1. ¿Keman okichi Jesús achto milagro?

 MATIKILNAMIKIKAN tlen okichi Jesús itech xiuitl 29 ijkuak opejki tetlapouia. Ye uan inantsin uan sekimej imachtijkauan oyajkej kanin omonamiktijkej ompa Caná. Non altepetsintli okatka ik norte ompa Nazaret kanin Jesús omoskalti. María omouikaya inuan infamiliares akinmej omonamiktijkej uan xamo okinselijtoka akinmej ompa oyajkej. Pero otlanki vino b uan non xamo okichi mapinauakan akinmej omonamiktijkej uan infamilias. Noijki xamo miakej oajsitoj kanin omonamiktijkej. María san niman okitato itelpoch uan okilui: “Ayakmó kipiah vino” (Juan 2:1-3). ¿Tlen okichi Jesús? Ye okichi se milagro ijkuak atl okikopki vino (Juan 2:9, 10).

2, 3. (1) ¿Tlen okichi Jesús ika ichikaualis? (2) ¿Tleka moneki timomachtiskej milagros tlen okinchi Jesús?

² Jesús okinchi miakej milagros ijkuak otetlapoui. c Ye sapanoua miakej okinpaleui ika ichikaualis. Se tonal okintlamakak kanaj 5 mil tlakamej uan okse tonal okintlamakak kanaj 4 mil. Ijkuak okinchi nonmej ome milagros, xamo okintlamakak kanaj 27 mil. Noijki ompa opouiayaj miakej siuamej uan konemej (Mat. 14:15-21; 15: 32-38). Jesús okinpajti akinmej omokokouayaj ijkuak okinchi nonmej ome milagros (Mat. 14:14; 15:30, 31). Xamo okintlajtlachialti tlen Jesús okichi akinmej okintlamakak uan akinmej okinpajti.

³ Axkan timomachtiskej tlen milagros okinchi Jesús. Noijki tikitaskej tlen techmachtia uan ken techpaleuia okachi matitlaneltokakan. Noijki tikitaskej ken uelis tiyetoskej tiyolyamankej uan titeiknomatiskej ijkon ken Jesús okichi ijkuak okinchi milagros.

4. ¿Akinmej tikinmixmatiskej tla timomachtiaj milagros tlen okinchi Jesús?

⁴ Milagros tlen okinchi Jesús noijki techpaleuiaj matikixmatikan iTajtsin porque ye okimakak chikaualistli makinchiua milagros. Hechos 10:38 kijtoua: “Dios okimák weletílistli n Jesús de Nazaret ika n Espíritu Santo, okitechiwilijtinemia tlan kuali iwa okimpajtiaya nochteh akimeh otlaijyowijtinemia imak n diablo. Jesús okichi nochi noni porke Dios okipalewiaya”. Jesús mokuayejyekoua ken iTajtsin uan kichiua ken ye. Ijkon okiteititi ika tlen okichi uan tlen okijto ijkuak okinchi milagros (Juan 14:9). Matikitakan eyi tlamantli tlen techmachtia milagros tlen okinchi Jesús uan ken techpaleuia okachi matitlaneltokakan.

5. ¿Tlen okiyolini Jesús makinchiua milagros? (Mateo 20:30-34).

⁵ Jesús uan iTajtsin sapanoua techtlasojtlaj. Ijkuak Jesús okatka nikan tlaltikpak, okiteititi okintlasojtlaya akinmej okinpajti porque okinpaleui ayakmo matlajyouikan. Se tonal, ome tlakamej tlen amo otlachiayaj okitsajtsilijkej Jesús makinpaleui (xiktlajtolti Mateo 20:30-34). Biblia kijtoua ye “okinmiknoma” uan okichi oksepa matlachiakan. Nin tlajtoli ika griego “okinmiknoma” kijtosneki melauak okimachili tlen okinpanotoka nonmej tlakamej. Jesús oteiknomatiaya ikinon okiteititi sapanoua tetlasojtla. Non okiyolini miakej makintlamaka uan okipajti se tlakatl tlen opalaniaya inakayo (Mat. 15:32; Mar. 1:41). Jehová uan Jesús techiknomatij ikinon, sapanoua techtlasojtlaj uan moyolkokouaj ijkuak kitaj titlajyouiaj (Luc. 1:78; 1 Ped. 5:7). Yejuan kinekij kipojpoloskej nochi tlen techtlajyouiltia.

