1. ¿Tlen tikneltokaj?

 AKINMEJ tiktekichiuiliaj Jehová tikmatij ye techtlasojtla uan kimati tlen okachi techpaleuis (Rom. 8:35-39). Tejuan tikneltokaj techpaleuia tla timoyekanaj ika principios bíblicos (Is. 48:17, 18). ¿Tlen tikchiuaskej tla tikixnamiskej se ouijkayotl tlen amo otikchiayaj?

2. ¿Tlen tlamantli techpanoua uan tlen uelis timotlajtlaniskej?

² Tinochtin titlajyouiaj. Xamo se tofamiliar kichiuas noso kijtos itlaj tlen techyolkokos. Xamo timokokouaj uan non amo techkauilia matiktekichiuilikan Jehová. Xamo titlajyouiskej ijkuak kanaj tlaxixini. Noijki xamo techtlajyouiltiskej porque titlaneltokaj. Ijkuak titlajyouiaj xamo timotlajtlaniaj: “¿Tleka ijkon nechpanoua? ¿Tlen amo kuali onikchi? ¿Kijtosneki Jehová amo nechteochiua?”. Amo ximoyolkoko tla se tonal ijkon yotimomachili. Yiuejkika miakej itekipanojkauan Jehová ijkon yokinpanok (Sal. 22:1, 2; Hab. 1:2, 3).

3. ¿Tlen techmachtia Salmo 34:19?

³ (Xiktlajtolti Salmo 34:19). Itech nin versículo kijtoua ome tlamantli miak ipati. Se tlamantli, akinmej yolkualmej tlajyouiaj uan okse tlamantli Jehová kinpaleuia. Jehová techpaleuia matikajsikamatikan tlen axkan panotok porque non techpaleuis ijkuak titlajyouiskej. Jehová kijtoua tiyolpakiskej tla tiktekichiuiliskej pero non amo kijtosneki amitlaj tikixnamikiskej (Is. 66:14).  Jehová kineki matikilnamiktokan tlen tikchiuaskej itech xochitlali porque ye kineki nochipa matiyoltokan (2 Cor. 4:16-18). Pero axkan ye ok techpaleuia (Lam. 3:22-24).

4. ¿Tlen tikitaskej?

⁴ Axkan timomachtiskej tlen okichijkej sekimej itekipanojkauan Jehová tlen okatkaj yiuejkika uan oksekimej tokniuan. Tikitaskej ualeua titlajyouiskej pero Jehová nochipa techpaleuis tla tikneltokaj (Sal. 55:22). Ijkuak timomachtijtiaskej tlen okichijkej itekipanojkauan Jehová, matimotlajtlanikan: “¿Tlen nikchiuaskia tla ijkon nechpanoskia? ¿Ken nechpaleuia okachi manitlaneltoka tlen okinpanok itekipanojkauan Jehová? ¿Ken nechpaleuia tlen yejuan okichijkej?”.

5. ¿Tlen okipanok Jacob? (Xikita dibujo tlen kajki página 1).

⁵ Itekipanojkauan Jehová tlen yiuejkika okatkaj noijki otlajyouijkej uan amo okimatiayaj kox ijkon kinpanoskia. Matikitakan tlen okipanok Jacob. Itajtsin okinauati mamonamikti iuan se ichpoch Labán porque noijki okiueyichiuaya Jehová. Noijki okilui Jehová kiteochiuaskia (Gén. 28:1-4). Jacob otetlakamatki uan okiski Canaán. Oyajki kanin ochantiaya Labán. Ye okinpiaya ome ichpochuan tlen omotokayotiayaj Lea uan Raquel. Jacob okitlasojtlak Raquel tlen okatka okachi tsikitsin. Jacob okipaleui chikome xiuitl Labán para monamiktiskia iuan Raquel (Gén. 29:18). Pero amo ijkon opanok porque Labán okikajkaya uan okinamikti iuan Lea tlen okatka okachi ueyi. Opanok se semana uan okilui uelis monamiktiskia iuan Raquel pero omonekiaya tekipanos ok chikome xiuitl (Gén. 29:25-27). Pero amo san non tlamantli okipanok Jacob. Noijki Labán amo kuali okitlaxtlauiaya Jacob uan kanaj veinte xiuitl ijkon okichi (Gén. 31:41, 42).

6. ¿Tlen okseki tlamantli okipanok Jacob?

