1. ¿Tlen kineki Jehová matikchiuakan?

 AKINMEJ yomonamiktijkej sapanoua yolpakij ijkuak nesi se inkone. Yejuan kitlasojtlaj pero amo kinekij nochipa mayeto konetl. Motekipachoskiaj tla amo moskaltiskia. Jehová noijki yolpaki ijkuak peua titlaneltokaj pero amo kineki nochipa matiyetokan ken ‘tikonemej’ (1 Cor. 3:1). Ye kineki matimokuayejyekokan ijkon ken “akinmej yiuejueyij” (1 Cor. 14:20).

2. ¿Tlen tlajtlanilmej tikinnankiliskej?

² ¿Tlen kijtosneki timokuayejyekoskej ijkon ken “akinmej yiuejueyij”? ¿Tlen moneki tikchiuaskej tla tiknekij tikpiaskej chikauak totlaneltokilis? ¿Ken techpaleuia kuali matimouikakan iuan Jehová tla timomachtiaj tlen okachi oui? ¿Tleka amo matimokuayejyekokan yikuali timouikaj iuan Jehová uan ayakmo moneki itlaj tikchiuaskej? Axkan tikinnankiliskej ninmej tlajtlanilmej.

¿TLEN KIJTOSNEKI TIMOKUAYEJYEKOSKEJ IJKON KEN MOKUAYEJYEKOUAJ “AKINMEJ YIUEJUEYIJ”?

3. ¿Tlen kijtosneki timokuayejyekoskej ijkon ken akinmej yiuejueyij?

³ Ijkuak Biblia kijtoua tlajtoli griego “akinmej yiuejueyij” kijtosneki akinmej kipiaj chikauak intlaneltokilis. Amo kijtosneki yiuejueyij porque yikipiaj miak xiuitl (1 Cor. 2:6). a Ijkon  ken se konetl moskaltia hasta yetos chikauak, tejuan noijki moneki tikpiaskej chikauak totlaneltokilis para kuali timouikaskej iuan Jehová. ¿Kijtosneki ayakmo itlaj tikchiuaskej tla yikuali timouikaj iuan Jehová? Amo. Moneki nochipa mamochikajti totlaneltokilis (1 Tim. 4:15). Pero ¿ken tikmatij ikaj kipia chikauak itlaneltokilis maski ok telpochtli noso yikipia miak xiuitl?

4. ¿Tlen kichiuaj tokniuan tlen kipiaj chikauak intlaneltokilis?

⁴ Tokniuan tlen kipiaj chikauak intlaneltokilis kintlakamatij nochi itlanauatiluan Jehová uan amo san tlen yejuan kinpejpenaj kintlakamatiskej. Maski tlajtlakolejkej uan motlapololtiaj, kiteititiaj mokuayejyekouaj uan kichiuaj ijkon ken kineki Jehová makichiuakan. Yejuan kiyankuiliaj innemilis ijkon ken toTajtsin Dios kineki uan mokuayejyekouaj ijkon ken ye mokuayejyekoua (Efes. 4:​22-24). Yejuan moyekanaj ika itlanauatiluan Jehová uan principios bíblicos ijkuak itlaj kipejpenaj kichiuaskej. Ikinon amo moneki kipiaskej se amatl kanin ijkuilitos tlen kichiuaskej. Noijki mochijchikauaj kichiuaskej tlen yokijtojkej (1 Cor. 9:​26, 27).

5. ¿Tlen kichiuaj akinmej amo kipiaj chikauak intlaneltokilis? (Efesios 4:​14, 15).

⁵ Pero akinmej amo kipiaj chikauak intlaneltokilis xamo san niman kichiuaj tlen oksekimej kinmiluiaj ijkuak kintlaliliaj “trampas” uan okseki tlamantli. Yejuan kinneltokiliaj akinmej kijtojtinemij tlen amo melauak opanok uan noijki kinneltokiliaj akinmej okikajkej Jehová uan kixnamikij ialtepe (xiktlajtolti Efesios 4:​14, 15). b Xamo tlaixnekij, mokualanijtinemij, san niman kualanij uan san niman kichiuaj tlen kinyoltilana (1 Cor. 3:3).

6. ¿Tleka tikijtouaj akin amo kipia chikauak itlaneltokilis yetoskia ken se konetl ijkuak moskaltijti? (Noijki xikinmita fotos).

