1. ¿Tlen moneki tikchiuaskej para titlatlaniskej ijkon ken kijtoua Hebreos 12:1?

 BIBLIA kijtoua akinmej tiktekichiuiliaj Jehová yetoskia ken timotlalouaj. Akinmej tlatlaniskej nochipa yoltoskej (2 Tim. 4:7, 8). Moneki okachi timochijchikauaskej timotlaloskej porque ayakmo uejka poliui para tiajsiskej. Apóstol Pablo okichi tlen omonekiaya uan okijto non techpaleuis noijki matitlatlanikan. Ye okijto: “Matiktlakaltechokah nochi tlan techtsakuilia [...]. Iwa ika miak yolchikawálistli matimotlelokah itech nin ojtli non kajki toyakapa” (xiktlajtolti Hebreos 12:1).

2. ¿Tlen kijtosneki ijkuak Pablo okijto “matiktlakaltechokah nochi tlan techtsakuilia”?

² ¿Tlen kijtosneki tlajtoli “matiktlakaltechokah nochi tlan techtsakuilia”? Pablo amo okijto akinmej tiktekichiuiliaj toTajtsin Dios amo moneki itlaj tikchiuaskej. Ye okijto moneki ‘tiktlakaltechoskeh’ tlen amo techpaleuia. Non tlamantli amo techpaleuis matimotlalokan uan techsotlauas. Moneki tikitaskej kox onka itlaj tlen techtsakuilia uan moneki san niman tikkauaskej para uelis timotlaloskej. Pero onka okseki tlamantli tlen miak ipati uan amo moneki tikkauaskej. Tla tikkauaskej amo titlatlaniskej ijkuak timotlaloskej (2 Tim. 2:5). Matikitakan tlen moneki tikchiuaskej.

3. (1) ¿Tlen moneki tikchiuaskej ijkon ken kijtoua Gálatas 6:5? (2) ¿Tlen timomachtiskej uan tleka?

³ (Xiktlajtolti Gálatas 6:5). Itech non versículo Pablo okijto tisejse “matikyekchiwakah toteki”. ¿Tlen okijtosnekiaya? Ijkuak ijkon okijto ye okijtosnekiaya tekitl tikchiuiliaj toTajtsin Dios. Non tekitl amikaj okse uelis topatka kichiuas. Axkan tikitaskej seki tlamantli tlen moneki tikchiuaskej uan tlen techpaleuis matikchiuakan. Noijki tikitaskej  seki tlamantli tlen xamo tikchijtokej pero tikitaskej tlen techpaleuis ayakmo ijkon matikchiuakan. Amo matikchiuakan tlen amo moneki uan ijkon titlatlaniskej uan nochipa tiyoltoskej.

4. ¿Tleka amo tikitaj oui tikchiuaskej tlen otikiluijkej Jehová ijkuak ixpan otimotemakakej? (Noijki xikinmita fotos).

⁴ Itlaj otikiluijkej Jehová ijkuak ixpan otimotemakakej. Ijkuak otimotemakakej ixpan Jehová otikiluijkej nochipa tikueyichiuaskej uan tikchiuaskej tlen ye kineki. Tejuan moneki tikchiuaskej ijkon ken otikiluijkej Jehová. Maski miak ipati tlen otikiluijkej Jehová ijkuak ixpan otimotemakakej, amo tikitaj oui tikchiuaskej tlen otikiluijkej. Porque Jehová otechchijchi para matikchiuakan tlen ye kipaktia (Apoc. 4:11). Ye otechchijchi ken ye uan okitlali ipan toyolo matiknekikan tikixmatiskej uan matikueyichiuakan. Ikinon uelis iuan timouikaskej uan tiyolpakiskej tiktekichiuiliskej (Sal. 40:8). Noijki kuali timomachiliaj ijkuak tikchiuaj tlen Jehová kineki uan noijki tikchiuaj ijkon ken iKone okichi (Mat. 11:28-30).

5. ¿Tlen techpaleuis matikchiuakan ijkon ken otikiluijkej Jehová ijkuak ixpan otimotemakakej? (1 Juan 5:3).

