1, 2. (1) ¿Tlen kijtosneki Jubileo? (Xikita recuadro “¿ Tlen kijtosneki Jubileo?”). (2) ¿Tlen okijto Jesús itech Lucas 4:16-18?

ITECH seki altepemej iluichiuaj ijkuak se tekiua kajxitia cincuenta xiuitl tlanauatijtok. Nin iluitl motokayotia Jubileo. Ualeua iluichiuaj se tonal, se semana noso okachi uejkauaj. Pero ijkuak tlami iluichiuaj kilkauaj tleka oiluichijkej.

² Axkan timomachtiskej se iluitl itoka Jubileo tlen okachi kuali. Nin iluitl okachi techpaleuia amo ken Jubileo tlen okichiuayaj israelitas ijkuak oajsiaya cincuenta xiuitl. Jubileo ouejkauaya se xiuitl uan non okijtosnekiaya okinmakixtiayaj israelitas. ¿Tleka tiknekij tikmatiskej tlen okichiuayaj non xiuitl? Porque techilnamiktia tlen okichi Jehová para techmakixtis. Jesús okijto otechmakixtijkej uan non techpaleuia (xiktlajtolti Lucas 4:16-18).

3. Ijkon ken kijtoua Levítico 25:8-12, ¿ken okinpaleuiaya israelitas ijkuak okichiuayaj Jubileo?

³ Tikajsikamatiskej tlen okijto Jesús tla timomachtiskej tlen okinnauatijkej israelitas ma kichiuakan ijkuak okichiuayaj Jubileo. Jehová okinmilui israelitas: “Moneki nankitaskej santo xiuitl 50 uan nochtin nankinmiluiskej momakixtiskej akinmej ompa chantij. Nankichiuaskej Jubileo uan oksepa namechmakaskej tlen namoaxka uan oksepa nanmokopaskej kanin katej namofamilia” (xiktlajtolti Levítico 25:8-12). Itech okse tlamachtil otikitakej ken okinpaleuiaya israelitas ijkuak omoseuiayaj nochi  sábados. Axkan tikitaskej ken okinpaleuiaya ijkuak okichiuayaj Jubileo. Ma tikijtokan se israelita otlateuikiliaya uan okinemakaya itlal uan ijkon okitlaxtlauaya tlen okiteuikiliaya. Ijkuak oajsiaya xiuitl ijkuak okichiuayaj Jubileo oksepa okimakayaj itlal. Ijkon okipiaya tlen kinkajteuilis ikoneuan. Noijki ma tikijtokan se israelita amo okipiaya tomin uan amo okipiaya tlen ika kitlaxtlauas tlen okiteuikiliaya. Ik non, omonekiaya kinemakas se ikone ken tlakeuali noso ye ineuian omonemakaya. Pero ijkuak oajsiaya xiuitl ijkuak okichiuayaj Jubileo, akin okinemakayaj oksepa omokopaya iuan ifamilia. Ijkon akinmej okinnemakayaj okimatiayaj se tonal mokopaskiaj iuan infamilia. Nochi nin okiteititiaya Jehová okinmiknomatiaya itekipanojkauan.

4, 5. ¿Ken techpaleuia tlen okichiuayaj israelitas ijkuak okichiuayaj Jubileo?

⁴ ¿Ken okachi otlapaleuiaya Jubileo? Jehová okiyekijto: “Pero amo ma yeto akin amitlaj kipia porque Jehová melauak mitsteochiuas itech tlali tlen Jehová moDios mitsmakas tlen tikmoaxkatis” (Deut. 15:4). Axkan ayakmo ijkon kichiuaj. Akin kipia tomin okachi kineki kipias uan akin amitlaj kipia okachi ayakmo itlaj kipia.

⁵ Akinmej tikchiuaj ken Cristo ayakmo tiktlakamatij tlanauatil tlen okijkuilo Moisés. Nin amo kijtosneki tikinkauaj ma yakan tlakeualmej, ayakmo tiktlaxtlauaj tlen tikteuikiliaj uan amo kijtosneki oksepa tikmakaj itlal akin otikkouilijkej (Rom. 7:4; 10:4; Efes. 2:15). Pero techpaleuia tlen okichiuayaj itech Jubileo. ¿Tleka? Porque techilnamiktia Jehová otechmakixti ijkon ken yiuejkika okinmakixti israelitas.

6. ¿Tleka moneki ma techmakixtikan?

⁶ Tinochtin tiknekij ma techmakixtikan imak tlajtlakoli. Porque tikokoxkatij noso tiueuejtij, timokokouaj uan tiixpoliuij. Tikitaj ijkon techpanoua ijkuak timotaj itech teskatl noso ijkuak tiauij timopajtitiuij. Noijki timoyolkokouaj ijkuak  titlajtlakolchiuaj. Tlatitlanil Pablo okijto: “Nikita noijtik onka ok se tlanawatílistli, ye tlan nechyoltilana manitlatlajkolchiwa”. Noijki okijto: “¡Nimialma! ¿Akin weletis nechmakixtis itech nin kuerpo non nechwika manimiki?” (Rom. 7:23, 24).

