1. Ijkon ken kijtoua 1 Tesalonicenses 5:11, ¿tlen tikchiuaj tinochtin?

 ¿YOTITLAPALEUI ijkuak okichijchijkej noso okiyektlalijkej se kali kanin timonechikouaj? Xamo tikilnamiki ijkuak achto otimonechiko itech non kali sapanoua otiyolpakik uan otiktlasojkamatili Jehová. Xamo otiknekiaya tichokas uan amo ueli otitlakuikaya. Kalmej kanin timonechikouaj sapanoua kualtsitsintin uan kiueyichiuaj Jehová. Pero onka okse tlamantli tlen okachi miak ipati uan okachi kiueyichiua Jehová: ijkuak tikinyolchikauaj akinmej touan monechikouaj. Apóstol Pablo ijkon okijto ijkuak okijkuilo tlen kijtoua 1 Tesalonicenses 5:11 (xiktlajtolti).

2. ¿Tlen tikitaskej?

² Tlen okichi apóstol Pablo techpaleuis matikmatikan ken tikinyolchikauaskej tokniuan, ye okinmiknomatiaya oksekimej. Itech nin tlamachtil tikitaskej ken okinpaleui tokniuan matlaxikokan, kuali mamouikakan uan okachi makineltokakan Jehová. Matikitakan ken uelis tikchiuaskej ijkon ken ye okichi (1 Cor. 11:1).

3. ¿Tlen okachi okipatioitak Pablo?

³ Pablo sapanoua okintlasojtlaya tokniuan. Ye noijki otlajyoui, ik non, okinmiknomatiaya uan okinmajsikamatiaya akinmej otlajyouijtokaj. Se tonal otlanki itomin uan opejki tekipanoua para kipias tlen moneki uan kinpaleuis tokniuan (Hech. 20:34). Ye okinchijchiuaya mantajkalmej. Ijkuak oajsito ompa Corinto otekipano inmiuan Áquila uan Priscila porque yejuan noijki okinchijchiuayaj mantajkalmej. “Nochi sábado” okintlapouiaya judíos uan griegos, pero ijkuak oajsitoj Silas uan Timoteo, “Pablo okachi okimosenmák iteki; otetlapowiaya  de n kualitlájtoli de Dios” (Hech. 18:2-5). Maski Apóstol Pablo okipaktiaya tekipanos, ye okachi okipatioitaya kitekichiuilis Jehová, ik non, okinyole tokniuan nochipa makiueyichiuakan Jehová uan amo okachi makipatioitakan kitaskej ken kinpanoltiskej infamilia noso okseki tlamantli makichiua ayakmo makitekichiuilikan (Filip. 1:10).

4. ¿Tlen okichijkej Pablo uan Timoteo para kinpaleuiskej tokniuan matlaxikokan?

⁴ Ijkuak opejkej monechikouaj ompa Tesalónica opejki kintlajyouiltiaj tokniuan. Se tonal ijkuak sekimej okinekiayaj kitlajyouiltiskej Pablo uan Silas pero amo okimajsikej, okinuikakej oksekimej tokniuan uan okintlajyouiltijkej uan okinuikakej inmixpan tekiuajkej. Nonmej tlakamej otsajtsiayaj: “Yejwah [amo] kitlakitah itlanawatil n torey César” (Hech. 17:6, 7). Xamo ijkuak okitakej okinkokoliayaj akinmej ompa ochantiayaj omoyolkokojkej uan non uelis kichiuaskia ayakmo makinekikan kitekichiuiliskej Jehová. Pero Pablo amo okinekiaya ijkon makinpano, ik non, ijkuak ye uan Silas oksekan oyajkej, okititlankej Timoteo para makinmalui tokniuan. Satepan Pablo okinmilnamikti akinmej ochantiayaj Tesalónica uan okinmilui: “Otiktitlankeh tokni Timoteo […] para manomechyekketsa iwa manomechyolchikawa itech nomotlaneltokalis, para amaka mamosotlawa ika nochi tlan kijyowia” (1 Tes. 3:2, 3). Ijkuak Timoteo ochantiaya ompa Listra xamo okitlajyouiltijkej. Ye okitak ken Pablo okinyolchika tokniuan tlen ompa ochantiayaj uan noijki okitak Jehová okinmalui. Ik non, ye okinmilui akinmej yikin opejki kichiuaj ken Cristo amo mamomojtikan porque Jehová kinmaluiskia (Hech. 14:8, 19-22; Heb. 12:2).

