Onineski 1955, nikinpia ome nokniuan uan ne nixokoyotl. Onimoskalti itempa mar ik sur ompa Finlandia. Axkan non altepetl moixmati ken Vantaa.

Nomama omoapolakti ken iTlaixpantijka Jehová seki xiuitl achto ijkuak ayamo oninesiaya. Pero nopapa amo okipakti uan amo okikauiliaya nomama matechmachti tlen kijtoua Biblia nion matechuika kanin timonechikouaj. Ikinon ye otechmachtiaya ijkuak nopapa amo touan okatka.

Desde onikatka nichokotsin oniknekiaya niktekichiuilis Jehová. Ijkuak onikpiaya chikome xiuitl okualanki akin onechmachtiaya porque amo onikkua verilättyjä. Non yetoskia ken se memelatsin tlen okipiaya estli. Ika se ima onechkamatlapo uan ika okse ima okinekiaya nechmakas manikua. Onikmatlatsini uan ouetsito tlen okinekiaya manikkua.

Nopapa oixpoliuik ijkuak ne onikpiaya 12 xiuitl. Satepan opejki nimonechikoua. Non onechpaleui manimouika iuan Jehová porque tokniuan onechtlasojtlayaj. Opejki mojmostla niktlajtoltia Biblia uan nimomachtia amatlajkuilolmej. Non onechpaleui manimoapolakti 8 de agosto 1969 ijkuak onikpiaya 14 xiuitl.

Opejki nitlapaleuia ken precursor regular ijkuak otlanki onimomachti. Opanok seki  semanas onichantito Pielavesi porque ompa onitetlapouito. Non altepetsintli kajki ik Finlandia.

Ompa Pielavesi onikixmatki se ichpochtli itoka Sirkka tlen satepan iuan onimonamikti. Onechpakti porque okatka yolyamanki uan kuali omouikaya iuan Jehová. Ye amo omoueyinekiaya nion okipaktiaya kipias miak tlamantli. Otiknekiayaj tiktekichiuiliskej Jehová ika nochi toyolo uan tikchiuaskiaj tlen technauatiskiaj. Otimonamiktijkej 23 de marzo 1974 uan amo kanaj otipaxialotoj. Tejuan otiajkej otitlapaleuitoj ompa Karttula kanin okachi omonekiaya titetlapouiskej.

Desde otimonamiktijkej Jehová otechititi techmakaskia tlen omonekiaya tla okachi tiktekichiuiliskiaj (Mat. 6:33). Ijkon otikitakej ijkuak otikatkaj Karttula porque amo otikpiayaj se carro. San otikpiayaj se bicicleta. Pero amo ueli ipan otiayaj ijkuak sapanoua oseuaya. Noijki otiknekiayaj tikpiaskej se carro porque okatka ueyi altepetl kanin omonekiaya titetlapouiskej. Pero amo otikpiayaj tomin tlen ika tikmokouiskiaj.

Se tonal otechtlajpaloko se nokni pero amo otechilui uan okijto matikmokauikan icarro. Amitlaj otiktlaxtlajkej nion seguro tlen okipiaya carro. San omonekiaya tikkouaskej gasolina. Otipakej porque yotikpiayaj se carro.

Jehová otechititi techmakaskia tlen omonekiaya. San omonekiaya okachi tiktekichiuiliskej.

1978 ijkuak otimomachtijtokaj itech tlamachtil tlen kiseliaj precursores, se tokni itoka Raimo Kuokkanen a tlen otechmachtijtoka otechyole matimomachtitij Galaad. Ikinon opejki timomachtiaj inglés porque monekiskia tla satepan techtitlaniskiaj matimomachtitij. Pero amo otiktemitijkej se amatl porque 1980 otechyolejkej matitlapaleuitij ompa Betel tlen kajki Finlandia. Ijkuakon akinmej otlapaleuiayaj Betel amo ueli oyayaj momachtitiuij Galaad. Otiknekiayaj tiktekichiuiliskej Jehová kanin ye techiluiskia uan amo kanin tejuan tiknekiskiaj. Ikinon  otiajkej kanin otechtitlankej. Pero ok otimomachtiayaj inglés tla satepan uelis tiaskiaj timomachtitiuij Galaad.

Seki xiuitl satepan tokniuan tlen pouij itech Cuerpo Gobernante okijtojkej akinmej otlapaleuiayaj Betel uelis yaskiaj momachtitiuij Galaad. Ikinon san niman otiktemitijkej se amatl. Sapanoua otechpaktiaya titlapaleuiskej Betel pero noijki otiknekiayaj titlapaleuiskej kanin okachi omonekiaya titetlapouiskej. Otechyolejkej matimomachtitij tlamachtil 79 ompa Galaad uan otlanki otimomachtijkej septiembre 1985. Ijkuakon otechtitlankej matiakan Colombia.

