1, 2. ¿Tlen okichi Jesús? ¿Tleka omonekiaya ijkon ma kichiua?

ADÁN amo okipiaya tlajtlakoli pero satepan otlajtlakolchi, ik non, ye uan ikoneuan ayakmo uelis yoltoskiaj nochipa. Amo uelis kitlapojpoluiskiaj Adán porque okimatoka tlen okichijtoka, ik non, omonekiaya mikis. Pero ¿tlen kinpanoskia ikoneuan? Yejuan amo intlajtlakol tlen Adán okichi (Rom. 5:12, 14). ¿Uelis ikaj kinmakixtiskia para amo ixpoliuiskiaj? Kema. Ijkuak Adán otlajtlakolchi Jehová san niman okitematilti ken kinmakixtiskia ikoneuan Adán imak tlajtlakoli uan mikilistli (Gén. 3:15). Ijkuak ajsiskia tonal, Jehová kiualtitlaniskia iKone para ‘motemakas makimiktikah para ika noni kitlaxtlawas intemakixtilis miakeh’ (Mar. 10:45; Juan 6:51).

² Jesús okitemakak inemilis uan ijkon okitlaxtla tlen Adán okipolo (1 Cor. 15:22). ¿Tleka omonekiaya ma motemaka Jesús? Porque itech itlanauatil Jehová okijtouaya omonekiaya kitemakaskej “yolilistli ika se yolilistli” (Éx. 21:23, 24). Adán okipolo iyolilis tlen amo okipiaya tlajtlakoli. Ik non, Jesús omonekiaya kitemakas iyolilis para uelis mochiuaskia tlen toTajtsin Dios okinekiaya (Rom. 5:17). Ijkon mochiua ‘inTajtsin tlen nochipa yoltok’ akinmej tlaneltokaj itech imikilis Jesús (Is. 9:6; Rom. 3:23, 24).

3. Ijkon ken kijtoua Juan 14:31 uan 15:13, ¿tleka Jesús okinek kitemakas inemilis tlen amo okipiaya tlajtlakoli?

³ Jesús okinek kitemakas inemilis porque sapanoua kitlasojtla iTajtsin uan noijki tejuan (xiktlajtolti Juan 14:31; 15:13). Ik non, nochipa okitlakamatki iTajtsin uan  okichi tlen okinauati maski okimiktijkej. Ijkon mochiuas tlen Jehová okinekiaya, nochipa tiyoltoskej uan tlaltikpak yetos se xochitlali. Axkan timomachtiskej tleka toTajtsin Dios okitekauili sapanoua ma kitlajyouiltikan Jesús ijkuak okimiktijkej. Noijki tikitaskej ikaj tlen otlapaleui ma moijkuilo Biblia sapanoua okitlasojkamatki tlen okichi Jesús. Saiktlami timomachtiskej ken uelis okachi tikteititiskej tiktlasojkamatij tlen topatka okichi Jehová uan Jesús.

4. Xikijto ken oixpoliuik Jesús.

⁴ Ma timokuayejyekokan nochi tlen okipanok Jesús saiktlami tonal ijkuak okatka nikan tlaltikpak. Ye okitekauili ma kikitskikan uan ma kikojkokan soldados romanos, ijkon okichi maski ueliskia kinnotsaskia miakej ángeles ma kipaleuikij (Mat. 26:52-54; Juan 18:3; 19:1). Chikauak okiuitekej uan okikojkojkej. Satepan okimamaltijkej se kuauitl sapanoua etik, maski ikuitlapan oeskisaya. Jesús okimamajtia non kuauitl hasta kanin kimiktiskiaj. Pero soldados romanos okichiualtijkej okse tlakatl ma kimama (Mat. 27:32). Ijkuak Jesús oajsito kanin kimiktiskiaj, soldados okitsoponijkej imauan uan ikxiuan itech kuauitl. Ijkuak okipilojkej okachi ueyi omotlapojtiaya kanin okikoyonijkej. Akinmej inmiuan omouikaya uan inantsin sapanoua omoyolkokojkej ijkuak okitayaj ken otlajyouijtoka Jesús uan okichokiliayaj pero tlayekankej judíos okipinauiayaj (Luc. 23:32-38; Juan 19:25). Uejkika ijkon otlajyouijtoka. Ayakmo ueli omijyotiaya porque iyolo uan ipulmones ayakmo okipaleuiayaj. Jesús okilnamiktoka nochipa okitlakamatki Jehová uan ijkuak yiixpoliuiskia okitlatlaujti. Saiktlami omokuatolo uan oixpoliuik (Mar. 15:37; Luc. 23:46; Juan 10:17, 18; 19:30). ¡Sapanoua otlajyoui, yolik oixpoliuik uan amo kuali tlen okichiuilijkej!