5. ¿Ken okipaleui Ramón tlen okichi se tlayekanki?

⁵ ¿Tlen okseki tlamantli okichi Pablo para kinyolchikauas tokniuan? Ijkuak ye uan Bernabé omokopkej ompa Listra, Iconio uan Antioquía “okimpejpenkeh sikimeh tlayakankeh makinyakanakah” (Hech. 14:21-23). Nonmej tlayekankej sapanoua okinyolchikajkej tokniuan ijkon ken kichiuaj tlayekankej tlen axkan katej. Se tokni tlen itoka Ramón okijto: “Ijkuak onikajxiti 15 xiuitl notajtsin otechkajte uan nonantsin okikixtijkej itech tlanechikol. Onikmachiliaya ayakmo ikaj onechtlasojtlaya uan sapanoua onimoyolkokouaya”. ¿Tlen okipaleui? Ye okijto: “Se tlayekanki tlen itoka Tony nouan omotlapouiaya ijkuak otimonechikouayaj uan noijki ijkuak amo otimonechikouayaj. Otechtlapouiaya ken sekimej tokniuan oyolpakiayaj maski otlajyouijkej. Onechtlajtoltiliaya Salmo 27:10 uan onechilnamiktiaya tekiua Ezequías okitekichiuili Jehová ika nochi iyolo maski itajtsin okichiuaya tlen amo kuali”. ¿Ken okipaleui Ramón tlen okichi tokni? Ye okijto: “Niktlasojkamatilia Tony porque onechyolchika, ik non, satepan onimochi precursor uan sapanoua niyolpaki”. Tokniuan tlayekankej, xikitakan akinmej moneki nankinpaleuiskej ijkon ken okipaleuijkej Ramón uan xikinyolchikauakan (Prov. 12:25).

6. ¿Tlen okichi Pablo?

⁶ Pablo okinmilnamikti tokniuan miakej otlaxikojkej porque Jehová okinpaleui (Heb. 12:1). Ye okimatiaya tlen yiuejkika okinpanok tokniuan kinpaleuiskia mamoyolchikauakan uan mayetokan “kan weyi altepetl de Dios non yolitok”  (Heb. 12:22). Tejuan noijki techyolchikaua ijkuak tiktlajtoltiaj Jehová, okinpaleui Gedeón, Barac, David, Samuel uan oksekimej itekipanojkauan (Heb. 11:32-35). Axkan tlen kinpanoua sekimej tokniuan noijki techyolchikaua. Miakej tokniuan kintitlanij cartas ompa kanin techyekanaj iTlaixpantijkauan Jehová. Yejuan kijtouaj sapanoua kinyolchikaua ijkuak kitlajtoltiaj tlen kinpanoua sekimej tokniuan.

7. ¿Tlen techmachtia tlen okijto Pablo itech Romanos 14:19-21?

