1. ¿Tleka akinmej kichiuaj ken Cristo moneki moapolaktiskej? (Xikita tlaixkopinal tlen ika peua tlamachtil).

SEJSE xiuitl sapanoa miakej moapolaktiaj. Miakej telpokamej, ichpokamej uan konemej. Xamo okinmachtijkej intatajuan tlen iTlaixpantijkauan Jehová. ¿Uan te yotimoapolakti? Melauak tiyolpakij tla ijkon yotikchi. Nochtin akinmej kichiuaj ken Cristo moneki moapolaktiskej tla kinekij momakixtiskej (Mat. 28:19, 20, TNM; 1 Ped. 3:21).

2. ¿Tleka amo ximomojti tla tikneki timotemakas ixpan Jehová?

² Tla timoapolaktis mitspaleuis okachi xiktekichiuili Jehová uan non amo san ajauili. ¿Tleka? Porque ijkuak otimoapolakti, otiknankili se tlajtlanilistli tlen ijkin okijtoaya: “Ken axkan yititlaneltoka itech imikilis Jesús, ¿yotimoyolkuepki uan yotimotemakak ixpan Jehová para tikchiuas tlen ye kineki?”. Uan otitlanankili kema yotikchi. Otikijto tiktlasojtlas Jehová uan nochipa tiktekichiuilis. ¿Ayakmo tikneki  tikchiuas tlen otikilui Jehová? Amo keman ximokuayejyeko tikkauas Jehová porque tla ayakmo tiktekichiuilis, tikkauilis Satanás ma mitsyekana. Uan ye amo kineki ximomakixti. Ye yolpakis tla tikkauas Jehová uan ayakmo tikselis yolilistli tlen amo keman tlamis.

3. ¿Ken yomitsteochi Jehová porque ixpan yotimotemakak?

³ Ximokuayejyeko ken yomitsteochi Jehová porque yotimotemakak ixpan uan yotimoapolakti. Ken yotikmaktili monemilis, uelis tikijtos: “Jehová nouan kajki; amo nimomojtis. ¿Akin uelis itlaj nechchiuilis?” (Sal. 118:6). Melauak se tlateochiualistli tiktekichiuiliskej Jehová uan ma techseli.

4. ¿Tleka amo ikaj uelis mitspatkayotis ximouika iuan Jehová?

⁴ Tla yotimoapolakti, moneki timouikas iuan Jehová. Amo uelis ikaj mitspatkayotis, porque nin amo ken ijkuak motatajuan mitskajteuiliaj se tlali. Uan tla ok tichanti iuan motatajuan, te moneki timochijchikauas timouikas iuan Jehová. ¿Tleka miak ipati ijkon xikchiua? Porque amo tikmati tlen ouijkayotl uelis tikixnamikis. Uelis otimoapolakti ijkuak otikatka titsikitsin. Pero axkan uelis okse tlamantli timomachilia uan okseki tlamantli tikixnamiki. Se neskayotl, se ichpochtli okijto: “Ijkuak otikatkaj tikonemej amo otechkuejsoaya tiyetoskej tiiTlaixpantijkauan Jehová san porque amo otikkuayaj pastel ijkuak ikaj okiluichiuiliayaj escuela. Pero ijkuak timoskaltiaj peua tiknekij ikaj iuan timotekaskej, ik non, moneki ma tikilnamiktokan okachi ipati tikintlakamatiskej itlanauatiluan toTajtsin Dios”.

5. ¿Tlen ouijkayotl tinochtin tikixnamikij?

⁵ Amo san telpokamej uan ichpokamej kixnamikij ouijkayotl. Noijki akinmej yikipiaj miak xiuitl uan moapolaktiaj kinpanoa miak tlamantli. Xamo kipiaj ouijkayotl iuan innamik, kanin tekitij noso mokokoaj. Maski san keski xiuitl tikpiaj, tinochtin tikpiaj ouijkayotl uan moneki tikteititiskej tiyolmelajkej ixpan Jehová (Sant. 1:12-14).

