1, 2. ¿Tlen ok moneki tikchiuaskej maski Jehová ayamo kikopa se xochitlali tlaltikpak?

 SAPANOUA tiktlasojkamatiliaj Jehová porque yokijto kipojpolos nochi tlen amo kuali uan kichiuas kuali matiyetokan (2 Ped. 3:13). Maski amo tikmatij keman ijkon kichiuas Jehová, nochi tlen tikitaj kiteititia ayakmo miak poliui ijkon panos (Mat. 24:32-34, 36; Hech. 1:7).

² Tinochtin moneki tikneltokaskej tlen Jehová kichiuas maski yitikpiaj miak xiuitl tiktekichiuiliaj noso amo. ¿Tleka ijkon tikijtouaj? Porque uelis timosotlauaskej maski sapanoua titlaneltokaj. Apóstol Pablo okijto tla amo titlaneltokaj yetoskia ken “tlajtlákoli non techijilpia” (Heb. 12:1). Para amo ijkon matechpano moneki tikojpauiskej tlen kiteititia Jehová melauak kichiuas tlen yokijto (Heb. 11:1).

3. ¿Tlen tikitaskej?

³ Axkan tikitaskej eyi tlamantli tlen techpaleuis matikneltokakan Jehová kichiuas tlen yokijto. Se, matimokuayejyekokan tlen topatka okichi Jesús. Ome, matimokuayejyekokan Jehová sapanoua chikauak uan eyi okachi matiktekichiuilikan Jehová. Satepan tikitaskej ken techyolchikaua tlen Jehová okilui Habacuc. Pero achto matimomachtikan tleka moneki okachi matikneltokakan Jehová kikopas se xochitlali tlaltikpak.

 ¿TLEKA MONEKI OKACHI TITLANELTOKASKEJ?

4. ¿Ken tikteititiaj melauak titlaneltokaj ijkuak itlaj tikpejpenaj?

⁴ Mojmostla moneki tikpejpenaskej tlen tikchiuaskej uan makiteititi melauak titlaneltokaj. Tikinpejpenaj akinmej inuan timouikaskej, ken timoyolpaktiskej, kox timomachtiskej noso amo, ken timouikaskej iuan tonamik, ken tikinmiskaltiskej tokoneuan uan ken titekipanoskej. Moneki timotlajtlaniskej: “¿Tlen nikteititia ijkuak itlaj nikpejpena? ¿Nikteititia nikneltoka Jehová kipojpolos nochi tlen amo kuali? ¿Noso nimokuayejyekoua ijkon ken akinmej amo kineltokaj nochipa tiyoltoskej?” (Mat. 6:19, 20; Luc. 12:16-21). Kuali tikpejpenaskej tlen tikchiuaskej tla tikneltokaj Jehová melauak kichiuas tlen yokijto.

5, 6. Xikyekijto tleka moneki tikteititiskej titlaneltokaj ijkuak titlajyouiaj.

⁵ Moneki tikteititiskej titlaneltokaj ijkuak techpanos tlen amo kuali. Ijkuak timokokouaj, ijkuak techtlajyouiltiaj noso ijkuak panos itlaj tlen kichiuas matimosotlauakan. Xamo titlaxikouaj ijkuak peua titlajyouiaj. Pero ijkuak uejkaua tlen techpanoua, moneki okachi titlaneltokaskej uan ijkon tiyolpakiskej ijkuak tiktekichiuiliskej Jehová (Rom. 12:12; 1 Ped. 1:6, 7).

⁶ Ijkuak titlajyouiskej xamo timokuayejyekoskej Jehová amo keman kikopas se xochitlali tlaltikpak. ¿Kijtosneki ayakmo okachi titlaneltokaj tla ijkon timokuayejyekouaj? Amo. Matikijtokan sapanoua seua. Xamo timokuayejyekouaj ayakmo keman tonas pero nochipa oksepa tona. Xamo ijkon techpanos ijkuak sapanoua timoyolkokouaj. Uelis timokuayejyekoskej Jehová amo kichiuas tlen yokijto. Pero tla titlaneltokaj, tikneltokaskej Jehová melauak kichiuas tlen yokijto (Sal. 94:3, 14, 15; Heb. 6:17-19). Non techpaleuis matikpatioitakan tikueyichiuaskej Jehová.

7. ¿Tleka moneki timomaluiskej?

⁷ Noijki moneki tikteititiskej titlaneltokaj ijkuak titetlapouiaj. Miakej amo kineltokaj mochiuas tlen kijtoua toTajtsin Dios (Mat. 24:14; Ezeq. 33:32). Pero moneki timomaluiskej amo timokuayejyekoskej ijkon ken yejuan. Ikinon moneki timochijchikauaskej okachi titlaneltokaskej. Matikitakan eyi tlamantli tlen uelis techpaleuis.

MATIMOKUAYEJYEKOKAN TLEKA TOPATKA OMOTEMAKAK JESÚS

8, 9. ¿Ken techpaleuia matimokuayejyekokan tlen topatka okichi Jesús?

