1. ¿Tleka titlanankiliaj ijkuak timonechikouaj?

 ¿TLEKA timonechikouaj? Ijkon tikchiuaj porque tiknekij tikueyichiuaskej Jehová (Sal. 26:12; 111:1). Axkan okachi panotok tlen amo kuali, ikinon timoyolchikauaj inuan tokniuan ijkuak timonechikouaj (1 Tes. 5:11). Ijkuak titlanankiliaj kanin timonechikouaj, tikueyichiuaj Jehová uan timoyolchikauaj inuan tokniuan.

2. ¿Keman uelis titlanankiliskej?

² Nochi semanas uelis titlanankiliskej. Itlamian semana uelis titlanankiliskej ijkuak timomachtiaj revista Akin Tetlapouijtok. Noijki uelis titlanankiliskej tlajko semana ijkuak kipanoltiaj “Matiktemokan ken techpaleuia Biblia”, ijkuak kipanoltiaj Tlamachtil ika Biblia itech tlanechikol uan ijkuak techiluiaj matitlanankilikan.

3. (1) ¿Tlen ome tlamantli uelis kichiuas amo matitlanankilikan? (2) ¿Ken techpaleuia tlen kijtoua Hebreos 10:24, 25?

³ Nochtin tiknekij tikueyichiuaskej Jehová uan tikinyolchikauaskej tokniuan ijkuak titlanankiliaj. Pero onka seki tlamantli tlen uelis kichiuas amo ijkon matikchiuakan. Xamo sapanoua timomojtiaj uan  amo titlanankiliaj. Noijki xamo tikajkouij miak uelta toma pero tokni akin tlamachtijtok amo techiluia matitlanankilikan. Carta tlen Pablo okinmijkuilili tokniuan hebreos kijtoua itlaj tlen uelis techpaleuis. Pablo okijto tleka miak ipati matimonechikokan. Ye okijto: “Matimosepanyolchikawakah” (xiktlajtolti Hebreos 10:24, 25). Matikilnamiktokan uelis tikinyolchikauaskej tokniuan maski amo miak tlamantli tikijtoskej ijkuak titlanankiliskej. Ijkon amo okachi timomojtiskej ijkuak titlanankiliskej. Pero maski amo titlanankiliaj ijkon ken tiknekiskiaj, tiyolpakij ijkuak oksekimej tlanankiliaj (1 Ped. 3:8).

4. ¿Tlen eyi tlamantli tikitaskej?

⁴ Achto tikitaskej ken uelis timoyolchikauaskej inuan tokniuan maski amo timiakej timonechikouaj. Satepan tikitaskej ken uelis ijkon tikchiuaskej ijkuak timonechikouaj inuan miakej tokniuan porque yejuan noijki kinekij tlanankiliskej. Saiktlami tikitaskej ken uelis titlanankiliskej para melauak tikinyolchikauaskej tokniuan.

5. ¿Tlen uelis tikchiuaskej tla amo timiakej timonechikouaj?

⁵ Ualeua amo miakej tlanankiliaj ijkuak amo timiakej timonechikouaj. Ijkuak se tokni tlamachtia, ualeua non tokni moneki mochias hasta ijkuak se tokni matlanankili. Ijkon okachi oui tlamis timomachtiskej uan amo timoyolchikauaskej. ¿Tlen uelis tikchiuaskej? Uelis timoyektlaliskej uan ijkon miak uelta titlanankiliskej. Tla ijkon tikchiuaskej, tikinpaleuiskej oksekimej noijki ijkon makichiuakan.

6, 7. ¿Tlen uelis tikchiuas para amo timomojtis ijkuak titlanankilis?

⁶ Miakej tokniuan momojtiaj ijkuak mokuayejyekouaj tlanankiliskej. ¿Tlen uelis tikchiuas tla ijkon mitspanoua? Xiktemo tlen mitspaleuis amo okachi ximomojti ijkuak titlanankilis uan ijkon tikinyolchikauas tokniuan.

⁷ Uelis mitspaleuis seki tlamachtilmej tlen yokiskej itech nin revista Akin Tetlapouijtok. b Ompa kijtoua moneki kuali timoyektlalis para titlanankilis (Prov. 21:5). Ijkon tikmatis tlen tikijtos uan amo timomojtis. Noijki mitspaleuis tla amo miak tlamantli tikijtos (Prov. 15:23; 17:27). Ijkon tokniuan kajsikamatiskej tlen tikijtoua pero amo kilnamiktoskej tlen tikijtos tla miak titlapoua. Tokniuan kitaskej tikajsikamati tlen otimomachti tla titlanankilis tlen timokuayejyekoua.