6. (1) ¿Tlen kijtosneki moneuia otimotemakak ixpan Jehová? (2) ¿Tlen mitsmachtia Filipenses 4:11, 12 uan Isaías 12:2?

⁶ Mitspaleuis xiyeto yolmelajki tla tikilnamiktos te moneuia otimotemakak ixpan Jehová. Non kijtosneki otikilui toTeko Jehová akin Ueyi Tekiua itech nochi semanauak, nochipa tiktekichiuilis maski motatajuan noso akinmej iuan timouika ayakmo kitekichiuiliskej (Sal. 27:10). Maski san tlen mitspanos, xiktlatlaujti Jehová ma mitsyolchikaua para tikchiuas tlen otikilui (xiktlajtolti Filipenses 4:11, 12; Isaías 12:2).

7. ¿Tlen moneki tikchiuas para timomakixtis?

⁷ Jehová kineki iuan ximouika. Pero moneki timochijchikauas uan tikchiuas seki tlamantli para iuan timouikas. Filipenses 2:12 kijtoa: “Xikmosenmakakah itech nomotemakixtilis ika miak tetlakitálistli iwa mawílistli”. Ninmej tlajtolmej kiteititiaj moneki kuali timokuayejyekos para tikchiuas tlen moneki uan ijkon timouikas iuan Jehová uan tiyetos yolmelajki maski san tlen ouijkayotl tikixnamikis. Amo ximokuayejyeko ayakmo moneki timochijchikauas. Xikilnamiki sekimej akinmej  okitekichiuiliayaj Jehová satepan okikajkej. Ik non, ¿tlen mitspaleuis para timomakixtis?

8. ¿Ken moneki timomachtis Biblia uan tleka miak ipati?

⁸ Tla tiknekij timouikaskej iuan Jehová, moneki tikkakiskej uan iuan timotlapouiskej. Ik non, moneki timomachtis Biblia para uelis tikkakis. Nin kijtosneki tiktlajtoltis uan noijki amatlajkuilolmej uan itech timokuayejyekos. Xikilnamiki timomachtis Biblia amo kijtosneki san tikmatos seki tlamantli ken ijkuak tikchiuas se examen. Xikchiua ken ijkuak kanaj tio kanin sapanoa tlakualtsin uan tiktemos miak tlamantli. Ijkon tikmatis ken iyelis Jehová uan okachi itech timotokis uan ye noijki mouan mouikas (Sant. 4:8).

9. ¿Tlen tlamantli yomitspaleui ximomachti Biblia?

⁹ Ialtepe Jehová techmaka miakej amatlajkuilolmej tlen ika kuali timomachtiskej. Ma tikitakan seki tlamantli tlen techmaka uan katej itech jw.org. Kanin kijtoa “Jóvenes”, tikinmajsis “Actividades para estudiar la Biblia”, ninmej mitspaleuiskej ximomachti seki tlapoualismej tlen tlajtoaj itech Biblia. Noijki tikajsis kanin kijtoa guías de estudio “¿Qué enseña realmente la Biblia?”, ninmej mitspaleuiskej xikpia chikauak motlaneltokilis uan tikinyekiluis oksekimej tlen tikneltoka. Uan revista ¡Despertad! de abril 2009, kijtoa seki tlamantli tlen mitspaleuis ximomachti kanin kijtoa “Los jóvenes preguntan. ¿Cómo disfrutar la lectura de la Biblia?”. Miak ipati timomachtis uan timokuayejyekos para timomakixtis (xiktlajtolti Salmo 119:105).

10. ¿Tleka miak ipati ximotlatlaujti?

¹⁰ Yotimomachtijkej tikkakij Jehová ijkuak timomachtiaj Biblia. Pero tla tiknekij iuan timotlapouiskej, moneki tiktlatlaujtiskej. Amo ma timotlatlaujtikan porque moneki ijkon tikchiuaskej noso para kuali ma kisa tlen tikchiuaskej. Tlatlaujtilistli techpaleuia ma  timotlapouikan iuan Jehová. Uan ye kineki mitskakis (xiktlajtolti Filipenses 4:6). Ijkuak timotekipachos xikchiua ken kijtoa nin tlaxelol: “Xikmaka Jehová motlamamal” (Sal. 55:22). ¿Tikneltoka melauak mitspaleuis tla timotlatlaujtis? Sapanoa miakej yokijtojkej yokinpaleui miak motlatlaujtiskej. Uan te noijki mitspaleuis.

