TLAMACHTIL 31
TLAKUIKALI 12 Amo onka okse ken Jehová
Jehová itlaj okichi para techmakixtis imak tlajtlakoli uan mikilistli
“ToTajtsin Dios sapanoua okintlasojtlak akinmej chantij tlaltikpak ikinon okitemakak san ye se iKone” (JUAN 3:16).
NIN TLEN TIMOMACHTISKEJ
Maski titlajtlakolejkej uelis timouikaskej iuan toTajtsin Dios uan tiktekichiuiliskej. Ye sapanoua techiknomati ikinon techiluia satepan ayakmo tiyetoskej titlajtlakolejkej uan nochipa tiyoltoskej.
1, 2. (1) ¿Tlen kijtosneki tlajtlakoli uan tlen techpaleuis ayakmo matiyetokan titlajtlakolejkej? (Noijki xikita “Tlen okachi ipati”). (2) ¿Tlen timomachtiskej uan tlen okseki tlamantli tikitaskej itech nin revista Akin Tetlapouijtok? (Noijki xikita “Nota para akin kitlajtoltis” tlen kajki itech nin revista).
¿MITSPAKTISKIA tikmatis kox sapanoua mitstlasojtla Jehová? Tla tiknekij tikmatiskej, moneki timomachtiskej tlen okichi para techmakixtis imak tlajtlakoli uan mikilistli. Tlajtlakoli a yetoskia ken ikaj techkokolia uan amo uelis tiktlaniliskej. Tinochtin titlajtlakolchiuaj porque titlajtlakolejkej ikinon tiixpoliuij (Rom. 5:12). Pero Jehová techiluia se tonal techmakixtis imak tlajtlakoli uan mikilistli.
2 Jehová sapanoua techtlasojtla ikinon yikipia kanaj seis mil xiuitl techpaleuia iuan matimouikakan maski titlajtlakolejkej. Ijkon kichiua porque sapanoua techtlasojtla desde ijkuak otechchijchi ikinon yokichi miak tlamantli para techpaleuis ayakmo matiyetokan titlajtlakolejkej (Rom. 6:23). Jehová noijki kineki mitspaleuis. Axkan tikinnankiliskej eyi tlajtlanilmej. “¿Tlen okichi Jehová para techmatiltis amo nochipa tiyetoskej titlajtlakolejkej? ¿Tlen okichijkej sekimej yiuejkika para kiyolpaktiskej Jehová uan iuan mouikaskej? ¿Tlen okichi Jesús para techmakixtis imak tlajtlakoli uan mikilistli?”.
¿TLEN OKICHI JEHOVÁ PARA TECHMATILTIS AMO NOCHIPA TIYETOSKEJ TITLAJTLAKOLEJKEJ?
3. ¿Tlen okichijkej Adán uan Eva?
3 Jehová okinekiaya nochipa mapakikan Adán uan Eva ijkuak okinchijchi. Ikinon okinmakak kanin chantiskej, okinnamikti, okinmilui makinpiakan miakej inkoneuan uan makikopakan tlaltikpak se kualtsin xochitlali. Okinnauati amo makikuakan se tlakilotl pero noijki okinyekilui mikiskiaj tla amo kitlakamatiskiaj. Tinochtin tikmatij tlen okichi Satanás. Ye amo okintlasojtlaya Adán uan Eva uan noijki amo okitlasojtlaya Jehová. Ikinon okinyejyeko uan okichi matlajtlakolchiuakan. Adán uan Eva okichijkej tlen Satanás okinmilui ikinon opanok tlen Jehová yokinmiluijka. Ijkuakon opejki kokoxkatij noso ueuejtij uan satepan oixpolikej (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Tleka Jehová kikokolia tlajtlakoli uan ken techpaleuia iuan matimouikakan? (Romanos 8:20, 21).
