1. ¿Tlen kita Jehová ijkuak kinmita itekipanojkauan?

¡TIYOLPAKIJ ijkuak tikmatij “Jehová kiyolpaktia tlen kichiuaj itekipanojkauan”! (Sal. 149:4). Ye kita tlen kuali tikchiuaj, noijki kita tlen uelis tikchiuaskej uan techkauilia iuan ma timouikakan. Tla amo keman tikkauaj, ye nochipa touan yetos (Juan 6:44).

2. ¿Tleka sekimej tokniuan mokuayejyekouaj Jehová amo kintlasojtla?

² Xamo timokuayejyekouaj: “Ne nikmatok Jehová kintlasojtla nochtin tokniuan pero ¿ken nikmati ne noijki nechtlasojtla?”. ¿Tleka ualeua sekimej tokniuan ijkon motlajtlaniaj? Ma tikitakan tlen okijto Oksana. * Ye sapanoua otlajyoui ijkuak okatka tsikitsin, ye okijto: “Sapanoua oniyolpakiaya ijkuak onimoapolakti uan onimochi precursora. Pero ijkuak opanok 15 xiuitl opejki nikilnamiki tlen amo kuali onechpanok. Opejki nimokuayejyekoua Jehová ayakmo onechseliaya uan noijki amo nechnamiki ma nechtlasojtla”. Se precursora tlen itoka Yua, noijki otlajyoui ijkuak okatka tsikitsin, okijto: “Onimotemakak ixpan Jehová porque oniknekiaya nikyolpaktis pero onimokuayejyekouaya ye amo keman nechtlasojtlaskia”.

3. ¿Tlen tlajtlanilmej tikinnankiliskej itech nin tlamachtil?

³ Xamo tejuan noijki timokuayejyekouaj ken nonmej tokniuan, tiktlasojtlaj Jehová pero xamo tikijtouaj ye amo techtlasojtla. Itech nin tlamachtil tikinnankiliskej ninmej ome tlajtlanilmej: ¿tleka moneki ma tikneltokakan Jehová techtlasojtla?, uan ¿tlen uelis tikchiuaskej tla timokuayejyekouaj amo techtlasojtla?

4. ¿Tleka uelis techijtlakos tla timokuayejyekouaj Jehová amo techtlasojtla?

⁴ Tla melauak tikneltokaj Jehová techtlasojtla, timochijchikauaskej okachi tiktekichiuiliskej uan noijki ijkon tikchiuaskej maski san tlen techpanos. Pero tla timokuayejyekouaj amo techtlasojtla ‘amo tiyolchikajtoskej’ (Prov. 24:10). Noijki tla timosotlauaj uan timokuayejyekouaj Jehová amo techtlasojtla, amo tikpiaskej tlen ika timopaleuiskej ijkuak Satanás techtlajyouiltis (Efes. 6:16).

5. ¿Tlen kinpanoua tokniuan ijkuak peua mokuayejyekouaj amo techtlasojtla Jehová?

⁵ Sekimej tokniuan opejkej mokuayejyekouaj Jehová amo kitekipachoua tlen kinpanoua, ik non, ayakmo chikauak kipiaj intlaneltokilis. Se tlayekanki tlen itoka James okijto: “Maski onitlapaleuiaya Betel uan onechpaktiaya nitetlapouis ika okse tlajtoli, opejki nimokuayejyekoua kox melauak okipatioitaya Jehová tlen onikchiuaya. Noijki opejki nimokuayejyekoua amo onechkakiaya ijkuak oniktlatlaujtiaya”. Okse tokni tlen itoka Eva uan okachi kitekichiuilia Jehová, okijto: “Onikajsikamatki ijkuak peuaj timokuayejyekouaj amo techtlasojtla Jehová, techijtlakoua porque ayakmo tiktekichiuiliaj ken moneki”. Okse tokni tlen itoka Michael, precursor regular uan noijki tlayekanki, okijto: “Tla timokuayejyekouaj amo kitekipachoua Jehová tlen techpanoua, ayakmo kuali iuan timouikaskej”.