⁶ Jacob satepan okachi otlajyoui. Okinpiaya miakej ikoneuan pero amo kuali omouikayaj. Se tonal ikniuan José okinemakakej ken se tlakeuali. Itelpochuan tlen omotokayotiayaj Simeón uan Leví okipinatijkej infamilia uan okisokiotijkej itoka Jehová. Isiua oixpoliuik ijkuak okipixki okse ikone. Noijki Jacob ochantito Egipto ijkuak okipiaya miak xiuitl porque otlaapistik (Gén. 34:30; 35:16-19; 37:28; 45:9-11, 28).

7. ¿Ken okiteititi Jehová okipaktiaya tlen okichiuaya Jacob?

⁷ Jacob nochipa okineltokak Jehová kiteochiuaskia maski otlajyoui. Jehová noijki okiteititi okipaktiaya tlen okichiuaya Jacob. Jehová okipaleui makipia miak tlamantli maski Labán amo kuali okitlaxtlauiaya. Noijki Jacob okitlasojkamatili toTajtsin Dios porque oksepa okitak José maski okimatiaya yoixpolika. Ye omouikaya iuan Jehová ikinon otlaxiko ijkuak otlajyoui (Gén. 30:43; 32:9, 10; 46:28-30). Tejuan noijki ualeua titlajyouiskej pero titlaxikoskej tla kuali timouikaj iuan Jehová.

8. ¿Tlen okinekiaya kichiuas tekiua David?

⁸ Tekiua David okinekiaya okachi kitekichiuilis Jehová pero amo ijkon  opanok. Ye ika nochi iyolo okinekiaya kichiuas kanin kiueyichiuaskiaj Jehová. Ijkuak okilui profeta Natán tlen okinekiaya kichiuas, ye okinankili: “Xikchiua tlen kineki moyolo porque mouan kajki akin melauak toTajtsin Dios” (1 Crón. 17:1, 2). David sapanoua oyolpakik ijkuak ijkon okiluijkej. Xamo san niman omokuayejyeko ken kichiuaskia teokali.

9. ¿Tlen okichi David ijkuak okiluijkej ayakmo kichiuaskia teokali?

⁹ Iprofeta Jehová san niman okilui ye amo kichiuaskia teokali. Non youak Jehová okilui Natán akin kichiuaskia teokali yetoskia se ikone David (1 Crón. 17:3, 4, 11, 12). ¿Tlen okichi David ijkuak ijkon okimatki? Okipatlak tlen okinekiaya kichiuas. Opejki kololoua tomin uan okseki tlamantli tlen kipaleuiskia ikone makichiua teokali (1 Crón. 29:1-5).

10. ¿Ken okiteochi Jehová tekiua David?

¹⁰ Jehová itlaj okilui David ijkuak okimatilti amo ye kichiuaskia teokali. Okilui se ixui nochipa tlanauatiskia (2 Sam. 7:16). David sapanoua yolpakis itech xochitlali ijkuak kimatis se ixui yetos tekiua mil xiuitl. Tlen okipanok David techmachtia Jehová techteochiuas maski amo tiktekichiuiliaj ijkon ken tiknekiskiaj.

11. ¿Ken okinteochi Jehová tokniuan tlen okatkaj achto siglo? (Hechos 6:7).

¹¹ Tokniuan tlen okatkaj achto siglo noijki otlajyouijkej. Yejuan okinekiayaj maajsiki iTekiuajkayo toTajtsin Dios pero amo okimatiayaj keman ijkon panoskia (Hech. 1:6, 7). ¿Tlen okichijkej? Yejuan nochipa otetlapouijkej. Okitakej Jehová okinteochijtoka porque okachi okitematiltiayaj kuali tlajtoli itech okseki altepemej (xiktlajtolti Hechos 6:7).

12. ¿Tlen okichijkej tokniuan tlen okatkaj itech achto siglo ijkuak sapanoua otlaapistik?

¹² Itech achto siglo sapanoua otlaapistik ipan nochi tlaltikpak (Hech. 11:28). Ikinon tokniuan noijki otlajyouijkej. Tetajmej okintekipachouaya kipiaskej tlen ika kinpanoltiskej infamilia. Telpochmej uan ichpochmej tlen okinekiayaj okachi kitekichiuiliskiaj toTajtsin Dios xamo omokuayejyekouayaj ayakmo ijkon kichiuaskiaj. Pero tokniuan nochipa omochijchikajkej tetlapouiskej uan ika nochi inyolo okinpaleuijkej tokniuan tlen ochantiayaj Judea (Hech. 11:29, 30).

13. ¿Ken okinteochi Jehová tokniuan ijkuak sapanoua otlaapistik?

