¿TECHPAKTISKIA okachi titlapaleuiskej itech tlanechikol pero axkan amo tiuelij? Xamo tiknekiskiaj tikchiuaskej tlen kichiua se tokni noso techpaktiskia tikchiuaskej itlaj tlen achto otikchiuayaj. Pero xamo yitikpiaj miak xiuitl, timokokoaj, amo tikpiaj tomin noso moneki tikmaluiskej se tokalchanejka uan amo ueli tikchiuaj tlen tiknekiskiaj. Noijki omopatlak seki tlamantli itech ialtepe Jehová uan ayakmo titlapaleuiaj ken achto. Miak tlamantli uelis kichiuas ma timokuayejyekokan ayakmo tiktekichiuiliaj Jehová ken tiknekiskiaj. Xamo timoyolkokoaj tla ijkon techpanotok. Pero ¿tlen tikchiuaskej tla amo tiknekij timoyolkokojtoskej? ¿Tlen techpaleuis ma tiyolpakikan?

Juan akin oteapolaktiaya okichi seki tlamantli tlen techpaleuis ma tiyolpakikan. ToTajtsin Dios okimakak tekitl tlen miak ipati. Pero xamo amo omokuayejyeko tlen kipanoskia. Juan amo uejkika tetlapouiskia uan uejkika tsaktoskia. Pero ye nochipa oyolpakik. ¿Tlen okipaleui? ¿Ken tiyolpakiskej maski tikixnamikiskej ouijkayotl?

Itech xiuitl 29 kanaj metstli abril, Juan opejki tetlapouia ken momatiskia akin Mesías ijkon ken okinauati Jehová. Juan okijtoaya: “Ximoyolpatla inawak Dios, ya walajsi n tonati ijkuak Dios pewas tlanawatis” (Mat. 3:2; Luc. 1:12-17). Miakej oyayaj kikakitiuij tlen otlamachtiaya uan miakej omoyolkopkej uan omoapolaktijkej. Noijki Juan amo omomojti ijkuak okinmilui teopixkej tlen okipiayaj ome inmixko tlajyouiskiaj tla amo kipatlaskiaj inyelis (Mat. 3:5-12, TNM). Itech xiuitl 29 kanaj metstli octubre, Juan okiapolakti Jesús uan non tlen okachi miak ipati okichi. Ijkuakon opejki kinyolchikaua oksekimej ma kichiuakan ken Jesús, Mesías tlen omoijto ualaskia (Juan 1:32-37, TNM).

Juan okichi se tekitl miak ipati, ik non, Jesús okijto: “Asta axa itech nin tlaltíkpaktli  amo onka ok se tlakatl kemi Juan Bautista” (Mat. 11:11). Juan okiyolpakti nochi tlen Jehová okimakak. Axkan noijki miakej tokniuan yolpakij porque kitekichiuiliaj Jehová uan sapanoa yokinteochi. Ijkon okipanok tokni Terry. Ye uan isiua tlen itoka Sandra yikipiaj kanaj cincuenta xiuitl kitekichiuiliaj Jehová. Tokni Terry okijto: “Jehová onechkauili tlatlamantli ma niktekichiuili. Onikatka precursor regular, betelita, precursor especial, tlayekanki itech circuito, tlayekanki itech distrito uan axkan oksepa niprecursor especial”. Tiyolpakij ijkon titlapaleuiaj. Pero tla tiknekij tiyolpaktoskej, moneki timochijchikauaskej tikchiuaskej ken Juan maski mopatlas tonemilis. Ma tikitakan tleka ijkon tikijtoaj.

Juan akin oteapolaktiaya nochipa oyolpakiaya porque okitlasojkamatiliaya Jehová tekitl tlen okimakak. Ma tikitakan tleka ijkon tikijtoaj. Ijkuak Juan okiapolakti Jesús, Juan ayakmo miakej okinpiaya imachtijkauan. Pero imachtijkauan Jesús okachi omomiaktilijtokaj. Ik non, imachtijkauan Juan omotekipachojkej uan okiluijkej: “Ya [teapolaktijtok], iwa nochteh yawih inawak” (Juan 3:26). Ye okijto: “Kan monamiktilo, n novio mokawa iwan novia, iwa iamigo n novio paki ijkuak kikaki itlajtol n novio. Ijkó kiné, ajsitok nopakilis” (Juan 3:29). Juan amo omokuayejyeko tlen Jesús okichi miak ipati uan ye amitlaj ipati tlen okichi. Juan oyolpakiaya porque okipatioitaya yetos “iamigo n novio”.

Juan oyolpakiaya, ik non, okichi tlen okinauati toTajtsin Dios. Ma tikitakan ken okichi. Amo okoniaya vino porque ye okatka nazareo (Luc. 1:15). Jesús okijto Juan “amo otlakuaya nion okonia vino”. Pero Jesús uan imachtijkauan okichiuayaj seki tlamantli porque amo okatkaj nazareos (Mat. 11:18, 19). Juan amo keman okichi milagros pero okimatiaya imachtijkauan Jesús uelis kichiuaskiaj uan noijki tlen okatkaj imachtijkauan (Mat. 10:1; Juan 10:41). Juan okichi tekitl tlen Jehová okimakak uan amo san okitak tlen opanotoka.

