * (Filip. 4:6, 7; 1 Ped. 5:7). Jehová yolpaki tla timochijchikauaj tiktekichiuiliskej maski timokokouaj noso timoyolkokouaj.

21. ¿Tlen tikchiuaskej tla tikkauiliaj Jehová ma techpaleui?

²¹ Yotikitakej seki tlamantli tlen kichiuaj akinmej motlalouaj amo kichiuaj itekipanojkauan Jehová. Yiuejkika san se otlatlaniaya ijkuak omotlalouayaj. Pero akinmej tikchiuaj ken Cristo tinochtin tikseliskej tlen techmakas toTajtsin Dios (Juan 3:16). Akinmej omotlalouayaj nochtin omonekiaya yetoskej chijchikauakej tlamo amo tlatlaniskiaj. Tejuan amo tinochtin tichijchikauakej pero titlaxikouaj (2 Cor. 4:16). Jehová techpaleuia uan ijkon uelis nochipa tiktekichiuiliskej.