1. ¿Ken momachiliaj sekimej tokniuan ijkuak tetlapouiaj? (Noijki xikita foto).

 TEJUAN titetlapouiaj porque tiktlasojtlaj Jehová uan tiknekij oksekimej makixmatikan. Miakej tokniuan kinpaktia tetlapouiskej pero oksekimej kitaj oui ijkon kichiuaskej. ¿Tleka ijkon kinpanoua? Porque sekimej pinauaj uan momojtiaj ijkuak tetlapouiaj. Oksekimej kitaj oui oksepa kintlajpalotiuij akinmej kuali okinkakej. Noijki sekimej momojtiaj amo kuali makinselikan. Oksekimej okinmachtijkej amo makinkualanikan oksekimej. Tikmatij sapanoua kitlasojtlaj Jehová maski kitaj oui kintlapouiskej kuali tlajtoli akinmej amo kinmixmatij. Pero kimatij miak ipati tetlapouiskej ikinon mochijchikauaj nochipa ijkon kichiuaskej. Jehová sapanoua yolpaki ijkuak kita nochi tlen kichiuaj tokniuan.

2. ¿Tleka amo matimosotlauakan tla tikitaj oui titetlapouiskej?

² ¿Tejuatsin noijki tikita oui titetlapouis? Amo ximotekipacho tla ijkon mitspanoua. Tla timomojtia kijtosneki tiyolyamanki. Xamo amo tikneki mamitsitakan oksekimej tlen tikchiua nion tikneki inuan timokualanis. Tinochtin techpaktia matechselikan porque tiknekij tikinpaleuiskej oksekimej. Jehová techajsikamati uan kineki techpaleuis  (Is. 41:13). Axkan tikitaskej makuili tlamantli tlen techpaleuis ayakmo ijkon matimomachilikan uan matiyolpakikan ijkuak titetlapouiaj.

MATECHYOLCHIKAUA ITLAJTOL TOTAJTSIN DIOS

3. ¿Tlen okipaleui Jeremías matetlapoui?

³ ToTajtsin Dios yiuejkika kinyolchikaua itekipanojkauan ika iTlajtol ijkuak kitaj oui kitekichiuiliskej. Matikitakan tlen okipanok Jeremías. Ye omomojti ijkuak Jehová okinauati matetlapoui. Okijto: “Ne ok nitelpochtli uan amo nikmati nitlapouas” (Jer. 1:6). ¿Tlen okipaleui ayakmo mamomojti? Okiyolchika tlen okilui toTajtsin Dios. Jeremías okijto: “Tlen Jehová kijtoua […]. Yetoskia ken okatka tlitl ijtik noomiouan, onechsotla uan ayakmo onikxiko” (Jer. 20:​8, 9). Sapanoua oui okatka kanin otetlapouiaya Jeremías porque amo okikakiayaj akinmej ompa ochantiayaj. Pero tlen omonekiaya kitematiltis okiyolchika matetlapoui.

4. ¿Ken techpaleuis tla timokuayejyekouaj ijkuak tiktlajtoltiaj Biblia? (Colosenses 1:​9, 10).

⁴ Tejuan noijki techyolchikaua tlen kijtoua iTlajtol toTajtsin Dios. Apóstol Pablo okintlajkuilili tokniuan tlen ochantiayaj Colosas. Ye okinmilui tla kuali kajsikamatiskiaj tlen Jehová kineki kinpaleuiskia ‘makichiuakan tlen kuali’ uan ‘mayeknemikan’ (xiktlajtolti Colosenses 1:​9, 10). Tejuan noijki tikchiuaj tlen kuali ijkuak tiktematiltiaj kuali tlajtoli. Okachi tikneltokaj Jehová ijkuak tiktlajtoltiaj Biblia uan timokuayejyekouaj tlen ompa kijtoua. Noijki tikajsikamatij tleka miak ipati matitetlapouikan.

5. ¿Tlen tikchiuaskej tla tiknekij okachi matechpaleui tlen kijtoua Biblia?

⁵ Tla tiknekij okachi matechpaleui tlen kijtoua iTlajtol toTajtsin Dios, moneki yolik matiktlajtoltikan, matimomachtikan uan matimokuayejyekokan tlen timomachtiaj. ¿Tlen moneki tikchiuaskej ijkuak amo tikajsikamatij se texto? Uelis tikitaskej ken moyekijtoua non texto itech Índice de las publicaciones Watch Tower noso amatlajkuilol Tlen ika momachtiaj iTlaixpantijkauan Jehová. Moneki timajxiliskej timomachtiskej uan ijkon okachi tikneltokaskej iTlajtol toTajtsin Dios (1 Tes. 5:21). Tla okachi tikneltokaj tlen kijtoua Biblia,  okachi tiyolpakiskej tikintlapouiskej oksekimej tlen timomachtiaj.

KUALI MATIMOYEKTLALIKAN IJKUAK TITETLAPOUISKEJ

6. ¿Tleka miak ipati achto matimoyektlalikan ijkuak titetlapouitiuij?

