TLAMACHTIL 33
Jehová nochipa kita tlen techpanotok
“Jehová kinmita akinmej kitlakaitaj” (SAL. 33:18).
TLAKUIKALI 4 “Jehová notlajpixki”
XIKILNAMIKTO *
1. ¿Tleka Jesús okitlatlaujti Jehová makinmalui imachtijkauan?
YOUAK ijkuak yikimiktiskiaj Jesús okitlatlaujti Jehová makinmalui imachtijkauan (Juan 17:15, 20). Jehová nochipa kinmaluia uan kinpaleuia itekipanojkauan. Jesús okimatiaya Satanás sapanoua kintlajyouiltiskia imachtijkauan, ik non, monekiskia okachi makinpaleui Jehová.
2. Ijkon ken kijtoua Salmo 33:18-20, ¿tleka amo moneki matimomojtikan?
2 Akinmej kinyekanaj Satanás kinekij matikchiuakan ken yejuan. Tlen techpanoua uelis kichiuas matimosotlauakan uan ayakmo matiknekikan tiktlakamatiskej Jehová. Axkan tikitaskej amo moneki timomojtiskej. Jehová kita tlen techpanotok uan kineki techpaleuis. Tikitaskej tlen okinpanok yiuejkika ome itekipanojkauan Jehová uan non kiteititia ye “kinmita akinmej kitlakaitaj” (xiktlajtolti Salmo 33:18-20).
IJKUAK TIMOMACHILIAJ TOSELTI
3. ¿Tlen uelis kichiuas matimomachilikan toselti?
3 Maski tikinpiaj miakej tokniuan ualeua uelis timomachiliskej toselti. Xamo ijkon momachiliaj telpochmej ijkuak moneki kinmiluiskej akinmej inmiuan momachtiaj tlen kineltokaj noso ijkuak oksekan peua monechikouaj. Xamo timoyolkokouaj noso amo kuali timomachiliaj uan timokuayejyekouaj nochipa ijkon timomachilijtoskej uan amikaj uelis techpaleuis. Xamo amikaj tikiluiaj ken timomachiliaj porque timokuayejyekouaj amo techajsikamatis uan amikaj techtlasojtla. Tla timomachiliaj toselti uelis kichiuas matimoyolkokokan uan matimosotlauakan. Jehová amo kineki ijkon matimomachilikan. ¿Tleka ijkon tikijtouaj?
4. ¿Tleka Elías okijto “san ne nimokaua”?
4 Matikitakan tlen okipanok Elías. Ye omotlajtijtinemia kanaj 40 tonal porque Jezabel okijtojka kimiktis (1 Rey. 19: 1-9). Omotlatito itech se cueva uan ompa okilui Jehová “san ne nimokaua” (1 Rey. 19:10). Omokuayejyekouaya ayakmo okatkaj oksekimej profetas. Pero Abdías okinpaleui 100 profetas uan Jezabel amo okinmikti (1 Rey. 18:7, 13). Ik non, ¿tleka Elías omomachiliaya iselti? Xamo omokuayejyeko yokinmiktijkaj oksekimej profetas maski Abdías yokinpaleuijka. Noso noijki ijkon omomachili porque ijkuak okinmiktijkej iprofetas Baal ompa altepetl Carmelo, amikaj okinek kitekichiuilis Jehová. Xamo noijki omokuayejyeko amikaj okimatiaya tlen okipanotoka uan amikaj okitlasojtlaya. Maski Biblia amo kijtoua nochi tlen opanok. Jehová okajsikamatiaya Elías uan okimatiaya ken kipaleuiskia.
¿Ken techyolseuia tikmatiskej Jehová okipaleui Elías ijkuak timomachiliaj toselti? (Xikinmita párrafos 5 uan 6).
5. ¿Tlen okichi Jehová para Elías amo mamomachili iselti?
5 Jehová miak uelta okipaleui Elías. Okiyole makijto tlen okimachiliaya, ik non, ome uelta okitlajtlani: ¿Tlen tikchiua nikan Elías? (1 Rey. 19:9, 13). Jehová okikak ijkuak Elías okilui ken omomachiliaya uan okititi iuan okatka uan kipaleuiskia porque sapanoua chikauak. Noijki okilui ompa Israel ok okatkaj akinmej okiueyichiuaya (1 Rey. 19:11, 12, 18). Elías omoyolseui porque okilui Jehová ken omomachiliaya uan okititi kipaleuiskia. Jehová okititlanki makipejpena Hazael matlanauati ompa Siria, Jehú mayeto tekiua ompa Israel uan Eliseo mayeto profeta (1 Rey. 19:15, 16). Ijkon Jehová okipaleui Elías kuali mamomachili uan okititlanki Eliseo makipaleuiti. ¿Tlen uelis tikchiuaskej tla timomachiliaj toselti?