⁷ Tla timochijchikauaj kuali timouikaskej inmiuan tokniuan ijkon uelis tikinpaleuiskej. San sekan timopaleuiaj maski tlatlamantli timokuayejyekouaj uan noijki tikinkauiliaj tokniuan makichiuakan tlen kinekij pero ijkon ken kijtouaj principios bíblicos. Matikitakan tlen opanok itech tlanechikol ompa Roma, okatkaj judíos uan oksekimej tlen okatka okse inmialtepe. Ijkuakon ayakmo omonekiaya kitlakamatiskej tlanauatil tlen okijkuilo Moisés uan yiuelis kikuaskiaj seki tlamantli (Mar. 7:19). Sekimej judíos nochi okikuayaj pero oksekimej amo okinekiayaj, ik non, ayakmo san sekan okatkaj. Pablo okinmititi omonekiaya kuali mouikaskej uan okinmilui: “Satlawel kuali tla amo tikkuas nakatl, nion tikonis vino, nion tikchiwas itla non ika matlajtlakolchiwa mokni” (xiktlajtolti Romanos 14:19-21). Tlen ye okijto okinpaleui tokniuan makajsikamatikan tlen okichijtokaj kinmijtlakoskia uan noijki oksekimej tokniuan. Ye noijki okipatlak tlen okichiuaya para amo kinmijtlakos (1 Cor. 9:19-22). Tejuan noijki uelis tikchiuaskej ken Pablo uan tikinpaleuiskej tokniuan kuali mamouikakan tla amo tikchiuaj san tlen tejuan techpaktia.

8. ¿Tlen okichi Pablo para amo makualanikan tokniuan?

⁸ Pero ¿tlen uelis tikchiuaskej tla amo timokuayejyekouaj ken oksekimej, ijkuak moneki tikpejpenaskej itlaj miak ipati? Matikitakan tlen okichi Pablo, non techpaleuis amo matimokualanikan. Itech achto siglo sekimej tokniuan okijtouayaj tlakamej tlen amo okatkaj judíos omonekiaya makimochiuilikan circuncisión para amo kinkuejsoskiaj oksekimej (Gál. 6:12). Pablo amo omokuayejyekouaya ken nonmej tokniuan pero amo okinchiualti mamokuayejyekokan ken ye porque okatka yolyamanki uan okinmiluito tlen opanotoka apóstoles uan tlayekankej tlen okatkaj Jerusalén (Hech. 15:1, 2). Tlen ye okichi okinpaleui tokniuan mayolpakikan uan amo mamokualanikan (Hech. 15:30, 31).

9. ¿Ken uelis tikchiuaskej ijkon ken okichi Pablo?

⁹ Tla se tonal amo tiknekij tikchiuaskej tlen oksekimej mokuayejyekouaj, uelis tikinmiluiskej matechpaleuikan tokniuan tlen Jehová okintlali matechmaluikan. Noijki tikinpiaj amatlajkuilolmej tlen techpaleuiaj matikajsikamatikan tlen kijtoua Biblia uan tlen technauatia ialtepe toTajtsin Dios. Tla tikchiuaj tlen ompa kijtoua uan amo tikchiuaj tlen tejuan tiknekij, kuali timouikaskej inmiuan tokniuan.

10. ¿Tlen okseki tlamantli okichi Pablo para kuali mamouikakan tokniuan?

¹⁰ Pablo okitaya tlen kuali okichiuayaj oksekimej uan amo san okitaya tlen amo kuali okichiuayaj, ijkon kuali omouikak  inmiuan tokniuan. Ijkuak otlanki okijkuilo carta tlen okintitlanili tokniuan tlen ochantiayaj ompa Roma, okijto tlen kuali okichiuayaj nochtin tokniuan uan okijto intoka. ¿Ken uelis tikchiuaskej tlen ye okichi? Matikinmiluikan tokniuan tlen kuali kichiuaj. Ijkon titlapaleuiskej okachi mamotlasojtlakan tokniuan uan kuali mamouikakan.

11. ¿Tlen uelis tikchiuaskej tla amo techpaktia tlen kichiuaj sekimej tokniuan?