Ijkuak otiajsitoj Colombia otechiluijkej matitlapaleuitij Betel. Onimochijchika nikchiuas kuali noteki pero ijkuak otlanki se xiuitl onimokuayejyeko nikchiuas okse tlamantli. San ijkuakon oniktlajtlanki nikchiuas okse tlamantli para niktekichiuilis Jehová. Ijkuakon otechtitlankej matitlapaleuitij ken misioneros ompa altepetsintli Huila tlen poui itech altepetl Neiva.

Sapanoua nechpaktia nitetlapouis. Ijkuak ayamo onimonamiktiaya uan onitlapaleuiaya ken precursor ompa Finlandia, onitetlapouiaya desde kualkan hasta ijkuak yotlayouak. Ijkuak onimonamikti iuan Sirkka noijki ijkon otitetlapouiayaj. Ualeua hasta otikochiayaj itech tocarro ijkuak uejka otiayaj titetlapouitiuij. Ijkon ayakmo omonekiaya kanaj tiaskej uan mostlatika san niman otipeuayaj otitetlapouiayaj.

Oksepa otiyolpakiayaj ijkon ken achto ijkuak otitetlapouiayaj. Kanin otimonechikouayaj opejki momiaktiliaj. Tokniuan tlen chantij Colombia tetlakaitaj, tetlasojtlaj uan motlasojkamatij.

Ik Neiva okatkaj miakej altepemej kanin amo ochantiaya nion se tokni. Ompa otemiktiayaj ikinon omonekiaya momaluiskej tla ompa yaskiaj akinmej amo ompa ochantiayaj. Nochipa onimokuayejyekouaya ken uelis ompa titetlapouiskiaj. Opejki niktlatlaujtia Jehová makipaleui ikaj makixmati tlen poui itech non altepetl. Oniktlatlaujtiaya makipaleui ikaj mamochiua iTlaixpantijka akin ompa opouiaya pero machanti ompa Neiva. Noijki onikiluiaya Jehová ijkuak moapolaktiskia non tlakatl makichikaua itlaneltokilis uan matetlapouiti kanin chanti. Oniknekiaya ijkon mamochiua pero Jehová okimatiaya tlen okachi kuali kichiuaskia.

Satepan opejki nikmachtia se telpochtli tlen itoka Fernando Gonzáles. Ye ochantiaya ompa Algeciras uan itech non altepetl amo okatka nion se iTlaixpantijka Jehová. Fernando oyaya tekipanoti nochi semanas ompa Neiva tlen omokauaya kanaj 50 kilómetros. Kuali omoyektlaliaya ijkuak otimomachtiayaj uan opejki nochipa monechikoua. Noijki san niman opejki kinyoleua mamonechikokan akinmej ochantiayaj itech ialtepe uan okinmachtiaya tlen omomachtijtoka.

Fernando omoapolakti enero 1990. San tlajko xiuitl ouejka omomachti uan omoapolakti  uan san niman omochi precursor regular. Tokniuan tlen tlapaleuiaj Betel okintitlankej precursores especiales ompa Algeciras porque yokatka se tokni tlen uelis kinmaluiskia. Febrero 1992 omochi se yankuik tlanechikol.

Pero Fernando amo san otetlapoui ompa Algeciras. Satepan ijkuak omonamikti iuan Olga ochantitoj San Vicente del Caguán kanin amo okatka nion se iTlaixpantijka Jehová. Ompa noijki otlapaleuijkej mamochiua se tlanechikol. Pero 2002 okinyolejkej matlapaleuikan itech circuito uan hasta axkan ijkon tlapaleuiaj.

Tlen onechpanok onechititi tleka miak ipati matiktlatlaujtikan Jehová para okachi kuali tiktekichiuiliskej. Ye uelis kichiuas tlen tejuan amo ueli tikchiuaj. Ijkon moneki matikchiuakan porque Jehová iaxka tlatoktli (Mat. 9:38).

1990 otechtlalijkej manitlapaleuikan itech circuito uan opejki titlapaleuiaj ompa Bogotá. Sirkka uan ne amo okachi otikmatiayaj itlaj tikchiuaskej. Noijki amo keman otichantiayaj itech se ueyi altepetl. Ikinon otimomojtiayaj amo kuali tikchiuaskiaj non tekitl. Pero Jehová otechpaleui ijkon ken kijtoua Filipenses 2:13. Ompa kijtoua: “ToTajtsin Dios namechmaka chikaualistli para xikchiuakan nochi tlen kipaktia. Ye kichiua xiknekikan ijkon nankichiuaskej uan namechmaka chikaualistli para xikchiuakan”.