6. ¿Tlen okimakak Jehová iKone para matechpaleui?

⁶ ToTajtsin Dios okimakak chikaualistli Jesús makipojpolo nochi tlen techtlajyouiltia. Onka miak tlamantli tlen tejuan amo keman uelis tikyektlaliskej. Pero Jesús uelis ijkon kichiuas porque ijkon okiteititi ijkuak okinchi milagros. Jesús kipojpolos tlajtlakoli porque non kichiua matimokokokan uan matiixpoliuikan (Mat. 9:1-6; Rom. 5:12, 18, 19). Milagros tlen okinchi Jesús kiteititia kichiuas ayakmo matimokokokan uan kinyolitis akinmej yoixpolikej (Mat. 4:23; Juan 11:43, 44). Ye kichiuas ayakmo chikauak maejeka uan kintlanilis amo kuali ejekamej (Mar. 4:37-39; Luc. 8:2). Techyolseuia tikmatiskej Jehová okimakak chikaualistli Jesús.

7, 8. (1) ¿Tlen tikneltokaj panos satepan porque Jesús okinchi milagros? (2) ¿Tlen milagro okachi tikneki tikitas ijkuak tiyetos itech xochitlali?

⁷ Moneki tikneltokaskej melauak techteochiuas iTekiuajkayo toTajtsin Dios.  Milagros tlen okinchi Jesús kiteititia tlen kichiuas satepan ijkuak ualtlanauatis iTekiuajkayo toTajtsin Dios nikan tlaltikpak. Ximokuayejyeko ken tiyetoskej ijkuak Jesús ualtlanauatijtos nikan tlaltikpak. Amitlaj techtlajyouiltis porque ye kichiuas ayakmo matimokokokan uan kuali matiyetokan (Is. 33:24; 35:5, 6; Apoc. 21:3, 4). Ayakmo tlaxixinis uan nochipa tikpiaskej tlen tikkuaskej (Is. 25:6; Mar. 4:41). Noijki tiyolpakiskej ijkuak tikinseliskej tofamiliares akinmej yoixpolikej (Juan 5:28, 29). ¿Tlen milagro okachi tikneki tikitas ijkuak tiyetos itech xochitlali?

⁸ Ijkuak Jesús okinchi milagros, okiteititi okatka yolyamanki uan oteiknomatiaya. Tejuan noijki moneki tiyetoskej tiyolyamankej uan titeiknomatiskej. Matikitakan ome tlamantli tlen opanok ijkuak Jesús okinchi milagros. Achto matikitakan ijkuak omonamiktijkej ompa Caná.

9. ¿Tleka Jesús okichi se milagro kanin omonamiktijkej ompa Caná? (Juan 2:6-10).

⁹ (Xiktlajtolti Juan 2:6-10). ¿Omonekiaya itlaj kichiuas Jesús ijkuak otlanki vino kanin omonamiktijkej? Amo. Nion se profecía okijtouaya Mesías kichiuaskia vino ika se milagro. Pero ximokuayejyeko tla ijkon mitspanoskia  ijkuak timonamiktis. Xamo Jesús omokuayejyeko kinpinauiskiaj akinmej omonamiktijkej, ikinon okinpaleui porque okinmiknomatki. Kanaj 390 litros atl okikopki kuali vino. ¿Tleka sapanoua miak atl okikopki vino? Xamo tlen mokauaskia, okse tonal koniskiaj noso kinemakaskiaj akinmej omonamiktijkej. Xamo yejuan okitlasojkamatilijkej Jesús.