6. ¿Tlen uelis tikiluiskej Jehová ijkuak timomachiliaj toselti? (Salmo 62:8).
6 Jehová kineki ijkuak tiktlatlaujtiaj matikiluikan tlen tikmachiliaj. Ye kimati ken timomachiliaj uan techilnamiktia techkakis ijkuak tiktlatlaujtiskej (1 Tes. 5:17). Ye kiyolpaktia ijkuak tiktlatlaujtiaj (Prov. 15:8). ¿Tlen uelis tikiluiskej Jehová ijkuak timomachiliaj toselti? Uelis tikiluiskej ken timomachiliaj ijkon ken okichi Elías (xiktlajtolti Salmo 62:8). Matikiluikan tlen techtekipachouaj uan tlen tikmachiliaj, noijki matechpaleui matikitakan tlen moneki tikchiuaskej. Tla titelpochtli noso tiichpochtli, ¿tlen uelis tikchiuas tla timomojtiaj tikinmiluis akinmej inmiuan timomachtiaj tlen tikneltoka? Uelis tikiluis Jehová mamitsyolchikaua uan xiyeto ixtlamatki para tikinmiluis tlen tikneltoka (Luc. 21:14, 15). ¿Tlen uelis tikchiuas tla amo kuali timomachilia? Xikilui Jehová mamitspaleui ximotlapoui iuan se tokni uan makipaleui mamitsajsikamati. Tla tikiluiaj Jehová ken timomachiliaj, tikitaj ken technankilia uan tikinkaluiaj oksekimej matechpaleuikan, ayakmo okachi timomachiliskej toselti.
¿Okachi titetlapouiaj iuan tokniuan? (Xikita párrafo 7).
7. ¿Tlen techmachtia tlen okipanok Mauricio?
7 Jehová techkauilia matiktekichiuilikan. Ye kipatioita tlen tikchiuaj ijkuak titetlapouiaj uan kanin timonechikouaj (Sal. 110:3). Tla tiktekichiuiliaj Jehová, techpaleuis amo matimomachilikan toselti. ¿Tleka ijkon tikijtouaj? Matikitakan tlen okipanok se telpochtli tlen itoka Mauricio. * Ijkuak yikin omoapolakti se iyolikni ayakmo okinek kitekichiuilis Jehová. Ye okijto: “Ijkuak onikitak noyolikni ayakmo okitekichiuili Jehová. Onikijtouaya kox ok uelis niktekichiuilijtos uan nikchiuas ijkon ken onikilui ijkuak ixpan onimotemakak. Onimomachiliaya noselti uan onimokuayejyekouaya amikaj nechajsikamatis”. ¿Tlen okipaleui ayakmo ijkon mamomachili? Ye okijto: “Ijkuak onitetlapouiaya iuan tokniuan onechpaleui amo san manimokuayejyekojto tlen nechpanotok. Opejki niyolpaki uan ayakmo noselti nimomachilia”. Maski amo tikatej iuan tokniuan uelis tiyolpakiskej uan techyolchikauas ijkuak inmiuan titetlapouiaj ika carta uan ika teléfono. ¿Tlen okachi okipaleui Mauricio? Ye okijto: “Opejki okachi nitlapaleuia kanin nimonechikoua uan okachi kuali nimoyektlalia para nitlamachtis. Ijkon onikitak tokniuan nechtlasojtla”.
IJKUAK TITLAJYOUIAJ TIMOTEKIPACHOUAJ
8. ¿Ken timomachiliaj ijkuak itlaj amo kuali techpanoua?
8 Tikmatij tinochtin itlamian tonalmej techpanos tlen amo kuali. (2 Tim. 3:1). Xamo amo timokuayejyekouaj kox itlaj techpanos. Xamo oixpoliuik akin otiktlasojtlaya, amo tikpiaskej tomin noso techiluiskej sapanoua timokokouaj. Ijkuak ijkon techpanos xamo timoyolkokoskej uan timosotlauaskej uan okachi ijkuak techpanoua nochi non tlamantli. Pero matikilnamiktokan Jehová kita nochi tlen techpanotok uan techpaleuia matitlaxikokan.
