1. ¿Tlen tikchiuaj akinmej tiktekichiuiliaj Jehová uan tlen yotikijtojkej?

 AXKAN miakej san sekan kiueyichiuaj Jehová uan kichijtokej miak tlamantli kuali. Yejuan pouij itech ialtepe Jehová, kuali katej uan kuali mouikaj. Yejuan yokijtojkej nochipa kiueyichiuaskej Jehová. Noijki kinekij oksekimej kuali mayetokan, mamouikakan iuan Jehová uan noijki inuan oksekimej.

2. ¿Tleka tetlajtlachialti san sekan tikueyichiuaj Jehová?

² Jehová yokitlali matikueyichiuakan uan kuali tikatej maski axkan miakej tekokoliaj, kichiuaj tlen amo kuali uan okseki tlamantli tlen uelis techpanos (1 Juan 5:19; Apoc. 12:12). Ye kuali kimati techtlajyouiltia nochi tlen kiyekana Satanás. Pero Jehová techtlasojtla miak ikinon techmaluia uan kineki matiyolpakikan porque tiktekichiuiliaj. Biblia kijtoua ijkuak tikueyichiuaj Jehová iuan ialtepe yetoskia ken ompa timopaleuiaj uan yetoskia “ken se xochitlali tlen kuali katekiaj” (Is. 4:6; 58:11). Tiyolpakij tikueyichiuaj Jehová uan kuali timomachiliaj maski tikatej itlamian tonalmej (Is. 54:14; 2 Tim. 3:1).

3. ¿Keman achto omochi tlen Isaías okijkuilo?

³ Capítulo 65 tlen Isaías okijkuilo kijtoua ken tikueyichiuaskiaj Jehová. Tlen okijto Isaías achto omochi itech xiuitl 537 achto itech xiuitl se. Ijkuakon israelitas okatkaj  Babilonia pero omoyolkopkej uan oksepa omokopkej Jerusalén. Jerusalén oxixinki pero Jehová okinpaleui makiyektlalikan uan oksepa ompa opejki kiueyichiuaj (Is. 51:11; Zac. 8:3).

4. ¿Ken mochijtok tlen ijkuilitok itech Isaías capítulo 65?

⁴ Noijki tlen okijkuilo Isaías opejki mochiua 1919. Ijkuakon tokniuan okiskej itech Ueyi Babilonia. Ijkuakon opejki momiaktiliaj akinmej kiueyichiuaj Jehová. Tokniuan oyolpakiayaj ijkuak otetlapouiayaj ikinon omochijkej miakej tlanechikolmej. Miakej oteuitekiayaj uan oauilnemiayaj pero opejki momachtiaj tlen kijtoua Biblia uan ijkon ‘okiyankuilijkej innemilis ken kineki toTajtsin Dios’ (Efes. 4:24). Okseki tlamantli tlen okijkuilo Isaías mochiuas ijkuak yetos tlaltikpak se xochitlali. Pero axkan toTajtsin Dios techteochijtok miak. Matikitakan ken techpaleuia tikueyichiuaskej Jehová uan tleka moneki nochipa ijkon matikchiuakan.

¿KEN TIMOMACHILIAJ PORQUE TIKUEYICHIUAJ JEHOVÁ?

5. ¿Tlen tikpiaj akinmej tikueyichiuaj Jehová iuan ialtepe ijkon ken kijtoua Isaías 65:13?

⁵ Kuali tikatej uan kuali timomachiliaj. Isaías okijkuilo ken katej akinmej kiueyichiuaj Jehová pero noijki okijto ken katej akinmej amo kiueyichiuaj (xiktlajtolti Isaías 65:13). Jehová techmaka miak tlamantli tlen techpaleuia iuan matimouikakan. Techmaka iespíritu santo, techmaka iTlajtol uan amatlajkuilolmej tlen techpaleuiaj okachi matitlaneltokakan. Non yetoskia ken tipakij ijkuak titlakuaj uan ijkuak tiatlij (noijki xikita Apocalipsis 22:17). Pero nochi nin tlamantli amo kipiaj akinmej amo kiueyichiuaj toTajtsin Dios porque yejuan katej ken akinmej “apismikij” “amikij” uan “mopinatiaj”. Yejuan amo kipiaj tlen kinpaleuis makixmatikan toTajtsin Dios (Amós 8:11).

