1. ¿Tleka akinmej ochantiayaj Babilonia kuali okitakej Daniel?

 IJKUAK Daniel okatka telpochtli, babilonios okikixtijkej ialtepe uan okiuikakej Babilonia. Pero akinmej ompa ochantiayaj kuali okitakej maski okatka telpochtli. Porque kuali omotaya uan oualaya itech se familia tlen oueyititoka (1 Sam. 16:7). Ikinon kuali okimachtijkej para mayeto ijkon ken akinmej ochantiayaj Babilonia (Dan. 1:3, 4, 6).

2. ¿Jehová ken okitaya Daniel? (Ezequiel 14:14).

² Jehová amo okitlasojtlaya Daniel porque kualtsin omotaya noso porque kuali otekipanouaya. Ye okitlasojtlaya porque Daniel okipejpenki kichiuas tlen kuali. Ijkuak Daniel okipiaya kanaj 20 xiuitl, Jehová okijto Noé uan Job okatkaj yolkualmej uan yejuan miak xiuitl yokitekichiuilijkaj. Pero noijki okijto Daniel okatka yolkuali ijkon ken yejuan (Gén. 5:32; 6:9, 10; Job 42:16, 17; xiktlajtolti Ezequiel 14:14). Jehová nochipa okitlasojtlak Daniel uan miak xiuitl oyoltoka (Dan. 10:11, 19).

3. ¿Tlen timomachtiskej?

³ Axkan timomachtiskej Daniel okichi ome tlamantli ikinon Jehová okipatioitak. Achto tikitaskej non ome tlamantli uan noijki tikitaskej keman ijkon okichi. Satepan tikitaskej tlen okipaleui Daniel ijkon makichiua. Noijki timomachtiskej ken uelis tikchiuaskej ijkon ken Daniel okichi. Nin tlamachtil kinpaleuis telpochmej uan ichpochmej pero tinochtin uelis tikchiuaskej ijkon ken Daniel okichi.

4. ¿Keman okiteititi Daniel okatka yolchikauak?

⁴ Akinmej yolchikauakej noijki momojtiaj pero mochijchikauaj kichiuaskej tlen kuali. Daniel okatka yolchikauak  desde ijkuak okatka telpochtli. Matikitakan ken okiteititi okatka yolchikauak. Ijkon okichi ijkuak yopanoka ome xiuitl ijkuak akinmej ochantiayaj Babilonia okipojpolojkej Jerusalén. Tekiua Nabucodonosor okitemik se ueyi estatua uan okitekipachouaya tlen okijtosnekiaya. Tekiua okinmilui ixtlamatkej tlen okatkaj Babilonia uan noijki Daniel, makiluikan tlen okitemik uan tlen okijtosnekiaya. Noijki okinmilui nochtin kinmiktiskiaj tla amo kiluiskiaj tlen okijtosnekiaya tlen okitemik (Dan. 2:3-5). Daniel omonekiaya san niman itlaj kichiuas porque miakej uelis kinmiktiskiaj. Ikinon “okilui tekiua makichia uan kiluiskia tlen kijtosneki tlen okitemik” (Dan. 2:16). Daniel omonekiaya yetos yolchikauak uan tlaneltokas. Porque Biblia amo kijtoua kox Daniel yokijtojka tlen kijtosneki ijkuak ikaj itlaj kitemiki. Daniel okinmilui iyolikniuan tlen omotokayotiayaj Sadrac, Mesac uan Abednego b makitlatlaujtikan toTajtsin Dios makinpaleui (Dan. 2:18). Jehová okinnankili Daniel uan okipaleui makijto tlen okijtosnekiaya tlen okitemik Nabucodonosor. Ijkon ye uan iyolikniuan omomakixtijkej.

5. ¿Keman oksepa okiteititi Daniel okatka yolchikauak?

⁵ Daniel oksepa omonekiaya kiteititis okatka yolchikauak. Nabucodonosor oksepa otemik uan okitak se ueyi kouitl. Daniel omoyolchika uan okilui tlen okijtosnekiaya tlen okitemik. Ye okilui kuatlapoloskia uan seki xiuitl ayakmo tlanauatiskia (Dan. 4:25). Nabucodonosor uelis kijtoskia Daniel okixnamikiaya uan uelis tlanauatiskia makimiktikan. Pero Daniel omoyolchika uan okilui nochi tlen okijtosnekiaya.

6. ¿Tlen okipaleui Daniel mayeto yolchikauak?