¹¹ Xamo ualeua tokniuan maski kuali mouikaj iuan Jehová amo kinpaktis tlen oksekimej kichiuaj uan uelis mokualaniskej. Ijkon okinpanok Pablo uan Bernabé, yejuan kuali omouikayaj pero se tonal omokualanijkej porque amo okimatiayaj kox kiuikaskiaj Marcos ijkuak yaskiaj kintlajpalotiuij tokniuan. ¿Tlen opanok satepan? Biblia kijtoua: “Iwa kemi amo omoajsikamatkeh, omoxexelojkeh” (Hech. 15:37-39). Pero Pablo, Bernabé uan Marcos omoyolseuijkej. Ijkon okiteititijkej sapanoua okipatioitayaj kuali mouikaskej uan san sekan kitekichiuiliskej Jehová iuan tokniuan. Satepan Pablo okijto Bernabé uan Marcos kuali tlen okichiuayaj (1 Cor. 9:6; Col. 4:10). Tejuan noijki moneki san niman matimoyolseuikan ijkuak timokualaniaj inmiuan tokniuan uan moneki matikitakan tlen kuali kichiuaj. Tla ijkon tikchiuaj, kuali timouikaskej uan san sekan tiktekichiuiliskej Jehová (Efes. 4:3).

12. ¿Tlen kinpanoua sekimej tokniuan?

¹² Noijki tikinyolchikauaj tokniuan ijkuak tikinpaleuiaj okachi makineltokakan Jehová. Sekimej tokniuan moneki tlaxikoskej porque kinpinauiaj infamiliares, noijki kinpinauiaj akinmej inmiuan tekipanouaj noso akinmej inmiuan momachtiaj. Oksekimej mokokouaj noso moyolkokouaj. Xamo oksekimej yikipia miak xiuitl omoapolaktijkej uan ok kichixtokej matlami tlen amo kuali. Nochi non tlamantli uelis kichiuas ayakmo matlaneltokakan. Tokniuan tlen okatkaj itech achto siglo ijkon okinpanok. ¿Tlen okichi Pablo para kinyolchikauas?

13. ¿Ken okinpaleui Pablo tokniuan tlen okinpinauiayaj?

¹³ Pablo okinpaleui tokniuan makineltokakan tlen kijtoua iTlajtol toTajtsin Dios. Xamo tokniuan judíos amo okimatiayaj tlen kijtoskej ijkuak infamiliares okinmiluiayaj judíos okachi inpati uan amo ken akinmej okichiuayaj ken Cristo. Xamo carta tlen Pablo okinmijkuilili hebreos sapanoua okinyolchika (Heb. 1:5, 6; 2:2, 3; 9:24, 25). Nonmej tokniuan ueli okinmiluiayaj akinmej okinteneuayaj tlen okijto Pablo uan ayakmo itlaj okinmiluiayaj. ¿Uan tejuan ken uelis tikinpaleuiskej tokniuan tlen kipinauiaj? Uelis tikinmititiskej ken kiyekijtoskej tlen kineltokaj ika amatlajkuilolmej tlen tikinpiaj ken: ¿Es la vida obra de un Creador? Uan El origen de la vida. Cinco cuestiones dignas de análisis. Uelis tikinpaleuiskej telpochmej uan ichpochmej makimatikan ken kiyekijtoskej ijkuak kintlajtlaniskej tleka kineltokaj ikaj otlachijchi.

14. ¿Tlen okichi Pablo maski sapanoua otetlapouiaya?

¹⁴ Pablo okinmilui tokniuan mamopaleuikan uan ijkon kiteititiskiaj motlasojtlaj (Heb. 10:24). Ye amo san okintlapouiaya, noijki okinpaleuiaya ika tlen  omonekiaya. Ijkuak tokniuan tlen ochantiayaj Judea amo okipiayaj tlen kikuaskej Pablo okinuikili tlen omonekiaya (Hech. 11:27-30). Maski sapanoa otetlapouiaya uan otlamachtiaya, okitaya ken kinpaleuis tokniuan tlen amitlaj okipiayaj (Gál. 2:10). Ijkon okinpaleuiaya okachi makineltokakan Jehová nochipa kinmaluiskia. Axkan noijki tikinpaleuiaj tokniuan okachi matlaneltokakan ijkuak tiauij titlapaleuitiuij, ijkuak panoua tlen amo kuali uan ijkuak tiktemakaj totomin.

