Tlen kijtoua Deuteronomio 22:25-27 amo san kiteititia tlakatl okatka itlajtlakol tlen opanok porque yokimatiayaj ye otlajtlakolchi. Nin tlanauatil kijtoua amo omonekiaya kitlajtlakoltiskej ichpochtli tlen opanok. Ma tikitakan seki tlamantli para okachi tikajsikamatiskej.

Textos tlen achto ijkuilitokej kijtouaj se tlakatl omotekak iuan se ichpochtli ompa ixtlauak uan nin ichpochtli yimonamiktiskia. Tlakatl okitlajtlakoltiayaj omomekati porque yiuejkika ichpokamej tlen yimonamiktiskiaj okinmitayaj ken yomonamiktijkej. ¿Tlen okipanouaya siuatl? Amo chikauak otsajtsik ompa ixtlauak. Tla chikauak tsajtsiskia ma kipaleuikan, xamo ikaj kikakiskia uan kipaleuiskia. Pero amikaj okilui ma kipaleui, ik non, noijki okitlajtlakoltiayaj omomekati. Yejuan ome okatka intlajtlakol (Deut. 22:23, 24).

Pero tlanauatil noijki okijtouaya: “Pero tla se tlakatl okajsito tlalan se ichpochtli tlen yimonamiktiskia uan okichiualti iuan ma moteka, san moneki kimiktiskej tlakatl tlen iuan omotekak; ichpochtli amitlaj xikchiuilikan. Ye amo nankimiktiskej porque amo itlajtlakol. Noijki moneki ijkon nankichiuiliskej tla se tlakatl itlaj kichiuilia ikni uan kimiktia. Porque ye okajsito tlalan uan ichpochtli tlen yimonamiktiskia chikauak otsajtsik ma kipaleuikan pero amikaj okipaleui” (Deut. 22:25-27).

Ijkuak ijkon opanouaya jueces okineltokiliayaj ichpochtli. Jueces okijtouayaj: “Ma tikijtokan ichpochtli chikauak otsajtsiaya ikaj ma kipaleui pero amikaj okipaleui”. Ichpochtli amo okitlajtlakoltiayaj omomekati. Pero tlakatl okitlajtlakoltiayaj omomekati porque “okichiualti iuan ma moteka”.

Nin tlanauatil kijtoua amitlaj kitlajtlakoltiskiaj ichpochtli. Pero kijtoua tleka tlakatl okitlajtlakoltiayaj omomekati. Noijki tikneltokaj jueces okachi otlajtlaniayaj tlen opanok uan okichiuayaj ijkon ken miak uelta otlanauati toTajtsin Dios (Deut. 13:14; 17:4; Éx. 20:14).