Tejuan noijki tiyolpakiskej tla tikpatioitaj tiktekichiuiliaj Jehová. Tokni Terry tlen itech yotimotlapouijkej, okijto: “Onimochijchika kuali nikchiuas tekitl tlen Jehová onechmakak”. Mokuayejyekoa ken yokitekichiuili Jehová uan okijto: “Amitlaj nechyolkokoa. Nikilnamiki nochi tlen kualtsin onikchi”.

Tiyolpakiskej tla tikilnamiktokej miak ipati tekitl tlen tikpiaj porque “titlapalewijkeh itech iteki Dios” (1 Cor. 3:9). Ma tikijtokan tokojkoluan itlaj otechkajteuilijkej tlen yikipia miak xiuitl. Nochipa petlantos tla tikchipauaskej uan tikmaluiskej. Noijki ijkon nochipa tiyolpakiskej tla tikilnamiktokej miak ipati tiktekichiuiliaj toTajtsin Dios. Amo ma timokuayejyekokan oksekimej okachi kitekichiuiliaj Jehová noso okachi ipati tlen kichiuaj (Gál. 6:4).

Xamo Juan okimatiaya amo uejkauaskia tetlapouiskia pero amo omokuayejyeko san niman tlamiskia iteki (Juan 3:30). Itech xiuitl 30 tekiua Herodes otlanauati ma kitsakuakan. Ijkuakon yokipiaya kanaj chikuase metstli ijkuak okiapolakti Jesús. Pero Juan ok otetlapoui (Mar. 6:17-20). ¿Tlen okipaleui ma yolpaki maski otlajyoui? Okilnamiktoka tlen okachi kipatioita Jehová.

Ijkuak Juan otsaktoka, okimatiltijkej nochi tlen Jesús okichijtoka (Mat. 11:2; Luc. 7:18). Juan okimatiaya Jesús okatka Mesías. Pero xamo omotlajtlani kox kichiuaskia nochi tlen iTlajtol toTajtsin Dios okijtojka kichiuaskia Mesías. Juan okimatiaya Jesús yetoskia tekiua. Ik non, xamo omotlajtlani kox san niman tlanauatiskia uan kox kipaleuiskia ma kisa kanin otsaktoka. Juan okinekiaya kajsikamatis tlen  kichiuaskia Jesús, ik non, okintitlanki ome imachtijkauan “makitlajtlanitih kox Ye n Cristo Akin walaskia, noso kichiaskiah ok se” (Luc. 7:19). Ijkuak omokopatoj, Juan kuali okikak tlen okimatiltijkej uan nochi milagros tlen Jesús okinchijtoka. Okiluijkej tlen otlanauati Jesús: “Non amo otlachiayah, ya tlachiah, non amo onejnemiah, ya nejemih; non okipiayah lepra, yopajtikeh; non amo otlakakiah, ya tlakakih. Non yomikkeh, moyolitiah, iwa n próbesteh kinmatiltiah n kualitlájtoli” (Luc. 7:20-22).

Sapanoa okiyolchika Juan tlen okimatiltijkej imachtijkauan. Nochi non okiteititi Jesús okichi nochi profecías tlen omoijto itech Mesías. Maski Jesús amo kikixtiskia kanin otsaktoka, Juan okimatiaya miak ipati tlen ye okichi. Ye oyolpakiaya maski otsaktoka.

Tla tikchiuaj ken Juan uan tikpatioitaj tlen Jehová kipatioita, titlaxikoskej, tikmatiskej timochiaskej uan tiyolpakiskej (Col. 1:9-11). Tikilnamiktoskej miak ipati tiktekichiuiliskej Jehová tla tiktlajtoltiaj Biblia uan itech timokuayejyekoaj (1 Cor. 15:58). Sandra tlen itech yotimotlapouijkej, okijto: “Mojmostla niktlajtoltia se capítulo uan non nechpaleuia okachi kuali ma nimouika iuan Jehová uan itech ma nimokuayejyeko”. Ma tikinmitakan tokniuan ken kitekichiuiliaj Jehová uan ijkon kipaleuiaj iTekiuajkayo. Ijkon amo san timotekipachojtoskej uan timokuayejyekoskej nochi tlen Jehová kichijtok. Sandra okijto: “Tlen tikitaj sejse metstli itech JW Broadcasting^® techpaleuia ma tikmachilikan tikatej iuan nochtin tokniuan uan tiyolpakij maski san kanin tiktekichiuilijtokej Jehová”.

Maski Juan akin oteapolaktiaya amo uejkika okitekichiuili Jehová, okichi “ika iespíritu iwa iweletilis n tiotlajto Elías”. Ijkon ken Elías, Juan “okatka se tlakatl kemi tejwah” (Luc. 1:17; Sant. 5:17). Ma tiktlasojkamatilikan Jehová uan ma tiktekichiuilikan ken okichi Juan. Ijkon tiyolpakiskej tikpaleuiskej iTekiuajkayo toTajtsin Dios maski tikixnamikiskej ouijkayotl.