1. ¿Tlen techpaleuis matechpakti timomachtiskej profecías?

 SE TELPOCHTLI tlen itoka Ben okijto sapanoua kipaktia momachtis profecías. ¿Noijki ijkon timomachiliaj? ¿Noso amo techpaktia timomachtiskej profecías porque tikitaj sapanoua oui? Tla ijkon techpanotok, techpaleuis matikajsikamatikan tleka Jehová otlanauati makinmijkuilokan profecías itech iTlajtol.

2. ¿Tlen timomachtiskej?

² Axkan tikitaskej tleka moneki kuali tikinmixmatiskej profecías uan tlen moneki para timomachtiskej. Satepan timomachtiskej ome profecías tlen katej itech amochtli Daniel uan tikitaskej ken techpaleuis tla tikajsikamatij tlen kijtosneki.

3. ¿Tlen moneki tikchiuaskej para tikinmajsikamatiskej profecías?

³ Para tikinmajsikamatiskej profecías tlen katej itech Biblia moneki ikaj techpaleuis. Ximokuayejyeko otia otipaxialoto itech se altepetl kanin amo titlaixmati pero mouan oyajki se moyolikni tlen tlaixmati. Moyolikni kuali tlaixmati kanin nankatej uan kixmati ojtli. ¡Sapanoua yolkuali moyolikni porque mouan oyajki! Jehová noijki kimati tlen tonalmej tikatej uan kimati tlen panos satepan. Ikinon moneki tiyetoskej tiyolyamankej uan matikiluikan Jehová matechpaleui matikinmajsikamatikan profecías (Dan. 2:28; 2 Ped. 1:19, 20).

4. ¿Tleka Jehová otlanauati makinmijkuilokan profecías? (Jeremías 29:11; noijki xikita foto).

⁴ Ijkon ken se kuali teta, Jehová kineki mayolpakikan  ikoneuan axkan uan noijki satepan (xiktlajtolti Jeremías 29:11). Tetajmej amo uelis kinmiluiskej inkoneuan tlen panos satepan pero Jehová kimati nochi tlen panos. Ikinon otlanauati makinmijkuilokan profecías uan ijkon matikmatikan tlen miak ipati panos satepan (Is. 46:10). Profecías yetoskiaj ken se tetliokolil tlen techmaka toTajtsin Dios porque sapanoua techtlasojtla. Pero ¿ken tikmatij melauak mochiuaskej nonmej profecías?

5. ¿Tlen kinmachtia telpochmej uan ichpochmej tlen okipanok Max?

⁵ Miakej ayakmo kitlakaitaj tlen tlamachtia Biblia kanin momachtiaj telpochmej uan ichpochmej. Xamo tlen kijtouaj noso kichiuaj akinmej ompa momachtiaj, uelis kichiuas ayakmo matlaneltokakan tokniuan. Matikitakan tlen okipanok se tokni tlen itoka Max. Ye okijto: “Ijkuak onikatka nitelpochtli opejki nimokuayejyekoua kox melauak religión tlen onechmachtiayaj notatajuan uan kox melauak Biblia iaxka toTajtsin Dios”. ¿Tlen okichijkej itatajuan? Max okijto: “Ne onikmatiaya notatajuan okintekipachouaya tlen onechpanouaya pero amo san niman omosotlajkej”. Itatajuan okititijkej ika Biblia tlen ye omotlajtlaniaya. Noijki Max itlaj okichi. Ye okijto: “Opejki nimomachtia profecías uan onikinmiluiaya oksekimej telpochmej kanin nimonechikoua tlen onimomachtiaya”. ¿Tlen okipanok satepan? Max okijto: “Satepan onikneltokak Biblia melauak iaxka toTajtsin Dios”.

6. ¿Tlen moneki tikchiuas tla ayakmo okachi titlaneltoka uan tleka?

⁶ ¿Tlen mitspaleuis tla mitspanoua ijkon ken Max uan timokuayejyekoua kox Biblia tlamachtia tlen melauak? Amo ximoyolkoko pero moneki itlaj tikchiuas. Ijkuak ikaj ayakmo okachi tlaneltoka yetoskia ken xauali. Tla itlaj tikpatioitaj peua xaualoua uan amo itlaj tikchiuaj, xauali nochi kijtlakos. ¿Ken uelis tikkixtis “xauali” tlen kichiua ayakmo okachi xitlaneltoka? Achto ximotlajtlani: “¿Nikneltoka tlen kijtoua Biblia panos satepan?”. Tla amo ijkon tikneltoka, moneki timomachtis profecías tlen yomochijkej. ¿Tlen mitspaleuis ximomachti profecías?