7. ¿Tlen okijto Isaías panoskia?

⁷ Jehová ika pakilistli itlaj okichi uan ijkon techmakixtiskia imak tlajtlakoli. Jesús otechmakixti uan non sapanoua miak ipati. Itech siglo ocho achto itech xiuitl se, profeta Isaías okijto techmakixtiskiaj. Nin okachi techpaleuiskia uan amo ken ijkuak israelitas okichiuayaj Jubileo. Isaías okijkuilo: “Nikpia iespíritu toTeko Jehová akin Ueyititok porque Jehová onechpejpenki ma nikinmatilti kuali tlajtoli akinmej yolkualmej. Onechualtitlanki ma nikinyolchikauaki akinmej moyolkokouaj, ma niktematilti kinkixtiskej akinmej tsaktokej” (Is. 61:1). Ma tikitakan akin kichiuaskia tlen kijtoua nin profecía.

8. ¿Akin okichi profecía tlen okijkuilo Isaías?

⁸ Nin profecía opejki mochiua satepan ijkuak Jesús opejki tetlapouia. Jesús oyajki kanin okatka teokali ompa Nazaret kanin omoskalti uan okintlajtoltili akinmej ompa okatkaj profecía tlen okijkuilo Isaías. Ye ijkin okijto: “Iespíritu n Noteko [Jehová] notech kajki, ken Ye inewia onechpéjpenki para manikinmatilti n kualitlájtoli non amitla kipiah, onechaltítlanki manikinyolchikawaki akimeh moyolkokoah, iwa manikinmatilti kinkixtiskeh non tsaktokeh; iwa manikinmixtlajtlapo akimeh amo tlachiah, iwa manikinpalewi akimeh tlaijyowiah, iwa maniktematilti yoajsiko n tonati keman Dios kintiochiwas nochteh akimeh witseh inawak” (Luc. 4:16-19). ¿Ken okichi Jesús nin profecía?

9. ¿Tlen okinekiayaj sekimej ma kichiua Jesús ijkuak okatka nikan tlaltikpak?

⁹ Akinmej okatkaj itech achto siglo, opejki kinmakixtiaj ijkon ken okijkuilo Isaías uan tlen okitlajtolti Jesús. Ye ijkin okijto: “Nin tonati nomoixpa yomochi tlan kijtoa itlajkuilol Dios” (Luc. 4:21). Miakej tlen okikakej Jesús xamo omokuayejyekojkej kinpatlaskia tekiuajkej uan ijkon ayakmo kinnauatiskiaj tekiuajkej tlen okatkaj Roma. Xamo omokuayejyekojkej ken ome tlakamej tlen okijtojkej: “Tejwah otimoyolchikawayah  itech porke otikneltokayah Ye akin kimakixtiskia nochi Israel” (Luc. 24:13, 21). Pero tikmatij Jesús amo okinmilui imachtijkauan ma kinmixnamikikan tekiuajkej tlen okinnauatiayaj. Ye okinmilui: “Xikmakakah n César tlan iaxka n César” (Mat. 22:21). Tla ijkon, ¿tleka okijto okinmakixti?

10. ¿Ken okinpaleui Jesús akinmej okatkaj yolyamankej?

¹⁰ IKone toTajtsin Dios okichiuako ome tlamantli. Se tlamantli, Jesús okinpaleui miakej ma kajsikamatikan tlen melauak tlamachtia iTlajtol toTajtsin Dios uan ijkon teopixkej ayakmo kinkajkayauaskiaj. Miakej judíos okineltokayaj miak tlamantli uan okichiuayaj miak tlamantli tlen kixnamiki iTlajtol toTajtsin Dios (Mat. 5:31-37; 15:1-11). Teopixkej okatkaj ken amo otlachiayaj porque amo okitekichiuiliayaj toTajtsin Dios ken ye okinekiaya. Yejuan amo okiselijkej Mesías uan tlen otlamachti. Ik non, yetoskia ken okatkaj kanin tlayoua uan sapanoua otlajtlakolchiuayaj (Juan 9:1, 14-16, 35-41). Jesús okinmachti akinmej yolyamankej tlen melauak tlamachtia iTlajtol toTajtsin Dios. Ijkon ayakmo kineltokaskiaj tlen otlamachtiayaj teopixkej. Jesús okichiuaya tlen okijtouaya (Mar. 1:22; 2:23–3:5).

11. ¿Ken okachi otlapaleui Jesús?

¹¹ Okse tlamantli, Jesús topatka omotemakak uan ijkon otechmakixti imak tlajtlakoli. Ijkon toTajtsin Dios kintlapojpoluia akinmej kineltokaj Jesús topatka omotemakak uan noijki kichiuaj tlen kinnauatia (Heb. 10:12-18). Jesús okijto: “Tla Ikone Dios nomechmakixtis, nomejwah de milajka nonmomakixtiskeh” (Juan 8:36). Tlen okichi Jesús okachi otlapaleui. Amo ijkon ken okinmakixtiayaj israelitas ijkuak okichiuayaj Jubileo. Ma tikitakan tleka ijkon tikijtouaj. Tla ikaj ayakmo okatka tlakeuali, satepan uelis oksepa kinemakaskiaj uan ompa kokoxkatiskia noso ueuejtiskia uan ixpoliuiskia.