4 Teyolkoko tlen opanok pero Jehová otlanauati makijkuilokan itech iTlajtol uan ijkon matikajsikamatikan tleka kikokolia tlajtlakoli. Tlajtlakoli amo techkauilia matimouikakan iuan toTajtsin Dios uan satepan tiixpoliuij (Is. 59:2). Satanás kikokolia Jehová uan tejuan noijki techkokolia. Ikinon okinyejyeko Adán uan Eva matlajtlakolchiuakan uan tejuan noijki kineki ijkon matikchiuakan. Xamo Satanás omokuayejyeko ayakmo mochiuaskia tlen toTajtsin Dios okinekiaya porque ye okichi matlajtlakolchiuakan Adán uan Eva. Pero ye amo okajsikamatki toTajtsin Dios sapanoua techtlasojtla. ToTajtsin Dios amo keman okipatlak tlen okinekiaya makichiuakan Adán uan Eva. Jehová sapanoua techtlasojtla ikinon san niman okijto kiyektlaliskia tlen opanok (xiktlajtolti Romanos 8:20, 21). ToTajtsin Dios okimatiaya miakej kitlasojtlaskiaj uan kitlakamatiskiaj. Ye okichi seki tlamantli para iuan matimouikakan uan techmakixtis imak tlajtlakoli uan mikilistli porque ye toTajtsin uan ye otechchijchi. ¿Tlen okichi?
5. Xikyekijto keman okijto Jehová itlaj kichiuaskia para amo nochipa tiyetoskej titlajtlakolejkej. (Génesis 3:15).
5 (Xiktlajtolti Génesis 3:15). Jehová san niman okijto kipojpoloskia Satanás uan ijkon otechmatilti satepan ayakmo tiyetoskej titlajtlakolejkej. ToTajtsin Dios okijto se ‘ikone’ siuatl kichiuaskia itlaj miak ipati. Tekone ‘kixajxamanis itsonteko Satanás. Ijkon kiyektlalis nochi tlen okichi Satanás itech xochitlali (1 Juan 3:8). Pero Satanás achto kitlajyouiltiskia tekone uan noijki kimiktiskia. Kiyolkokoskia Jehová nochi non tlamantli pero ijkon okichi para tinochtin techmakixtis imak tlajtlakoli uan mikilistli.
¿TLEN OKICHIUAYAJ SEKIMEJ YIUEJKIKA PARA KIYOLPAKTISKIAJ JEHOVÁ MASKI OKATKAJ TLAJTLAKOLEJKEJ?
6. ¿Tlen okichijkej Abel uan Noé uan oksekimej para mouikaskej iuan Jehová?
6 ¿Ken uelis timouikaskiaj iuan Jehová maski titlajtlakolejkej? Ye yolik okijtojtiaj tlen tikchiuaskej para iuan timouikaskej. Se inkone Adán uan Eva tlen omotokayotiaya Abel, opejki kineltoka Jehová. Ye okitlasojtlaya Jehová uan okinekiaya iuan mouikas uan kiyolpaktis. Abel okatka tlajpixki ikinon okinmikti ichkamej tlen okachi uejueyij uan okintliokoli Jehová. ¿Kox okiseli toTajtsin Dios? Ye okiseli Abel uan noijki tlen okitliokoli (Gén. 4:4). Satepan noijki okinseli sekimej tlakamej porque okitlasojtlayaj uan okineltokayaj ikinon yejuan okintemakakej yolkamej para makinmiktikan uan makintliokolikan. Ijkon okichi se tlakatl tlen omotokayotiaya Noé (Gén. 8:20, 21). Non okiteititi uelis timouikaskej iuan Jehová uan tikyolpaktiskej maski titlajtlakolejkej. b
7. ¿Tlen techmachtia tlen okichi Abrahán?
7 Okatka se tlakatl tlen omotokayotiaya Abrahán. Ye otlaneltokaya ikinon Jehová okilui makimikti itelpoch tlen omotokayotiaya Isaac. Abrahán sapanoua omoyolkoko ijkuak okiluijkej ijkon makichiua. Pero ye okitlakamatki toTajtsin Dios. Ijkuak yikimiktiskia ikone, Jehová amo okikauili ijkon makichiua. Tlen okichi Abrahán techmachtia itlaj miak ipati tinochtin akinmej titlaneltokaj. Techmachtia Jehová techtlasojtla ikinon topatka kitemakaskia ikone makimiktikan (Gén. 22:1-18).
8. ¿Tlen okiteititi ijkuak okinmiktiayaj yolkamej para kintliokoliskej Jehová? (Levítico 4:27-29; 17:11).