10. Xikyekijto seki tlamantli tlen kijtoua Juan capítulo 2 (noijki xikita dibujo).

¹⁰ Matikitakan seki tlamantli miak ipati tlen kijtoua Juan capítulo 2. ¿Otikitak akin okintemiti atekonmej? Amo okintemiti Jesús. Ye amo okinekiaya nochtin makitakan tlen okichi, ikinon okilui se tlakeuali makintemiti (versículos 6 uan 7). ¿Akin okilui makiyeko vino ijkuak okichi milagro? Amo okiyeko Jesús. Otlanauati makiuikilikan se tepitsin tlakatl tlen okiyekanaya iluitl (versículo 8). Noijki Jesús amo nochtin okinmititi vino uan okinmilui: “¡Xikyekokan nin uelik vino tlen yikin onikchi!”.

11. ¿Tlen techmachtia milagro tlen okichi Jesús?

¹¹ ¿Tlen techmachtia milagro tlen okichi Jesús? Techmachtia moneki tiyetoskej tiyolyamankej. Jesús amo omoueyineki ijkuak atl okikopki vino uan amo keman okijtojtinemiaya tlen okichiuaya. Ye okatka yolyamanki, okitlasojkamatiliaya iTajtsin uan okijtouaya ye okipaleuiaya (Juan 5:19, 30; 8:28). Tla tikchiuaskej ken Jesús, tiyetoskej tiyolyamankej uan amo san tikijtojtinemiskej tlen tikchiuaj. Matikilnamiktokan Jehová techkauilia matiktekichiuilikan, ikinon amo matimoueyinekikan ijkuak okachi techmakaj tekitl (Jer. 9:23, 24). San Jehová matikueyichiuakan porque amitlaj tikchiuaskej tla ye amo techpaleuiskia (1 Cor. 1:26-31).

12. Xikyekijto ken uelis tiyetoskej tiyolyamankej ken Jesús.

¹² Matikitakan tlen okachi uelis tikchiuaskej para tiyetoskej tiyolyamankej ijkon ken Jesús. Matikijtokan se tlayekanki kipaleuia se siervo ministerial ijkuak yikin tlamachtis. Ijkon telpochtli kuali tlamachtia uan nochtin tokniuan okinpakti. Satepan se tokni kiluia tlayekanki kuali otlamachti non telpochtli. Timokuayejyekoua tlayekanki kijtos: “Kema, porque ne onikpaleui” noso yetos yolyamanki uan kijtos: “Niyolpaki porque kuali otlamachti”. Akin yolyamanki amo kineki nochtin makimatikan ken kinpaleuia oksekimej. Ye ijkon kichiua porque kimati Jehová kita tlen kichiua uan kipatioita (noijki xikita Mateo 6:2-4; Heb. 13:16). Jehová melauak yolpaki ijkuak tiknekij tiyetoskej tiyolyamankej ijkon ken Jesús (1 Ped. 5:6).

13. ¿Tlen okitak Jesús ijkuak oajsito Naín uan tlen okichi? (Lucas 7:11-15).

¹³ (Xiktlajtolti Lucas 7:11-15). Jesús oyajki Naín ijkuak otetlapouiaya. Non altepetsintli opouiaya Galilea uan amo uejka okatka ik Sunem. Itech non altepetl yokipiaya kanaj 900 xiuitl Eliseo okiyoliti ikone se siuatl (2 Rey. 4:32-37). Ijkuak Jesús oajsito itech non altepetl, okitak ikaj oixpoliuik. Teyolkoko tlen opanotoka porque oixpoliuik ikone se siuatl. Non siuatl okipiaya san se ikone. Miakej iuan oyayaj non siuatl. Pero Jesús okinketsalti akinmej ompa oyayaj uan okiyoliti ichokotsin non siuatl tlen  sapanoua omoyolkokouaya. Evangelios kijtouaj non achto milagro tlen okichi Jesús ijkuak okiyoliti chokotsin.

