1. ¿Tleka techpaktia timouikaskej inmiuan akinmej kimatij mochiaskej?

 TINOCHTIN techpaktia timouikaskej inmiuan akinmej kimatij mochiaskej. Porque tikintlakaitaj akinmej amo san niman kualanij. Tikpatioitaj ijkuak oksekimej amo san niman kualanij tla tejuan timotlapololtiaj. Noijki tiktlasojkamatiliaj akin otechmachti porque amo okualaniaya ijkuak tejuan itlaj amo otikajsikamatiayaj noso amo san niman otikchiuayaj tlen otimomachtiayaj. Pero okachi tiktlasojkamatiliaj Jehová porque ye kimati mochias (Rom. 2:4).

2. ¿Tleka tikitaj oui timochiaskej?

² Tinochtin techpaktia ijkuak oksekimej kimatij mochiaskej. Pero xamo tikitaj oui ijkuak tejuan moneki timochiaskej. Xamo san niman tikualanij ijkuak tikatej carretera uan katej miakej carros porque amo san niman tiajsij kanin tiauij. Noijki xamo san niman tikualanij ijkuak ikaj techkualania. Ualeua xamo noijki timokuayejyekouaj amo san niman mochiua tlen Jehová yokijto kichiuas. Pero tinochtin techpaktiskia tikmatiskej timochiaskej. Itech nin tlamachtil tikitaskej tlen kijtosneki timochiaskej uan tleka miak ipati. Noijki tikitaskej tlen techpaleuis matimochiakan uan amo san niman matikualanikan.

3. ¿Tlen kichiua akin kimati mochias ijkuak kikualaniaj?

³ Matikitakan naui tlamantli tlen kichiua akin kimati mochias. Amo san niman kualani. Amo momakopa ijkuak oksekimej kikualaniaj uan amo san niman kualani ijkuak sotlaua. Biblia kijtoua Jehová kimati mochias uan ye “se Dios tlen teiknomati uan teajsikamati,  amo san niman kualani uan sapanoua tetlasojtla uan kijtoua tlen melauak” (Éx. 34:6).

4. ¿Tlen kichiua akin kimati mochias?

⁴ Akin kimati mochias moyolseuia. Amo sapanoua motekipachoua nion amo kualani ijkuak itlaj amo san niman panoua (Mat. 18:26, 27). Onka miak tlamantli tlen moneki tikchiuaskej uan ijkon tikteititiskej tikmatij timochiaj. Moneki kuali titlakakiskej ijkuak ikaj techiluia tlen kipanoua uan amo titlajtoskej ijkuak ye techtlapouijtok (Job 36:2). Noijki amo matimosotlauakan ijkuak tikpaleuiaj akin tikmachtiaj makajsikamati tlen kijtoua Biblia noso ayakmo makichiua tlen amo kuali.

5. ¿Ken tikteititiaj tikmatij timochiaj?

⁵ Akin kimati mochias amo san niman itlaj kichiua. Xamo ualeua moneki itlaj san niman tikchiuaskej. Pero tla moneki tikchiuaskej itlaj sapanoua ipati, akin kimati mochias amo san niman peua kichiua nion amo san niman kitlamia. Ye achto kuali mokuayejyekoua para kimatis tlen kipejpenas uan satepan yolik kichiua tlen okipejpenki para kuali makisa.

6. ¿Tlen kichiua akin kimati mochias ijkuak tlajyouia?

⁶ Akin kimati mochias tlaxikoua ijkuak tlajyouia uan amo san kualani. Non kijtosneki tla tikmatij timochiaskej noijki uelis titlaxikoskej. Pero amo tlajtlakoli tla tikiluiskej se toyolikni ken timomachiliaj ijkuak titlajyouiaj. Akin kimati mochias amo san kitekipachoua tlen kipanoua uan yolpaki kitekichiuilia Jehová (Col. 1:11). Tinochtin tlen tiktekichiuiliaj Jehová moneki tikchiuaskej naui tlamantli tlen yotikitakej uan ijkon tikteititiskej tikmatij timochiaskej.  Matikitakan tleka moneki ijkon tikchiuaskej.

7. ¿Tleka miak ipati matikmatikan timochiaskej ijkon ken kijtoua Santiago 5:7, 8? (Noijki xikinmita dibujos).

⁷ Uelis timomakixtiskej tla tikmatij timochiaskej. Tejuan moneki tikchiaskej toTajtsin Dios makichiua tlen ye yokijto ijkon ken yiuejkika okichijkej itekipanojkauan (Heb. 6:11, 12). Biblia kijtoua tejuan tiyetoskiaj ken akinmej tlatokaj (xiktlajtolti Santiago 5:7, 8). Akin tlatoka chikauak tekipanoua uan katekia tlen kitoka pero amo kimati keman moskaltis. Ikinon mochia uan kimatok kololos tlen okitokak. Tejuan noijki timochijchikauaj tiktekichiuiliaj Jehová maski ‘amo tikmatih kemania walmuikas Toteko’ (Mat. 24:42). Tikmatij timochiaj porque tikneltokaj ajsis tonal Jehová kichiuas nochi tlen yokijto. Pero xamo timosotlauaskej tla tiknekij san niman mamochiua tlen Jehová yokijto uan ayakmo tiktekichiuiliskej. Noijki xamo peuas tikchiuaskej san tlen techyolpaktia. Pero uelis titlaxikoskej tla tikmatij timochiaskej uan timomakixtiskej (Miq. 7:7; Mat. 24:13).

