TLAMACHTIL 16
“Mokni moyolitis”
“Jesús okili [Marta]: ‘Mokni moyolitis’” (JUAN 11:23).
TLAKUIKALI 151 Jehová kinyolitis
XIKILNAMIKTO a
1. ¿Tlen okineltokaya Matthew?
SE TELPOCHTLI tlen itoka Matthew sapanoua mokokoua uan miak uelta okichiuilijkej operación. Ijkuak okipiaya chikome xiuitl, miak uelta itlaj okipanok. Se tonal, ye uan ifamilia okitokaj JW Broadcasting®. Ijkuak yitlamiskia, okikakej se tlatsotsonali tlen kipia video kanin omotayaj tokniuan okinseliayaj infamiliares tlen yoixpolikej. b Satepan omotoki innauak itatajuan, okinmakitski uan okinmilui: “¿Onankitakej tla niixpoliuis uelis oksepa niyoltos? Uelis nannechchiaskej uan nochi kuali kisas”. ¿Timokuayejyekoua ken omomachilijkej itatajuan ijkuak okitakej inkone otlaneltokaya? Matthew okineltokaya oksepa kiyolitiskiaj tla ixpoliuiskia.
2, 3. ¿Tleka moneki matimokuayejyekokan kinyolitiskej akinmej yoixpolikej?
2 Matimokuayejyekokan melauak kinyolitiskej akinmej yoixpolikej (Juan 5:28, 29). Porque amo tikmatij tlen panos satepan uan xamo sapanoua timokokoskej noso ixpoliuis ikaj akin tiktlasojtlaj (Ecl. 9:11; Sant. 4:13, 14). Techpaleuis matitlaxikokan tla tikneltokaj melauak kinyolitiskej akinmej yoixpolikej (1 Tes. 4:13). Biblia techiluia Jehová kuali techixmati uan sapanoua techtlasojtla (Luc. 12:7). Moneki kuali techixmatis Jehová para techyolitis ken otikatkaj uan tikilnamikiskej tlen otikchijkej. Jehová sapanoua techtlasojtla porque kineki nochipa matiyoltokan. Ye uelis oksepa techyolitis maski tiixpoliuiskej.
3 Axkan tikitaskej tleka moneki tikneltokaskej melauak kinyolitiskej akinmej yoixpolikej. Noijki techpaleuis okachi matitlaneltokakan ijkuak timomachtiskej texto kanin kisa nin tlamachtil: “Mokni moyolitis” (Juan 11:23). Saiktlami tikitaskej tlen techpaleuis okachi matikneltokakan kinyolitiskej akinmej yoixpolikej.
¿TLEKA UELIS TIKNELTOKASKEJ KINYOLITISKEJ AKINMEJ YOIXPOLIKEJ?
4. Xikyekijto tleka tikneltokiliaj ijkuak ikaj kineki techpaleuis.
4 Ijkuak ikaj techiluia kineki techpaleuis moneki tikneltokiliskej kineki ijkon kichiuas. Matikijtokan tokalijtik oijtlakauik porque sapanoua oejekakiauik. Se toyolikni techiluia techpaleuis kiyektlalis tokal. Tikmatij ye yolkuali uan kineki techpaleuis. Ye kimati kalchiuas uan kipia tlen ika tekipanos, ikinon tikneltokiliaj techpaleuis. ¿Tejuan tikneltokaj melauak kinyolitiskej akinmej yoixpolikej? ¿ToTajtsin Dios kineki kinyolitis akinmej yoixpolikej uan uelis ijkon kichiuas?
5, 6. ¿Tleka tikneltokaj Jehová kineki kinyolitis akinmej yoixpolikej?
