AXKAN tikatej itlamian tonalmej uan tikixnamikij ouijkayotl, ik non, moneki nochi ma tikxikokan (2 Tim. 3:1-5). Axkan miakej san motlasojtlaj, amo kinekij kinkakiskej oksekimej uan san niman kualanij. Nochtin akinmej ijkon kichiuaj amo itlaj kixikoaj. Ik non, tejuan ma timotlajtlanikan: “¿San niman nikualani? ¿Tlen kijtosneki nochi ma nikxiko? ¿Tlen nikchiuas para amo san niman ma nikualani uan nochi ma nikxiko?”.

¿Tlen kijtosneki itech Biblia ijkuak kijtoa “nochi kixikoa”? Amo san kijtosneki tikxikoskej ouijkayotl. Akin “nochi kixikoa” mochia ma moyektlali ouijkayotl. Akin “nochi kixikoa” amo san itech motekipachoa noijki kajsikamati tlen oksekimej kimachiliaj maski okikualanijkej noso okitlajyouiltijkej. Uan nochipa mouika iuan akinmej okikualanijkej. Ik non, Biblia kijtoa tla nochi tikxikoaj noijki tikteititiaj titetlasojtlaj (1 Cor. 13:4). * Nin noijki poui itech espíritu santo (Gál. 5:22, 23). ¿Tlen moneki tikchiuaskej para nochi tikxikoskej?

Para nochi tikxikoskej moneki tiktlajtlaniliskej iespíritu santo Jehová uan ye techmakas tla itech titlaneltokaj (Luc. 11:13). Iespíritu santo Jehová techpaleuis pero moneki tikchiuaskej ken tiktlajtlanij (Sal. 86:10, 11). Nin kijtosneki mojmostla timochijchikauaskej uan ijkon yolik nochi tikxikoskej. Pero ualeua xamo amo nochi tikxikoskej. ¿Tlen techpaleuis nochi ma tikxikokan?

Moneki timomachtiskej ken kipia iyelis Jesús uan tikchiuaskej ken ye. Ijkuak tlatitlanil Pablo okijto ma tikpatlakan toyelis noijki kijtosneki nochi ma tikxikokan, ik non, okinmilui tokniuan: “Iwan xikkawilikan in yolosewilistle katlej Cristo amechmaka ma amechyekana ipan namoyolo” (Col. 3:10, 12, 15, NHY). Moneki tikchiuaskej ken Jesús uan ma timochiakan ma moyektlali ouijkayotl tlen techtekipachoa. Tla tikchiuaskej ken Jesús, nochi tikxikoskej maski panos miak tlamantli (Juan 14:27; 16:33).

Maski tinochtin tiknekij yitiyetoskej itech xochitlali, moneki ma timokuayejyekokan Jehová okachi kimati mochias.  Biblia kijtoa: “Noni amo kijtosneki Dios yokilka tlan okisentlali kichiwas, kemi sikimeh yowejka kiyejyekoliah, yej techchixtok iwa amo kineki aka mamoixpolo, yej tinochteh matimoyolpatlakah inawak” (2 Ped. 3:9). Okachi tikinxikoskej oksekimej tla timokuayejyekoskej Jehová kimati mochias (Rom. 2:4). ¿Keman moneki nochi tikxikoskej?

Ualeua tikixnamikij miak tlamantli, ik non, moneki nochi tikxikoskej. Ualeua tikijtojtikisaj itlaj miak ipati pero moneki timochiaskej uan tikinkauiliskej oksekimej ma tlajtokan (Sant. 1:19). Noijki moneki tikinxikoskej tokniuan tlen okse tlamantli inyelis. Amo san niman ma tikualanikan. Moneki ma tikilnamikikan Jehová uan Jesús amo san niman kualanij ijkuak itlaj amo kuali tikchiuaj. Yejuan amo san kitaj tlen amo kuali tikchiuaj. Jehová uan Jesús kitaj tlen kuali tikpiaj uan kitaj timochijchikauaj okachi kuali tikpiaskej toyelis (1 Tim. 1:16; 1 Ped. 3:12).

Noijki moneki nochi tikxikoskej ijkuak ikaj kijtoa itlaj otikijtojkej noso itlaj amo kuali otikchijkej. Xamo san niman tikualaniskej tleka ijkon okijtojkej. Pero iTlajtol toTajtsin Dios kijtoa amo ma tikualanikan: “Okachi kuali se mochias uan amo se moueyinekis. Amo san niman xikualani porque xoxojtin akinmej san niman kualanij” (Ecl. 7:8, 9). Tla itlaj techteluiaj, achto ma timokuayejyekokan tlen tikijtoskej. Ijkon okichi Jesús ijkuak okiteluijkej (Mat. 11:19).