8. ¿Ken techpaleuis matimouikakan inmiuan oksekimej tla tikmatij timochiaj? (Colosenses 3:12, 13).

⁸ Kuali timouikaj inmiuan oksekimej ijkuak tikmatij timochiaj. Noijki kuali tikinkakiskej oksekimej tla tikmatij timochiaskej (Sant. 1:19). Amo timokualaniskej inmiuan oksekimej, amo tiknekiskej san niman itlaj tikchiuaskej nion amo tikijtoskej itlaj tlen kinyolkokos oksekimej ijkuak itlaj techpanoua. Noijki amo san niman tikualaniskej ijkuak oksekimej techkualaniaj uan amo timomakopaskej. Matikinxikokan oksekimej uan matimotlapojpoluikan ika nochi toyolo (xiktlajtolti Colosenses 3:12, 13).

9. ¿Ken techpaleuis matikpejpenakan tlen kuali tla tikmatij timochiaskej? (Proverbios 21:5).

⁹ Kuali tikpejpenaskej tlen tikchiuaskej tla tikmatij timochiaskej. Moneki achto tikitaskej tlen techpaleuis uan amo san niman itlaj tikchiuaskej (xiktlajtolti Proverbios 21:5). Xamo ijkuak amo tikpiaj kanin titekipanoskej tiknekiskej tikseliskej se tekitl maski ayakmo nochipa timonechikoskej noso ayakmo okachi titetlapouiskej. Pero tla tikmatij timochiaskej, achto tikitaskej hasta kanin titekipanotiuij, keski horas titekipanoskej uan kox techpaleuis kuali matimouikakan iuan tofamilia uan noijki Jehová. Amo tikchiuaskej itlaj tlen amo kuali tla tikmatij timochiaskej.

10. ¿Tlen techpaleuis nochipa matikmatikan timochiaskej?

¹⁰ Matikiluikan Jehová matechpaleui matimochiakan. Iespíritu santo Jehová techpaleuia matimochiakan (Gál. 5:22, 23). Ikinon uelis tikiluiskej matechmaka espíritu santo uan matechpaleui matikpiakan kuali toyelis. Noijki matikiluikan Jehová matechmaka espíritu santo para tikmatiskej timochiaskej ijkuak titlajyouiskej uan ijkuak amo tikmatij tlen tikchiuaskej (Luc. 11:9, 13). Matikiluikan matechpaleui matikitakan nochi tlamantli ijkon ken ye kita. Tla yotiktlatlaujtijkej Jehová, nochipa matimochijchikauakan  matikmatikan timochiaskej. Okachi tikmatiskej timochiaskej tla nochipa tikiluiaj Jehová matechpaleui uan timochijchikauaj tikchiuaskej tlen moneki.

11, 12. ¿Ken yokiteititi Jehová kimati mochias?

¹¹ Matimokuayejyekokan tlen okichijkej sekimej itekipanojkauan Jehová tlen okatkaj yiuejkika. Biblia techiluia sekimej okimatiayaj mochiaskej. Tejuan noijki uelis ijkon tikchiuaskej tla timokuayejyekouaj tlen yejuan okichijkej. Tikitaskej tlen okichijkej pero achto matikitakan Jehová ye okachi kimati mochias.

¹² Satanás okisokioti itoka Jehová itech xochitlali Edén uan okijto ye amo kuali tlanauatia uan amo tetlasojtla. Pero Jehová okiteititi kimati mochias uan kuali monauatia ikinon amo san niman okixpolo Satanás maski otlakajkaya. Ye ijkon okichi porque okimatiaya uejkauaskia para motaskia ye okachi kuali tlanauatia. Jehová mochixtok uan tlaxikojtok maski miakej kisokiotiaj itoka. Sapanoua miakej yokinpaleui Jehová kimati mochias porque yokixmatkej uan noijki uelis nochipa yoltoskej (2 Ped. 3:9, 15). Tla timokuayejyekouaj ken yotechpaleui Jehová kimati mochias, amo tikitaskej oui timochiaskej maajsi itonal ijkuak kipojpolos nochi tlen amo kuali.

13. ¿Ken okiteititi Jesús okimatiaya mochias ijkon ken iTajtsin ijkuak okatka nikan tlaltikpak? (Noijki xikita foto).