⁶ Axkan yotikitakej Biblia kijtoua ijkuak ikaj kipia chikauak itlaneltokilis yetoskia ken ijkuak ikaj yomoskalti. Se konetl amo kimati miak tlamantli ikinon moneki ikaj makimalui uan makita tlen kichiua. Matikijtokan se temama panos ik kanin panouaj carros ikinon kiluia itakotsin makimakitski uan ijkon  amitlaj kipanos. Xamo imama kikauilis iselti makipanoui ojtli ijkuak okachi moskaltijtias pero ok kiluis mamomalui. Pero ijkuak yomoskalti yikimati iselti momaluis. Noijki ijkon kinpanoua akinmej amo kipiaj chikauak intlaneltokilis. Yejuan kinekij tokniuan tlen kipiaj chikauak intlaneltokilis makinpaleuikan mamouikakan iuan Jehová uan makinmiluikan tlen kipejpenaskej kichiuaskej. Pero tokniuan tlen kipiaj chikauak intlaneltokilis moyekanaj ika principios bíblicos uan ijkon kimatij ken mokuayejyekoua Jehová. Non kinpaleuia kuali makipejpenakan tlen kichiuaskej.

7. ¿Ayakmo moneki ikaj makinpaleui tokniuan tlen kipiaj chikauak intlaneltokilis?

⁷ ¿Kijtosneki ayakmo ikaj makinpaleui tokniuan tlen kipiaj chikauak intlaneltokilis? Amo. Ualeua moneki kinmiluiskej oksekimej makinpaleuikan. Akin amo kipia chikauak itlaneltokilis xamo kinekis makiluikan tlen moneki kipejpenas noso makiluikan tlen moneki kichiuas. Pero akin kipia chikauak itlaneltokilis kinkaki tokniuan tlen ixtlamatkej uan noijki kimati “sejse moneki kichiuas iteki” (Gál. 6:5).

8. ¿Tleka tikijtouaj tlatlamantli mokuayejyekouaj akinmej kipiaj chikauak intlaneltokilis?

⁸ Ijkuak timoskaltiaj tlatlamantli timotaj. Tokniuan tlen kipiaj chikauak intlaneltokilis noijki tlatlamantli inyelis. Ijkon tikijtouaj porque sekimej okachi ixtlamatkej, oksekimej okachi yolchikauakej, oksekimej okachi kinpaktia kitemakaskej tlen kipiaj uan oksekimej okachi teajsikamatij. Xamo sekimej tokniuan kipejpenaskej tlatlamantli tlen kichiuaskej pero moyekanaj ika principios bíblicos. Ijkon kichiuaj porque intlalnamikilis amo kinkuejsoua. Pero nonmej tokniuan amo moteneuaj porque kinekij kuali mouikaskej (Rom. 14:10; 1 Cor. 1:10).

¿TLEN MONEKI TIKCHIUASKEJ TLA TIKNEKIJ TIKPIASKEJ CHIKAUAK TOTLANELTOKILIS?

9. ¿Tleka moneki itlaj tikchiuaskej tla tiknekij tikpiaskej chikauak totlaneltokilis?

⁹ Se chokotsin moskaltia ijkuak panoti xiuitl. Pero akin kineki kipias chikauak itlaneltokilis moneki itlaj kichiuas uan amo san mochias mapano xiuitl. Tokniuan tlen ochantiayaj Corinto okikakej kuali tlajtoli, omoapolaktijkej, okiselijkej espíritu santo uan okichijkej tlen okinmachti apóstol Pablo (Hech. 18:​8-11). Pero opanok seki xiuitl uan ayamo okipiayaj chikauak intlaneltokilis maski yomoapolaktijkaj (1 Cor. 3:2). ¿Tlen moneki tikchiuaskej tla amo tiknekij ijkon matechpano?

10. ¿Tlen moneki tikchiuaskej tla tiknekij tikpiaskej chikauak totlaneltokilis? (Judas 20).

¹⁰ Tla tiknekij tikpiaskej chikauak totlaneltokilis, achto moneki tiknekiskej ijkon tikchiuaskej. Amo keman kipiaskej chikauak intlaneltokilis akinmej kinekij yetoskej ken konemej (Prov. 1:22). Tejuan amo tiknekij tikchiuaskej ijkon ken kichiuaj sekimej tlen yiuejueyij. Yejuan san kichiaj makinmiluikan inpapanuan tlen kichiuaskej noso tlen kipejpenaskej kichiuaskej. Tejuan tiknekij timochijchikauaskej tikpiaskej chikauak totlaneltokilis (xiktlajtolti Judas 20). Tla tikitaj amo tikpiaj chikauak totlaneltokilis, matiktlatlaujtikan Jehová ‘makichiua matiknekikan ijkon tikchiuaskej uan matechmaka chikaualistli para matikchiuakan’ (Filip. 2:13).

