1. ¿Tlen kichiua akin moyolkopa?

 MIAK ipati matimoyolkopakan ijkuak tikchiuaj tlen amo kuali. Biblia kijtoua ijkuak ikaj moyolkopa kikokolia tlen amo kuali okichi, ayakmo ijkon kichiua uan ayakmo keman kineki kichiuas tlen amo kuali (xikita Diccionario tlen kiualika Biblia kanin kijtoua “moyolkopa”).

 2. ¿Tleka moneki tinochtin matikajsikamatikan tlen kijtosneki timoyolkopaskej? (Nehemías 8:​9-11).

² Tinochtin moneki matikajsikamatikan tlen kijtosneki timoyolkopaskej. ¿Tleka? Porque nochipa titlajtlakolchiuaj. Tinochtin titlajtlakolchiuaj uan tiixpoliuij porque tiixuiuan Adán uan Eva (Rom. 3:23; 5:12). Tinochtin titlajtlakolchiuaj ikinon moneki timoyolkopaskej. Apóstol Pablo noijki omochijchika amo tlajtlakolchiuas maski ye otlaneltokaya (Rom. 7:​21-24). Pero non amo kijtosneki nochipa timoyolkokojtoskej porque titlajtlakolejkej. Jehová kineki matiyolpakikan uan techiknomati. Matikitakan tlen okinpanok judíos ijkuak okatka Nehemías (xiktlajtolti Nehemías 8:​9-11). Jehová okinekiaya mapakikan ijkuak okitekichiuiliayaj uan amo san mamoyolkokojtokan porque achto otlajtlakolchijkej. Jehová techmachtia matimoyolkopakan porque kimati tipakiskej tla ijkon tikchiuaskej. Tikneltokaj toTajtsin Dios techtlapojpoluis tla timoyolkopaskej porque ye sapanoua teiknomati.

 3. ¿Tlen timomachtiskej?

³ Axkan timomachtiskej tlen kijtosneki matimoyolkopakan. Achto tikitaskej ken Jehová okinmachti israelitas mamoyolkopakan. Satepan tikitaskej Jehová yokinpaleui miakej mamoyolkopakan. Saiktlami tikitaskej ken okinmachti Jesús idiscípulos mamoyolkopakan.

 JEHOVÁ OKINMITITI ISRAELITAS UELIS MOYOLKOPASKIAJ

 4. ¿Tlen okinmilui Jehová israelitas panoskia tla yejuan moyolkopaskiaj?

⁴ Jehová okichi se acuerdo inuan israelitas ijkuak okinmilui yejuan yetoskiaj ialtepe. Jehová okinmilui kinmaluiskia uan kinteochiuaskia tla yejuan kintlakamatiskiaj itlanauatiluan. Noijki okinmilui: ‘Nin tlanauatil tlen axkan namechmakatok amo sapanoua oui, uelis nankichiuaskej’ (Deut. 30:​11, 16). Pero okinmilui amo kinseliskia uan tlajyouiskiaj tla yejuan kixnamikiskiaj uan kinueyichiuaskiaj okseki dioses. ¿Ayakmo keman kinseliskia toTajtsin Dios tla ijkon kichiuaskiaj? Amo. Tlanauatil tlen okijkuilo Moisés kijtoua yejuan uelis oksepa kitekichiuiliskiaj uan kitlakamatiskiaj (Deut. 30:​1-3, 17-20). Non kijtosneki yejuan uelis moyolkopaskiaj. Jehová okijto kinpaleuiskia oksepa makitekichiuilikan uan oksepa kinteochiuaskia tla yejuan moyolkopaskiaj.

 5. ¿Ken okiteititi Jehová ok okinekiaya kinpaleuis israelitas? (2 Reyes 17:​13, 14).

⁵ Pero israelitas miak uelta okixnamikej Jehová. Okinueyichijkej okseki dioses uan okichijkej okseki tlamantli sapanoua amo kuali, ikinon yejuan otlajyouijkej. Pero Jehová ok okinpaleui uan miak uelta okintitlanili profetas makinpaleuikan mamoyolkopakan uan oksepa makitekichiuilikan (xiktlajtolti 2 Reyes 17:​13, 14).

