• “Onikmachiliaya nonamik nochipa onechkajkayauaya”.

• “Onimoyolkokouaya, onikmachiliaya amo nikualtsin uan amitlaj nopati”.

• “Onitlajyouiaya pero amikaj onikiluiaya tlen opanotoka”.

• “Onimokuayejyekouaya Jehová amo okitekipachouaya tlen onechpanotoka”.

Nonmej tlajtolmej kiteititiaj ijkuak se tlakatl kita pornografía, isiua sapanoua tlajyouia. Tla se tlakatl san ichtaka kita pornografía miak metstli noso miak xiuitl, isiua xamo ayakmo kineltokilis tlen kiluis. Se siuatl okijto: “Amo onikajsikamatiaya tlen okichiuaya nonamik. Onimotlajtlaniaya tlen okachi okichijtoka uan amo onechiluiaya”.

Nin tlamachtil kinpaleuis siuamej tlen innamik kitaj pornografía. a Tikinmitaskej seki principios bíblicos tlen kinyolchikauas siuamej. Noijki kajsikamatiskej Jehová kinpaleuis mamoyolseuikan uan kuali iuan mamouikakan. b

Tejuatsin xamo amo uelis tiknauatis monamik tlen moneki kichiuas pero uelis tikchiuas seki tlamantli tlen mitspaleuis amo okachi ximotekipacho. Nikan kajki seki tlamantli tlen uelis tikchiuas.

Amo xikijto motlajtlakol tlen kichiua monamik. Se siuatl uelis mokuayejyekos itlajtlakol tla inamik kita pornografía. Alice c omokuayejyekouaya itlajtlakol tlen opanotoka uan omotlajtlaniaya: “¿Tleka nonamik kipaktia kinmitas oksekimej siuamej?”. Sekimej siuamej kimachiliaj intlajtlakol tlen kichiua innamik uan mokuayejyekouaj san okachi moouijtiliskej. Okse tokni tlen itoka Daniela, okijto: “Sapanoua onechkualaniaya nonamik porque okitaya pornografía. Nochipa onikualaniaya uan onikmachiliaya okatka notlajtlakol amo kuali onimouikaya iuan nonamik”.

Tla ijkon timomachilia, xikilnamikto Jehová amo kijtoua motlajtlakol tlen kichiua monamik. Santiago 1:14 kijtoua: “Se tlakatl wetsi itech tlajtlákoli  ijkuak kimokawilia makiyoltilana tlan amokuali mokuatlapowijtok” (Rom. 14:12; Filip. 2:12). Jehová amo mitsiluia motlajtlakol tla ijkon mitspanotok. Ye mitspatioita porque timochijchikaua nochipa tiktekichiuilia (2 Crón. 16:9).

Tla monamik kita pornografía, amo kijtosneki itlaj amo kuali tikchijtok. Sapanoua mitspaleuis tla kuali tikajsikamati non tlamantli. Ixtlamatkej kijtouaj tlakamej tlen kitaj pornografía san kinekij motekaskej iuan se siuatl. Pero nion se siuatl uelis kinyolpaktis akinmej ijkon kichiuaj.

Amo sapanoua ximotekipacho. Catherine okijto nochipa omokuayejyekouaya tleka inamik okitaya pornografía. Noijki Frances okijto: “Sapanoua nimotekipachoua ijkuak amo nikmati kanin kajki nonamik. Nochi tonal amo kuali nimomachilia”. Oksekimej siuamej kijtouaj sapanoua pinauaj ijkuak katej inmiuan tokniuan tlen xamo kimatij tlen kichiua innamik. Noijki oksekimej kijtouaj momachiliaj inselti porque kitaj amikaj kajsikamati tlen kinpanoua.

Xamo ijkon mitspanoua pero okachi timotlajyouiltis tla nochipa ijkon timokuayejyekojtos. Okachi kuali xikita kox kuali timouika iuan Jehová porque non mitspaleuis xitlaxiko (Sal. 62:2; Efes. 6:10).

Mitspaleuis tla tiktlajtoltia Biblia uan timokuayejyekoua tlen ompa kijtoua. Porque Biblia kijtoua okatkaj sekimej siuamej tlen sapanoua otlajyouijkej pero kuali omomachilijkej ijkuak okiluijkej Jehová tlen okinpanotoka. Jehová amo okichi ayakmo matlajyouikan pero okinpaleui mamoyolseuikan. Biblia kijtoua Ana sapanoua otlajyoui. Ye uejkika omotlapoui iuan Jehová uan satepan kuali omomachili maski amo okimatiaya tlen panoskia (1 Sam. 1:10, 12, 18; 2 Cor. 1:3, 4).

Xikinmilui tlayekankej mamitspaleuikan porque yejuan katej “ken itlaj kanin ikaj motlatis ijkuak ejeka uan kanin ikaj motlatis ijkuak chikauak ejekakiaui” (Is. 32:2). Yejuan xamo kiluiskej se tokni siuatl mouan mamotlapoui uan mamitsyolchikaua (Prov. 17:17).

Xamo tiknekis itlaj tikchiuas para tikpaleuis monamik ayakmo makita pornografía. Uelis tikpaleuis porque Biblia kijtoua okachi kuali tla ome mopaleuiaj kiyektlaliskej se ouijkayotl (Ecl. 4:9-12). Ixtlamatkej yokitakej akin kita pornografía  okachi uelis san niman kikauas tla inamik noso isiua kipaleuia. Non kinpaleuis okachi kuali mamouikakan.