¹³ ¿Ken okinteochi Jehová tokniuan ijkuak sapanoua otlaapistik? Tokniuan akinmej okinpaleuijkej okitakej Jehová okinmaluiaya (Mat. 6:31-33). Kuali omouikakej iuan tokniuan tlen okinpaleuijkej. Noijki tokniuan sapanoua oyolpakej porque okitemakakej tomin ika nochi inyolo uan okinpaleuijkej oksekimej tokniuan (Hech. 20:35). Jehová okinteochi porque omochijchikajkej kinpaleuiskej oksekimej tokniuan maski otlajyouijkej.

14. ¿Tlen okinpanok Bernabé uan Pablo uan tlen opanok satepan? (Hechos 14:21, 22).

¹⁴ Tokniuan tlen okatkaj achto siglo miak uelta okintlajyouiltijkej maski yejuan amo okichiayaj ijkon makinpano. Matikitakan tlen okinpanok Pablo uan Bernabé ijkuak otetlapouiayaj ompa Listra. Ijkuak opejki tetlapouiaj kuali okinselijkej uan okinkakej. Pero non tonal, akinmej okinkokoliayaj okichijkej  oksekimej makualanikan. Ikinon Pablo okimojmotlakej ika tetl uan omokuayejyekojkej okimiktijkej (Hech. 14:19). Pero Bernabé uan Pablo oyajkej okse altepetl uan ompa otetlapouijkej. ¿Tlen opanok satepan? Miakej “okineltokakeh n Cristo Jesús”. Noijki okinyolchikajkej oksekimej tokniuan ika tlen okijtouayaj uan ika tlen okichiuayaj (xiktlajtolti Hechos 14:21, 22). Bernabé uan Pablo otlaxikojkej ijkuak okintlajyouiltijkej uan non okinpaleui oksekimej. Jehová techteochiuas tla amo timosotlauaj uan timochijchikauaj tiktekichiuiliskej.

15. ¿Tlen mitsmachtia tlen okipanok tokni Alexander Macmillan?

¹⁵ Seki xiuitl achto ajsiskia 1914 tokniuan okichiayaj mapano seki tlamantli. Matikitakan tlen okipanok tokni Alexander Macmillan. Ye uan oksekimej tokniuan omokuayejyekouayaj san niman yaskiaj iluikak. Septiembre 1914 okitemakak se tlamachtil uan okijto: “Xamo nin saiktlami tlamachtil tlen niktemaka”. Pero amo ijkon opanok. Satepan okijkuilo: “Sekimej tejuan otikneltokayaj san niman tiaskiaj iluikak”. Noijki okijto: “Ok omonekiaya timochijchikauaskej tiktekichiuiliskej toTeko”. Tokni Alexander Macmillan ijkon okichi. Ye oyolpakiaya ijkuak otetlapouiaya uan okinyolchika tokniuan tlen otsaktokaj porque yejuan amo omokajkalakiayaj itech política. Noijki nochipa omonechikouaya maski yokipiaya miak xiuitl. Ye okitekichiuili toTajtsin Dios ijkuak ok omochiaya yas iluikak. ¿Ken okipaleui tlen okichi? Itech 1966 ijkuak yoixpoliuiskia, ye okijkuilo: “Nochipa nikpia chikauak notlaneltokilis”. Sapanoua techyolchikaua tlen okichi tokni. Pero okachi kinyolchikauas tokniuan tlen yikipiaj miak xiuitl tlaxikojtokej maski amo okichiayaj ijkon makinpano (Heb. 13:7).

16. ¿Tlen okipanok tokni Jennings uan isiua? (Santiago 4:14).

¹⁶ Miakej tokniuan mokokouaj maski amo ijkon okichiayaj makinpano. Matikitakan tlen okipanok tokni Herbert Jennings. Ijkuak okijto tlen okipanok itech inemilis, okijto ye uan isiua oyolpakiayaj kitekichiuiliskej Jehová ken misioneros ompa Ghana. b Pero satepan okajxilijkej se kokolistli itech itsonteko. Tokni Herbert Jennings okijto yetoskia ken itlaj tlen amo otikchiayaj. Ye okijto ijkon ken kijtoua Santiago 4:14 (xiktlajtolti). Ye okijkuilo: “Omonekiaya timoyektlaliskej para tikinmiluiskej tokniuan uan toyolikniuan tlen ochantiayaj ompa Ghana ayakmo ompa tiyetoskia uan timokopaskiaj Canadá para nimopajtiti”. Jehová okipaleui tokni Jennings uan isiua nochipa makitekichiuilijtokan maski otlajyouijtokaj.

17. ¿Ken yokinpaleui tokniuan tlen okipanok tokni Jennings?