 6. ¿Ken okinpaleui Jehová mamoyolkopakan akinmej opouiayaj ialtepe? (Noijki xikita dibujo).

⁶ Jehová miak uelta okintitlanki profetas para kinnejmachtis israelitas uan kinyektlalis. Ijkon okichi ijkuak okilui Jeremías makinmilui israelitas: “Ximokopakan israelitas tlen amo nantetlakamatij. [...] Amo namechtlauelitas porque ne amo nitekaua. Amo nochipa nikualantos. San xikijtokan tlen amo kuali onankichijkej porque onankixnamikej Jehová” (Jer. 3:​12, 13). Noijki Jehová okilui Joel makinmilui oksepa makitekichiuilikan ika nochi  inyolo (Joel 2:​12, 13). Isaías noijki okilui makinmilui: “Ximochipauakan, xikachiuakan noixpan tlen amo kuali nankichiuaj; ayakmo xikchiuakan tlen amo kuali” (Is. 1:​16-19). Jehová noijki okinauati Ezequiel matlajtlani: “¿Kox nipaki ijkuak miki akin amo yolkuali? ¿Kox amo nikneki makipatla inemilis uan mayolto? [...] Amo nipaki ijkuak ikaj miki. Ikinon nonauak xiualmokopakan uan xiyoltokan” (Ezeq. 18:​23, 32). Jehová sapanoua yolpaki ijkuak ikaj moyolkopa porque ye kineki nochipa mayolto. Nin kiteititia Jehová amo san mochia hasta ijkuak ikaj kinekis oksepa kitekichiuilis uan ijkuakon peua kipaleuia. Matikitakan okseki tlamantli tlen kiteititia ken kinpaleuia.

 7. ¿Tlen okinmititi Jehová israelitas ika tlen okipanok Oseas uan isiua?

⁷ Jehová okinmititi israelitas tlen omonekiaya kichiuaskej ika tlen okipanok Oseas iuan isiua tlen omotokayotiaya Gómer. Ye okikajkaya inamik uan satepan oyajki inuan oksekimej tlakamej. ¿Omokuayejyeko Jehová amo keman moyolkopaskia Gómer? Jehová kita tlen tikpiaj itech toyolo ikinon okilui Oseas: “Oksepa xiktlasojtla siuatl tlen yokatka iuan okse tlakatl uan momekatijtok, ijkon ken Jehová kitlasojtla altepetl Israel maski yejuan kinueyichiuaj okseki dioses” (Os. 3:1; Prov. 16:2). Ijkuakon Gómer sapanoua otlajtlakolchijtoka. Pero Jehová okilui Oseas makitlapojpolui uan oksepa makitlasojtla. a Ijkon Jehová okinekiaya kinmiluis israelitas ye ok okintlasojtlaya. Yejuan sapanoua otlajtlakolchijtokaj pero Jehová ok okintlasojtlaya ikinon okintitlanili profetas. Ijkon okinpaleui mamoyolkopakan uan makipatlakan innemilis. Non techmachtia Jehová kimati tlen tikpiaj itech toyolo uan kineki techpaleuis matimoyolkopakan maski ok titlajtlakolchijtokej (Prov. 17:3). Matikitakan tleka ijkon tikijtouaj.

JEHOVÁ KINPALEUIA MAMOYOLKOPAKAN AKINMEJ TLAJTLAKOLCHIUAJ

 8. ¿Tlen okinekiaya Jehová makichiua Caín? (Génesis 4:​3-7). (Noijki xikita dibujo).

⁸ Adán uan Eva okipixkej achto inkone tlen omotokayotiaya Caín uan okipanoltilijkej tlajtlakoli. Biblia kijtoua: ‘Ye okichiuaya tlen amo kuali’ (1 Juan 3:12). Xamo ikinon Jehová amo okiseli Caín uan amo okiselili itetliokolil. Caín amo okipatlak iyelis uan sapanoua okualanki. Ikinon Jehová iuan omotlapoui (xiktlajtolti Génesis 4:​3-7). Jehová okitlasojtlaya ikinon okilui tlen omonekiaya kichiuas. Okilui ye oksepa kiseliskia tla ye kipatlaskia iyelis uan noijki okilui tlen panoskia tla amo ijkon kichiuaskia. Pero Caín amo okikak Jehová nion okikauili makipaleui mamoyolkopa. ¿Tlen okichi Jehová ijkuak Caín amo okikak? ¿Okijto ayakmo keman ikaj kipaleuiskia mamoyolkopa? Amo.