15, 16. ¿Ken uelis tikinpaleuiskej akinmej ayakmo kuali mouikaj iuan Jehová?

¹⁵ Pablo okinpaleui akinmej ayakmo kuali omouikayaj iuan Jehová uan okinpatioitak. Ye okinmiknomatki, okinyolchika uan okinmititi kintlasojtla ijkuak okintlapoui (Heb. 6:9; 10:39). Ijkuak Pablo okinmijkuilili carta tlen itoka Hebreos ye okijto “tejuan” uan amo okijto “namejuan”, ijkon okiteititi ye noijki omonekiaya kichiuas tlen okijtouaya (Heb. 2:1, 3). Axkan tejuan noijki tikchiuaj ken Pablo uan tikinpatioitaj akinmej ayakmo kuali omouikayaj iuan Jehová. Tikteititiaj techtekipachoua tlen kinpanoua uan tikinyolchikauaj, ijkon tikteititiaj tikintlasojtlaj. Matikilnamiktokan tlen tikinmiluiaj tokniuan uelis kinyolchikauas pero noijki moneki matikteititikan tikintlasojtlaj ijkuak tikintlapouiaj.

¹⁶ Pablo okinmilnamikti tokniuan Jehová amo kilkaua tlen tikchiuaj (Heb. 10:32-34). Tejuan noijki uelis ijkon tikchiuaskej ijkuak tiknekij tikinpaleuiskej akinmej ayakmo kuali mouikaj iuan Jehová. Uelis tikinmiluiskej matechiluikan ken okixmatkej Jehová noso uelis tikintlajtlaniskej ken yokinpaleui Jehová. Ijkuak inmiuan timotlapouiskej matikinmiluikan Jehová  amo keman kilkauas nochi tlen yokichijkej para kiteititiskej kitlasojtlaj uan nochipa kinpaleuis (Heb. 6:10; 13:5, 6). Non kinyolinis tokniuan makinekikan kitekichiuiliskej Jehová.

17. ¿Ken uelis tikinyolchikauaskej tokniuan?

¹⁷ Akin kalchijchiua ijkuak yimiak xiuitl kinchijchitok kalmej okachi kimati kalchijchiuas. Tejuan noijki uelis tikmatiskej ken tikinyolchikauaskej oksekimej tla nochipa ijkon tikchiuaj. Matikinmiluikan ken sekimej tokniuan tlen tlajyouiaj yotlaxikojkej, ijkon tikinyolchikauaskej uan non kinpaleuis noijki matlaxikokan. Noijki moneki matikinmiluikan tokniuan tlen kuali kichiuaj, tla itlaj panoua, san niman matikyektlalikan uan amo matimokualanikan. Matikinmiluikan tokniuan itlaj tlen miak ipati yotimomachtijkej itech Biblia, ijkon yejuan moyolchikauaskej, matikinpaleuikan ijkuak monekis uan noijki matikinpaleuikan akinmej ayakmo kuali mouikaj iuan Jehová.

18. ¿Tlen uelis tikchiuaskej?

¹⁸ Akinmej tlapaleuiaj para kinchijchiuaskej kalmej kanin timonechikouaj sapanoua yolpakij. Tejuan noijki tiyolpakiskej tla tikinyolchikauaj tokniuan. Kalmej tlen tokniuan kinchijchiuaj satepan ijtlakauij pero tla tikinyolchikauaj non nochipa kinpaleuis. Ik non, matimochijchikauakan matikchiuakan tlen kijtoua 1 Tesalonicenses 5:11: “Ximosepanyolchikawakah iwa ximochikawakah ijkó kemi ya nonkichijtiwitseh”.