 ⁵ ¿Tlen techpaleuis matikchiuakan tlen otikiluijkej Jehová? Achto, okachi matiktlasojtlakan. Okachi tiktlasojtlaskej Jehová tla timokuayejyekouaj tlen topatka yokichi uan ken techteochiuas satepan. Amo oui tiktlakamatiskej Jehová tla sapanoua tiktlasojtlaj. Non techpaleuis amo oui matikitakan tikchiuaskej tlen ye technauatia (xiktlajtolti 1 Juan 5:3). Noijki matikchiuakan ijkon ken Jesús okichi. Ye okitlakamatki toTajtsin Dios porque okitlatlaujtiaya makipaleui uan okilnamiktoka tlen kiseliskia (Heb. 5:7; 12:2). Tejuan noijki matikiluikan Jehová matechpaleui ijkon ken Jesús okichi uan matikilnamiktokan satepan nochipa tiyoltoskej. Uelis tikchiuaskej tlen otikiluijkej Jehová ijkuak ixpan otimotemakakej tla okachi tiktlasojtlaj uan tikchiuaj ijkon ken iKone okichi.

6. ¿Tleka moneki matikpaleuikan tofamilia? (Noijki xikinmita fotos).

⁶ Tinochtin matikpaleuikan tofamilia. Tejuan moneki okachi tikintlasojtlaskej Jehová uan Jesús uan amo okachi tiktlasojtlaskej tofamilia (Mat. 10:37). Pero non amo kijtosneki amo tikpaleuiskej tofamilia. Amo matikijtokan amo uelis tiktekichiuiliskej Jehová tla tikpaleuiskej tofamilia. Moneki tikpaleuiskej tofamilia tla tiknekij tikinyolpaktiskej Jehová uan Jesús (1 Tim. 5:4, 8). Okachi tiyolpakiskej tla ijkon tikchiuaskej. Jehová kimati familias yolpakiskej tla siuatl uan inamik motlasojtlaj uan motlakaitaj. Noijki tla tetajmej kintlasojtlaj inkoneuan uan kuali kinmachtiaj. Noijki yolpakiskej konemej tla kintlakaitaj intatajuan (Efes. 5:33; 6:1, 4).

7. ¿Tlen techpaleuis matikpaleuikan tofamilia?

⁷ ¿Tlen techpaleuis matikpaleuikan tofamilia? Matikneltokakan Biblia uelis techpaleuis kuali matimouikakan iuan tofamilia. Amo matimokuayejyekokan okachi kuali tlen tejuan tikijtouaj, okachi kuali tlen kichiuaj kanin otimoskaltijkej noso okachi kuali tlen kijtouaj ixtlamatkej (Prov. 24:3, 4). Matimomachtikan tlen kijtouaj amatlajkuilolmej porque ompa techiluiaj ken uelis timoyekanaskej ika principios bíblicos. Amatlajkuilol “Mokalchanejkauan uelis yolpakiskej” uelis kinpaleuis akinmej yomonamiktijkej, tetajmej uan telpochmej. Noijki uelis kinpaleuis amochtli “Tiyoltos uan tiyolpakis” tlamachtil 49 uan 50. b Matimochijchikauakan tikchiuaskej tlen kijtoua Biblia maski san toselti timomachtiaj. Ijkon tofamilia kuali yetos uan Jehová techteochiuas (1 Ped. 3:1, 2).

8. ¿Tlen techpanoua ijkuak itlaj tikpejpenaj tikchiuaskej?

⁸ Matikselikan tlen techpanoua ijkuak itlaj tikpejpenaj tikchiuaskej. Jehová techkauilia matikpejpenakan tlen tikchiuaskej uan kineki matiyolpakikan ijkuak tikpejpenaj tlen kuali. Pero amo techpaleuia ijkuak tikpejpenaj tikchiuaskej tlen amo kuali uan titlajyouiaj (Gál. 6:7, 8). Ikinon titlajyouiskej tla itlaj amo kuali tikpejpenaj tikchiuaskej, tla itlaj amo kuali tikijtouaj noso itlaj san niman tikchiuaj. Ualeua xamo timoyolkokoskej porque itlaj amo kuali otikchijkej uan techkuejsos totlalnamikilis. Tla tejuan tikmatokej tlen  tikpejpenaj tikchiuaskej, non techyolinis matikijtokan tlen otikchijkej, matimochijchikauakan matikyektlalikan tlen tikchijtokej uan ayakmo matikchiuakan. Ijkon uelis titlatlaniskej uan nochipa tiyoltoskej.

9. ¿Tlen techpaleuis tla otikpejpenkej tikchiuaskej itlaj amo kuali? (Noijki xikinmita fotos).