7. ¿Tlen okipaleui Daniel mamomachti profecías? (Daniel 12:10; noijki xikita foto).

⁷ Moneki tikitaskej tlen okichi Daniel tla tiknekij timomachtiskej profecías. Ye omomachtiaya profecías porque okinekiaya kimatis tlen melauak. Noijki okatka yolyamanki. Ye okineltokaya Jehová kinmaka ixtlamatilistli akinmej kinmixmatij itlanauatiluan uan kintlakamatij (Dan. 2:27, 28; xiktlajtolti Daniel 12:10). Okiteititi okatka yolyamanki ijkuak okilui Jehová makipaleui (Dan. 2:18). Noijki Daniel kuali omomachtiaya iTlajtol Jehová. Kuali otlatemouaya itech amochmej tlen ijkuakon okatkaj (Jer. 25:11, 12; Dan. 9:2). ¿Ken uelis tikchiuaskej ijkon ken Daniel okichi?

8. ¿Tleka sekimej momachtiaj profecías pero tejuan tlen moneki tikchiuaskej?

 ⁸ Ximokuayejyeko tleka tikneki timomachtis profecías. ¿Tleka timomachtia profecías? ¿Tikneki tikmatis tlen melauak ika nochi moyolo? Jehová mitspaleuis tla tikneki ijkon tikchiuas (Juan 4:23, 24; 14:16, 17). Sekimej momachtiaj Biblia porque kinekij kichiuaskej okseki tlamantli. Tlatemouaj porque kinekij itlaj kajsiskej uan ijkon kiteititiskej Biblia amo iaxka toTajtsin Dios. Ijkon kijtouaj tlen kuali uan tlen amo kuali porque kinekij kichiuaskej san tlen yejuan kinpaktia. Ijkuak timomachtiaj profecías, matikchiuakan porque tiknekij tikmatiskej tlen melauak. Noijki moneki tikpiaskej se tlamantli miak ipati tla tiknekij tikinmajsikamatiskej.

9. ¿Tlen techpaleuis matikinmajsikamatikan profecías uan tleka?

⁹ Xiyeto tiyolyamanki. Jehová kijtoua kinpaleuis akinmej yolyamankej (Sant. 4:6). Ikinon moneki tiktlatlaujtiskej Jehová matechpaleui tla tiknekij tikinmajsikamatiskej profecías. Tla tejuan tiyolyamankej, noijki tikseliskej tlen techmaka tlakeuali yolmelajki uan ixtlamatki (Luc. 12:42). ToTajtsin Dios kipaktia nochi kuali mayeto ikinon okitlali tlakeuali yolmelajki uan ixtlamatki matechpaleui matikajsikamatikan tlen tlamachtia Biblia (1 Cor. 14:33; Efes. 4:4-6).

10. ¿Tlen mitsmachtia tlen okichi Esther?

¹⁰ Kuali ximomachti iTlajtol toTajtsin Dios. Ximokuayejyeko se profecía tlen mitspaktiskia uan ximomachti. Ijkon okichi se tokni tlen itoka Esther. Ye okinekiaya kimatis profecías kijtouaj ualaskia Mesías. Ye okijto: “Ijkuak onikpiaya 15 xiuitl, oniknekiaya nikmatis kox nonmej profecías omoijkuilojkej ijkuak ayamo oualaya Jesús nikan tlaltikpak”. Pero ¿tlen okichi? Opejki kitlajtoltia tlen tlajtoua itech Rollos tlen okinmajsikej itech mar Muerto uan okipaleui tlen omomachti. Esther okijto: “Seki rollos okinmijkuilojkej ijkuak ayamo oualaya Jesús nikan tlaltikpak. Ikinon profecías tlen ompa tikinmajsij melauak iaxkauan toTajtsin Dios”. Pero noijki okijto: “Seki tlamantli omonekiaya nikojpauis uan ijkon okachi nikajsikamatis”. Tokni sapanoua omochijchika momachtis. Ye okijto ken omomachili ijkuak omomachti profecías. Ye okijto: “Tlen onimomachti onechititi Biblia kijtoua tlen melauak”.