6. ¿Tlen uelis tikchiuaskej tla peua timokuayejyekouaj amo techtlasojtla Jehová?

⁶ Tlen okijtojkej tokniuan techpaleuia ma tikajsikamatikan sapanoua techijtlakos tla amo tikneltokaj Jehová techtlasojtla. ¿Tlen uelis tikchiuaskej tla peuaj timokuayejyekouaj amo techtlasojtla Jehová? San niman okse tlamantli ma timokuayejyekokan. Ma tiktlatlaujtikan Jehová ma techpaleui para timoyolseuiskej, ma kimalui toyolo uan tlen timokuayejyekouaj para ijkon amo sapanoua timotekipachoskej (Sal. 139:23; nota; Filip. 4:6, 7). Uan ma tikilnamiktokan katej oksekimej tokniuan tlen noijki moyolkokouaj. Noijki ijkon omomachilijkej sekimej itekipanojkauan Jehová tlen yiuejkika okatkaj. Ma tikitakan tlen okipanok apóstol Pablo.

7. ¿Ken omomachiliaya Pablo?

⁷ Ualeua tikpiaj miak tekitl uan tikmachiliaj amo timajxiliaj tikchiuaskej. Ijkon omomachili tlatitlanil Pablo. Ye okijto amo san okitekipachouaya se tlanechikol, ye okintekipachouaya “sentetl n tokniwah” (2 Cor. 11:23-28). ¿Timokokouaj uan ik non timoyolkokouaj? Pablo omoyolkokouaya porque okipiaya ken se “witstli”, xamo omokokouaya (2 Cor. 12:7-10). ¿Ualeua timoyolkokouaj porque titlajtlakolejkej? Pablo noijki ijkon omomachili. Okijto omoyolkokouaya porque nochipa omonekiaya mochijchikauas para kichiuas tlen kuali (Rom. 7:21-24).

8. ¿Tlen okipaleuiaya Pablo ma kitekichiuili Jehová maski okixnamik ouijkayotl?

⁸ Maski Pablo okixnamik miak ouijkayotl, nochipa okitekichiuili Jehová. ¿Tlen okipaleui? Maski ye okimatoka okatka tlajtlakole, okineltokaya okipaleuiaya tlen Jesús okichi. Noijki okimatoka tlen Jesús okijto: “Nochteh akimeh kineltokaskeh” nochipa yoltoskej (Juan 3:16; Rom. 6:23). Pablo nochipa okilnamiktoka Jesús topatka omotemakak. Ye okimatoka Jehová kintlapojpoluiskia akinmej otlajtlakolchiuayaj tla melauak moyolkopaskiaj (Sal. 86:5).

9. ¿Tlen techmachtia tlen okijto Pablo itech Gálatas 2:20, TNM?

⁹ Pablo okineltokaya Jehová okitlasojtlaya porque okiualtitlanki Jesús topatka ma mikiki. Ma tikitakan tlen okijto itech Gálatas 2:20, TNM (xiktlajtolti). Pablo okijto: “IKone toTajtsin Dios [...] onechtlasojtlak uan nopatka omotemakak”. Pablo amo omokuayejyeko san sekimej kintlasojtla, ye amo okijto: “Nikmatok Jehová kintlasojtla tokniuan pero ne amo nechtlasojtla”. Ye okinmilui tokniuan tlen ochantiayaj Roma: “Cristo Jesús omikki topatka, maya otikatkah titlajtlakolejkeh” (Rom. 5:8). ToTajtsin Dios tinochtin techtlasojtla.

10. ¿Tlen techmachtia tlen kijtoua Romanos 8:38, 39?

¹⁰ (Xiktlajtolti Romanos 8:38, 39). Pablo okineltokaya toTajtsin Dios melauak techtlasojtla. Ye okijkuilo amitlaj “weletis techachiwas de itech itlasojtlalis [toTajtsin Dios]”. Ye okimatoka Jehová okinmiknomatki israelitas. Noijki okilnamiktoka ye noijki okiknomatki. Yetoskia ken kijtoskia: “Jehová okiualtitlanki iKone  nopatka ma mikiki, ik non, nikmatok ye nechtlasojtla” (Rom. 8:32).