⁶ Okachi kuali timomachiliskej ijkuak titetlapouitiuij tla kuali timoyektlaliaj. Jesús kuali okinmachti idiscípulos ijkuak yiyaskiaj tetlapouitiuij (Luc. 10:​1-11). Yejuan oyolpakej porque okichijkej nochi tlen Jesús okinmachti (Luc. 10:17).

7. ¿Tlen uelis tikchiuaskej tla tiknekij kuali titetlapouiskej? (Noijki xikita foto).

⁷ ¿Tlen uelis tikchiuaskej tla tiknekij kuali titetlapouiskej? Achto matimokuayejyekokan tlen tikijtoskej uan mamokaki ikaj iuan timotlapouijtokej uan amo san matiktlajtoltikan se amatl. Matimokuayejyekokan ken technankiliskej akinmej tikintlapouiaj uan tlen uelis tikinmiluiskej. Ijkon amo timomojtiskej, tiixuetskatoskej uan kuali titetlapouiskej.

8. ¿Tleka tikijtouaj tejuan ‘tikatej ken konmej de sokitl’?

⁸ Apóstol Pablo okijto ijkuak titetlapouiaj tikchiuaj se tekitl miak ipati “maski tikatej ken konmej de sokitl” (2 Cor. 4:7). ¿Tleka tikijtouaj non tekitl miak ipati? Porque uelis momakixtiskej akinmej tikintlapouiaj iTekiuajkayo toTajtsin Dios (2 Cor. 4:1). Uan ¿akinmej ‘katej ken konmej de sokitl’? Tejuan akinmej tiktekichiuiliaj Jehová uan titetlapouiaj kuali tlajtoli. Ijkuak okatka Pablo, akinmej otlasemanayaj okitlaliayaj ijtik konmej tlamantli tlen miak ipati. Okitlaliayaj ijtik komitl tlakuali, vino uan tomin. Axkan toTajtsin Dios noijki techkauilia matikchiuakan itlaj miak ipati. Techkauilia matitetlapouikan kuali tlajtoli. Jehová techpaleuis matitetlapouikan porque ye otechmakak nin tekitl miak ipati.

MATIKILUIKAN JEHOVÁ MATECHYOLCHIKAUA

9. ¿Tlen techpaleuis amo matimomojtikan ijkuak titetlapouiaj? (Noijki xikita foto).

⁹ Ualeua timomojtiaj ijkuak titetlapouiaj. Matimokuayejyekokan ijkuak apóstoles okinmiluijkej ayakmo matetlapouikan pero yejuan okitlatlaujtijkej toTajtsin Dios makinpaleui. Ye san niman okinnankili,  okinpaleui matetlapouikan iTlajtol uan amo mamomojtikan (Hech. 4:​18, 29, 31). Tejuan noijki matikiluikan Jehová matechpaleui uan amo matimomojtikan. Matikiluikan Jehová matechpaleui matikintlasojtlakan oksekimej uan ijkon uelis tikintlapouiskej.

10. ¿Ken techpaleuia Jehová matitetlapouikan? (Isaías 43:​10-12).

¹⁰ Jehová otechtlali matiyetokan tiiTlaixpantijkauan (xiktlajtolti Isaías 43:​10-12). Ikinon techiluia techpaleuis matiyetokan tiyolchikauakej ijkuak titetlapouiaj. Matikitakan naui tlamantli tlen kiteititia Jehová techpaleuia. Jesús touan kajki ijkuak titetlapouiaj (Mat. 28:​18-20). Jehová yokinnauati ángeles matechpaleuikan ijkuak titetlapouiaj (Apoc. 14:6). Jehová techpaleuia ika iespíritu santo matikilnamikikan tlen yotimomachtijkej (Juan 14:​25, 26). Noijki techkauilia matitetlapouikan inuan tokniuan. Nochi non techpaleuia amo matimomojtikan ijkuak titetlapouiaj porque Jehová techpaleuia uan noijki tokniuan.

MATIKITAKAN KEN TITETLAPOUISKEJ UAN MATIYOLPAKIKAN

11. ¿Tlen moneki tikchiuaskej tla tiknekij okachi titetlapouiskej? (Noijki xikita foto).

¹¹ ¿Timoyolkokoua porque amo katej inkalijtik akinmej tikneki tikintlapouis? Tla ijkon mitspanoua ximotlajtlani: “¿Kanin oyajkej? ¿Otekipanotoj noso omotlakouitoj?” (Hech. 16:13). Xamo uelis timochijchikauas titetlapouis itech ojtli kanin miakej panoua. Se tokni itoka Joshua okijto: “Nimochijchikaua nitetlapouis ijkuak nio tiankisko, ik kanin tlanemakaj miak uan kanin kinketsaltiaj carros”. Nin tokni iuan isiua tlen itoka Bridget yauij tiotlak tetlapouitiuij. Ijkon okachi kinmajsij akinmej ompa chantij uan domingo yauij kanaj tlajko tonal (Efes. 5:​15, 16).

12. ¿Ken uelis tikmatiskej tlen kineltokaj akinmej tikintlapouiaj uan tlen kintekipachoua?