6. ¿Tlen tlamantli ijkuilitok itech Joel 2:​21-24, tlen kijtosneki uan ken techpaleuia?

⁶ Joel okijkuilo Jehová kinmakaskia tlen okachi okinpolouaya akinmej pouij itech ialtepe. Kinmakaskia semilla, vino uan aceite de oliva (Joel 2:​21-24). Joel okinekiaya kijtos Jehová techmakaskia tlen ika timopanoltiskej uan nochi tlen techpaleuiskia okachi matitlaneltokakan. ¿Ken kiteititia toTajtsin Dios ijkon kichijtok? Techmaka iTlajtol, techinmaka amatlajkuilolmej, tikpiaj se página tlen kajki itech internet, techmachtia ijkuak timonechikouaj uan noijki ijkuak tikinpiaj uejueyij nechikolmej.

7. ¿Tleka tiyolpakij? (Isaías 65:14).

⁷ Tipakij uan kuali timomachiliaj. Tokniuan kitlasojkamatiliaj toTajtsin Dios ika nochi inyolo ikinon sapanoua yolpakij (xiktlajtolti Isaías 65:14). ¿Tleka sapanoua yolpakij? Porque kinyolchikaua tlen tlamachtia Biblia uan nochi tlen kijtoua toTajtsin Dios kichiuas. Tikchiaj itlaj miak ipati porque Jesús topatka omotemakak. Tipakij ijkuak timotlapouiaj inuan tokniuan nochi tlen tlamachtia Biblia uan tlen tikchiaj (Sal. 34:8; 133:​1-3).

8. ¿Tlen ome tlamantli tikchiuaj ijkuak tikueyichiuaj Jehová?

⁸ Ijkuak tikueyichiuaj Jehová, san sekan tikatej uan timotlasojtlaj. Tejuan timotlasojtlaj ikinon ‘techpaleuia tinochtin kuali matimouikakan’. Non techpaleuia  matimokuayejyekokan ken tiyetoskej ijkuak tichantiskej itech xochitlali (Col. 3:14). Se tokni okijto tlen okipanok ijkuak okinmixmatki iTlaixpantijkauan Jehová. Ye okijto: “Ne amo oniyolpakiaya nion iuan nofamilia. Pero onikitak motlasojtlaj iTlaixpantijkauan Jehová”. Nin techititia akin kineki yolpakis uan kineki kuali momachilis moneki kiueyichiuas Jehová iuan ialtepe. Jehová uan tokniuan kuali techitaj maski oksekimej amo kuali techitaskej (Is. 65:15).

9. ¿Tlen kichiuas toTajtsin Dios uan ijkon ayakmo titlajyouiskej? (Isaías 65:​16, 17).

⁹ Amo okachi timotekipachouaj uan kuali tikatej. Isaías 65:14 kijtoua tlen kinpanos akinmej amo kiueyichiuaj Jehová. Kijtoua: ‘Tsajtsiskej porque moyolkokoskej uan chokaskej porque mosotlauaskej’. Pero ¿tlen techpanos akinmej tiktekichiuiliaj toTajtsin Dios? ¿Nochipa titlajyouijtoskej? Jehová techiluia: “Ayakmo nankilnamikiskej tlen onamechtekipachouaya uan noixtololouan ayakmo kitaskej non tlamantli” (xiktlajtolti Isaías 65:​16, 17). Jehová kipojpolos nochi tlen amo kuali uan satepan ayakmo tikilnamikiskej.

10. ¿Tleka timotlasojkamatij tipouij itech ialtepe toTajtsin Dios? (Noijki xikita foto).

¹⁰ Kuali timomachiliaj ijkuak timonechikouaj uan amo san timotekipachojtokej. Amo san tikilnamiktokej tlen amo kuali panotok nikan tlaltikpak. ¿Ken uelis titlapaleuiskej nochipa kuali mamomachilikan oksekimej ijkuak tikueyichiuaj Jehová? Matimoyekanakan ika espíritu santo uan nin kijtosneki matitetlasojtlakan, matipakikan, matikpiakan yolseuilistli, matimochiakan, matitetlakaitakan, matiyetokan tiyolkualmej, matitlaneltokakan uan matiyetokan tiyolyamankej (Gál. 5:​22, 23). ¡Timotlasojkamatij tipouij itech ialtepe toTajtsin Dios! Nochipa matikueyichiuakan. Ijkon tikitaskej nochi tlen yokijto kichiuas toTajtsin Dios. Ye yokijto kichiuas “se yankuik iluikak uan se yankuik tlaltikpak”.