Miak ipati xikita kox monamik melauak kineki kikauas pornografía uan mochijchikaua ayakmo kitas. ¿Kitlatlaujtia Jehová makipaleui uan yokinmilui tlayekankej makipaleuikan? (2 Cor. 4:7; Sant. 5:14, 15). ¿Itlaj kichiua para ayakmo kitas pornografía? ¿Mochijchikaua amo okachi kitekitiltis celular, computadora noso tableta para ayakmo kitas pornografía? ¿Noijki mochijchikaua amo yetos kanin uelis kitas pornografía? (Prov. 27:12). ¿Kineki xikpaleui uan mitsiluia nochi tlen kichiua? Ijkon xamo uelis tikpaleuis.

Pero ¿ken uelis tikpaleuis monamik? Matikitakan tlen kichiua se tokni tlen itoka Felicia. Ye omonamikti iuan Ethan. Pero Ethan opejki kita pornografía desde ijkuak okatka tsikitsin. Felicia mochijchikaua kuali mouikas iuan inamik uan ijkon ye amo oui kiluis ijkuak kineki kitas pornografía. Ethan okijto: “Kuali nimotlapouia iuan nosiua uan amitlaj niktlatilia. Ye nechtlasojtla uan nechpaleuia manikchiua seki tlamantli para ayakmo manikita pornografía. Noijki nechtlajtlania ken nimomachilia uan nechpaleuia kuali manikpejpena tlen nikitas itech internet”. Maski Felicia kipaleuia inamik, ye moyolkokoua ijkuak mokuayejyekoua inamik kipaktia kitas pornografía. Pero ye okijto: “Ne nikmati maski nikualanis uan nimoyolkokos non amo kipaleuis nonamik ayakmo makita pornografía. Ikinon achto timotlapouiaj tlen kipanoua uan satepan nikiluia ken nimomachilia para tikitaskej tlen tikchiuaskej”.

Tlen kichiuaj nonmej tokniuan kinpaleuia innamik ayakmo makitakan pornografía. Pero noijki kinpaleuia siuamej kuali mamouikakan iuan innamik. Siuatl okachi kineltokilia tlen kiluia inamik tla kiluia tlen amo kuali kineki kichiuas, kanin yaui noso kanin kajki porque ijkon kiteititis amitlaj kitlatilia.

¿Uelis itlaj tikchiuas para tikpaleuis monamik? Uelis timomachtis nin tlamachtil iuan monamik. ¿Tlen moneki kichiuas monamik? Moneki mochijchikauas ayakmo kitas pornografía uan kuali mouan mamouika. Ye amo moneki kualanis ijkuak iuan timotlapouis. Moneki mochijchikauas kajsikamatis ken titlajyouia ijkuak ye kita pornografía. Pero ¿tlen uelis tikchiuas tejuatsin? Ximochijchikaua xikpaleui monamik para oksepa kuali nanmouikaskej. Noijki xikitakan tleka sekimej kitaj pornografía uan tlen kinpaleuis ayakmo ijkon makichiuakan. d

 Tla tikita nanmokualaniskej ijkuak nanmotlapouiskej, uelis tikiluis se tlayekanki namouan mayeto uan manamechpaleui ijkuak nanmotlapouiskej. Uelis tikiluis se tlayekanki tlen nankixmatij uan kuali iuan nanmouikaj. Moneki xikilnamikto xamo amo san niman oksepa tikneltokilis tlen mitsiluia monamik maski ayakmo kitas pornografía pero amo ximosotlaua. Xikita ken mochijchikaua monamik para kipatlas tlen kichiua. Xikilnamikto yolik oksepa peuas kuali nanmouikaskej (Ecl. 7:8; 1 Cor. 13:4).

Tla monamik oksepa kita pornografía, amo kijtosneki amo kineki moyolkopas noso amo keman kikauas. Tla ye kita oui kikauas pornografía, xamo moneki nochipa mochijchikauas para ayakmo kitas. Xamo oksepa kinekis kitas maski yikipia miak xiuitl okika. Moneki kichiuas seki tlamantli para okachi momaluis maski mokuayejyekos yokika non tlamantli (Prov. 28:14; Mat. 5:29; 1 Cor. 10:12). Moneki kipatlas tlen mokuayejyekoua uan kikokolis nochi “tlen amo kuali”. Non kijtosneki ayakmo kitas pornografía, amo momajmachilis uan amo kichiuas okseki tlamantli tlen amo kuali (Efes. 4:23; Sal. 97:10; Rom. 12:9). Tla monamik mochijchikauas ijkon kichiuas, uelis ayakmo kitas pornografía. e

Pero tla monamik amo mochijchikaua kikauas pornografía, xamo okachi timoyolkokos, tikualanis uan tikmachilis mitskajkayaua. Xikilui Jehová tlen mitstekipachoua uan ye mitspaleuis ximoyolseui (1 Ped. 5:7). Nochipa ximomachti, ximokuayejyeko tlen timomachtia uan ximotlatlaujti. Ijkon okachi timouikas iuan Jehová uan ye noijki mouan mouikas. Biblia kijtoua “Jehová kajki inmiuan akinmej moyolkokouaj” uan kineki kinpaleuis oksepa mayolpakikan (Sal. 34:18). Tejuatsin ximochijchikaua tiktlakamatis Jehová. Xikinmilui tlayekankej mamitspaleuikan uan xikilnamikto ajsis tonal monamik uelis kipatlas tlen kichijtok (Rom. 2:4; 2 Ped. 3:9).