 9. ¿Ken okipaleui Jehová mamoyolkopa David?

⁹ Jehová sapanoua okitlasojtlaya tekiua David. Ye okijto ken okitaya David: “Se tlakatl tlen nechyolpaktia” (Hech. 13:22). Pero David sapanoua otlajtlakolchi, oauilnenki, otemikti uan iTlanauatil Moisés okijtouaya omonekiaya kimiktiskej akin ijkon okichiuaya (Lev. 20:10; Núm. 35:31). Jehová sapanoua yolkuali uan okipaleui, ikinon okititlanki profeta Natán mamotlapouiti iuan David maski ye amo okiteititiaya  okinekiaya moyolkopas. b Natán okilui David se neskayotl para kipaleuis mamoyolkopa. Non okipaleui David mamoyolkopa porque okajsikamatki otlajtlakolchi ixpan Jehová (2 Sam. 12:​1-14). Ye okijkuilo se salmo kanin okiteititi sapanoua omoyolkokouaya (Sal. 51, kanin peua). Nin salmo yimiak xiuitl miakej yokinyolseui uan noijki miakej yokinpaleui mamoyolkopakan. Jehová melauak tetlasojtla uan non techyolchikaua porque okipaleui David mamoyolkopa.

10. ¿Ken timomachilia ijkuak tikmati Jehová kimati mochias uan techtlapojpoluia?

¹⁰ Jehová amo kipaktia matitlajtlakolchiuakan uan kikokolia non tlamantli (Sal. 5:​4, 5). Pero techpaleuia amo matitlajtlakolchiuakan porque techtlasojtla uan kimati tinochtin titlajtlakolejkej. Ikinon ye kinpaleuia akinmej moyolkopaj makitekichiuilikan maski sapanoua otlajtlakolchijkej. Sapanoua techyolseuia tikmatij Jehová ijkon kichiua. Ijkuak timokuayejyekouaj ken mochia Jehová uan techtlapojpoluia, techpaleuia amo keman matikkauakan uan san niman matimoyolkopakan ijkuak titlajtlakolchiuaj. Axkan matikitakan ken Jesús okinmachti idiscípulos mamoyolkopakan.

JESÚS OKINMACHTI IDISCÍPULOS TLEN KIJTOSNEKI MAMOYOLKOPAKAN

11, 12. ¿Tlen okijto Jesús uan kiteititia Jehová kineki techtlapojpoluis? (Xikita dibujo).

¹¹ Achto siglo yokichixtokaj maajsiki Mesías. Itech okse tlamachtil otikitakej Jesús uan Juan akin oteapolaktiaya okinmachtijkej oksekimej tleka omonekiaya mamoyolkopakan uan ijkon Jehová okinpaleui (Mat. 3:​1, 2; 4:17).

¹² Ijkuak Jesús otetlapoui okinmachti oksekimej Jehová nochipa kineki tetlapojpoluis. Ijkon okiteititi ijkuak okijto tlen okipanok telpochtli tlen opolika. Non telpochtli okiski ichan uan oyajki oksekan kanin okichijtinemiaya tlen pitsotik. Pero “satepan  omolnamik” uan oksepa omokopki ichan. ¿Tlen okichi ipapa? Jesús okijto “ipapa okitak ijkuak uejka oualaya uan okiknomatki. Omotlalo okinamikito, okinapalo uan okipijpitso”. Non telpochtli okinekiaya kiluis ipapa makikauili mayeto itlakeual. Pero ipapa okinekiaya kitlapojpoluis uan okinekiaya oksepa mapoui iuan ifamilia. Okijto: “Notelpoch [...] opolika uan oksepa otikajsikej” (Luc. 15:​11-32). Xamo ijkuak Jesús okatka iluikak okitak Jehová miak uelta okinmiknomatki akinmej omoyolkopayaj porque otlajtlakolchiuayaj. Sapanoua techyolchikaua tlen okijto Jesús porque kiteititia toTajtsin Dios techiknomati.