12. ¿Akinmej achto okinpaleui tlen okitlajtolti Jesús ompa Nazaret?

¹² Itech iluitl Pentecostés xiuitl 33, Jehová okinpejpenki tlatitlanilmej ika iespíritu santo uan oksekimej tlen okatkaj yolmelajkej. Okinseli ken ikoneuan uan satepan kinyolitiskia uan ijkon tlanauatiskiaj iuan Jesús ompa iluikak (Rom. 8:2, 15-17). Yejuan achto okinpaleui tlen Jesús okitlajtolti  ijkuak oyajki teokali ompa Nazaret. Yejuan ayakmo okineltokayaj tlen teopixkej otlamachtiayaj uan okseki tlamantli tlen okixnamikiaya iTlajtol toTajtsin Dios. Ixpan toTajtsin Dios ayakmo okatkaj tlajtlakolejkej. Jehová opejki temakixtia ijkuak opejki kinpejpena imachtijkauan Jesús itech xiuitl 33 uan tlamis kinmakixtis ijkuak tlamis mil xiuitl tlanauatis Jesús. ¿Ijkuakon ken motas tlen kichiuas Jesús?

13, 14. ¿Akinmej noijki kinpaleuia tlen okitlajtolti Jesús ompa Nazaret?

¹³ Axkan sapanoua miakej pouij iuan “oksikimeh ichkameh” porque yolyamankej (Juan 10:16). Ninmej “oksikimeh ichkameh” amo okinpejpenkej tlanauatiskej iuan Jesús ompa iluikak. Yejuan kichiaj chantiskej nikan tlaltikpak ijkon ken kijtoua Biblia. ¿Tejuan noijki tikchiaj tichantiskej nikan tlaltikpak?

¹⁴ Tejuan yitikselijtokej seki tlateochiualistli tlen kiseliaj akinmej tlanauatiskej iuan Jesús. Uelis tikiluiskej toTajtsin Dios ma techtlapojpolui porque tikneltokaj Jesús topatka omotemakak. Noijki tikmatij techselia Jehová uan totlalnamikilis amo techkuejsoua (Efes. 1:7; Apoc. 7:14, 15). Ma tiktlasojkamatilikan toTajtsin Dios ayakmo tikneltokaj tlen achto otikneltokayaj. Jesús okijto: “Nonkixmatiskeh tlan milák,  iwa tlan milák nomechmakixtis” (Juan 8:32). Sapanoua tiyolpakij porque otechmakixtijkej.

15. ¿Ken techmakixtiskej satepan uan ken techteochiuaskej?

¹⁵ Satepan sepa techmakixtiskej. Ayakmo miak poliui uan Jesús kinpojpolos religiones tlen san tlakajkayauaj uan noijki tekiuajkej. ToTajtsin Dios kinpaleuis “senmiaktikeh tlaltikpaktlakah”. Nin kijtosneki akinmej kitekichiuiliaj Jehová yetoskej itech xochitlali uan kinteochiuas (Apoc. 7:9, 14). Noijki miakej kinyolitis uan ayakmo kipiaskej tlajtlakoli tlen okinpanoltili Adán (Hech. 24:15).

16. ¿Ken tikchiaj ma techpaleuikan satepan?

¹⁶ Ijkuak Jesús uan tlapejpenalmej tlanauatiskej mil xiuitl, ayakmo tikokoxkatiskej noso tiueuejtiskej uan kuali timouikaskej iuan toTajtsin Dios. Ijkuak ijkon techpaleuiskej, yetoskia ken ijkuak israelitas okichiuayaj Jubileo. Nochtin yolmelajkej ayakmo yetoskej tlajtlakolejkej.

17. ¿Ken kijtoua Isaías 65:21-23 tiyetoskej satepan? (Xikita ixko revista).

¹⁷ Isaías 65:21-23 (xiktlajtolti) techiluia ken tiyetoskej itech xochitlali. Titekipanoskej uan amo san timoseuiskej. Biblia kijtoua kuali titekipanoskej uan tiyolpakiskej. Ma tikneltokakan ijkuak tlamis mil xiuitl, “nochi tlan onka itech nin tlaltíkpaktli momakixtis, iwa ayakmó ijtlakawis. Ijkuakó momakixtiskeh ipilwah n Dios iwa ijkó sansikah kipiaskeh weyílistli” (Rom. 8:21).

18. ¿Tleka uelis tikneltokaskej satepan kuali tiyetoskej?

¹⁸ Jehová okinnauati ma tekipanokan israelitas uan ma moseuikan. Noijki ijkon kichiuas ijkuak Cristo kinnauatis mil xiuitl itekipanojkauan. Ijkuakon, timajxiliskej tikueyichiuaskej toTajtsin Dios ijkon ken axkan porque san ijkon uelis tiyolpakiskej. Tinochtin tiyolpakiskej porque techpaktis tekitl tlen tikpiaskej uan tiktekichiuiliskej Jehová.