11. Maski Pablo otlajtlakolchi ijkon ken kijtoua 1 Timoteo 1:12-15, ¿tleka okineltokaya toTajtsin Dios okitlasojtlaya?

¹¹ (Xiktlajtolti 1 Timoteo 1:12-15). Xamo Pablo ualeua okiyolkokouaya tlen achto okichi. Okijto: “Ne okachi nitlajtlakolchi de nochteh n tlajtlakolchijkeh”. Melauak tlen okijto porque ijkuak ayamo okichiuaya ken Cristo okintlajyouilti miakej tokniuan itech miakej altepemej. Sekimej okintsakuato uan otlapaleui ijkuak sekimej okinmiktijkej (Hech. 26:10, 11). Ma tikijtokan okinmixpolojkej itatajuan se tokni uan Pablo ompa otlapaleui pero axkan okixmatki non tokni. ¿Ken momachiliskia? Pablo omoyolkokouaya pero ayakmo uelis itlaj kichiuaskia. Ika nochi iyolo okineltokaya Jesús ipatka omikik, ik non, okijkuilo: “Dios onechtlasojtlak axa ni itlatematilti” (1 Cor. 15:3, 10). ¿Tlen techmachtia tlen ye okijto? Moneki tikneltokaskej ika nochi toyolo Cristo omotemakak topatka uan ijkon ueli timouikaj iuan Jehová (Hech. 3:19). ToTajtsin Dios kita tlen tikchiuaj axkan uan tlen tikchiuaskej satepan, amo kita tlen achto otikchijkej, maski yotiktekichiuiliayaj noso amo (Is. 1:18).

12. Ijkon ken kijtoua 1 Juan 3:19, 20, ¿tlen moneki ma tikchiuakan tla timokuayejyekouaj amitlaj topati nion technamiki ma techtlasojtlakan?

¹² Ualeua toyolo uelis techkajkayauas porque titlajtlakolejkej, ik non, uelis tikmachiliskej amitlaj topati uan uelis timokuayejyekoskej amo technamiki ikaj ma techtlasojtla (xiktlajtolti 1 Juan 3:19, 20). Ik non, uelis timokuayejyekoskej imikilis Jesús amo techpaleuia para techtlapojpoluis toTajtsin Dios. Ijkuak ijkon timomachiliskej, ma tikilnamiktokan “Dios  okachi weyi ke toyolo”. Uelis timokuayejyekoskej toTajtsin Dios amo techtlasojtla nion techtlapojpoluia pero non amo melauak, ye techtlasojtla uan techtlapojpoluia. Moneki ma tikneltokakan. Para uelis tikneltokaskej nochipa ma timomachtikan Biblia, noijki moneki nochipa ma timotlatlaujtikan uan noijki ma tiyetokan iuan tokniuan. Ma tikitakan tleka moneki ma tikchiuakan non eyi tlamantli.

13. ¿Ken techpaleuia ijkuak timomachtiaj iTlajtol toTajtsin Dios? (Xikita recuadro tlen itoka “ ¿Ken kinpaleuia tokniuan iTlajtol toTajtsin Dios?”).

¹³ Nochipa ma timomachtikan iTlajtol toTajtsin Dios. Ijkon okachi tikmatiskej Jehová kuali kipia iyelis uan noijki tikitaskej ye sapanoua techtlasojtla. Tla nochipa timokuayejyekouaj tlen kijtoua Biblia techpaleuis kuali ma timokuayejyekokan uan ‘kimilawas’ tlen timokuayejyekouaj uan tlen tikpiaj itech toyolo (2 Tim. 3:16). Se tlayekanki tlen itoka Kevin okimachiliaya amitlaj ipati, okijto: “Ijkuak niktlajtoltia tlen kijtoua Salmo 103 uan nimokuayejyekoua tlen ompa kijtoua, nechpaleuia ma nikita nochi ken moneki uan ma nikajsikamati Jehová nechtlasojtla”. Tokni Eva tlen itech yotitlajtojkej, okijto: “Ijkuak yiyouak nimokuayejyekoua ken kita Jehová nochi, ijkon nimoyolseuia uan okachi nikneltoka tlen ye kijtoua”.