14. Xikijto seki tlamantli miak ipati tlen kijtoua Lucas capítulo 7 (noijki xikita dibujo).

¹⁴ Matikitakan seki tlamantli miak ipati tlen kijtoua Lucas capítulo 7. ¿Yotikitak ken opanotia nochi? Jesús achto “okitak n iknosiwatl” uan satepan “okiknoma” (versículo 13). Xamo okitak siuatl sapanoua ochokaya ijkuak oyaya iyekapan ichokotsin. Jesús sapanoua okiyolkoko ijkuak okitak. Pero Jesús amo san okiknomatki. Ye okiteititi okinekiaya kipaleuis. Xamo Jesús yolik okilui: “Ayakmo xichoka”. Pero amo san non okilui. Ye okiyoliti ichokotsin uan okimaktili (versículos 14 uan 15).

15. ¿Tlen techmachtia milagro tlen okichi Jesús?

¹⁵ ¿Tlen techmachtia milagro tlen okichi Jesús? Techmachtia moneki tikinmiknomatiskej akinmej moyolkokouaj porque oixpoliuik akin okitlasojtlayaj. Tejuan amo uelis tikinyolitiskej akinmej yoixpolikej ijkon ken okichi Jesús. Moneki achto matikitakan ken momachilia uan satepan matikijtokan noso matikchiuakan itlaj tlen kiyolseuis uan kiyolchikauas (Prov. 17:17; 2 Cor. 1:3, 4; 1 Ped. 3:8). d Xamo amo tikmatiskej tlen tikinmiluiskej pero uelis tikinpaleuiskej tla itlaj inpatka tikchiuaj.

16. ¿Tlen techmachtia tlen okipanok se tokni? (Xikita foto kanin mota tlen opanok).

¹⁶ Matikitakan tlen okipanok se tokni kanin omonechikouaya. Se tokni okitak ochokaya se tokni ijkuak otlakuikatokaj ken kinyolitiskej akinmej yoixpolikej. Ye ochokatoka porque oixpoliuik itakotsin. Tokni tlen okitak, san niman omotoki uan okinapalo (okinauajtek) uan san sekan otlakuikakej porque okimatiaya tlen okipanotoka. Non tokni oyolpakik  ijkuak okitak tokniuan okitlasojtlayaj. Sapanoua oyolpakik omonechiko non tonal. Ye okijto: “Onikmatiaya tokniuan nechpaleuiskiaj”. Matikilnamiktokan Jehová kita nochi tlen tikchiuaj ijkuak tikinmiknomatij akinmej moyolkokouaj porque oixpoliuik akin okitlasojtlayaj (Sal. 34:18).

17. ¿Tlen otimomachtijkej?

¹⁷ Techpaleuis okachi matitlaneltokakan tla timomachtiaj milagros tlen okinchi Jesús. Jehová uan Jesús sapanoua techtlasojtlaj ijkon kiteititiaj tlen kijtouaj Evangelios. Ikinon moneki tikneltokaskej Jesús kipojpolos nochi tlen techtlajyouiltia uan ayakmo miak poliui techteochiuas iTekiuajkayo toTajtsin Dios. Noijki techpaleuis matimokuayejyekokan ken uelis tikchiuaskej ijkon ken Jesús okichi. Uelis timomachtis moselti noso iuan mofamilia okseki milagros tlen okinchi Jesús. Xikita tlen mitsmachtiaj milagros uan xikinmilui oksekimej ken mitspaleuia. Non mitspaleuis ximotlapoui iuan oksekimej (Rom. 1:11, 12).

18. ¿Tlen timomachtiskej itech okse tlamachtil?

¹⁸ Ijkuak yitlamiskia tetlapouis Jesús, Biblia kijtoua okiyoliti se tlakatl. Okiyoliti iyolikni pero okichi okseki tlamantli. ¿Tlen techmachtia non milagro? ¿Tlen techpaleuis okachi matikneltokakan kinyolitiskej akinmej yoixpolikej? Non timomachtiskej itech okse tlamachtil.