8 Opanok miak xiuitl uan Jehová okinnauati israelitas makintemakakan yolkamej para makinmiktikan uan ijkon ye kintlapojpoluiskia (xiktlajtolti Levítico 4:27-29; 17:11). Non okiteititi Jehová kitemakaskia itlaj okachi ipati para tinochtin techmakixtis. ToTajtsin Dios okinnauati profetas makiyekijtokan ‘ikone siuatl’ kitlajyouiltiskiaj uan kimiktiskiaj. Okiyekijtojkej kimiktiskiaj ijkon ken se ichkatsin okimiktiayaj para kitliokoliskej toTajtsin Dios (Is. 53:1-12). Ijkon Jehová okiteititi kitemakaskia iKone tlen sapanoua kitlasojtla para makimiktikan uan ijkon techmakixtiskia imak tlajtlakoli uan mikilistli.
¿TLEN OKICHI JESÚS PARA TECHMAKIXTIS?
9. ¿Tlen okitak Juan Bautista? (Hebreos 9:22; 10:1-4, 12).
9 Juan Bautista okitak Jesús itech xiuitl 29 uan okijto: “¡Xikitakan, nin Ichkatsin iaxka toTajtsin Dios tlen kipojpolos tlajtlakoli ipan tlaltikpak!” (Juan 1:29). Ijkon okiteititi ye Jesús ikone siuatl tlen toTajtsin Dios okijto techmakixtiskia porque ye kitemakaskia iyolilis. Non techpaleuiskia matechmakixtikan imak tlajtlakoli uan mikilistli (xiktlajtolti Hebreos 9:22; 10:1-4, 12).
10. ¿Ken okiteititi Jesús ‘ye okinmiluiko tlajtlakolejkej mamoyolkopakan’?
10 Jesús omotlapouiaya inuan akinmej omoyolkokouayaj porque otlajtlakolchiuayaj uan okinmiluiaya makichiuakan ijkon ken ye kichiua. Ye okimatiaya tejuan titlajtlakolejkej ikinon titlajyouiaj. Ye okintlapouiaya akinmej sapanoua otlajtlakolchiuayaj. Ikinon ye okijto: “Akinmej amo mokokouaj amo moneki kinpajtiskej, pero kokoxkej moneki kinpajtiskej”. Noijki okijto: “Ne onikinmiluiko tlajtlakolejkej mamoyolkopakan uan amo ijkon onikinmiluiko akinmej yolkualmej” (Mat. 9:12, 13). Ijkon okiteititi ijkuak se siuatl “opejki kinsiauilia ikxiuan Jesús ika ixayo” uan ye okitlapojpolui tlen amo kuali okichi (Luc. 7:37-50). Noijki Jesús okimachti seki tlamantli miak ipati se siuatl tlen ochantiaya Samaria maski okimatiaya ochantiaya iuan se tlakatl tlen amo okatka inamik (Juan 4:7, 17-19, 25, 26). Non kiteititia titlajtlakolejkej uan timikij ikinon Jehová okimakak chikaualistli Jesús makinyoliti tlakamej, siuamej uan konemej (Mat. 11:5).
11. ¿Tleka noijki omotokiayaj inauak Jesús akinmej otlajtlakolchiuayaj?
11 Akinmej sapanoua otlajtlakolchiuayaj noijki okinpaktiaya yetoskej iuan Jesús. Yejuan inauak omotokiayaj porque okinmajsikamatiaya uan okinmiknomatiaya (Luc. 15:1, 2). Jesús okinyolchika akinmej okineltokayaj uan noijki okinteochi (Luc. 19:1-10). Ijkon okiteititi toTajtsin Dios sapanoua teiknomati (Juan 14:9). Jesús kualtsin okinnotski akinmej okinpaleuiaya. Non okiteititi Jehová techiknomati, techtlasojtla uan kineki techpaleuis ayakmo matiyetokan titlajtlakolejkej. Ikinon Jesús okinpaleui akinmej otlajtlakolchiuayaj makipatlakan innemilis uan makichiuakan ijkon ken ye okichiuaya (Luc. 5:27, 28).