5 ¿Jehová kineki kinyolitis akinmej yoixpolikej? Kema ijkon kichiuas. Ye okinnauati sekimej tlakamej makijkuilokan kinyolitiskej akinmej yoixpolikej (Is. 26:19; Os. 13:14; Apoc. 20:11-13). Jehová kichiua ijkuak kijtoua itlaj kichiuas (Jos. 23:14). Jehová yikineki kinyolitis akinmej yoixpolikej. ¿Tleka ijkon tikijtouaj?
6 Matimokuayejyekokan tlen okijto Job. Ye okineltokaya Jehová kiyolitiskia tla ixpoliuiskia (Job 14:14, 15, nota). Jehová kinyolitis akinmej yiuejkika okitekichiuilijkej porque kineki kuali mayetokan uan mayolpakikan. ¿Tlen kinpanos akinmej yoixpolikej uan amo okixmatkej Jehová? ToTajtsin Dios tetlasojtla uan noijki kineki kinyolitis (Hech. 24:15). Ye kineki iuan mamouikakan uan kineki nochipa mayoltokan nikan tlaltikpak (Juan 3:16). Jehová melauak kineki kinyolitis akinmej yoixpolikej.
7, 8. ¿Ken tikmatij Jehová Dios kipia chikaualistli uan uelis kinyolitis akinmej yoixpolikej?
7 ¿Jehová kipia chikaualistli uan uelis kinyolitis akinmej yoixpolikej? Kema porque ye “nochi weleti kichiwa” (Apoc. 1:8). Ye uelis kintlanilis nochtin akinmej kikokoliaj uan noijki kitlanilis mikilistli (1 Cor. 15:26). Non sapanoua techyolchikaua uan techyolseuia. Matikitakan tlen okipanok Emma Arnold. Ye uan ifamilia sapanoua otlajyouijkej ijkuak opanotoka Segunda Guerra Mundial. Nazis okinmiktijkej ifamiliares uan tokni okiyolseui itakotsin ijkuak okilui: “Tla akinmej yoixpolikej ayakmo uelis kinyolitiskej, kijtosneki mikilistli okachi chikauak uan amo chikauak toTajtsin Dios”. Pero non amo melauak. San Jehová okachi kipia chikaualistli. Ye otechmakak yolilistli uan uelis kinyolitis akinmej yoixpolikej.
8 Jehová amitlaj kilkaua ikinon uelis tikneltokaskej kinyolitis akinmej yoixpolikej. Biblia kijtoua sitlalimej kinnotsa ika intoka (Is. 40:26). Jehová kinmilnamiktok nochtin akinmej yoixpolikej (Job 14:13; Luc. 20:37, 38). Jehová kilnamiki ken okatkaj akinmej yoixpolikej, tlen okichiuayaj uan tlen okinpaktiaya.
9. ¿Tleka tikneltoka melauak kinyolitiskej akinmej yoixpolikej?
9 Axkan yotikitakej uelis tikneltokaskej Jehová kinyolitis akinmej yoixpolikej porque ye kineki uan kipia chikaualistli ijkon kichiuas. Noijki tikneltokaj ijkon kichiuas porque ye yiuejkika okinyoliti sekimej. Okinpaleui sekimej tlakamej uan noijki Jesucristo makinyolitikan akinmej yoixpolikaj. Matimomachtikan Juan capítulo 11 uan ompa kijtoua Jesús okiyoliti se tlakatl.
OIXPOLIUIK SE IYOLIKNI JESÚS
10. ¿Tlen opanok ijkuak Jesús otetlapouijtoka Betania uan tlen okichi? (Juan 11:1-3).
10 (Xiktlajtolti Juan 11:1-3). Jesús kuali omouikaya iuan Lázaro, María uan Marta. Yejuan ochantiayaj Betania (Luc. 10:38-42). Itlamian xiuitl 32 Lázaro omokoko uan ikniuan sapanoua omotekipachojkej. Otlanauatijkej makiluitij Jesús pero ye uejka okatka “ik nepa lado de n río Jordán”. Kanaj ome tonal uejkauaskiaj ompa ajsitiuij (Juan 10:40). Pero Lázaro oixpoliuik ijkuak Jesús okimatki tlen opanotoka. Jesús ok omoka ome tonal ompa maski okimatiaya iyolikni yoixpoliuik uan amo san niman oyajki Betania. Ikinon Lázaro yokipiaya naui tonal yoixpoliuik ijkuak ompa oajsito. Tlen okichi Jesús okinpaleui iyolikniuan uan okiueyichi toTajtsin Dios (Juan 11:4, 6, 11, 17).