¹³ Jesús okiteititi okimatiaya mochias ijkon ken iTajtsin ijkuak okatka nikan tlaltikpak. Xamo okitak oui ijkon kichiuas porque escribas uan fariseos  okipiayaj ome inmixko (Juan 8:25-27). ToTajtsin Dios amo san niman kualani ikinon Jesús amo san niman okualanki (1 Ped. 2:23). Jesús otlaxiko ijkuak otlajyoui porque okimatiaya mochias. Ikinon Biblia techiluia: “Xikilnamikikah kenomi Jesús okixiko nochi tlan okitoktijkeh n tlajtlakolejkeh” (Heb. 12:2, 3). Tejuan noijki titlaxikoskej ijkuak titlajyouiaj tla tikiluiaj Jehová matechpaleui.

14. ¿Tlen techmachtia tlen okichi Abrahán? (Hebreos 6:15; noijki xikinmita fotos).

¹⁴ ¿Tlen techpaleuis matikmatikan timochiaskej hasta ijkuak tlamis tlen amo kuali? Xamo yotikchiayaj ijkon mapano uan axkan timokuayejyekouaj xamo ayakmo tikitaskej ijkuak ajsiki non tonal. Pero matikitakan tlen okichi Abrahán. Ye okipiaya 75 xiuitl ijkuak Jehová okilui ‘kichiuaskia mayeto se ueyi altepetl’ pero amo okipiaya nion se ikone (Gén. 12:1-4). ¿Okitak Abrahán ijkuak omochi tlen Jehová okilui? Amo nochi okitak. Abrahán okipanoui aueyatl Éufrates uan omochixki 25 xiuitl. Jehová okichi makipiakan se inkone tlen omotokayoti Isaac. Satepan opanok 60 xiuitl uan oneskej ixuiuan tlen omotokayotijkej Esaú uan Jacob (xiktlajtolti Hebreos 6:15). Pero Abrahán amo keman okinmitak ixuiuan mamomiaktilikan uan mamochiuakan se ueyi altepetl. Noijki amo okinmitak machantikan itech tlali tlen Jehová okinmilui kinmakaskia. Abrahán amo okitak nochi non tlamantli pero ye kuali omouikaya iuan Jehová  (Sant. 2:23). ¿Timokuayejyekouaj ken yolpakis ijkuak kiyolitiskej? Ijkuakon kimatis nochi altepemej okinteochijkej porque ye otlaneltokak uan okimatki mochias (Gén. 22:18). ¿Tlen techmachtia? Xamo tejuan amo tikitaskej nochi tlen toTajtsin Dios yokijto kichiuas. Matikchiuakan ijkon ken Abrahán okichi uan Jehová techteochiuas axkan uan noijki itech xochitlali (Mar. 10:29, 30).

15. ¿Tlen uelis tikitaskej ijkuak timomachtiaj?

¹⁵ Biblia techiluia miakej okimatkej mochiaskej (Sant. 5:10). ¿Tleka amo timomachtiaj tlen yejuan okichijkej? b Matikitakan tlen okipanok David. Ye okatka chokotsin ijkuak okipejpenkej kinyekanas israelitas. Pero David omochixki miak xiuitl para uelis yetos tekiua. Simeón uan Ana nochipa okitekichiuilijkej Jehová ijkuak okichiayaj Mesías tlen omoijto ualaskia (Luc. 2:25, 36-38). Ijkuak timomachtijtiaskej tlen okichijkej akinmej okitekichiuilijkej Jehová, matimotlajtlanikan: “¿Tlen okinpaleui makimatikan mochiaskej? ¿Tlen okiselijkej porque okimatkej mochiaskej? ¿Ken uelis tikchiuaskej ijkon ken yejuan okichijkej?”. Noijki uelis tikitaskej tlen okinpanok akinmej amo okimatkej mochiaskej (1 Sam. 13:8-14). Matimotlajtlanikan: “¿Tleka amo okimatkej mochiaskej? ¿Tlen okinpanok porque amo okimatkej mochiaskej?”.

16. Xikijto ken techpaleuis tla tikmatij timochiaskej.

¹⁶ Matimokuayejyekokan ken techpaleuis tla tikmatij timochiaskej. Okachi tiyolpakiskej uan timoyolseuiskej tla tikmatij timochiaskej. Techpaleuia kuali matimomachilikan uan kuali matiyetokan. Noijki techpaleuia kuali matimouikakan inmiuan tokniuan uan noijki oksekimej. Amo okachi timoouijtiliskej tla amo san niman tikualanij ijkuak oksekimej kichiuaj tlen amo techpaktia (Sal. 37:8, xikita nota; Prov. 14:29). Tla tikmatij timochiaskej, tikchiuaskej ken Jehová uan okachi iuan timouikaskej.

17. ¿Tlen moneki tikchiuaskej?

¹⁷ Axkan yotikitakej tla tikmatij timochiaskej okachi kuali timomachiliskej uan okachi tiyolpakiskej. Jehová techpaleuis matikmatikan matimochiakan maski tikitaskej oui ijkon tikchiuaskej. Matikchiakan toTajtsin Dios makikopa se xochitlali tlaltikpak uan matikilnamiktokan “Jehová kinmita akinmej kitlakaitaj uan akinmej kineltokaj, ye nochipa kintlasojtlas ika nochi iyolo” (Sal. 33:18). Ikinon tinochtin matikmatikan timochiaskej.