⁶ ¿Tlen okipaleui Daniel nochipa makiteititi okatka yolchikauak? Xamo ijkuak okatka konetl itatajuan kuali okimachtijkej. Itatajuan okitlakamatkej tlen Jehová okinnauati israelitas uan okimachtijkej itlanauatiluan (Deut. 6:6-9). Daniel amo san okinmixmatiaya majtlaktli tlanauatilmej tlen Jehová okinmakak israelitas. Ye noijki okimatiaya tleka israelitas  amo omonekiaya kikuaskej seki tlamantli (Lev. 11:4-8; Dan. 1:8, 11-13). c Daniel noijki okimatiaya tlen okinpanok israelitas uan tlen okinpanouaya tla amo okitlakamatiayaj Jehová (Dan. 9:10, 11). Nochi tlen okipanok okipaleui makineltoka Jehová uan iángeles nochipa kipaleuiskiaj (Dan. 2:19-24; 10:12, 18, 19).

7. ¿Tlen okachi okipaleui Daniel mamoyolchikaua? (Noijki xikita dibujo).

⁷ Daniel nochipa omomachtiaya tlen okijkuilojkej iprofetas toTajtsin Dios. Ye omomachti tlen okijkuilo Jeremías. Non okipaleui makajsikamati judíos oksepa mokopaskiaj Jerusalén (Dan. 9:2). Ye okachi okineltokak Jehová ijkuak okitaya omochiuaya nochi tlen okijtouayaj profecías. Akin kineltoka Jehová kipaleuia mayeto yolchikauak (noijki xikita Romanos 8:31, 32, 37-39). Daniel nochipa okitlatlaujtiaya toTajtsin Dios uan non sapanoua okipaleui (Dan. 6:10). Ye okiluiaya ijkuak itlaj amo kuali okichiuaya, okiluiaya ken omomachiliaya uan okiluiaya makipaleui (Dan. 9:4, 5, 19). Ijkuak oneski Daniel amo okatka yolchikauak ikinon ye omonekiaya itlaj kichiuas para yetoskia yolchikauak. Ye omomachti, omotlatlaujti uan okineltokak Jehová uan non okipaleui mayeto yolchikauak.

8. ¿Tlen techpaleuis matiyetokan tiyolchikauakej?

⁸ Amo kijtosneki tiyetoskej tiyolchikauakej tla totatajuan yolchikauakej uan techiluiaj noijki ijkon matikchiuakan. Tejuan moneki timochijchikauaskej tla tiknekij tiyetoskej tiyolchikauakej ijkon ken ijkuak timomachtiaj itlaj tikchiuaskej. Para timomachtiskej moneki kuali tikitaskej akin techmachtia uan tikchiuaskej ijkon ken ye kichiua. Noijki para tiyetoskej tiyolchikauakej moneki timomachtiskej tlen okichijkej akinmej okatkaj yolchikauakej uan tikchiuaskej tlen yejuan okichijkej. Tlen okichi Daniel techmachtia moneki kuali matimomachtikan Biblia, matiktlatlaujtikan Jehová para kuali iuan timouikaskej uan matikneltokakan ika nochi toyolo ye nochipa techpaleuis. Non techpaleuis matiyetokan tiyolchikauakej ijkuak techyejyekoskej.

9. ¿Ken uelis tikinpaleuiskej oksekimej tla tiyolchikauakej?

⁹ Tla tiyolchikauakej uelis tikinpaleuiskej oksekimej. Matikitakan tlen okipanok Ben tlen chanti Alemania. Kanin omomachtiaya nochtin okineltokayaj tiuitsej itech se yolkatl. Noijki amo okineltokayaj Biblia kijtoua toTajtsin Dios otlachijchi. Se tonal okikauilijkej makinyekilui akinmej inmiuan omomachtiaya tleka okineltokaya toTajtsin Dios otlachijchi. Ye omoyolchika uan okinmilui tlen okineltokaya. ¿Tlen opanok ijkuak ijkon okichi? Ye okijto: “Akin onechmachtiaya kuali onechkak uan okinmakak se copia akinmej inmiuan onimomachtiaya tlen oniktemo ijkuak onimomachti”. ¿Tlen okijtojkej akinmej inmiuan omomachtiaya? Ben okijto: “Miakej kuali onechkakej uan onechiluijkej okinpaktiaya tlen onikchiuaya”. Tlen okichi Ben kiteititia okachi kintlakaitaj akinmej yolchikauakej. Noijki uelis kinpaleuiskej oksekimej makinekikan kixmatiskej Jehová. Non techmachtia miak ipati matimochijchikauakan tiyetoskej tiyolchikauakej.

10. ¿Tlen kijtosneki tlajtoli “amo tekaua”?

¹⁰ Itech Biblia tlajtoli hebreo “amo tekaua” noso “nochipa tetlasojtla”, kijtosneki ijkuak ikaj kuali mouika inmiuan oksekimej uan sapanoua tetlasojtla. Biblia miak uelta ijkon kiteititia ijkuak kijtoua toTajtsin Dios kintlasojtla akinmej kitekichiuiliaj. Noijki ijkon kiteititia ijkuak kijtoua akinmej kitekichiuiliaj toTajtsin Dios motlasojtlaj (2 Sam. 9:6, 7). Jehová noijki kineki nochipa iuan matimouikakan. Tla ijkon tikchiuaj, nochipa timouikaskej iuan Jehová ijkon ken Daniel okichi.