9. ¿Tlen okipanok Job?
9 Matikitakan ken Jehová okipaleui Job. Ye sapanoua okitekichiuiliaya Jehová pero opejki kipanoua tlen amo kuali. San itech se tonal okinmiktijkej iyolkauan, itlakeualuan uan oixpolikej ikoneuan (Job 1:13-19). Ijkuak yomoyolseuijtiaya, ye sapanoua omokoko uan hasta amo okixmatiayaj (Job 2:7). Job sapanoua otlajyoui, ik non, okijto ayakmo okinekiaya yoltos (Job 7:16).
Jehová kitlapouia Job ken kinmaluia nochi tlen okichijchi. Ijkon kiteititia ken kimaluia akinmej kitekichiuiliaj porque kintlasojtla. (Xikita párrafo 10).
10. ¿Ken okipaleui Jehová makixiko Job nochi tlen okipanoka? (Xikita dibujo tlen kajki itech página 1).
10 Jehová okitak tlen okipanotoka Job. Ye sapanoua okitlasojtlaya, ik non, okipaleui matlaxiko uan makitekichiuilijto. Jehová iuan omotlapoui uan okilui sapanoua ixtlamatki uan tinochtin techtlasojtla. Okijto okatkaj uejueyij yolkamej (Job 38:1, 2; 39:9, 13, 19, 27; 40:15; 41:1, 2). Satepan okititlanili Elihú makiyolseuiti uan makiyolchikauati. Elihú okilnamikti Job, Jehová kinteochiua akinmej tlaxikouaj uan kitekichiuiliaj. Pero Jehová okinekiaya Elihú makilui tlen omonekiaya kichiuas. Okititi kitlasojtla ijkuak okilui tleka ijkon okipanotoka. Okilnamikti tejuan amo tichikauakej nion tiixtlamatkej ken Jehová porque ye okichijchi nochi tlen onka (Job 37:14). Jehová okilui Job mamotlatlaujti inpatka iyolikniuan (Job 42:8-10). ¿Ken techpaleuia Jehová ijkuak techpanoua tlen amo kuali?
11. ¿Ken techyolseuia Biblia ijkuak titlajyouiaj?
11 Maski axkan Jehová amo touan motlapouia ken okichi iuan Job, techtlapouia ika iTlajtol (Rom. 15:4). Techyolchikaua tikmatiskej satepan okachi kuali tiyetoskej. Matikitakan ken techpaleuia Biblia ijkuak techpanoua itlaj tlen amo kuali. Ompa Jehová techiluia maski titlajyouiskej amitlaj “weletis techachiwas de itech itlasojtlalis” (Rom. 8:38, 39). Noijki techiluia ye kajki innauak “nochtin akinmej kinotsaj”, kijtosneki kinkaki ijkuak kitlatlaujtiaj (Sal. 145:18). Jehová techiluia tla tikneltoka, maski san tlen techpanos uelis titlaxikoskej uan tiyolpakiskej (1 Cor. 10:13; Sant. 1:2, 12). Biblia kijtoua amo nochipa titlajyouijtoskej uan satepan techteochiuas porque nochipa tiyoltoskej (2 Cor. 4:16-18). Jehová techiluia kixpolos Satanás uan akinmej kichiuaj ken ye porque yejuan techtlajyouiltia (Sal. 37:10). ¿Tikinmilnamiki seki textos tlen mitspaleuiskej xitlaxiko satepan?
12. ¿Tlen uelis tikchiuaskej para Jehová matechpaleui ika Biblia?
12 Tikteititiskej tikkauiliaj Jehová matechpaleui tla mojmostla tiktlajtoltiaj Biblia uan timokuayejyekouaj. Okachi titlaneltokaskej uan okachi kuali iuan timouikaskej tla tikchiuaj tlen timomachtiaj uan non techpaleuis matitlaxikokan. Jehová techmakas iespíritu santo tla tikneltokaj tlen kijtoua Biblia. Maski san tlen techpanos, ika iespíritu santo Jehová, uelis titlaxikoskej (2 Cor. 4:7-10).