8. ¿Tlen kimachilia Jehová ijkuak kita timochijchikauaj titlanankiliskej?

⁸ ¿Tlen uelis tikchiuas tla yotimomachti pero san kanaj ome uelta titlanankilia? Xikilnamikto Jehová kipatioita ijkuak timochijchikaua titlanankilis (Luc. 21:1-4). Pero Jehová kineki san xikchiua tlen tiueli (Filip. 4:5). Ximokuayejyeko tlen uelis tikchiuas, ximochijchikaua uan xikilui Jehová mamitsyolseui. Uelis  timochijchikauas peuas titlanankilis pero amo miak tlamantli xikijto.

9. ¿Tlen uelis panos kanin miakej monechikouaj?

⁹ Xamo kanin timonechikoua katej miakej tokniuan uan oui titlanankilis. Matikitakan tlen okipanok se tokni tlen itoka Danielle. Ye sapanoua kipaktia tlanankilis ijkuak monechikoua. c Ye kipatioita tlanankilis porque ijkon kiueyichiua Jehová, kinyolchikaua tokniuan uan noijki kipaleuia makilnamikto tlen momachtia. Pero okitak okachi oui tlanankilis ijkuak otlapaleuito kanin okatkaj miakej tokniuan. Ualeua amo otlanankiliaya. Ye okijto: “Onimosotlauaya, onikmachiliaya ayakmo onikueyichiuaya Jehová ken moneki. Ijkuak se tokni amo nechiluia manitlanankili nimokuayejyekoua amo kipaktia manitlanankili”.

10. ¿Tlen uelis tikchiuas para okachi titlanankilis?

¹⁰ ¿Yomitspanok ijkon ken Danielle okipanok? Xamo timokuayejyekoua ayakmo titlanankilis uan san titlakaktos. Pero amo ximosotlaua. ¿Tlen uelis tikchiuas? Amo ximoyektlali para san se uelta titlanankilis. Ximomachti nochi párrafos uan ijkon okachi uelis titlanankilis. Ijkuak timomachtis revista Akin Tetlapouijtok, xikita ken mouikaj párrafos iuan itoka tlamachtil. Ijkon nochipa tikmatis tlen titlanankilis. Noijki uelis timoyektlalis para tikyekijtos seki tlamachtilmej tlen okachi oui tlen katej itech seki párrafos (1 Cor. 2:10). Xamo itech nonmej párrafos tokniuan kitaj oui tlanankiliskej. Pero ¿tlen uelis tikchiuas tla ok tikita oui titlanankilis? Ijkuak ayamo peua nechikol, uelis tikiluis tokni tlen tlamachtis tlen párrafo tikneki titlanankilis.

11. ¿Tlen uelis tikchiuaskej ijkon ken kijtoua Filipenses 2:4?

¹¹ (Xiktlajtolti Filipenses 2:4). ToTajtsin  Dios okiyekanki apóstol Pablo makinmilui tokniuan itech achto siglo ken kinpaleuiskej oksekimej. ¿Ken uelis ijkon tikchiuaskej ijkuak timonechikouaj? Matikilnamikikan oksekimej noijki kinekij tlanankiliskej.

12. ¿Tlen uelis tikchiuaskej tla tiknekij tikinyolchikauaskej tokniuan? (Noijki xikita foto).

¹² Matikijtokan ijkuak timotlapouia iuan moyolikniuan amo san te titlajtoua porque tikneki nochtin kuali mamomachilikan. Ijkon moneki tikchiuaskej ijkuak timonechikouaj. Tiknekij nochtin tokniuan matlanankilikan. Ijkon timoyolchikauaj ijkuak tikinmitaj tokniuan kijtouaj tlen kineltokaj (1 Cor. 10:24). Matikitakan tlen uelis tikchiuaskej para oksekimej tokniuan matlanankilikan.

13. ¿Tlen uelis tikchiuaskej para matlanankilikan tokniuan?

¹³ Tokniuan noijki uelis tlanankiliskej tla amo miak tlamantli tikijtouaj ijkuak titlanankiliaj. Uelis ijkon kichiuaskej tlayekankej uan tokniuan tlen yikipiaj miak xiuitl kitekichiuiliaj toTajtsin Dios. Noijki amo matikijtokan nochi tlen kijtoua párrafo porque tokniuan ayakmo kimatiskej tlen kijtoskej tla ijkon tikchiuaskej. Nin párrafo kijtoua amo moneki tikijtoskej miak tlamantli nion tikijtoskej nochi tlen kijtoua párrafo. Tla mitsiluiskej xitlanankili itech nin párrafo, uelis tikijtos san se tlamantli.