11. ¿Tlen techmachtia tlen okichi Jesús?
11 ¿Tlen techmachtia tlen okichi Jesús? Ijkuak Marta uan María otlanauatijkej makiluitij Jesús tlen opanotoka, amo okiluijkej mauia Betania. San otlanauatijkej makiluitij Lázaro sapanoua omokokouaya (Juan 11:3). Jesús uelis kiyolitiskia Lázaro desde kanin okatka. Pero ye oyajki Betania okinyolchikauato María uan Marta porque inuan omouikaya. ¿Timouika iuan akin kipaktia mitspaleuis maski amo tiktlajtlanilia mamitspaleui? Tla ijkon kichiua akin iuan timouika, xikilnamikto nochipa mouan yetos ijkuak okachi timoyolkokos (Prov. 17:17). Uelis timouikaskej iuan oksekimej tla tikchiuaj ijkon ken Jesús. Oksepa matikitakan tlen okichi Jesús uan tikitaskej tlen opanok.
12. ¿Tlen okiluijkej Marta uan tleka okineltokili Jesús kichiuaskia? (Juan 11:23-26).
12 (Xiktlajtolti Juan 11:23-26). Ijkuak Marta okimatki Jesús yoajsiaya Betania, san niman okitato. Okilui: “Noteko, tla nika tiyetoskia, nokni amo mikiskia” (Juan 11:21). Jesús uelis kipajtiskia Lázaro pero ye okichi itlaj tlen okachi tetlajtlachialti. Jesús okilui Marta: “Mokni moyolitis”. Noijki okipaleui okachi matlaneltoka ijkuak okilui: “Ne niktemaka nemílistli iwa yolílistli”. ToTajtsin Dios yokimakak chikaualistli Jesús makinyoliti akinmej yoixpolikej. Ijkuakon yokiyolitijka se takotsin tlen yikin oixpolika. Noijki okiyoliti se telpochtli tlen ayamo okipiaya se tonal oixpoliuik (Luc. 7:11-15; 8:49-55). Pero ¿ueliskia kiyolitis Lázaro tlen yokipiaya naui tonal oixpoliuik uan yopalantoka?
“¡LÁZARO, XIWALKISA!”
Jesús ochokak ijkuak okinmitak ochokayaj iyolikniuan. (Xikinmita párrafos 13 uan 14).
13. Ijkon ken kijtoua Juan 11:32-35, ¿tlen okichi Jesús ijkuak okitak María uan oksekimej ochokatokaj? (Noijki xikita dibujo).
13 (Xiktlajtolti Juan 11:32-35). Matimokuayejyekokan María omotoki inauak Jesús uan okilui ijkon ken okijto Marta: “Noteko, tla nika tiyetoskia, nokni amo mikiskia”. María uan oksekimej tlen ompa okatkaj sapanoua omoyolkokouayaj. Jesús sapanoua omoyolkoko ijkuak okinmitak ochokayaj. Ye noijki ochokak porque okinmiknomatki. Kajsikamati timoyolkokouaj ijkuak ixpoliui akin tiktlasojtlaj uan kineki kachiuas tlen techtlajyouiltia.
14. ¿Tlen techmachtia Jehová ijkuak Jesús okitak María ochokak?