5. ¿Tlen okiyolkokouaya Jesús?

⁵ Jesús amo okiyolkoko ken okimiktijkej, ye okiyolkoko okijtojkej okiuijuikalti toTajtsin Dios (Mat. 26:64-66). Non sapanoua okiyolkoko, ik non, okinekiaya iTajtsin ma kipaleui para kiteititiskia amo melauak tlen okijtouayaj (Mat. 26:38, 39, 42). ¿Tleka okitekauili Jehová ma kitlajyouiltikan uan ma kimiktikan iKone tlen sapanoua kitlasojtla? Ma tikitakan eyi tlamantli tlen techpaleuis ma tikajsikamatikan.

6. ¿Tleka omonekiaya kimiktiskej Jesús itech se kuauitl?

⁶ Omonekiaya kimiktiskej Jesús para ijkon kinmakixtiskia judíos (Gál. 3:10, 13). Yejuan sapanoua tlajyouiskiaj porque amo melauak okitlakamatkej itlanauatil toTajtsin Dios, maski okiluijkej kitlakamatiskiaj. Uan noijki porque Adán okinpanoltili tlajtlakoli (Rom. 5:12). Tlanauatil tlen Jehová okinmakak israelitas okijtouaya tla ikaj okichiuaya se ueyi tlajtlakoli omonekiaya ma kimiktikan (Deut. 21:22, 23; 27:26). * Ik non, ijkuak okimiktijkej Jesús noijki okinpaleui judíos, maski okixtopejkej.

7. ¿Tleka noijki toTajtsin Dios okitekauili ma tlajyoui iKone?

⁷ ToTajtsin Dios noijki okitekauili ma  kitlajyouiltikan iKone para ijkon uelis yetos se kuali teopixki. Jesús kuali kimatok ijkuak sapanoua titlajyouiaj oui tiktlakamatiskej toTajtsin Dios porque ye ijkon omomachili. Sapanoua omotekipachouaya, ik non, “chikawak omotiotsajtsili iwa ochokak”. Jesús sapanoua otlajyoui, ik non, “weleti kimpalewia akimeh noiwa n amokualitlakatl kineki matlajtlakolchiwakah”. Melauak timotlasojkamatij porque Jehová okipejpenki Jesús ma yeto teopixki porque “techiknomati” (Heb. 2:17, 18; 4:14-16; 5:7-10).

8. ¿Tleka toTajtsin Dios okitekauili sapanoua ma kitlajyouiltikan Jesús?

⁸ Noijki Jehová okitekauili sapanoua ma tlajyoui Jesús para ijkon kiteititiskia nochtin nochipa uelis tiktlakamatiskej Jehová maski sapanoua titlajyouiskej. Satanás kijtoua tiktekichiuiliaj toTajtsin Dios porque techpaleuia. Noijki kijtoua amo tiktlasojtlaj Jehová ijkon ken Adán amo okitlasojtlaya (Job 1:9-11; 2:4, 5). Jehová okimatiaya iKone kitlakamatiskia, ik non, okitekauili sapanoua ma kitlajyouiltikan. Jesús nochipa okitlakamatki Jehová, ijkon okiteititi Satanás san tlakajkayaua.