Satepan otechiluijkej matitlapaleuitij Medellín. Ompa okichiuayaj miak tlamantli amo kuali. Ikinon akinmej ompa ochantiayaj ayakmo omomojtiayaj. Nikilnamiki se tonal onitlamachtijtoka uan kiauak opejki tlatojtoponiaj. Onimomojti uan yonimotlamotlaskia ipan tlali. Pero akin onikmachtijtoka ok okitlajtoltiaya párrafo uan amitlaj okichi. Ijkuak otlanki okitlajtolti párrafo, okijto tepitsin manikchia. Satepan oajsito inuan ome ikoneuan uan onechilui: “Techtlapojpolui, onikinnotsato nokoneuan”.

Pero amo san non tlamantli otechmomojti. Se tonal ijkuak otitetlapouijtokaj, nosiua omotlalo otechnamikito uan hasta oistayak porque omomojtiaya. Otechilui ikaj okitlatoponili uan ne noijki onimomojti. Pero satepan otikitakej okinekiaya kimiktiskej se tlakatl tlen opanok inakastlan nosiua.

Satepan ayakmo okachi otimomojtiayaj. Otechtlajtlachialtiaya tokniuan otlaxikouayaj uan okatkaj yolchikauakej maski opanouaya miak tlamantli. Otikajsikamatkej Jehová noijki techpaleuiskia ijkon ken okinpaleuiaya tokniuan. Nochipa otikintlakamatiayaj tlayekankej, otimomaluiayaj uan otikkauiliayaj Jehová matechpaleui.

Pero ualeua amo opanouaya ijkon ken otimokuayejyekouayaj. Nikilnamiki se tonal onitetlajpaloto uan onikkak chikauak omotsatsajtsiliayaj kiauak ome siuamej. Ne amo oniknekiaya nikmatis tlen opanotoka. Pero siuatl tlen ompa ochantiaya onechilui  manitlachiati. Ijkuak onikiski onikinmitak ome totomej okintlachichiuiliayaj ijkon ken akinmej ik ompa chantij.

1997 onechiluijkej manitlamachti itech tlamachtil tlen kiseliaj tlayekankej uan siervos ministeriales. b Onechpaktiaya nimomachtiti tlamachtil para akinmej kichiuaj ken Cristo pero amo keman onimokuayejyeko ne nitlamachtiskia.

Satepan noijki onitlapaleui ken tlayekanki itech distrito. Pero satepan oksepa onitlapaleui ken tlayekanki itech circuito porque ayakmo okatkaj tlayekankej itech distrito. Yikipia kanaj 30 xiuitl nitlapaleuia itech circuito uan noijki nitlamachtia. Jehová sapanoua yotechteochi pero ualeua noijki nikixnamiki seki tlamantli oui. ¿Tleka ijkon nikijtoua?

Ne nechpaktia nochi kuali mamochiua. Non yonechpaleui manikixnamiki seki tlamantli. Pero ualeua nikneki san niman itlaj mamoyektlali itech tlanechikolmej. Ualeua chikauak onikinmiluiaya tokniuan omonekiaya tetlasojtlaskej uan teiknomatiskej. Pero amo onikitaya ne noijki ijkon omonekiaya nikchiuas (Rom. 7:​21-23).

Ualeua nimoyolkokoua porque nimotlapololtia (Rom. 7:24). Se tonal sapanoua onimoyolkokouaya ikinon onikilui Jehová ayakmo oniknekiaya nitlapaleuis ken misionero uan oniknekiaya nimokopas Finlandia. Pero non tonal ijkuak otimonechikojkej itlaj onikkak tlen onechpaleui amo manimoxijxiko. Noijki onechpaleui manimochijchikaua manikpia kuali noyelis. Amo keman nikilkauas ken onechnankili Jehová non tonal. Noijki sapanoua niktlasojkamatilia Jehová porque yonechpaleui maniyeto niyolkuali.

Sirkka uan ne sapanoua tiktlasojkamatiliaj Jehová porque yotechpaleui matiktekichiuilikan. Noijki sapanoua niktlasojkamatilia Jehová porque nosiua sapanoua nechtlasojtla uan nochipa nechpaleuia.

Yinikajxitis 70 xiuitl ikinon ayakmo nitlapaleuis ken tlayekanki itech circuito nion nitlamachtis. Pero amo nimoyolkokoua porque nikmati amo moneki tikpiaskej se tekitl miak ipati tla tiknekij tiktekichiuiliskej Jehová. Ye okachi kipatioita matikueyichiuakan san tlen tiuelij uan matikchiuakan ika nochi toyolo (Miq. 6:8; Mar. 12:​32-34).

Niyolpaki porque yonikchi miak tekitl kualtsin. Pero amo ijkon onikchi porque nikmati nikchiuas miak tlamantli noso okachi nopati. San Jehová onechpaleui manikchiua non tekitl maski nimotlapololtia. Amo keman nikchiuaskia non tekitl tla Jehová amo nechpaleuiskia. Yonikitak Jehová nochipa nechpaleuia maski nimotlapololtia (2 Cor. 12:9).