14. ¿Ken techpaleuis tla timotlatlaujtiskej?

¹⁴ Nochipa ma timotlatlaujtikan (1 Tes. 5:17). Akinmej kuali mouikaj nochipa motlapouiaj uan kijtouaj tlen mokuayejyekouaj. Noijki ijkon moneki ma tikchiuakan iuan Jehová. Ijkuak tikiluiaj ken timomachiliaj, tlen timokuayejyekouaj uan tlen techtekipachoua, tikteititiaj tikneltokaj ye techpaleuis uan tikajsikamatij ye techtlasojtla (Sal. 94:17-19; 1 Juan 5:14, 15). Tokni Yua tlen itech yotitlajtojkej okijto: “Ijkuak niktlatlaujtia Jehová amo san nikiluia tlen onikchi non tonal. Nikiluia nochi tlen nikmachilia. Amo nikita Jehová ken ikaj tlen san tlanauatia, ne nikita ken se tlakatl tlen melauak kintlasojtla ikoneuan”. (Xikita recuadro tlen itoka “ ¿Yotiktlajtolti?”).

15. ¿Ken kiteititia Jehová kitekipachoua tlen techpanoua?

¹⁵ Ma tiyetokan iuan tokniuan. Tokniuan ken se tetliokolil tlen techmaka Jehová (Sant. 1:17). Ye kiteititia techtlasojtla porque techinmaka miakej tokniuan tlen katej ken tofamilia uan ‘nochipa kiteititiaj techtlasojtlaj’ (Prov. 17:17). Ijkuak Pablo okintlajkuilili tokniuan tlen ochantiayaj Colosas, okijto: “Intech nimoyolchikawa” (Col. 4:10, 11). Akinmej omouikayaj iuan Jesucristo okipaleuijkej uan noijki okipaleuijkej ángeles, ye okitlasojkamatki  ken okipaleuijkej (Luc. 22:28, 43).

16. ¿Ken techpaleuiaj tokniuan kuali ma timouikakan iuan Jehová?

¹⁶ ¿Tikinmiluiaj tokniuan tlen techpanoua uan tikinmiluiaj ma techpaleuikan? Tla tikiluiaj se tokni ma techpaleui, amo kijtosneki amo tiyolchikauakej uan non melauak techpaleuis. Ma tikitakan tlen okijto tokni James tlen itech yotitlajtojkej, ye okijto: “Nechpaleuia ijkuak nimotlapouia iuan tokniuan tlen kipiaj chikauak intlaneltokilis. Ijkuak nimoyolkokoua yejuan nechkakij uan nechiluiaj nechtlasojtlaj. Ika nonmej tokniuan nikita Jehová nechtlasojtla uan kineki nechpaleuis”. ¡Moneki ma tikinpiakan toyolikniuan itech tlanechikol!

17, 18. ¿Tlen moneki ma tikilnamiktokan uan tleka?

¹⁷ Satanás kineki ma timosotlauakan uan ayakmo ma tikchiuakan tlen kuali. Kineki ma timokuayejyekokan Jehová amo techtlasojtla uan amitlaj topati para techmakixtis. Pero yotimomachtijkej non amo melauak.

¹⁸ Jehová techtlasojtla uan techpatioita. Tla tiktlakamatij, nochipa techtlasojtlas uan Jesús noijki (Juan 15:10). Ik non, amo ma tikneltokakan ijkuak Satanás uan toyolo kinekiskej ma tikneltokakan Jehová amo techtlasojtla. Ma tikilnamiktokan Jehová kita tlen kuali tikchiuaj. Ma tikneltokakan ye “kiyolpaktia tlen kichiuaj itekipanojkauan”, non kijtosneki noijki kiyolpaktia tlen te tikchiua.