14. ¿Tleka moneki kuali timokuayejyekoskej ijkuak titlanankiliskej? (Noijki xikinmita fotos).

¹⁴ Kuali ximokuayejyeko keski uelta titlanankilis. Xamo tokni akin tlamachtijtos mitsiluis xitlanankili porque kita nochipa tikajkokui moma. Pero xamo oksekimej mokuayejyekoskej ayakmo moneki tlanankiliskej (Ecl. 3:7).

15. (1) ¿Tlen uelis tikchiuaskej tla amo titlanankiliaj? (2) ¿Tlen moneki kilnamiktos tokni akin tlamachtia? (Xikita recuadro “ ¿Tlen uelis tikchiuas tla moneki tlanankiliskej tokniuan?”).

 ¹⁵ Xamo okachi oui titlanankiliskej tla katej miakej tokniuan tlen kinekij tlanankiliskej. Xamo tlamis nechikol uan amo techiluiskej matitlanankilikan. Pero amo matimoyolkokokan nion amo matikualanikan (Ecl. 7:9).

16. ¿Ken uelis tikinyolchikauaskej tokniuan ijkuak tlanankiliaj?

¹⁶ Maski amo miak titlanankilis, uelis tikinkakis ken tlanankiliaj tokniuan uan uelis tikinyolchikauas ijkuak tlamis nechikol. Ijkon tikinyolchikauas tokniuan ken yetoskia te otitlanankili (Prov. 10:21). Sapanoua tikinyolchikauaj tokniuan Ijkuak tikinmiluiaj kuali otlanankilijkej.

17. (1) ¿Tlen uelis kichiuaskej tetajmej? (2) Ijkon ken mota itech video, ¿tlen naui tlamantli moneki tikchiuaskej ijkuak timoyektlaliskej? (Noijki xikita nota).

¹⁷ ¿Tlen ok moneki tikchiuaskej para timoyolchikauaskej inuan tokniuan? Tla tikinpia mokoneuan, uelis tikinpaleuis kuali mamoyektlalikan uan ijkon uelis tlanankiliskej (Mat. 21:16). Ualeua timomachtiaj seki tlamantli tlen oui kajsikamatiskej konemej. Timomachtiaj  kixnamikij ouijkayotl akinmej yomonamiktijkej uan okseki tlamantli. Ijkuak ijkon timomachtiskej, konemej uelis tlanankiliskej se noso ome párrafos. Noijki uelis nankinyekiluiskej namokoneuan amo nochipa kinmiluiskej matlanankilikan ijkuak kajkokuij inma. Ijkon amo moyolkokoskej ijkuak amo kinmiluiskej matlanankilikan (1 Tim. 6:18). d

18. ¿Tlen moneki tikchiuaskej ijkuak titlanankiliskej? (Proverbios 27:2).

¹⁸ Nochtin uelis timoyektlaliskej para ijkuak titlanankiliskej makiueyichiua Jehová uan makinyolchikaua tokniuan (Prov. 25:11). Xamo ualeua tikijtoskej tlen otechpanok pero amo san non matikijtojtokan (xiktlajtolti Proverbios 27:2; 2 Cor. 10:18). Okachi matitlajtokan itech Jehová, iTlajtol uan ialtepe (Apoc. 4:11). Pero uelis tikijtoskej tlen otechpanok tla se párrafo techiluia matikijtokan tlen otechpanok. Itech okse párrafo tikitaskej ken uelis tikchiuaskej.

19. (1) ¿Tlen panos tla tikinmajsikamatij tokniuan? (Romanos 1:11, 12). (2) ¿Tleka mitspaktia titlanankilis?

¹⁹ Amo tikpiaj se tlanauatil kanin kijtoua ken titlanankilis. Pero tinochtin moneki timochijchikauaskej titlanankiliskej uan ijkon tikinyolchikauaskej oksekimej. Sekimej tokniuan mokuayejyekouaj moneki okachi tlanankiliskej. Pero sekimej moyolchikauaj ijkuak san kanaj keski uelta tlanankiliaj uan yolpakij ijkuak oksekimej tlanankiliaj. Tinochtin tiyolpakiskej uan timoyolchikauaskej tla tikinmajsikamatij oksekimej (xiktlajtolti Romanos 1:11, 12).