⁸ Uelis okachi titlaneltokaskej tla timokuayejyekouaj tlen topatka okichi Jesús. Non kiteititia toTajtsin Dios melauak kichiuas tlen yokijto. Moneki timajxiliskej timokuayejyekoskej tleka Jehová topatka okitemakak iKone. Ijkon okachi tikneltokaskej Jehová uelis kichiuas kuali matiyetokan uan ayakmo matiixpoliuikan. ¿Tleka ijkon tikijtouaj?

⁹ Matimokuayejyekokan tlen okichi Jehová. Ye kuali omouikaya iuan iKone pero okiualtitlanki nikan tlaltikpak manesiki ken se tlakatl tlen amo kipia tlajtlakoli. Jehová sapanoua omoyolkoko ijkuak otlajyoui Jesús uan hasta okimiktijkej. Jehová sapanoua miak otechtlaxtla. Tla amo techtlasojtlaskia, amo kitemakaskia iKone san para kuali matiyetokan uan satepan  matiixpoliuikan (Juan 3:16; 1 Ped. 1:18, 19). Tlen okichi Jehová sapanoua ipati, ikinon kichiuas nochipa matiyoltokan itech xochitlali.

MATIMOKUAYEJYEKOKAN JEHOVÁ KIPIA CHIKAUALISTLI

10. Ijkon ken kijtoua Efesios 3:20, ¿tlen uelis kichiuas Jehová?

¹⁰ Noijki techpaleuis okachi matitlaneltokakan tla timokuayejyekouaj Jehová kipia chikaualistli. Non kiteititia uelis kichiuas nochi tlen yokijto. Miakej amo kineltokaj nochipa tiyoltoskej itech se xochitlali. Jehová kipia sapanoua miak chikaualistli, ikinon nochipa techiluia kichiuas tlen tejuan amo uelis tikchiuaskej (Job 42:2; Mar. 10:27). Tikneltokaj Jehová kichiuas nochi tlen yokijto (xiktlajtolti Efesios 3:20).

11. Xikijto tlen tetlajtlachialti okichi Jehová yiuejkika. (Xikita recuadro “ Jehová okichi tlen yiuejkika okijto”).

¹¹ Matikilnamikikan tlen okinmilui itekipanojkauan Jehová tlen okatkaj yiuejkika. Xamo sekimej amo melauak kineltokaskiaj ijkon panoskia tlen okijtouaya Jehová. Abrahán uan Sara yokipiayaj miak xiuitl pero Jehová okinmilui kipiaskiaj se inkone (Gén. 17:15-17). Noijki Jehová okilui Abrahán ixuiuan chantiskiaj Canaán. Pero ixuiuan Abrahán tlen okatkaj israelitas, okatkaj miak xiuitl ken tlakeualmej ompa Egipto. Yejuan xamo omokuayejyekojkej tlen okijto Jehová amo melauak panoskia pero satepan ijkon opanok. Opanok miak xiuitl Jehová okilui Elisabet kipiaskia se ikone maski yokipiaya miak xiuitl. Noijki okilui se ichpochtli tlen omotokayotiaya María kipiaskia se ikone maski ayamo omonamiktiaya. Ijkon mochiuaskia se profecía tlen Jehová yokijtojka itech xochitlali Edén (Gén. 3:15).

12. ¿Tlen techmachtia Josué 23:14 uan Isaías 55:10, 11?

¹² Tikitaj Jehová kipia sapanoua chikaualistli ijkuak timokuayejyekouaj tlen okijto melauak opanok. Ijkon tikneltokaj ye kikopas se xochitlali tlaltikpak (xiktlajtolti Josué 23:14; Isaías 55:10, 11). Ijkon tikinpaleuiskej oksekimej makineltokakan melauak mochiuas tlen Jehová yokijto uan amo san se cuento. Jehová okijto kichiuas “se yankuik ilwikak iwa se yankuik tlaltíkpaktli” uan “milák iwa kuali se kinneltokas” (Apoc. 21:1, 5).

OKACHI MATIKTEKICHIUILIKAN JEHOVÁ

13. ¿Ken techpaleuia ijkuak timonechikouaj?

¹³ Uelis okachi titlaneltokaskej tla timochijchikauaj tiktekichiuiliskej Jehová. Matimokuayejyekokan ken techpaleuia ijkuak timonechikouaj inuan tokniuan. Se tokni itoka Anna b mochijchikaua okachi kitekichiuilis Jehová. Ye okijto: “Ijkuak nimonechikoua yetoskia ken se tepostli tlen ika kiketsaltiaj se barco uan non nechpaleuia okachi manitlaneltoka. Ijkon nikchiua maski tokni akin tlamachtijtok amo okachi kuali tlamachtia noso amo kijtoua se tlamantli tetlajtlachialti. Nochipa nimomachtia se tlamantli tlen nechpaleuia okachi manikajsikamati Biblia uan okachi nitlaneltoka”. Noijki tokniuan techyolchikauaj ijkuak tlanankiliaj kanin timonechikouaj (Rom. 1:11, 12; 10:17).

14. ¿Ken techpaleuia ijkuak titetlapouiaj?