14 Tlen okichi Jesús ijkuak okinmitak oksekimej ochokayaj, techititia Jehová techiknomati. ¿Tleka ijkon tikijtouaj? Ijkon ken otikitakej okse tlamachtil, Jesús mokuayejyekoua ijkon ken iTajtsin (Juan 12:45). Ikinon ijkuak tiktlajtoltiaj Jesús ochokak ijkuak iyolikniuan omoyolkokouayaj, tikmatij Jehová noijki moyolkokoua ijkuak kita tichokaj (Sal. 56:8). Non kichiua okachi matimouikakan iuan toTajtsin Dios.
Jesús yokiteititi uelis kinyolitis akinmej yoixpolikej. (Xikinmita párrafos 15 uan 16).
15. Ijkon ken kijtoua Juan 11:41-44, ¿tlen opanok ijkuak Lázaro yotoktoka? (Noijki xikita dibujo).
15 (Xiktlajtolti Juan 11:41-44). Jesús otlanauati makijkuanikan tetl kanin otoktoka Lázaro. Pero Marta okilui xamo yotsojyayak. Jesús okilui: “Yonimitsili, tla titlaneltokas tikitas iweyijkachiwalis Dios” (Juan 11:39, 40). Satepan Jesús oajkotlachixki uan okitlatlaujti toTajtsin Dios inmixpan tlen ompa okatkaj. Porque ye okinekiaya kiueyichiuas san toTajtsin Dios. Satepan chikauak okijto: “¡Lázaro, xiwalkisa!”. Lázaro okiski kanin otoktoka uan Jesús okichi tlen miakej amo okineltokayaj ueliskia kichiuas (xikita nota de estudio Juan 11:17).
16. ¿Ken techpaleuia Juan capítulo 11 matikneltokakan kinyolitiskej akinmej yoixpolikej?
16 Tlen kijtoua Juan capítulo 11 techpaleuia matikneltokakan kinyolitiskej akinmej yoixpolikej. Matikilnamikikan tlen Jesús okilui Marta: “Mokni moyolitis” (Juan 11:23). Jehová kineki kinyolitis akinmej yoixpolikej uan Jesús noijki kineki ijkon kichiuas. Ijkuak Jesús ochokak okiteititi kineki kipojpolos mikilistli uan nochi tlen techtlajyouiltia. Okiteititi uelis kinyolitis akinmej yoixpolikej ijkuak okiyoliti Lázaro. Noijki matimokuayejyekokan tlen Jesús okilui Marta: “Yonimitsili, tla titlaneltokas tikitas iweyijkachiwalis Dios” (Juan 11:40). Tejuan tikmatij miak tlamantli para tikneltokaskej toTajtsin Dios kinyolitis akinmej yoixpolikej. ¿Tlen techpaleuis okachi matikneltokakan tlen kichiuas toTajtsin Dios?
¿TLEN TECHPALEUIS OKACHI MATIKNELTOKAKAN KINYOLITISKEJ AKINMEJ YOIXPOLIKEJ?
17. ¿Tlen moneki tikchiuaskej ijkuak tiktlajtoltiaj akinmej yokinyolitijkej?
17 Matiktlajtoltikan akinmej yokinyolitijkej uan matimokuayejyekokan. Biblia kijtoua okinyolitijkej chikueyi nikan tlaltikpak. c ¿Uelis timomachtiskej tlen okinpanok? Ijkuak timomachtiskej matikilnamiktokan yejuan okatkaj ijkon ken tejuan. Okatkaj tlakamej, siuamej uan konemej. Matikitakan tlen techmachtia uan matimokuayejyekokan tlen okinpanok kiteititia toTajtsin Dios kineki kinyolitis akinmej yoixpolikej uan uelis ijkon kichiuas. Noijki okachi matimokuayejyekokan ijkuak okiyolitijkej Jesús. Sapanoua miakej okitakej ijkuak okiyolitijkej. Non techpaleuia matikneltokakan kinyolitiskej akinmej yoixpolikej (1 Cor. 15:3-6, 20-22).