11. ¿Ken timomachiliaj porque tikueyichiuaj Jehová? (Isaías 65:​18, 19).

¹¹ Timotlasojkamatij miak uan tipakij. Isaías okijto tleka tejuan ‘tipakij uan noijki tiyolpakij’. ToTajtsin Dios okitlali ialtepe para san sekan matikueyichiuakan (xiktlajtolti Isaías 65:​18, 19). ToTajtsin Dios  techyolchikaua matikinpaleuikan oksekimej makikauakan tlen amo melauak kinmachtiaj. Ijkon uelis yetoskej itech tlanechikol. Tejuan tipakij porque tikmatij tlen tlamachtia Biblia ikinon nochtin tiknekij tikintlapouiskej ken techteochiuas toTajtsin Dios (Jer. 31:12).

12. ¿Ken timomachiliaj ijkuak tiktlajtoltiaj Isaías 65:​20-24 uan tleka?

¹² Timotlasojkamatij miak iuan tipakij porque timouikaj iuan Jehová. Tikchiuaskej miak tlamantli itech xochitlali. Biblia kijtoua: “Ompa ayakmo mikis se konetl tlen yikin oneski nion se ueuetsin ayakmo mikis tla ayamo kajxitia miak xiuitl”. Noijki kijtoua: “Kinchijchiuaskej kalmej uan ompa chantiskej, kintokaskej viñas uan kikuaskej itlakilo”. Noijki “amo san nenka tekipanoskej” porque toTajtsin Dios kinteochiuas. ToTajtsin Dios kijtoua tonemilis kipias ipati, kuali tiyetoskej uan tipakiskej. Biblia kijtoua ToTajtsin Dios yikimati tlen techpolos ijkuakon maski ayamo tiktlajtlaniliaj. Noijki kinmakas “tlen kinekij nochtin tlen yoltokej” (Is. 65:​20-24; Sal. 145:16).

13. ¿Tlen moneki tikchiuaskej ijkon ken kijtoua Isaías 65:25 tla tiknekij tiktekichiuiliskej Jehová?

¹³ Timoyolseuiaj uan kuali tikatej. Iespíritu santo toTajtsin Dios yokinpaleui miakej makipatlakan innemilis maski achto okichiuayaj tlen amo kuali (xiktlajtolti Isaías 65:25). Yokipatlakej innemilis uan mochijchikauaj ayakmo kichiuaskej tlen amo kuali (Rom. 12:2; Efes. 4:​22-24). Ualeua ok tikchiuaj tlen amo kuali porque ok titlajtlakolejkej. Pero toTajtsin Dios yokichi “tlatlamantli personas” san sekan mayetokan, mamotlasojtlakan uan kuali mamouikakan (Tito 2:11). San toTajtsin Dios uelis kichiuas non milagro.

14. ¿Ken okipatlak inemilis se tokni ijkon ken kijtoua Isaías 65:25?

¹⁴ Pero ¿uelis tikpatlaskej tonemilis? Matikitakan tlen okipanok se tlakatl tlen kiteititia uelis tikpatlaskej tonemilis. Ijkuak okipiaya veinte xiuitl okichiuaya tlen amo kuali uan oauilnemiaya. Noijki miak uelta okitsakej porque okichiuaya miak tlamantli amo kuali, okinmichtekiaya carros uan okse tlamantli. Noijki nochipa san omokualanijtinemiaya. Pero okimatki miak ipati kiueyichiuas Jehová ijkuak okitlapouijkej tlen melauak tlamachtia Biblia uan ijkuak opejki touan monechikoua. Satepan omoapolakti uan okitak okipanotoka tlen kijtoua Isaías 65:25. Ye okatka ken se león pero omansojtik ken se ichka.

15. ¿Tleka tiknekij tikinpaleuiskej oksekimej touan matikueyichiuakan Jehová uan ken uelis tikinpaleuiskej?