11. ¿Tleka moneki nochipa xiktlasojkamatili Jehová tlen mitsmaka?

¹¹ Nochipa ma timotlapouikan iuan Jehová uan amo san ijkuak tiknekij ma techpaleui. Biblia kijtoa: “Nochipa ximotlasojkamatikah” (Col. 3:15). Ualeua techtekipachoa nochi tlen techpanoa uan tikilkauaj ken yotechteochi Jehová. ¿Uelis mojmostla timokuayejyekos itech eyi tlamantli uan tiktlasojkamatilis Jehová? Se tokni tlen itoka Abigail tlen omoapolakti ijkuak okipiaya 12 xiuitl, okijto: “Nimokuayejyekoa san Jehová moneki nochi ma tiktlasojkamatilikan. Nochipa ma tiktlasojkamatilikan tlen techmaka. Amo nikilkaua tlen onikkak se tonal: ‘Ma tikijtokan se tonal achto tikochiskej, tiktlasojkamatiliaj Jehová san seki tlamantli. Uan tla ijkuak tiijsaskiaj tikpiaskiaj san tlen otiktlasojkamatilijkej, ¿kox miak tlamantli tikpiaskej?’”. *

12, 13. ¿Tleka moneki ximokuayejyeko ken yotikitak Jehová yolkuali?

¹² Jehová okipaleui ueyi tekiua David ma kixnamiki miak ouijkayotl. Ik non, David okijto: “Xikyejyekokan uan xikitakan Jehová yolkuali; yolpaki tlakatl tlen itech mopaleuia” (Sal. 34:8). Nin tlaxelol kijtoa moneki xikita Jehová yolkuali. Ijkuak timomachtiaj Biblia, amatlajkuilolmej uan ijkuak timonechikoa, non mitspaleuis xikinmixmati akinmej yokinpaleui toTajtsin Dios ma yetokan yolmelajkej. Pero ijkuak okachi timouika iuan Jehová, moneki tikitas ken mitspaleuia. ¿Ken yotikitak Jehová yolkuali?

¹³ Tinochtin akinmej tikchiuaj ken Cristo yotikitakej Jehová yolkuali. Ye yokichi itech ma timotokikan uan noijki itech iKone. Jesús okijto: “Amaka weletis wits nonawak, tla amo kinotsa Notajtsi Akin onechaltítlanki” (Juan 6:44). ¿Tikneltoka Jehová yokichi itech ximotoki? Uelis tikijtos: “Jehová okichi notatajuan itech ma motokikan uan ne san nikchiua tlen yejuan kichiuaj”. Pero otikteititi timouika iuan Jehová ijkuak ixpan otimotemakak uan otimoapolakti. Ik non, Jehová mitsixmati. Biblia kijtoa: “Pero tla aka kitlasojtla Dios, Dios kuali kiyekixmati” (1 Cor. 8:3). Ximochijchikaua xikpatioita tika itech ialtepe Jehová.

14, 15. ¿Tleka tla titetlapouis mitspaleuis xikpia chikauak motlaneltokilis?

¹⁴ Noijki tikita Jehová yolkuali ijkuak mitspaleuia xikintlapoui oksekimej uan noijki itech escuela. Sekimej oui kintlapouiaj akinmej inmiuan momachtiaj porque amo kimatij ken kinnankiliskej. Uelis ijkon yomitspanok. Uelis okachi oui mitschiuilis tla moneki miakej tikintlapouis. ¿Tlen mitspaleuis?