11. ¿Ken techpaleuia Jehová matikpiakan chikauak totlaneltokilis? (Efesios 4:​11-13).

¹¹ Jehová kineki techpaleuis matikpiakan chikauak totlaneltokilis. Okintlali tlayekankej matechpaleuikan “matimochiuakan tiuejueyij uan matikchiuakan nochi ijkon ken Cristo okichi” (xiktlajtolti Efesios 4:​11-13). Jehová noijki techmaka iespíritu santo tlen  techpaleuia ‘matimokuayejyekokan ken Cristo’ (1 Cor. 2:​14-16). Noijki otlanauati makinmijkuilokan naui Evangelios tlen techpaleuiaj matikmatikan tlen okichi Jesús ijkuak okatka nikan tlaltikpak. Noijki tikpiaskej chikauak totlaneltokilis tla timokuayejyekouaj ijkon ken Cristo okichi, tla titlapouaj ijkon ken ye uan tla tikchiuaj tlen ye okichi.

¿KEN TECHPALEUIA KUALI MATIMOUIKAKAN IUAN JEHOVÁ TLA TIMOMACHTIAJ TLEN OKACHI OUI?

12. ¿Tlen “otechmachtijkej itech Cristo”?

¹² Tla tiknekij tikpiaskej chikauak totlaneltokilis, moneki matikmatikan tlen okachi oui uan amo san matikmatikan tlen “otechmachtijkej itech Cristo”. Achto otechmachtijkej tlen kijtosneki timoyolkopaskej, titlaneltokaskej, timoapolaktiskej uan ijkuak techyolitiskej (Heb. 6:​1, 2). Tinochtin moneki tikmatiskej nochi non tlamantli. Ikinon apóstol Pedro miakej okintlapoui ijkuak omochi iluitl Pentecostés (Hech. 2:​32-35, 38). Moneki matikselikan non tlamachtil tla tiknekij tikchiuaskej ijkon ken Cristo. Pablo okijto tla amo tikneltokaj techyolitiskej san nenka tikneltokaskej Cristo (1 Cor. 15:​12-14). Pero amo san moneki matikneltokakan non tlamantli.

13. ¿Tlen tikchiuaskej tla tiknekij matechpaleui tlen techmaka Jehová ijkon ken kijtoua Hebreos 5:14? (Noijki xikinmita fotos).

¹³ Jehová noijki techmaka okseki tlamantli tlen techpaleuia matikpiakan chikauak totlaneltokilis. Amo san techmaka itlanauatiluan. Noijki techmaka principios bíblicos tlen techpaleuiaj matikajsikamatikan ken mokuayejyekoua. Moneki matimomachtikan tlen kijtoua Biblia tla tiknekij matechpaleui. Noijki matimokuayejyekokan tlen timomachtiaj uan matikchiuakan. Non techpaleuis matikpejpenakan tlen Jehová kipaktia (xiktlajtolti Hebreos 5:14). c

14. ¿Ken okinpaleui Pablo tokniuan tlen okatkaj Corinto inselti makipejpenakan tlen kichiuaskej?

¹⁴ Tokniuan tlen amo kipiaj chikauak intlaneltokilis kitaj oui kipejpenaskej tlen kichiuaskej. Ijkon kinpanoua ijkuak amo kajsij  se tlanauatil tlen kinmiluia tlen kichiuaskej. Xamo san mokuayejyekoskej kichiuaskej tlen yejuan kinekij. Oksekimej xamo kijtoskej makitlalikan se tlanauatil maski amo moneki. Nesi ijkon opanok ijkuak tokniuan tlen ochantiayaj Corinto okiluijkej Pablo makitlali se tlanauatil tlen kijtoskia kox uelis kikuaskiaj tlakuali tlen okinmaniliayaj imágenes. Pablo amo okinmilui tlen omonekiaya kichiuaskej. Ye okinyekilui sejse omonekiaya kipejpenaskej tlen kichiuaskiaj uan ijkon amo kinkuejsoskia intlalnamikilis. Noijki amo ‘kinmikxitlanuiskiaj akinmej amo kipiaj chikauak intlalnamikilis’ (1 Cor. 8:​4, 7-9). Ijkon okinpaleui inselti makipejpenakan tlen kichiuaskej uan amo makintemojtinemikan tlanauatilmej kanin kinmiluia tlen kichiuaskej.

15. ¿Ken okinpaleui Pablo tokniuan hebreos makipiakan chikauak intlaneltokilis?