 ¹⁴ Noijki okachi titlaneltokaj ijkuak timochijchikauaj titetlapouiskej (Heb. 10:23). Se tokni tlen itoka Barbara uan yikipia kanaj 70 xiuitl kitekichiuilijtok Jehová, okijto: “Okachi nitlaneltoka ijkuak nitetlapouia. Nechpaktia nikintlapouis oksekimej tlen kichiuas Jehová”.

15. ¿Ken techpaleuia ijkuak timomachtiaj Biblia? (Noijki xikinmita fotos).

¹⁵ Noijki techpaleuia okachi matitlaneltokakan ijkuak timomachtiaj Biblia. Se tokni tlen itoka Susan okijto kipaleuia ijkuak kipia se hora para momachtis. Ye okijto: “Nochi domingos nimomachtia revista Akin Tetlapouijtok tlen timomachtiskej okse semana. Lunes uan martes nimoyektlalia tlen timomachtiskej tlajko semana. Uan okseki tonalmej nimomachtia Biblia”. Susan okachi tlaneltoka porque nochipa momachtia ijkon ken yokijto. Tokni Irene yitlapaleuia miak xiuitl ompa Betel tlen kajki Warwick. Ye okachi tlaneltoka ijkuak momachtia profecías. Ye okijto: “Nechtlajtlachialtia nikitas ken mochiuaj profecías ijkon ken yokijto Jehová”. c

MELAUAK MOCHIUAS TLEN YOKIJTO JEHOVÁ

16. ¿Tleka tikijtouaj tlen Jehová okilui Habacuc noijki techyolchikaua? (Hebreos 10:36, 37).

¹⁶ Sekimej itekipanojkauan Jehová yikipiaj miak xiuitl kichixtokej matlami nochi tlen amo kuali. Oksekimej kijtouaj youejka amo tlami tlen amo kuali. Jehová techajsikamati ikinon okilui profeta Habacuc: “Porque ok poliui maajsi tonal tlen omoijto para mochiuas tlen onimitsnextili, uan nin san niman mochiuas uan amo tekajkayauas. Maski uejkauas,  ¡xitlachixto! Porque melauak mochiuas. ¡Amo uejkauas!” (Hab. 2:3). Tlen Jehová okilui Habacuc noijki axkan techyolchikaua. Jehová okiyolini apóstol Pablo makinmijkuilo nonmej tlajtolmej tlen kinpaleuia nochtin tokniuan tlen kichixtokej yetoskej itech xochitlali (xiktlajtolti Hebreos 10:36, 37). Matikneltokakan Jehová melauak kichiuas tlen yokijto maski ualeua timokuayejyekouaj uejkaua ijkon kichiuas.

17. ¿Ken okipaleui se tokni tlen Jehová okilui Habacuc?

¹⁷ Miakej tokniuan yimiak xiuitl mochijchikauaj tlachixtokej ijkon ken Jehová kijtoua. Matikitakan tlen okipanok se tokni tlen itoka Louise. Ye opejki kitekichiuilia Jehová itech 1939. Ye okijto: “Amo onikneltokaya nikajxitiskia 18 xiuitl porque onikneltokaya Armagedón yiualaskia. Pero amo ijkon opanok. Onechpaleui manitlaxiko ijkuak oniktlajtoltiaya tlen okinpanok akinmej okiteititijkej kimatij mochiaskej. Noé, Abrahán, José uan oksekimej itekipanojkauan Jehová okiteititijkej kimatij mochiaskej para kiseliskej tlen ye okinmilui. Nikmati nechpaleuia nitlachixtos uan noijki kinpaleuia oksekimej tokniuan matikneltokakan Jehová melauak kichiuas matiyetokan itech xochitlali”. Noijki ijkon mokuayejyekouaj tokniuan tlen yikipiaj miak xiuitl kitekichiuiliaj Jehová.

18. ¿Ken techpaleuia tlen okichijchi Jehová matikneltokakan melauak kichiuas tlen ye yokijto?

¹⁸ Maski ayamo tikitaj xochitlali, tikinmitaj miakej nikan chantij, tikinmitaj sitlalimej, kuajyo uan yolkamej. Tikneltokaj melauak onka non tlamantli maski amo nochipa okatka. Axkan ueli tikitaj porque Jehová okinchijchi (Gén. 1:1, 26, 27). Jehová kikopas se xochitlali tlaltikpak uan ayakmo tiixpoliuiskej nion timokokoskej. Ijkon ken tikitaj nochi tlen axkan onka, satepan noijki tikitaskej Jehová kichiuas tlen yokijto (Is. 65:17; Apoc. 21:3, 4).

19. ¿Tlen uelis tikchiuaskej para okachi titlaneltokaskej?

¹⁹ Axkan uelis okachi timouikaskej iuan Jehová maski ayamo tikatej itech xochitlali. Matiktlasojkamatikan tlen topatka okichi Jesús, matikilnamikikan Jehová kipia chikaualistli uan okachi matiktekichiuilikan. Ikinon matikchiuakan “kemi kichiwah akimeh kineltokah Dios” porque ijkon tikseliskej ‘tlan Dios yotechsentlalili’ (Heb. 6:11, 12; Rom. 5:5).