12. ¿Tlen okijto Jesús panoskia ijkuak kixpoloskiaj?
12 Jesús yokimatiaya tlen kipanoskia ikinon miak uelta okinmilui idiscípulos ikaj kitemaktiskia uan satepan ‘kimiktiskiaj itech se kouitl’ (Mat. 17:22; 20:18, 19). Jesús okimatiaya ijkuak ye motemakaskia miakej kintlapojpoluiskiaj ijkon ken okijto Juan uan profetas. Jesús okijto ijkuak kixpoloskiaj ‘miakej kinyoltilanaskia mayakan inauak’ (Juan 12:32). Akinmej kineltokaskiaj Jesús uan kiyolpaktiskiaj Jehová ‘kinmakixtiskiaj imak tlajtlakoli’ (Rom. 6:14, 18, 22; Juan 8:32). Jesús omoyolchika uan omotemakak ika nochi iyolo maski sapanoua otlajyoui (Juan 10:17, 18).
13. ¿Tlen okitoktijkej Jesús ijkuak okixpolojkej uan tlen techmachtia Jehová? (Noijki xikinmita dibujos).
13 Se tlakatl okitemakti Jesús uan akinmej okikokoliayaj okikitskijkej, okiuijuikaltijkej uan okitlajtlakoltijkej okichi tlen amo kuali. Satepan sekimej soldados okipilojkej Jesús itech se kouitl para kimiktiskej. Ye otlaxiko maski otlajyoui pero Jehová okachi omoyolkoko porque okitak tlen okipanotoka iKone. Jehová kitlasojtla iKone pero amitlaj okichi maski kipia miak chikaualistli. ¿Tleka amitlaj okichi? Porque sapanoua techtlasojtla. Ikinon Jesús okijto: “ToTajtsin Dios sapanoua okintlasojtlak akinmej chantij tlaltikpak ikinon okitemakak san ye se iKone. Ijkon akin kiteititis kineltoka amo ixpoliuis uan nochipa yoltos” (Juan 3:16).
Jehová sapanoua omoyolkoko ijkuak okitekauili makimiktikan iKone para techmakixtis imak tlajtlakoli uan mikilistli. (Xikita párrafo 13).
14. ¿Tlen techmachtia ijkuak Jesús topatka okixpolojkej?
14 Jehová okiteititi sapanoua techtlasojtla. Ikinon okitekauili makixpolokan iKone inpatka ixuiuan Adán uan Eva. Jehová noijki okiteititi sapanoua mitstlasojtla. ¿Tikpatioita tlen okichi para mitsmakixtis imak tlajtlakoli uan mikilistli? (1 Juan 4:9, 10). Ye kineki techpaleuis matiktekichiuilikan maski titlajtlakolejkej uan satepan kipojpolos tlajtlakoli.
15. ¿Tlen moneki tikchiuaskej tla tiknekij matechpaleui imikilis Jesús?
15 ToTajtsin Dios okitemakak san se iKone uan non tetliokolil techpaleuia matechtlapojpolui. Pero moneki itlaj tikchiuaskej tla tiknekij matechtlapojpolui. Juan Bautista uan Jesucristo okiyekijtojkej tlen moneki tikchiuaskej. Yejuan okijtojkej: “Ximoyolkopakan porque yiuits Tekiuajkayotl tlen kajki iluikak” (Mat. 3:1, 2; 4:17). Ikinon moneki timoyolkopaskej tla tiknekij timouikaskej iuan Jehová uan matechtlapojpolui. Pero ¿tlen kijtosneki timoyolkopaskej uan ken techpaleuia matikyolpaktikan Jehová maski titlajtlakolejkej? Chikome timomachtiskej non tlamantli.
TLAKUIKALI 18 Tiktlasojkamatij imikilis Jesús
a TLEN OKACHI IPATI: Biblia kipia tlajtoli “tlajtlakoli” uan amo san se tlamantli kijtosneki. Kijtosneki tlajtlakoli ijkuak ikaj kichiua tlen Jehová amo kipaktia noso ijkuak ikaj amo kichiua tlen ye technauatia. Noijki kijtosneki tlajtlakoli tlen otechpanoltilijkej Adán uan Eva ikinon tinochtin tiixpoliuij.