11. ¿Ken techpaleuia tla tikajsikamatij Biblia kijtoua tlen melauak?

¹¹ Techpaleuia okachi matikneltokakan Jehová uan tikchiuaj tlen technauatia ijkuak tikitaj ken yomochijkej seki profecías. Noijki profecías techpaleuiaj matikneltokakan tikseliskej tlen Jehová yokijto techmakas uan ijkon amitlaj matechsotlaua. Axkan timomachtiskej ome profecías tlen ijkuilitokej itech amochtli Daniel tlen axkan mochijtokej. Tla tejuan tikinmajsikamatij profecías tlen kijtosnekij techpaleuis kuali matikpejpenakan tlen tikchiuaskej.

12. ¿Tlen kineskayotia ikxiuan estatua tlen ochijchitoka ika “hierro nelitok iuan sokitl”? (Daniel 2:41-43).

¹² (Xiktlajtolti Daniel 2:41-43). Ueyi tekiua Nabucodonosor okitemik uan okitak se estatua tlen ikxiuan ochijchitokaj ika “hierro nelitok iuan sokitl”. Nin profecía uan okseki profecías tlen ijkuilitokej itech amochtli Daniel uan Apocalipsis, techpaleuiaj matikajsikamatikan ikxiuan estatua kineskayotiaj Reino Unido uan Estados Unidos tlen axkan okachi tlanauatiaj. Ijkuak Daniel okilui Nabucodonosor tlen kijtosneki tlen okitemik, noijki okijto ken kajki non tekiuajkayotl. Okijto: “Yetos chikauak uan noijki yamanki”. ¿Tleka moijtoua noijki yamanki? Porque kineskayotiaj sokitl akinmej pouij itech nonmej altepemej ikinon hierro amo chikauak. b

13. ¿Tlen techpaleuia matikajsikamatikan profecía tlen tlajtoua itech estatua?

¹³ Tlen okijto Daniel itech estatua uan ken ochijchitokaj ikxiuan, techpaleuia matikajsikamatikan seki tlamantli miak ipati. Achto, yomotak okachi tlanauatiaj Estados Unidos uan Reino Unido. Tekiuajkej tlen ompa otlanauatiayaj otlapaleuijkej matlatlanikan itech Primera uan Segunda Guerra Mundial. Pero non tekiuajkayotl ayakmo kajki chikauak nion ok yetos chikauak porque akinmej ompa chantij ayakmo kinekij makinnauatikan. Ome, nin saiktlami tekiuajkayotl tlen kajki uan satepan iTekiuajkayo toTajtsin Dios kinpojpolos nochtin tekiuajkej tlen katej tlaltikpak. Xamo sekimej tekiuajkej kinekiskej kitlaniliskej pero amo uelis ijkon kichiuaskej. Profecía kijtoua se “tetl” tlen kijtosneki iTekiuajkayo toTajtsin Dios kinxajxamanis ikxiuan estatua (Dan. 2:34, 35, 44, 45).

14. ¿Tlen tikchiuaskej tla tikajsikamatij profecía tlen tlajtoua itech ikxiuan estatua?

¹⁴ ¿Tikneltokaj melauak tlen okijto Daniel itech ikxiuan estatua? Tla ijkon tikneltokaj tikteititiskej ika tlen tikchiuaj. Amo tiktemoskej miak tomin porque ayakmo miak poliui uan nochi pojpoliuis (Luc. 12:16-21; 1 Juan 2:15-17). Noijki tla tikajsikamatij non profecía techpaleuis okachi matitetlapouikan uan matitlamachtikan (Mat. 6:33; 28:18-20). Axkan yotimomachtijkej nin profecía, matimotlajtlanikan: “¿Tlen nikchiua kiteititia nikneltoka iTekiuajkayo toTajtsin Dios kinpojpolos nochtin tekiuajkej?”.

15. ¿Axkan akin “tekiua tlen kajki norte” uan akin “tekiua tlen kajki sur”? (Daniel 11:40).

¹⁵ (Xiktlajtolti Daniel 11:40). Daniel capítulo 11 kijtoua ome tekiuajkej mokualaniaj porque kinekij tlanauatiskej itech nochi tlaltikpak. Yotikinmitakej ninmej profecías uan okseki tlen kiteititiaj “tekiua tlen kajki norte” kijtosneki Rusia uan akinmej kipaleuiaj. “Tekiua tlen kajki sur” kijtosneki Reino Unido uan Estados Unidos tlen okachi tlanauatiaj. c

16. ¿Tlen kintoktiaj tokniuan tlen chantij kanin tlanauatia “tekiua tlen kajki norte”?