⁹ ¿Tlen techpaleuis amo san matikilnamiktokan tlen amo kuali otikchijkej? Matikilnamiktokan ayakmo uelis tikpatlaskej tlen otikchijkej. Amo san matimokuayejyekojtokan otimotlapololtijkej. Amo san matimotekipachojtokan, amo matikintlajtlakoltikan oksekimej tlen otikchijkej uan amo matikijtokan omonekiaya ijkon tikchiuaskej. Techpaleuis tla tikseliaj otimotlapololtijkej uan timochijchikauaj tikyektlaliskej tlen otikchijkej. Tla sapanoua techyolkokoua tlen otikchijkej, matiktlatlaujtikan Jehová, matikiluikan tlen otikchijkej uan matikiluikan matechtlapojpolui (Sal. 25:11; 51:3, 4). Tla tikitaj ikaj otikyolkokojkej, matikiluikan matechtlapojpolui. Noijki uelis tikinmiluiskej tlayekankej matechpaleuikan (Sant. 5:14, 15). Matikitakan tlen amo kuali otikchijkej uan amo oksepa ijkon matikchiuakan. Matikneltokakan Jehová techpaleuis uan nochipa techiknomatis (Sal. 103:8-13).

10. ¿Tleka amo techpaleuis tla tiknekij tikchiuaskej tlen amo tiuelij? (Gálatas 6:4).

¹⁰ Ijkuak tiknekij tikchiuaskej tlen amo tiuelij. Uelis ijkon techpanos tla tiknekij tikchiuaskej tlen oksekimej kichiuaj pero tejuan amo tiuelij (xiktlajtolti Gálatas 6:4). Xamo tiknekiskej timotlatlaniskej inmiuan oksekimej uan tikinchikoitaskej (Gál. 5:26). San tejuan timotlajyouiltiskej tla tiknekij tikchiuaskej tlen oksekimej kichiuaj maski amo tiuelij. Biblia kijtoua: “Moyolkokoua akin kichixtok itlaj tlen amo mochiua” (Prov. 13:12). San okachi timotekipachoskej tla tiknekij itlaj tikchiuaskej tlen amo keman uelis tikchiuaskej. Non kichiuas matimosotlauakan uan ayakmo okachi tiktekichiuiliskej Jehová (Prov. 24:10).

11. ¿Tlen techpaleuis amo matiknekikan tikchiuaskej tlen amo tiuelij?

¹¹ ¿Tlen techpaleuis “matiktlakaltechokah nochi tlan techtsakuilia”? Jehová amo keman techiluis matikchiuakan tlen amo tiuelij ikinon amo matiknekikan tikchiuaskej tlen ye amo techtlajtlanilia (2 Cor. 8:12). Amo matimotekipachokan porque Jehová amo kita kox tikchiuaj tlen oksekimej kichiuaj (Mat. 25:20-23). Ye kipatioita ijkuak tiktekichiuiliaj ika nochi toyolo, ijkuak amo keman tikkauaj uan ijkuak titlaxikouaj. Tla tiyolyamankej, tikajsikamatiskej amo uelis tikchiuaskej seki tlamantli porque xamo yotikokoxkatikej, timokokouaj noso mopatla seki tlamantli tlen otikchiuayaj. Matikchiuakan ijkon ken Barzilái okichi uan amo matikselikan seki tekitl tla tikitaj amo uelis tikchiuaskej porque timokokouaj (2 Sam. 19:35, 36). Noijki matikchiuakan ijkon ken Moisés okichi uan matikinmiluikan oksekimej matechpaleuikan tla tikitaj amo ueli tikchiuaj nochi tekitl tlen tikpiaj (Éx. 18:21, 22). Tla tiyolyamankej, tikitaskej tlen uelis tikchiuaskej uan ijkon amo timosotlauaskej.

12. ¿Totlajtlakol tlen amo kuali kichiuaj oksekimej?

¹² Xamo tikijtoskej totlajtlakol tlen amo kuali kichiuaj oksekimej. Amo uelis tikijtoskej tlen kichiuaskej oksekimej uan amo uelis nochipa tikinpaleuiskej ijkuak tlajyouiaj porque kipejpenaj kichiuaskej tlen amo kuali. Xamo tetajmej sapanoua  tlajyouiaj ijkuak se inkone ayakmo kineki kitekichiuilis Jehová. Tetajmej okachi tlajyouiaj ijkuak kijtouaj intlajtlakol se inkone ayakmo kitekichiuilia Jehová. Pero Jehová amo kineki ijkon mamomachilikan (Rom. 14:12).

13. ¿Tlen uelis kichiuas se teta tla ikone kipejpena kichiuas tlen amo kuali?

