Sekimej techtlajtlaniaj
¿Tleka ijkuak yiixpoliuiskia Jesús okijto tlen okijto David itech Salmo 22:1?
Mateo 27:46 kijtoua ijkuak Jesús yiixpoliuiskia okijto: “Nodios, Nodios, ¿tleka otechkakajteh noselti?”. Ijkon Jesús okichi tlen okijto David itech Salmo 22:1 (Mar. 15:34). Jesús amo ijkon okijto porque omoyolkokouaya nion porque ayakmo otlaneltokaya. Ye okimatoka omonekiaya ixpoliuis uan okinekiaya motemakas (Mat. 16:21; 20:28). Noijki okimatiaya Jehová amo kimaluiskia ijkuak yikimiktiskiaj akinmej okikokoliayaj (Job 1:10). Ijkon Jehová okikauili Jesús ma kiteititi nochipa kitlakamatiskia maski sapanoua tlajyouiskia ijkuak kimiktiskiaj (Mar. 14:35, 36).
Pero ¿tleka Jesús ijkon okijto? Amo uelis tikijtoskej tleka. San tikitaskej seki tlamantli tlen opanok uan xamo ik non ijkon okijto. *
Ijkuak Jesús ijkon okijto, xamo okinekiaya kiteititis Jehová amo kichiuaskia amo ma kimiktikan. Jesús iselti motemakaskia topatka, Jehová amo kipaleuiskia. Ye okatka se tlakatl uan omonekiaya ixpoliuis “porke omikki por tejwah” (Heb. 2:9).
Xamo Jesús okijto seki tlajtolmej tlen ijkuilitok itech Salmo 22 para akinmej ompa okatkaj ma kilnamikikan nochi tlen kijtoua non salmo. Ijkuakon, judíos okimatiayaj tlen okijtouayaj miak salmos. Ik non, tla ikaj okijtouaya se versículo, san niman okilnamikiayaj tlen okijtouaya nochi salmo kanin okatka non versículo. Tla ijkon okinekiaya kichiuas Jesús, ijkon okijto para imachtijkauan ma kilnamikikan miakej profecías tlen omoijtouaya itech non salmo. Ompa okijtouaya tlen panoskia ijkuak kimiktiskiaj (Sal. 22:7, 8, 15, 16, 18, 24). Noijki kanin tlami salmo kiyekijtoua itlanauatijkayo Jehová tlatlaniskia uan yetoskia itech nochi tlaltikpak (Sal. 22:27-31).
Ijkuak Jesús okijto tlen achto okijto David, xamo ijkon okichi para kiteititis ye amitlaj itlajtlakol. Ijkuak yikimiktiskiaj Jesús, okijtojkej ye okiuijuikalti toTajtsin Dios pero amo okixkomakakej ken omonekiaya. Jesús okixiko nochi tlen okichiuilijkej (Mat. 26:65, 66). Yiyouak okatka ijkuak okixkomakakej uan san niman okichijkej uan amo ken okijtouayaj tekiuajkej (Mat. 26:59; Mar. 14:56-59). Ijkuak Jesús ijkon okijto, xamo okinekiaya kiteititis amitlaj okichi para ijkon ma kitlajyouiltikan.
Xamo Jesús okinekiaya kinmilnamiktis maski David otlajyouijtoka, amo okijtosnekiaya ayakmo okipaleuijtoka Jehová. David ok okineltokaya Jehová kipaleuiskia. Ijkon tikijtouaj porque noijki okijto okimatoka Jehová uelis kinmakixtiskia itekipanojkauan uan ye nochipa okiteochi (Sal. 22:23, 24, 27). Noijki ijkon, maski Jesús “ikone n rey David”, otlajyouijtoka ipan kuauitl kanin okipilojkej, amo okijtosnekiaya Jehová ayakmo okiseliaya (Mat. 21:9).
Xamo noijki Jesús okinekiaya kijtos omoyolkokouaya porque Jehová ayakmo kipaleuiskia, ijkon uelis kiteititiskia kitlakamatiskia maski sapanoua tlajyouiskia. Adán uan Eva amo okitlakamatkej Jehová, ik non, omonekiaya Jesús ma tlajyoui uan ma ixpoliui. Pero Jehová amo okinekiaya ijkon ma pano. Jesús amo okichi itlaj tlen amo kuali pero omonekiaya tlajyouis uan ixpoliuis para ijkon uelis kiteititiskia amo melauak tlen Satanás kijtoua, topatka motemakaskia uan techmakixtiskia (Mar. 8:31; 1 Ped. 2:21-24). Jesús uelis ijkon kichiuaskia tla Jehová amo kipaleuiskia.
Xamo Jesús noijki ijkon okijto porque okinekiaya imachtijkauan ma kilnamiktokan tleka Jehová okitekauili ijkon ma kimiktikan. * Jesús okimatiaya miakej motlajtlachialtiskiaj porque Jesús kimiktiskiaj itech se kuauitl ken ikaj tlen okichi itlaj tlen amo kuali (1 Cor. 1:23, TNM). Tla imachtijkauan kajsikamatiskiaj tleka omonekiaya ixpoliuis, kajsikamatiskiaj ken kinpaleuiskia (Gál. 3:13, 14). Ijkon amo kitaskiaj ken ikaj tlen okichi itlaj tlen amo kuali, kajsikamatiskiaj ye otechmakixtiko.
Amo tikmatij tleka Jesús ijkon okijto pero ye okimatoka ijkuak ixpoliuiskia itech kuauitl, kichijtoskia tlen Jehová okinekiaya. Ijkuak ijkon okijto, noijki okijto: “¡Nochi yomochi!” (Juan 19:30; Luc. 22:37). Jehová se uelta amo okimalui para ijkon uelis kichiuaskia tlen omonekiaya kichiuas nikan tlaltikpak. Ijkon noijki omochi “nochi tlan ijkuilitok itech itlanawatil Moisés iwa itech intlajkuilolwah n profetas iwa itech salmos” (Luc. 24:44).
^ párr. 2 Itech nin revista xikita tlamachtil “¿Tlen techmachtia tlen saiktlami okijto Jesús?”, párrafos 9 uan 10.
^ párr. 4 Ijkuak Jesús okatka nikan tlaltikpak, okijto uan okichi seki tlamantli para kimatiskiaj tlen omokuayejyekouayaj imachtijkauan. Amo okijtouaya para kiteititis tlen ye omokuayejyekouaya (Mar. 7:24-27; Juan 6:1-5; xikita revista Akin Tetlapouijtok 15 de octubre 2010, páginas 4 uan 5).