18. ¿Ken uelis tikinnejnekiskej tlakuikalmej tlen kijtouaj kinyolitiskej akinmej yoixpolikej? (Noijki xikita nota).
18 Matikinkakikan tlakuikalmej tlen kijtouaj kinyolitiskej akinmej yoixpolikej (Efes. 5:19). d Ninmej tlakuikalmej techpaleuiaj okachi matikneltokakan tlen tikchiaj, ikinon moneki matikinkakikan. Ninmej tlakuikalmej uelis tikinkuikaskej ijkuak tikueyichiuaj Jehová iuan tofamilia uan noijki matikijtokan tlen techmachtia tlen kijtouaj. Matimomachtikan tlakuikalmej uan matikilnamiktokan tlen kijtouaj. Iespíritu santo Jehová techpaleuis matikinmilnamikikan tlakuikalmej ijkuak itlaj techpanos noso ijkuak ixpoliuis akin tiktlasojtlaj. Non techyolchikauas uan techpaleuis matikpiakan chikauak totlaneltokilis.
19. ¿Ken uelis timokuayejyekoskej ijkuak kinyolitiskej akinmej yoixpolikej? (Xikita recuadro “ ¿Tlen tikintlajtlaniskia?”).
19 Matimokuayejyekokan. Jehová techkauilia matimokuayejyekokan yitikatej itech xochitlali. Se tokni okijto: “Sapanoua nimokuayejyekoua yinika itech xochitlali hasta yinikijnekui xochitl tlen ompa tikpiaskej”. Matimokuayejyekokan tikinmixmatiskej akinmej yiuejkika okitekichiuilijkej toTajtsin Dios. ¿Akin tikneki okachi tikixmatis? ¿Tlen tikneki tikintlajtlanis? Matimokuayejyekokan ken yetos ijkuak tikinseliskej akinmej tikintlasojtlaj. Ximokuayejyeko tlen achto tikinmiluis, ijkuak tikinnapalos (tikinnauajtekis) uan sapanoua tiyolpakis ijkuak tikinmitas.
20. ¿Tlen ok moneki tikchiuaskej?
20 Sapanoua tiktlasojkamatiliaj Jehová porque techiluia kinyolitis akinmej yoixpolikej. Tikneltokaj ye kineki ijkon kichiuas uan ijkon panos. Yetoskia ken sejse techiluia: “Nikinyolitis akinmej tikintlasojtla”. Okachi matikneltokakan Jehová kinyolitis akinmej yoixpolikej. Ijkon okachi iuan timouikaskej uan ye otechilui kichiuas tlen tikchiaj.
TLAKUIKALI 147 Jehová yokijto ayakmo timikiskej
a Tla oixpoliuik akin otiktlasojtlaya sapanoua mitsyolchikauas tikmatis satepan kinyolitiskej. Pero ¿ken tikinmiluis oksekimej tikneltoka kinyolitiskej akinmej yoixpolikej? ¿Tlen tikchiuas para okachi tikneltokas melauak ijkon panos? Tlen timomachtiskej techpaleuis okachi matikneltokakan kinyolitiskej akinmej yoixpolikej.
b Itech Broadcasting® noviembre 2016 okiski video kanin kisa tlatsotsonali Ayakmo miak poliui.
c Xikita revista Akin Tetlapouijtok 1 de septiembre 2015 itech recuadro “Biblia techtlapouia itech chikueyi tlaltikpaktlakamej tlen okinyolitijkej”.
d Xikita amochtli “Ma tiktlakuikilikan Jehová ika nochi toyolo”. Xikita tlakuikali 139 “Amo ma tikilkauakan xochitlali”, tlakuikali 144 “Xikilnamikto tlen mitsmakas Jehová” uan tlakuikali 151 “Jehová kinyolitis”. Noijki itech jw.org xikinkaki tlakuikalmej tlen intoka “Ayakmo miak poliui”, “Melauak tiyolpakiskej” uan noijki “Ya verás”.