¹⁵ Techmachtia okse tlamantli miak ipati tlen Pablo okinmijkuilili tokniuan hebreos. Sekimej amo omochijchikauayaj kipiaskej chikauak intlaneltokilis. Ikinon okinmilui: “Yetoskia ken oksepa nankinekij leche uan amo nankinekij tlakuali” (Heb. 5:12). Amo okinekiayaj kiseliskej tlen yankuik okinmachtijtoka Jehová (Prov. 4:18). Ijkon opanok ijkuak miakej tokniuan tlen achto okatkaj judíos ok okinekiayaj makitlakamatikan iTlanauatil Moisés. Ijkon okinekiayaj kichiuaskej maski yopanoka kanaj 30 xiuitl Cristo okipojpolo non tlanauatil (Rom. 10:4; Tito 1:10). Ijkuakon ayakmo omonekiaya ijkon mokuayejyekoskej porque Cristo yokipiaya miak xiuitl okipojpolo non tlanauatil. Ikinon Pablo okinekiaya kinpaleuis makiselikan non tlamachtil tlen okinmilui itech carta tlen ye okinauatijkej makijkuilo. Tlen okinmijkuilili Pablo okinpaleui makajsikamatikan okachi kuali kiueyichiuaskiaj Jehová. Noijki mayetokan yolchikauakej uan matetlapouikan maski judíos okintlajyouiltiayaj (Heb. 10:​19-23).

¿TLEKA MONEKI NOCHIPA TIMOMALUISKEJ?

16. ¿Tlen moneki tikchiuaskej tla tiknekij tikpiaskej chikauak totlaneltokilis?

¹⁶ Moneki nochipa matimochijchikauakan matikpiakan chikauak totlaneltokilis. Ikinon moneki nochipa matimomaluikan (1 Cor. 10:12). Nochipa matikitakan tlen tikchiuaj uan ijkon tikitaskej kox mochikajti totlaneltokilis (2 Cor. 13:5).

17. ¿Tlen techmachtia carta tlen Pablo okinmijkuilili tokniuan tlen okatkaj Colosas?

 ¹⁷ Carta tlen Pablo okinmijkuilili tokniuan tlen okatkaj Colosas noijki okinmilui miak ipati mamochijchikauakan nochipa makipiakan chikauak intlaneltokilis. Yejuan yokipiayaj chikauak intlaneltokilis pero okinmilui omonekiaya momaluiskej uan ijkon amikaj kinkajkayauas ika tlen amitlaj ipati (Col. 2:​6-10). Epafras kuali okinmixmatiaya tokniuan ikinon nochipa inpatka omotlatlaujtiaya para ‘nochipa mayetokan ajsitokej’ (Col. 4:12). ¿Tlen techmachtia? Pablo uan Epafras okimatiayaj moneki timochijchikauaskej tikpiaskej chikauak totlaneltokilis uan matikiluikan Jehová matechpaleui. Yejuan okinekiayaj tokniuan tlen okatkaj Colosas makipiakan chikauak intlaneltokilis maski okixnamikiayaj miak tlamantli.

18. ¿Tlen uelis kipanos akin kipia chikauak itlaneltokilis? (Noijki xikita foto).

¹⁸ Pablo okinnejmachti tokniuan hebreos uelis ikaj ayakmo kiyolpaktis toTajtsin Dios maski kipias chikauak itlaneltokilis. Tla yoltlakuauas, Jehová amo kitlapojpoluis tla amo kitlakamati nion kikaki tlen kiluia. Pero tokniuan hebreos amo okachi ijkon okinpanotoka (Heb. 6:​4-9). ¿Tlen kinpanoua axkan akinmej ayakmo monechikouaj noso kinkixtiaj itech tlanechikol pero satepan moyolkopaj? Tla yolyamankej uan moyolkopaj kiteititiskej amo kichiuaj ijkon ken akinmej okijto Pablo. Pero moneki kinpaleuis Jehová ijkuak mochijchikauaj oksepa iuan mouikaskej (Ezeq. 34:​15, 16). Ikinon xamo tokniuan tlayekankej kiluiskej se tokni tlen kipia chikauak itlaneltokilis makipaleui akin kineki oksepa mouikas iuan Jehová.

19. ¿Tlen moneki nochipa matikchiuakan?

¹⁹ Tla timochijchikajtokej tikpiaskej chikauak totlaneltokilis moneki nochipa ijkon matikchiuakan. Nochipa matimomachtikan uan matimochijchikauakan timokuayejyekoskej ijkon ken Jehová mokuayejyekoua. Tla yitikpiaj chikauak totlaneltokilis matimomaluikan para nochipa kuali timouikaskej iuan toTajtsin Dios.