¹⁵ Achto ximokuayejyeko tleka titlaneltoka. Uan itech jw.org, katej miakej tlamachtilmej  ika miakej tlajtolmej tlen mitspaleuiskej ximokuayejyeko tlen tikneltoka, tleka tikneltoka uan ken uelis tikyekijtos. ¿Tleka amo timomachtia nonmej tlamachtilmej? Tla melauak titlaneltoka uan kuali timomachtia, tiknekis titetlapouis itech itoka Jehová (Jer. 20:8, 9).

16. ¿Tlen mitspaleuis amo ximomojti ijkuak titetlapouis?

¹⁶ Pero maski kuali timomachtis, uelis ok timomojtis titetlapouis. Se ichpochtli tlen kipia 18 xiuitl uan omoapolakti ijkuak okipiaya 13 xiuitl okijto: “Nikmati tlen nikneltoka pero ualeua oui nikyekijtos”. ¿Tlen kipaleuia tokni? Moyolseuia uan kintlapouia tlen kineltoka ken ijkuak kintlapouia itech okseki tlamantli. Uan okijto: “Akinmej inmiuan nimomachtia amo pinauaj kijtoskej tlen kichiuaj. ¿Tleka nipinauas? Ik non, ijkuak itlaj nikintlapouijtok, noijki nikinmiluia: ‘Se tonal onitlamachtijtoka itech Biblia uan...’. Uan ijkon nikinmiluijti tlen onikchi. Maski amo nikintlapouijtok itech Biblia, sekimej kinekij kimatiskej tlen nikchiua uan ken nitlamachtia. Ijkon amo okachi oui nitetlapouia. Uan niyolpaki ijkuak nitetlapouia”.

17. ¿Tleka moneki oksekimej ma kitakan amo timomojtiaj ijkuak tikintlapouiaj?

¹⁷ Tla tikintlakaita oksekimej uan intech timotekipachoa, yejuan noijki mitstlakaitaskej. Ma tikitakan tlen omokuayejyekoaya Olivia, se tokni tlen kipia 17 xiuitl uan omoapolakti ijkuak okatka okachi takotsin. Ye okijto: “Onimomojtiaya oksekimej ma mokuayejyekokan nochipa san nitetlapouijtok itech Biblia”. Pero okipatlak ken omokuayejyekoaya. Ayakmo okachi omomojti uan okijto: “Miakej telpokamej uan ichpokamej amo itlaj kimatij itech iTlaixpantijkauan Jehová uan san tejuan techixmatij. Ik non, tlen tikchiuaj uelis kichiuas ma techkakikan noso amo. Tla tipinauaj uan amo titetlapouiaj itech tlen titlaneltokaj, kijtoskej amo techpaktia tiyetoskej tiiTlaixpantijkauan Jehová. Uelis nion kinekiskej techkakiskej. Pero okachi techtlakaitaskej tla kitaj melauak tikneltokaj tlen tikinmiluiaj uan kualtsin tikintlapouiaj”.

18. ¿Tlen moneki tikchiuas para timomakixtis?

¹⁸ Yotikitakej moneki timochijchikauas para timomakixtis. Ik non, moneki xiktlajtolti Biblia, itech ximokuayejyeko, ximotlatlaujti uan ximokuayejyeko ken mitsteochiua Jehová. Nin kichiuas xikneltoka Jehová mouan mouika. Non mitsyolinis xitetlapoui tlen tikneltoka (xiktlajtolti Salmo 73:28).

19. ¿Tleka moneki ma timochijchikauakan tikchiuaskej tlen moneki para timomakixtiskej?

¹⁹ Jesús okijto: “Tla aka kineki wits nonawak, ayakmó makichiwa san tlan ye kineki. Yej, makixiko nochi tlan panos iwa mawiki nowa, maya makimiktikah itech se [kuauitl, TNM]” (Mat. 16:24). Tla tiknekij tikchiuaskej ken Jesús, moneki timotemakaskej ixpan Jehová uan timoapolaktiskej. Nin techpaleuis ma techteochiua uan ma tikselikan yolilistli tlen amo keman tlamis ijkon ken yokijto. Nochi nin techyolinis ma timochijchikauakan tikchiuaskej tlen moneki para timomakixtiskej.