9. ¿Tlen techmachtia tlen okichi apóstol Juan?

⁹ Miakej tokniuan okachi tlaneltokaj ijkuak mokuayejyekouaj Jesús topatka omotemakak. Tetlapouiaj maski kintlajyouiltiaj uan kixikouaj miak tlamantli. Ma tikitakan tlen okichi apóstol Juan. Kanaj 60 xiuitl otetlapoui Jesús topatka omotemakak. Okipiaya kanaj 100 xiuitl ijkuak tekiuajkej romanos okititlankej Patmos porque omokuayejyekouayaj okichijtoka tlen amo kuali. ¿Tlen okichi? ‘Otetlapowiaya itlajtol Dios non Cristo Jesús noiwa otechnextiliko’ (Apoc. 1:9). ¡Otechititi ken moneki titlaneltokaskej uan titlaxikoskej!

10. ¿Ken okiteititi Juan itech amochmej tlen okinmijkuilo okitlasojkamatiaya Jesús otechmakixtiko?

¹⁰ Itech amochmej tlen Juan okinmijkuilo okijto sapanoua okitlasojtlaya Jesús uan okitlasojkamatiaya okitemakak inemilis. Kanaj 100 uelta otlajto itech imikilis Jesús noso ken techpaleuia. Ye okijkuilo: “Tla aka otlajtlakolchi, tikpiah Akin techtlajtolpalewia inawak Totajtsi Dios, Ye Cristo Jesús, n yolmilajka” (1 Juan 2:1, 2). Noijki okijto miak ipati ‘kitematiltis iTlajtol Dios’ (Apoc. 19:10). Juan okiteititi sapanoua okitlasojkamatiaya Jesús otechmakixtiko. ¿Ken uelis tikteititiskej noijki tiktlasojkamatij?

11. ¿Tlen techpaleuis amo ma tikchiuakan tlen amo kuali?

¹¹ Amo ma titlajtlakolchiuakan. Tla melauak tiktlasojkamatij imikilis Jesús, amo timokuayejyekoskej: “Amo moneki ma nimochijchikaua para amo nitlajtlakolchiuas porque satepan uelis nikiluis toTajtsin Dios ma nechtlapojpolui”. Ijkuak itlaj amo kuali kineki techyoltilanas ma tikijtokan: “¡Amo! Amo uelis ijkon nikchiuas porque Jehová iuan Jesús yokichijkej miak tlamantli nopatka”. Noijki uelis tikiluiskej Jehová ma techpaleui para titlaxikoskej uan ma tiktlatlaujtikan: “Amo xiktekawili matechyoltilana n tlajtlákoli” (Mat. 6:13).

12. ¿Ken uelis tikchiuaskej tlen kijtoua 1 Juan 3:16-18?

 ¹² Ma tikintlasojtlakan tokniuan. Ijkuak ijkon tikchiuaj tikteititiaj tiktlasojkamatij imikilis Jesús porque ye amo san topatka omotemakak, noijki omotemakak inpatka tokniuan. Ye sapanoua kintlasojtla tokniuan, ik non, omotemakak inpatka (xiktlajtolti 1 Juan 3:16-18). Tla tikinchiuiliaj tlen kuali, tikteititiskej melauak tikintlasojtlaj (Efes. 4:29, 31–5:2). Tikinpaleuiaj ijkuak mokokouaj uan ijkuak itlaj kinpanoua ken ijkuak tlaxixini. Pero ¿tlen tikchiuaskej tla se tokni itlaj techtoktia noso kijtoua itlaj tlen techyolkokoua?

13. ¿Tleka moneki titetlapojpoluiskej?

¹³ ¿Ualeua tikitaj oui titetlapojpoluiskej? (Lev. 19:18). Tla ijkon techpanoua, ma tikchiuakan tlen kijtoua nin texto: “Moneki xiyetokah nonkualtentlakah iwa xiteiknomatikah. Ximosepantlapojpolwikah ijkó kemi Dios otechtlapojpolwi por Cristo” (Efes. 4:32). Ijkuak tikintlapojpoluiaj tokniuan tikteititiaj tiktlasojkamatiliaj Jehová topatka okitemakak iKone. ¿Ken uelis okachi tiktlasojkamatiliskej?