11. ¿Tlen okipanok Daniel ijkuak yokipiaya kanaj 90 xiuitl? (Xikita dibujo tlen kajki página 1).

¹¹ Daniel miak uelta okiteititi omouikaya iuan Jehová. Ye sapanoua otlajyoui ijkuak yokipiaya kanaj 90 xiuitl. Ijkuakon medos uan persas okinyekanayaj akinmej ochantiayaj Babilonia uan otlanauatiaya tekiua Darío. Sekimej tlen okipaleuiayaj tekiua okikokoliayaj Daniel uan amo okitlakaitayaj Jehová. Ikinon yejuan omotlapouijkej tlen kichiuaskiaj. Yejuan okiluijkej tekiua Darío makitlali ifirma itech se tlanauatil tlen kiteititiskia kox Daniel okitlakamatiaya toTajtsin Dios noso tekiua. Non tlanauatil okijtouaya amikaj makitlatlaujti toTajtsin Dios 30 tonal uan Daniel omonekiaya ijkon kichiuas tla okinekiaya kiteititis okitlakamatiaya tekiua. Daniel amo okichi tlen otlanauati tekiua ikinon okitlamotlakej kanin okatkaj leones. Pero Jehová okimakixti uan ijkon okiteochi porque ye amo keman okika (Dan. 6:12-15, 20-22). ¿Tlen techpaleuis nochipa matimouikakan iuan Jehová ijkon ken Daniel okichi?

12. ¿Tlen okipaleui Daniel nochipa mamouika iuan Jehová?

¹² Moneki tiktlasojtlaskej Jehová ika nochi toyolo tla tiknekij nochipa iuan timouikaskej. Daniel sapanoua okitlasojtlaya Jehová ikinon amo keman okika. Xamo okipaleui ijkuak omokuayejyekouaya ken iyelis Jehová uan tlen kichiua (Dan. 9:4). Noijki Daniel omokuayejyekouaya ken okipaleui ye uan ialtepe uan okitlasojkamatiliaya ika nochi iyolo (Dan. 2:20-23; 9:15, 16).

13. (1) Xikijto tlen kixnamikij telpochmej uan ichpochmej. (Noijki xikita foto). (2) ¿Tlen tikiluiskiaj tla ikaj techtlajtlanis kox iTlaixpantijkauan Jehová kitaj kuali ijkuak ikaj mosiuakopa noso motlakakopa? (Xikita itech jw.org video “Tla tiyetoskej tiyolmelajkej timoyolseuijtoskej”).

 ¹³ Telpochmej uan ichpochmej kinpanoua ijkon ken okipanok Daniel porque san kanin katej akinmej amo kitlakaitaj Jehová uan amo kintlakamatij itlanauatiluan. Yejuan amo kintlakaitaj akinmej kijtouaj kitlasojtlaj toTajtsin Dios. Sekimej kinmomojtiaj telpochmej uan ichpochmej para makikauakan Jehová. Ijkon okipanok se tokni tlen itoka Gabriel tlen chanti Australia. Okipanok itlaj sapanoua oui ijkuak okatka telpochtli. Akin okinmachtiaya okintlajtlani tlen kichiuaskiaj tla kimatiskiaj se inyolikni mosiuakopa. Okinmilui san sekan mamonechikokan akinmej kijtoskiaj kuali tlen okichijtoka uan san sekan mamonechikokan akinmej kijtoskiaj amo kuali tlen okichijtoka. Gabriel okijto: “Nochtin okijtojkej kuali tlen okichijtoka pero san ne uan okse tokni otikijtojkej amo kuali tlen okichijtoka”. Satepan Gabriel okiteititi nochipa okitlakamatiaya Jehová. Ye okijto: “Non tonal otechuijuikaltijkej akinmej inmiuan otimomachtiayaj uan otechpinauijkej uan noijki ijkon okichi akin otechmachtiaya. Onimochijchika amo nikualanis uan onikinmilui tlen nikneltoka pero amo onechkakej”. ¿Ken omomachili Gabriel? Ye okijto: “Amo onechpakti onechuijuikaltijkej pero sapanoua oniyolpakik porque oniktlakamatki Jehová uan onikijto tlen nikneltoka”.

14. ¿Tlen moneki tikchiuaskej para nochipa timouikaskej iuan Jehová?