¹⁶ “Tekiua tlen kajki norte” kintlajyouiltia tokniuan kanin ye tlanauatia.  Sekimej tokniuan yokinuitekej uan yokintsakej porque kineltokaj toTajtsin Dios. Pero tokniuan amo kinmomojtia tlen kichiua “tekiua tlen kajki norte”. Tokniuan okachi tlaneltokaj uan kimatokej techtlajyouiltiskej ijkon ken ijkuilitok itech amochtli Daniel (Dan. 11:41). d Matikilnamiktokan tlen kijtoua nin profecía techpaleuis amo matikilkauakan tlen satepan tikseliskej uan nochipa matimouikakan iuan Jehová.

17. ¿Tlen kinpanoua tokniuan tlen chantij kanin tlanauatia “tekiua tlen kajki sur”?

¹⁷ Yiuejkika “tekiua tlen kajki sur” noijki okintlajyouilti tokniuan. Kanaj itlajkotia siglo veinte okintsakej miakej tokniuan uan konemej okinkixtijkej kanin omomachtiayaj porque amo omokajkalakiayaj itech política. Ayamo kipia miak xiuitl, “tekiua tlen kajki sur” kinyejyekoua ika okseki tlamantli tokniuan. Matikitakan tleka ijkon tikijtouaj. Tokniuan xamo kinekiskej kipaleuiskej se ijkuak kinpejpenaj akinmej yetoskej tekiuajkej. Xamo kinekiskiaj  ikaj matlatlani maski amo yaskej votación. Amo san moneki tikitaskej tlen amo tikchiuaskej para amo timokajkalakiskej itech política. Noijki moneki tikitaskej tlen timokuayejyekouaj uan tlen tikmachiliaj (Juan 15:18, 19; 18:36).

18. ¿Ken timomachiliaj ijkuak tikitaj ome tekiuajkej moteuiaj? (Noijki xikinmita fotos).

¹⁸ Xamo sapanoua tlajyouiaj akinmej amo kineltokaj profecías ijkuak kitaj moteuiaj “tekiua tlen kajki sur” iuan “tekiua tlen kajki norte” (Dan. 11:40, nota). Nonmej ome tekiuajkej kinpiaj bombas tlen ika uelis kipojpoloskej nochi tlen onka. Pero Jehová amo kinkauilis ijkon makichiuakan (Is. 45:18). Ikinon amitlaj techtekipachoua nion timomojtiaj. Tejuan okachi titlaneltokaj ijkuak tikitaj moteuiaj “tekiua tlen kajki norte” iuan “tekiua tlen kajki sur” porque non techititia yitlamis tlen amo kuali.

19. ¿Tlen moneki tikilnamiktoskej ijkuak timomachtiaj se profecía?

¹⁹ Amo tikmatij ken mochiuaskej okseki profecías. Daniel amo okajsikamatki tlen okijtosnekiaya nochi tlen okijkuilo (Dan. 12:8, 9). Pero amo kijtosneki amo mochiuas se profecía maski amo kuali tikajsikamatij. Tikneltokaj Jehová techiluijtias tlen moneki tikmatiskej ijkuak ye kijtos. Ijkon ken yiuejkika okichi (Amós 3:7).

20. ¿Tlen profecías yimochiuaskej uan tlen moneki matikchiuakan?

²⁰ Ajsis tonal kijtoskej: “Axa kema ya tikateh ika kuali, iwa ya tikpiah yolsewílistli” (1 Tes. 5:3). Ijkuakon tekiuajkej kinmixnamikiskej religiones tlen tlakajkayauaj uan kinpojpoloskej (Apoc. 17:16, 17). Satepan kitlajyouiltiskej ialtepe toTajtsin Dios (Ezeq. 38:18, 19). Saiktlami peuas guerra tlen itoka Armagedón (Apoc. 16:14, 16). Tikneltokaj ayakmo miak poliui ijkon panos. Ikinon matikteititikan tikinpatioitaj profecías ijkuak tikitaj ken mochiuaj uan matikinpaleuikan oksekimej ijkon makichiuakan.