¹² Tla amo kinekij techkakiskej akinmej tikintlapouiaj matikintlajtlanikan tlen kineltokaj uan tlen kintekipachoua. Joshua uan Bridget kintlajtlaniaj tlen ijkuilitok itech amatsitsintin tlen tikinxexelouaj.  Matikitakan ken kichiuaj. Ijkuak kitemakaj amatsintli ¿Tlen kijtosneki Biblia para tejuatsin?, kinmiluiaj akinmej kintlapouiaj: “Sekimej kineltokaj Biblia iTlajtol toTajtsin Dios uan oksekimej amo. ¿Tejuatsin tlen tikneltoka?”. Ijkon miakej kintlapouiaj kuali tlajtoli.

13. ¿Tlen techpaleuis matiyolpakikan ijkuak titetlapouiaj maski amikaj techkaki? (Proverbios 27:11).

¹³ Uelis tiyolpakiskej maski amo miakej techkakij ijkuak titetlapouiaj. ¿Tleka? Jehová uan iKone kipatioitaj matitetlapouikan porque yejuan technauatiaj ijkon matikchiuakan (Hech. 10:42). Ikinon amo matimotekipachokan tla amo tikinmajsij akinmej tikintlapouiskej noso amo kinekij techkakiskej. Matiyolpakikan porque tikilnamiktokej tikyolpaktiaj toTajtsin Dios (xiktlajtolti Proverbios 27:11).

14. ¿Ken timomachiliaj ijkuak se tokni kajsi akin kineki momachtis?

¹⁴ Matiyolpakikan inuan tokniuan ijkuak kajsij ikaj tlen kineki kimatis tlen tlamachtia Biblia. Revista Akin Tetlapouijtok kijtoua nin tekitl yetoskia ken ijkuak kitemouaj se chokotsin tlen omoixpolo. Nochtin yolpakij uan amo san akin okajsik. Ikinon tikijtouaj tinochtin timopaleuiaj ijkuak tikintemouaj akinmej kinekij kimatiskej tlen tlamachtia iTlajtol toTajtsin Dios. Tinochtin timopaleuiaj ijkuak titetlapouiaj uan tiyolpakij ijkuak ikaj peua monechikoua.

XIKTLASOJTLA JEHOVÁ UAN AKINMEJ TIKINTLAPOUIAJ

15. ¿Tlen techpaleuis matiyolpakikan ijkuak titetlapouiaj? (Mateo 22:​37-39; noijki xikita foto).

¹⁵ Okachi techpaktis titetlapouiskej tla tiktlasojtlaj Jehová uan akinmej tikintlapouiaj (xiktlajtolti Mateo 22:​37-39). Matimokuayejyekokan ken yolpaki Jehová ijkuak kita titetlapouiaj uan noijki ken yolpakij akinmej peua momachtiaj iTlajtol. Noijki amo matikilkauakan uelis momakixtiskej akinmej kikakij iTlajtol toTajtsin Dios (Juan 6:40; 1 Tim. 4:16).

16. Xikijto ken uelis tiyolpakiskej maski amo uelis tiaskej titetlapouitiuij.

¹⁶ ¿Tlen uelis tikchiuas tla amo ueli tio titetlapouiti? Xikchiua san tlen tiueli uan  ijkon tikteititis tiktlasojtla Jehová uan noijki akinmej tikintlapouia. Samuel uan Dania omokajkej inkalijtik ijkuak opejki kokolistli COVID-19. Yejuan otetlapouiayaj ika teléfono, okinmijkuilouayaj cartas uan noijki otlamachtiayaj itech zoom. Noijki Samuel otetlapouiaya itech hospital kanin okipajtiayaj porque okipiaya cáncer. Ye okijto: “Ijkuak titlajyouiaj, timotekipachouaj, tisotlauaj uan ayakmo okachi titlaneltokaj. Ikinon moneki matiyolpakikan ijkuak tiktekichiuiliaj Jehová”. Noijki Dania ouetski uan ouetoka eyi metstli. Satepan kanaj tlajko xiuitl okatka ipan silla de ruedas. Ye okijto: “Onimochijchika nikchiuas tlen niueli. Oniktlapouiaya se enfermera tlen onechualitaya uan noijki akinmej itlaj okiualkauayaj nokalijtik. Noijki oniktlapouiaya se siuatl tlen tlayekana kanin tlapajtiaj”. Samuel uan Dania oyolpakiayaj maski okichiuayaj san tlen oueliayaj.

17. ¿Techpaleuis tlen axkan otimomachtijkej okachi kuali matitetlapouikan?

¹⁷ Matimochijchikauakan matikchiuakan makuili tlamantli tlen axkan otikitakej uan ijkon okachi kuali titetlapouiskej. Nin yetoskia ken se tlakuali. Tla tiknekij uelik makisa tlakuali moneki tiktlaliliskej seki tlamantli. Tla tikchiuaskej tlen axkan yotimomachtijkej tiyolpakiskej ijkuak titetlapouiskej.