¹⁷ Tlen okipanok tokni Jennings sapanoua okinyolchika oksekimej tokniuan. Se tokni okijkuilo: “Ijkuak oniktlajtolti tlen okipanok tokni Jennings, onechpaleui manikxiko tlen onechpanotoka. Onikitak tokni ayakmo ueli okitekichiuili Jehová porque omonekiaya yas mopajtiti”. Okse tokni okijkuilo:  “Onikatka nitlayekanki majtlaktli xiuitl pero satepan ayakmo onitlapaleui porque onikpixki se kokolistli itech notsonteko. Ikinon amo onechpaktiaya nikintlajtoltis tlen okinpanouaya tokniuan pero sapanoua onimoyolchika ijkuak onikitak otlaxiko tokni Jennings”. Tlen okipanok tokni techmachtia, uelis tikinyolchikauaskej oksekimej tokniuan tla titlaxikouaj ijkuak titlajyouiaj. Maski titlajyouiskej uelis tikteititiskej titlaneltokaj uan titlaxikouaj. Non uelis kinyolchikauas oksekimej tokniuan (1 Ped. 5:9).

18. ¿Tlen techmachtia tlen okipanok tokni tlen chanti Nigeria? (Xikinmita fotos kanin mota tlen okipanok tokni).

¹⁸ Kokolistli COVID-19 yokintlajyouilti miakej tokniuan. Matikitakan tlen okipanok se tokni tlen chanti Nigeria. Inamik oixpoliuik, ayakmo okipiaya miak tlakuali uan tomin. Se tonal san okipiaya se taza arroz uan itakotsin okitlajtlani tlen kikuaskiaj satepan. Tokni okilui ayakmo okipiayaj tomin nion tlen kikuaskej pero omonekiaya tlaneltokaskej ken siuatl tlen ochantiaya Sarepta tlen oixpoliuik inamik. Kikuaskiaj tlen okipiayaj uan kineltokaskiaj Jehová kinmakaskia tlen moneki (1 Rey. 17:8-16). Ayamo omokuayejyekouayaj tlen kikuaskej non tonal. ¡Ijkuakon tokniuan okinkauilitoj tlakuali tlen kikuaskiaj ome semanas! Okajsikamatki Jehová okikak tlen okilui itakotsin. Tlen okipanok tokni uan itakotsin techmachtia tla titlaneltokaj uan titlaxikouaj, techpaleuis okachi matimouikakan iuan Jehová (1 Ped. 5:6, 7).

19. ¿Tlen okipanok Alexéi Yershov?

¹⁹ Xamo miakej tokniuan amo omokuayejyekouayaj kintlajyouiltiskej. Matikitakan tlen okipanok se tokni tlen chanti Rusia uan itoka Alexéi Yershov.  Ye omoapolakti 1994 uan ijkuakon tokniuan okinkauiliayaj makitekichiuilikan Jehová. Pero satepan nochi non omopatlak. Itech 2020 sekimej policías okalakitoj ikalijtik tokni Alexéi Yershov okitlatemolijkej uan okikixtilijkej miak tlamantli. Satepan se tlakatl okikajkaya, okilui okinekiaya momachtis Biblia pero okikixtili seki videos uan okitelui, ikinon tekiuajkej okitsakej. ¡Sapanoua amo kuali tlen okichi non tlakatl!

20. ¿Tlen okichi tokni Alexéi Yershov para okachi mouikas iuan Jehová?

²⁰ ¿Ken okipaleui tokni Alexéi Yershov tlen okipanok? Axkan okachi kuali mouika iuan Jehová. Ye okijto: “Nosiua uan ne nochipa timotlatlaujtiaj. Nikmatok amo uelis nitlaxikoskia tla Jehová amo nechpaleuiskia”. Noijki okijto: “Ijkuak nimomachtia nechpaleuia amo san manimoyolkokojto. Nimokuayejyekoua tlen okinpanok sekimej itekipanojkauan Jehová tlen yiuejkika okatkaj. Biblia kijtoua miakej omoyolseuijkej uan okineltokakej Jehová”.

21. ¿Tlen otimomachtijkej?

²¹ ¿Tlen otimomachtijkej? Maski amo tikmatij tlen techpanos satepan, Jehová nochipa techpaleuis tla tikneltokaj. Ijkon ken kijtoua texto tlen ika peua nin tlamachtil: “Akin yolkuali sapanoua tlajyouia pero Jehová kimakixtia itech nochi non tlamantli” (Sal. 34:19). Ikinon matikneltokakan Jehová kipia chikaualistli uan techpaleuis matitlaxikokan uan amo san matimokuayejyekojtokan ken titlajyouiaj. Uelis tikijtoskej ken Apóstol Pablo: “Para nochi tlamantli nikpia chikaualistli porque onka akin nechmaka chikaualistli” (Filip. 4:13, TNM).