¹⁵ Ijkin kijtoua Isaías 65:13 kanin peua: “Nin tlen kijtoua Ueyi Tekiua Jehová” uan versículo 25 ijkin tlami: “Kijtoua Jehová”. Nin kiteititia Jehová nochipa kichiua tlen kijtoua (Is. 55:​10, 11). Axkan tikueyichiuaj Jehová ijkon ken ye okijto. Tejuan tikueyichiuaj Jehová ijkon ken se familia tlen kuali tikatej uan kuali timouikaj maski panotok miak tlamantli amo kuali (Sal. 72:7). Ikinon tiknekij miakej tikinpaleuiskej noijki touan makiueyichiuakan Jehová. ¿Ken uelis tikinpaleuiskej? Moneki matikinmachtikan (Mat. 28:​19, 20).

¿KEN UELIS TIKINPALEUISKEJ OKSEKIMEJ NOIJKI MAKIUEYICHIUAKAN JEHOVÁ?

16. ¿Tleka oksekimej kinekij kiueyichiuaskej Jehová?

¹⁶ Tinochtin uelis tikinpaleuiskej oksekimej touan makiueyichiuakan Jehová. ¿Ken  uelis titlapaleuiskej? Matikchiuakan ijkon ken Jehová kichiua. Ye tetlasojtla ikinon akinmej kinyoltilana amo san kinmiluia uelika moneki kiueyichiuaskej (Juan 6:44; Jer. 31:3). Akinmej peua kixmatij Jehová ika nochi inyolo, kinekij okachi kixmatiskej porque kipia kualtsin iyelis. ¿Ken moneki tikpiaskej toyelis tla tiknekij oksekimej noijki makiueyichiuakan Jehová?

17. ¿Tlen moneki tikchiuaskej tla tiknekij oksekimej noijki makiueyichiuakan Jehová?

¹⁷ Oksekimej kinekiskej touan kiueyichiuaskej Jehová tla tikintlasojtlaj tokniuan uan tikinchiuiliaj tlen kuali. Yiuejkika xamo omonechikotoj sekimej ompa Corinto uan okijtojkej: “ToTajtsin Dios melauak namouan kajki”. Tejuan noijki tiknekij ijkon makijtokan akinmej touan monechikoskej (1 Cor. 14:​24, 25; Zac. 8:23). Ikinon miak ipati ‘kuali matimouikakan inuan oksekimej’ ijkon ken kijtoua Biblia (1 Tes. 5:13).

18. ¿Tlen kinpaleuis oksekimej makinekikan kiueyichiuaskej Jehová?

¹⁸ Matimochijchikauakan matikinmitakan tokniuan ijkon ken Jehová kinmita. Ikinon matikitakan tlen okachi kualtsin inyelis uan amo san matikitakan tlen amo kuali kichiuaj porque satepan ayakmo motlapololtiskej. Amo san timokualaniskej tla timotlasojtlaj uan tla tikchiuaj tlen kijtoua iTlajtol toTajtsin Dios. Techiluia ‘okachi kuali matimosepantlasojtlakan, matimoyeknotsakan, matimoiknomatikan uan matimotlapojpoluikan ika nochi toyolo” (Efes. 4:32). Akinmej kinekiskej ijkon makinchiuilikan, kinekiskej kiueyichiuaskej Jehová. a

 NOCHIPA MATIKUEYICHIUAKAN JEHOVÁ

19. (1) ¿Tlen okijtojkej sekimej ijkuak oksepa opejki kiueyichiuaj Jehová? (Xikita recuadro “ Oksepa opejki kiueyichiuaj Jehová”). (2) ¿Tlen moneki tikchiuaskej? (Noijki xikita dibujo).

¹⁹ ¡Tipakij tikueyichiuaj Jehová! Axkan okachi kualtsin tikueyichiuaj Jehová uan okachi yomomiaktilijkej tokniuan. Matiktlasojkamatilikan Jehová porque ye okitlali matikueyichiuakan. Moneki nochipa kiueyichiuaskej Jehová akinmej kinekij kuali momachiliskej, pakiskej, amo okachi motekipachoskej uan kuali yetoskej. Satanás kineki techkajkayauas uan amo kineki matikueyichiuakan Jehová inuan tokniuan (1 Ped. 5:8; Apoc. 12:9). Ikinon amo matikkauilikan Satanás ijkon makichiua. Matimochijchikauakan kualtsin matikueyichiuakan Jehová uan noijki chipauak uan kuali.