¹³ ¿Tlen techpaleuis amo matimotlajtlakoltikan tla oksekimej kichiuaj tlen amo kuali? Matikilnamiktokan Jehová techkauilia matikpejpenakan tlen tikchiuaskej uan kineki matikpejpenakan kox tiktekichiuiliskej noso amo. Noijki kimati tejuan titlajtlakolejkej. Ye kineki tetajmej mamochijchikauakan kuali makinyekanakan inkoneuan. Pero teta amo itlajtlakol tla se ikone ayakmo kineki kitekichiuilis Jehová (Prov. 20:11). Pero xamo nochipa mokuayejyekojtok itlaj amo kuali okichi. Ikinon uelis kiluis Jehová ken momachilia uan makilui makitlapojpolui. Jehová kimati ayakmo uelis kipatlas teta tlen yiuejkika opanok. Pero amo kijtoua se teta moneki kipaleuis ikone ijkuak tlajyouia porque okipejpenki kichiuas tlen amo kuali. Ikinon teta moneki kilnamiktos tla ikone moyolkopa, Jehová oksepa kiselis ika pakilistli makitekichiuili (Luc. 15:18-20).

14. ¿Tleka amo san moneki matikilnamiktokan tlen amo kuali otikchijkej?

¹⁴ Amo san matikilnamiktokan tlen amo kuali otikchijkej. Amo kuali timomachiliaj ijkuak titlajtlakolchiuaj. Pero Jehová amo kineki nochipa matikilnamiktokan tlen amo kuali otikchijkej. ¿Ken tikmatiskej kox nochipa tikilnamiktokej tlen amo kuali otikchijkej? Uelis tikneltokaskej Jehová yotechtlapojpolui tla yotikijtojkej tlen otikchijkej, tla yotimoyolkopkej uan tla timochijchikauaj ayakmo ijkon tikchiuaskej (Hech. 3:19). Jehová amo kineki san matikilnamiktokan non tlamantli porque ye kimati non techijtlakos uan okachi titlajyouiskej (Sal. 31:10). Uelis timosotlauaskej  uan ayakmo tiknekiskej tiktekichiuiliskej Jehová tla sapanoua timoyolkokouaj (2 Cor. 2:7).

15. ¿Tlen techpaleuis tla nochipa tikilnamiktokej tlen amo kuali otikchijkej? (1 Juan 3:19, 20; noijki xikinmita fotos).

¹⁵ ¿Tlen techpaleuis amo nochipa matikilnamiktokan tlen amo kuali otikchijkej? Tla sapanoua techkuejsoua totlalnamikilis, matikilnamikikan Jehová melauak techtlapojpoluia (Sal. 130:4). Ijkuak ikaj moyolkopa, Jehová kijtoua ‘ayakmo kilnamikis itlajtlakol’ (Jer. 31:34). Non kijtosneki ijkuak Jehová techtlapojpoluia ayakmo techilnamiktijtok tlen amo kuali otikchijkej. Ijkuak titlajtlakolchiuaj titlajyouiaj pero non amo kijtosneki Jehová amo techtlapojpoluia. Noijki amo sapanoua matimotekipachokan tla axkan amo ueli titlapaleuiaj kanin timonechikouaj. Jehová ayakmo kilnamiktok tlen otikchijkej ikinon tejuan noijki ayakmo matikilnamiktokan (xiktlajtolti 1 Juan 3:19, 20).

16. ¿Tlen moneki tikilnamiktoskej?

¹⁶ Moneki tikchiuaskej tlen kijtoua iTlajtol toTajtsin Dios tla tiknekij nochipa tiyoltoskej. Ompa kijtoua: “Ximotlelokah iwa xitlatlanikah” (1 Cor. 9:24). Matikkauakan seki tlamantli tlen amo techpaleuis uan matikchiuakan tlen moneki. Itech nin tlamachtil yotikitakej seki tlamantli tlen moneki tikchiuaskej. Jesús okijto: “Amo san xitlakuajtinemikah, amo xitlawantinemikah iwa amo xikkawilikah manomechtekipacho tlan onka itech nin tlaltíkpaktli” porque uelis timosotlauaskej tla ijkon tikchiuaskej (Luc. 21:34). Ninmej uan okseki textos techpaleuiskej matikpatlakan tlen moneki. Ijkon uelis timotlaloskej uan nochipa tiyoltoskej.

17. ¿Tleka tikneltokaj uelis nochipa tiyoltoskej?

¹⁷ Uelis tikneltokaskej nochipa tiyoltoskej porque Jehová techpaleuis matitlatlanikan (Is. 40:29-31). Matikchiuakan ijkon ken okichi Pablo ijkuak omochijchika tlatlanis (Filip. 3:13, 14). Amikaj uelis topatka motlalos pero Jehová touan kajki uan techpaleuis. Ye “techuikilia totlamamal” uan techpaleuis “matiktlakaltechokah nochi tlan techtsakuilia” (Sal. 68:19). Ijkon titlaxikoskej uan titlatlaniskej porque Jehová touan kajki.