Tetajmej noijki moneki nochi kixikoskej ijkuak kinpaleuiskej inkoneuan ma kipatlakan inyelis. Ma tikitakan tlen okipanok Mattias tlen kajki Betel ompa Escandinavia. Ijkuak okatka telpochtli, okipinauiayaj ijkuak oyaya escuela porque kipia itlaneltokilis. Itatajuan amo okimatiayaj tlen okipanoaya. Pero okitakej ayakmo okipiaya chikauak itlaneltokilis. Itajtsin uan inantsin nochi okixikojkej porque Mattias okintlajtlaniaya: “¿Akin toTajtsin Dios? ¿Xamo Biblia amo iTlajtol toTajtsin Dios? ¿Kox melauak toTajtsin Dios techiluia tlen moneki tikchiuaskej?”. Mattias noijki okiluiaya itajtsin: “¿Tleka moneki itlaj nannechiluiskej tla amo nikneltoka tlen namejuan nankineltokaj?”.

Gillis okiyekijto: “Ualeua tokone sapanoa okualaniaya ijkuak touan omotlapouiaya pero okualaniaya porque tlen omomachti itech Biblia okijtoaya okiouijtili”. ¿Tlen okichi Gillis? “Miak uelta iuan onimotlapoui uan otiuejkauayaj. Onikkakiaya uan ualeua itlaj oniktlajtlaniaya uan ijkon onikajsikamatiaya tlen okimachiliaya uan  tlen omokuayejyekoaya. Se tonal, onikilui ma mokuayejyeko itech se tlamantli kanaj se tonal uan oksepa timotlapouiskiaj. Ualeua onikiluiaya omonekiaya nimokuayejyekos tlen ye onechiluiaya. Nochipa onimotlapouiaya iuan Mattias uan okajsikamatki Jesús otechmakixtiko, san Jehová tlanauatia uan noijki techtlasojtla. Sapanoa oui uan ouejka pero oksepa opejki kitlasojtla Jehová. Nosiua uan ne tiyolpakij porque nochi otikxikojkej ijkuak otikpaleuijkej Mattias uan oajsik itech iyolo tlen otikiluijkej”.

Ijkuak Gillis uan inamik okipaleuijkej intelpoch, yejuan okineltokakej Jehová kinpaleuiskia. Gillis okijto: “Onikilui Mattias ne uan inantsin sapanoa otiktlasojtlayaj uan otiktlajtlaniliayaj Jehová ma kipaleui kuali ma mokuayejyeko”. Melauak motlasojkamatij tetajmej porque nochi okixikojkej tlen intelpoch omokuayejyekoaya.

Akinmej tikchiuaj ken Cristo moneki nochi tikxikoskej ijkuak se tokalchanejka sapanoa mokokoa noso mokokoaj akinmej inmiuan timouikaj. Ma tikitakan tlen okipanok Ellen * tlen noijki chanti Escandinavia.

Yikanaj chikueyi xiuitl inamik Ellen opejki kikokoa itsonteko, ik non, ayakmo itlaj kimachilia, ayakmo teiknomati, amo yolpaki nion moyolkokoa. Ellen sapanoa otlajyoui. Ye okiyekijto: “Moneki nochi nikxikos uan sapanoa nimotlatlaujtis”. Noijki okijto: “Nechpaktia uan nechyolchikaua Filipenses 4:13, TNM ompa kijtoa: ‘Para nochi tlamantli nikpia chikaualistli itech akin nechmaka chikaualistli’”. Ellen nochi kixikoa porque Jehová kimaka chikaualistli uan itech tlaneltoka (Sal. 62:5, 6).

Jehová nochi kixikoa (2 Ped. 3:15). Biblia kijtoa miak uelta nochi okixiko (Neh. 9:30; Is. 30:18). Ma tikitakan tlen okichi Jehová ijkuak Abrahán okilui tleka kipojpoloskia Sodoma. Achto san okikak tlen okijtoaya Abrahán uan tlen okitekipachoaya. Satepan Jehová okilui Abrahán okajsikamatiaya tlen okitekipachoaya uan okilui amo kipojpoloskia Sodoma tla kinmajsiskia majtlaktli tlakamej yolmelauakej (Gén. 18:22-33). ¡Melauak kualtsin iyelis Jehová porque nochi okixiko!

Moneki nochi tikxikoskej uan ijkon tikpiaskej yankuik toyelis. Tla timochijchikauaskej nochi tikxikoskej, tikueyichiuaskej Jehová akin sapanoa techtlasojtla uan nochi kixikoa uan ma ‘tikneltokakah Dios, porke ijkó tejwah tikiseliskeh tlan Dios yotechsentlalili’ (Heb. 6:10-12).