14. ¿Tlen moneki tikchiuaskej?

¹⁴ Ma tiktlasojkamatilikan Jehová topatka okitemakak iKone. Ma tikitakan tlen okipanok se tokni tlen itoka Joanna, ye kipia 83 xiuitl uan chanti ompa India, ye okijto: “Ijkuak nimotlatlaujtia moneki niktlasojkamatilis Jehová topatka okitemakak iKone”. Ijkuak timotlatlaujtiaj ma timokuayejyekokan tlen amo kuali otikchijkej non tonal uan ma tikiluikan Jehová ma techtlapojpolui. Tla otikchijkej se ueyi tlajtlakoli, ma tikinmiluikan tlayekankej ma techpaleuikan. Yejuan techkakiskej uan techtlapouiskej ika Biblia. Touan motlatlaujtiskej uan kiluiskej Jehová ma techtlapojpolui porque Jesús omotemakak topatka. Ijkon uelis oksepa timouikaskej iuan Jehová (Sant. 5:14-16).

15. ¿Tleka moneki timomachtiskej uan timokuayejyekoskej nochi tlen okichi Jesús?

¹⁵ Ma timokuayejyekokan tlen okichi Jesús. Se tokni tlen itoka Rajamani uan kipia 73 xiuitl, okijto: “Nichoka ijkuak niktlajtoltia ken okitlajyouiltijkej Jesús”. Xamo tejuan noijki timoyolkokouaj ijkuak timokuayejyekouaj ken otlajyoui  iKone toTajtsin Dios. Tla timokuayejyekouaj nochi tlen okichi Jesús, okachi tiktlasojtlaskej uan noijki iTajtsin. Techpaleuis tla timomachtiskej nochi tlen Jesús okichi.

16. ¿Ken techpaleuis tikinmachtiskej oksekimej Jesús topatka omotemakak? (Xikita dibujo itech página 1).

¹⁶ Ma tikinmachtikan oksekimej Jesús topatka omotemakak. Okachi tikpatioitaj tlen Jesús okichi ijkuak tiktematiltiaj topatka omotemakak. Tikinpiaj miakej amatlajkuilolmej tlen ika uelis tikijtoskej tleka Jesús topatka oixpoliuik. Uelis tiktekitiltiskej tlamachtil 4 tlen kipia amatlajkuilol Kuali tlajtolmej techmaka toTajtsin Dios. Tlamachtil itoka “¿Akin Jesucristo?”. Noijki uelis tiktekitiltiskej tlamachtil 5 tlen kipia amochtli ¿Tlen techmachtia Biblia? Tlamachtil itoka “Jehová okitemakak iKone”. Sejse xiuitl okachi timotlasojkamatij ijkuak tikilnamikij imikilis Jesús uan miakej tikinyoleuaj touan ma monechikokan. Se tlateochiualistli Jehová techkauilia ma tikinmachtikan oksekimej tlen okichi iKone.

17. ¿Tleka se tetliokolil tlen okachi ipati Jesús topatka omotemakak?

¹⁷ Moneki nochipa timotlasojkamatiskej Jesús topatka omotemakak porque techpaleuia. Maski titlajtlakolejkej uelis timouikaskej iuan Jehová porque Jesús topatka omotemakak. Ayakmo yetos nochi tlen Satanás kichiua (1 Juan 3:8). Tlaltikpak yetos se xochitlali ijkon ken Jehová kineki uan nochtin kitlasojtlaskej uan kitekichiuiliskej. Ik non, mojmostla ma tiktlasojkamatikan Jesús topatka omotemakak. Ma tiktlasojkamatilikan Jehová topatka okitemakak iKone porque non se tetliokolil tlen okachi ipati.