13, 14. ¿Tlen okajsikamatki Pedro ijkuak ikaj moyolkopa uan tlen okinmachti oksekimej? (Noijki xikita dibujo).

¹³ Pedro omomachti miak tlamantli miak ipati ijkuak Jesús okijto Jehová kitlapojpoluia akin moyolkopa. Ye miak uelta omotlapololti uan Jesús okitlapojpolui. Ijkon opanok ijkuak Pedro eyi uelta okijto amo okixmatiaya uan satepan sapanoua omoyolkoko (Mat. 26:​34, 35, 69-75). Ijkuak Jesús okiyolitijkej, okimonextili Pedro uan xamo ijkon okichi ijkuak iselti okatka (Luc. 24:​33, 34; 1 Cor. 15:​3-5). Jesús okimatiaya Pedro omoyolkopki ikinon ijkuakon okiyolseui uan okilui yokitlapojpolui (xikita Marcos 16:7).

¹⁴ Pedro okimatki ken momachilia ijkuak ikaj moyolkopa uan kitlapojpoluiaj. Ikinon okinmachti oksekimej tlen okajsikamatki. Ijkuak opanok iluitl Pentecostés, ye okinmilui sekimej judíos yejuan okimiktijkej Mesías. Pero ika tlasojtlalistli noijki okinmilui: “Ximoyolkopakan uan ayakmo xikchiuakan tlen nankichiuaj. Ijkon Jehová namechtlapojpoluilis namotlajtlakol, kichiuas kuali xiyetokan” (Hech. 3:​14, 15, 17, 19). Tlen okijto Pedro okiteititi  miak ipati makipatlakan tlen mokuayejyekouaj akinmej moyolkopaj, ayakmo makichiuakan tlen amo kuali uan makichiuakan tlen kipaktia Totajtsin Dios. Ye okijto Jehová kintlapojpoluiskia uan ayakmo kilnamikiskia intlajtlakol. Opanok miak xiuitl uan Pedro okiyekijto: “Ye namechchixtok ximoyolkopakan porque amo kineki ikaj maixpoliui” (2 Ped. 3:9). Techyolchikaua uan techyolseuia tikmatij Jehová techtlapojpoluia maski sapanoua titlajtlakolchiuaskej.

15, 16. (1) ¿Tlen okajsikamatki Pablo ijkuak okitlapojpoluijkej? (1 Timoteo 1:​12-15). (2) ¿Tlen timomachtiskej itech okse tlamachtil?

¹⁵ Apóstol Pablo omonekiaya moyolkopas porque ye okichi miak tlamantli amo kuali ijkuak ayamo okitekichiuiliaya toTajtsin Dios. Ye sapanoua okintlajyouilti idiscípulos Jesús. Ikinon xamo discípulos omokuayejyekouayaj ye amo keman moyolkopaskia. Pero Jesús amo ijkon omokuayejyeko. Ye uan iTajtsin okitakej tlen kuali okipiaya itech iyolo. Jesús okijto: “Yonikpejpenki non tlakatl” (Hech. 9:15). Ye okichi se milagro uan ijkon okipaleui mamoyolkopa (Hech. 7:58–8:3; 9:​1-9, 17-20). Pablo omoyolkopki uan opejki kichiua ken Cristo. Jesús okimakak seki tekitl uan okitlali mayeto apóstol. Pablo omotlasojkamatiaya porque Jehová uan Jesús okiknomatkej (xiktlajtolti 1 Timoteo 1:​12-15). Ikinon ye okijto: “ToTajtsin Dios yolkuali uan kineki mitspaleuis ximoyolkopa” (Rom. 2:4).

¹⁶ Se tonal Pablo okimatki itech tlanechikol tlen okatka Corinto, okatka se tlakatl tlen oauilnemiaya uan amitlaj okiluiayaj. Pero Pablo itlaj okichi uan non techmachtia Jehová techtlasojtla ikinon techyektlalia uan techiknomati ijkuak timoyolkopaj. Noijki techmachtia tleka miak ipati matiteiknomatikan ijkon ken Jehová kichiua. Nochi nin timomachtiskej itech okse tlamachtil.