¹⁴ Amo keman tikkauaskej Jehová tla timochijchikauaj tiktlasojtlaskej ika nochi toyolo ijkon ken Daniel okichi. Moneki kuali tikixmatiskej Jehová para uelis okachi tiktlasojtlaskej. Techpaleuis matikixmatikan tla tikitaj tlen okichijchi (Rom. 1:20). ¿Tlen kinpaleuis telpochmej uan ichpochmej okachi makitlasojtlakan Jehová uan makitlakaitakan? Itech jw.org kanin kijtoua “¿Ikaj okichijchi?” katej videos uan tlamachtilmej tlen uelis kinpaleuis. Noijki uelis momachtiskej amatlajkuilolmej ¿Es la vida obra de un Creador? uan El origen de la vida. Matikitakan tlen okijto se ichpochtli tlen itoka Esther uan chanti Dinamarca. Ye okijto: “Sapanoua nechpaktia tlen kijtouaj nonmej amatlajkuilolmej. Tlen ompa kijtoua techpaleuia matikpejpenakan tlen tikchiuaskej pero amo techiluia tlen moneki tikneltokaskej”. Tokni Ben tlen otikitakej itech párrafo 9, okijto: “Amatlajkuilolmej tlen onimomachti onechpaleui okachi manitlaneltoka. Noijki onimomachti toTajtsin Dios okichijchi nochi tlen onka”. Ijkuak timomachtiaj nochi tlamachtilmej tlen yotikitakej, tikitaj melauak tlen kijtoua Apocalipsis 4:11. Ompa kijtoua: “Toteko Dios, sanwel Tejwatsi moaxka n weyílistli, mawistílistli iwa n weletílistli. Porke Tejwatsi otikchijchi nochi tlan onka”. d

15. ¿Tlen techpaleuis okachi matiktlasojtlakan Jehová?

¹⁵ Noijki techpaleuis okachi matiktlasojtlakan Jehová tla timomachtiskej tlen okichi Jesús. Ijkon okichi se ichpochtli tlen itoka Samira uan chanti Alemania. Ye okijto: “Tlen okichi Jesús onechpaleui okachi manikixmati Jehová”. Ijkuak Samira okatka tsikitsin, amo okajsikamatiaya ken omomachiliaya Jehová pero  okajsikamatki ken omomachiliaya Jesús. Ye okijto: “Onechpaktiaya nikitas Jesús okintlasojtlaya konemej uan kuali omouikaya inmiuan oksekimej”. Ijkuak okachi okixmatki Jesús opejki okachi kuali mouika iuan Jehová. Samira okijto: “Yolik onikajsikamatki Jesús kichiua ijkon ken iTajtsin. Noijki onikajsikamatki Jehová okiualtitlanki iKone nikan tlaltikpak para okachi matikixmatikan” (Juan 14:9). Telpochmej uan ichpochmej noijki uelis okachi kixmatiskej Jesús uan ijkon okachi kuali mouikaskej iuan Jehová. Non kinpaleuis okachi makitlasojtlakan uan amo keman makikauakan.

16. ¿Tleka amo keman matikkauakan Jehová? (Salmo 18:25; Miqueas 6:8).

¹⁶ Akinmej amo tekauaj okachi kintlasojtlaj inyolikniuan uan nochipa inmiuan mouikaj (Rut 1:14-17). Noijki tejuan nochipa timoyolseuijtoskej tla amo keman tikkauaj Jehová. Porque ye techiluia amo keman kinkauas akinmej nochipa kitekichiuiliaj (xiktlajtolti Salmo 18:25; Miqueas 6:8). ToTajtsin Dios akin kipia sapanoua miak chikaualistli kineki nochipa touan mouikas maski ye okachi ueyititok. Non sapanoua kualtsin porque amitlaj techtsakuilis iuan matimouikakan. Nochipa iuan timouikaskej maski techkokoliskej, maski titlajyouiskej noso tiixpoliuiskej (Dan. 12:13; Luc. 20:37, 38; Rom. 8:38, 39). Ikinon miak ipati matikchiuakan ijkon ken Daniel uan amo keman matikkauakan Jehová.

17, 18. ¿Tlen okseki tlamantli techmachtia tlen okichi Daniel?

¹⁷ Axkan yotikitakej ome tlamantli tlen okichi Daniel. Pero uelis timomachtiskej okseki tlamantli tlen ye okichi. Jehová okichi Daniel matemiki, makita seki tlamantli uan okipaleui makijto tlen kijtosneki seki profecías. Seki profecías tlen ye okijto yomochijkej pero okseki techiluiaj tlen panos satepan uan tlen moneki tikchiuaskej.

¹⁸ Chikome timomachtiskej ome profecías tlen katej itech amochtli Daniel. Tla kuali tikinmajsikamatiskej nonmej profecías, tinochtin techpaleuis kuali matikpejpenakan tlen tikchiuaskej. Nonmej profecías noijki techpaleuiskej okachi matiyetokan tiyolchikauakej uan amo keman matikkauakan Jehová. Ijkon uelis titlaxikoskej ijkuak titlajyouiskej.