13. ¿Ken techpaleuiaj tlamachtilmej tlen techmaka “tlakeuali yolmelajki uan ixtlamatki”?
13 Jehová kipaleuia “tlakeuali yolmelajki uan ixtlamatki” para matechmaka amatlajkuilolmej, videos uan tlakuikalmej tlen techpaleuia iuan matimouikakan uan okachi matitlaneltokakan (Mat. 24:45, TNM). Matiktlasojkamatilikan nochi tlen Jehová techmaka porque tikseliaj ijkuak moneki. Se tokni tlen chanti Estados Unidos okijto ken kipatioita nochi tlamachtilmej, ye okijto: “Yinikpia kanaj 40 xiuitl niktekichiuilijtok Jehová uan ualeua moneki nikteititis niktlakamati”. Tokni sapanoua otlajyoui. Ikoltsin oixpoliuik porque se tlakatl tlen otlauanki amo kuali okiuikaya icarro, itatajuan omokokojkej uan oixpolikej uan ye ome uelta omokoko ika cáncer. ¿Tlen okipaleui mamoyolchikaua? Ye okijto: “Jehová nochipa nechpaleuijtok. Tlamachtilmej tlen techmaka ika tlakeuali yolmelajki nechyolchikajtok. Ijkon ueli nikijtoua ken Job okijto: ‘¡Hasta ijkuak nimikis nikpias noyolo ajsitok!’” (Job 27:5).
¿Ken uelis tikinpaleuiskej tokniuan? (Xikita párrafo 14).
14. ¿Ken techpaleuia Jehová ijkuak titlajyouiaj? (1 Tesalonisenses 4:9).
14 Jehová kinmachtia itekipanojkauan mamotlasojtlakan uan ijkuak tlajyouiaj mamopaleuikan (2 Cor. 1:3, 4; xiktlajtolti 1 Tesalonisenses 4:9). Tokniuan kichiuaj ijkon ken Elihú porque ijkuak titlajyouiaj kinekij techpaleuiskej nochipa matiktekichiuilikan Jehová (Hech. 14:22). Ijkon okipanok se tokni tlen itoka Diane. Ijkuak inamik sapanoua omokoko tokniuan okiyolejkej mamouika iuan Jehová. Ye okijto: “Sapanoua otitlajyouijkej seki metstli pero otikitakej Jehová otechmalui uan otechpaleui. Tokniuan sapanoua otechpaleuijkej porque otechnotsayaj, otechtlajpalouayaj uan ijkon ueli otitlaxikojkej. Ne amo ueli onikuikaya carro, ik non, tokniuan noijki okitakej ken nechpaleuiskej para manimonechiko uan manitetlapoui”. ¡Tiyolpakij tikinpiaj miakej tokniuan tlen sapanoua techtlasojtlaj!
TIKTLASOJKAMATILIAJ JEHOVÁ TECHMALUIA
15. ¿Tleka tikneltokaj uelis titlaxikoskej maski titlajyouiaj?
15 Tinochtin techpanoua tlen amo kuali. Pero yotikitakej amo tikatej toselti, Jehová kita nochi tlen techpanotok. Ye techkaki ijkuak tikiluiaj matechpaleui (Is. 43:2). Jehová techmaka miak tlamantli para titlaxikoskej: Biblia, tokniuan, tlen ika timomachtiskej uan techkauilia matiktlatlaujtikan.
16. ¿Tlen moneki tikchiuaskej tla tiknekij Jehová ok matechmaluijto?
16 Sapanoua tiktlasojkamatiliaj Jehová porque nochipa kita tlen techpanotok. Ye techpaleuia matiyolpakikan (Sal. 33:21). ¿Ken uelis tiktlasojkamatiliskej Jehová nochipa techmaluia? Uelis ijkon tikchiuaskej, tla timomachtia Biblia, tikinkauiliaj matechpaleuikan tokniuan, timomachtiaj amatlajkuilolmej uan tiktlatlaujtiaj. Jehová ok techmaluijtos tla timochijchikauaj tikchiuaskej tlen moneki. Moneki timochijchikauaskej tiktlakamatiskej uan tikchiuaskej tlen ye kineki. Tla ijkon tikchiuaj, ye nochipa techmaluis (1 Ped. 3:12).
TLAKUIKALI 30 Noyolikni, noTajtsin uan noDios