1. ¿Ken kitaj tekitl sekimej?

¿KOX sapanoua tekipanouaj kanin tichantij? Porque itech okseki altepemej sapanoua tekipanouaj. Ik non, miakej ayakmo majxiliaj moseuiskej, ayakmo katej iuan infamilia nion ayakmo kinekij kixmatiskej toTajtsin Dios (Ecl. 2:23). Pero oksekimej tlatsiuij tekipanoskej. Ik non, san tlen amo kijtouaj porque amo kinpaktia tekipanoskej (Prov. 26:13, 14).

2, 3. ¿Tlen techmachtia Jehová uan Jesús?

² Akinmej ijkon kichiuaj amo kitaj tekitl ken moneki. Ik non, ma timotlajtlanikan: ¿Ken kita tekitl Jehová uan Jesús? Jehová kipaktia tekipanos. Jesús okijto: “Notajtsi nochipa tekiti, yika Ne noiwa nitekiti” (Juan 5:17). Ma timokuayejyekokan ijkuak Jehová okinchijchi miakej ángeles, sitlalimej, planetas uan nochi tlen onka ipan tlaltikpak para ma tichantikan. Ik non, se salmista okijto: “¡Jehová melauak miak tlamantli yotikchijchi! Ika ixtlamatilistli nochi otikchijchi. Tlaltikpak tentok ika nochi tlen otikchijchi” (Sal. 104:24).

³ Jesús okiteititi iTajtsin ixtlamatki. Okipaleui ijkuak okichijchi iluikak uan okiteititi okatka “se kuali itekipanojka” Jehová (Prov. 8:27-31). Noijki kuali otetlapoui uan kuali otlamachti ijkuak ouala tlaltikpak. Ye okitaya ken itlakual tlen okichiuaya uan ijkon okiteititi toTajtsin Dios okiualtitlanki (Juan 4:34; 5:36; 14:10).

4. ¿Tlen techmachtia Jehová uan Jesús ijkuak omoseuiayaj?

 ⁴ Jehová uan Jesús kinpaktia tekipanoskej, ik non, ¿kijtosneki amo uelis timoseuiskej? Amo. Jehová amo keman sotlaua, ik non, amo moneki moseuis. Pero Biblia kijtoua ijkuak otlanki okichijchi iluikak uan tlaltikpak, ayakmo otekipano uan omoseui (Éx. 31:17). Nin xamo kijtosneki ayakmo otlachijchi uan okiyolpakti tlen okichijchi. Jesús noijki sapanoua otekipano ijkuak okatka nikan tlaltikpak. Pero noijki omoseui uan otlakuaya iuan iyolikniuan (Mat. 14:13; Luc. 7:34).

5. ¿Tlen oui ualeua tikitaj tikchiuaskej?

⁵ Biblia kijtoua akinmej tiktekichiuiliaj toTajtsin Dios ma titekipanokan uan amo ma titlatsiuikan (Prov. 15:19). Xamo titekipanouaj para tiktlaniskej tlen ika mopanoltiskej akinmej inmiuan tichantij. Tinochtin akinmej tikchiuaj ken Cristo moneki titetlapouiskej. Pero noijki moneki timoseuiskej. ¿Tikitaj oui tikmatiskej keman titekipanoskej, keman titetlapouiskej uan keman timoseuiskej? ¿Ken tikmatiskej kox okachi titekipanouaj noso okachi timoseuiaj?

6. ¿Ken kiteititia Marcos 6:30-34 Jesús okimatiaya keman tetlapouis uan keman moseuis?

⁶ Ma tikitakan tekitl ken moneki. Tekiua Salomón okijkuilo: “Para nochi onka kauitl, noijki para nochi tlen mochiuas” noijki okijto uelis titlatokaskej, tikchijchiuaskej se kali, tichokaskej, tiuetskaskej uan timijtotiskej (Ecl. 3:1-8). Moneki titekipanoskej uan timoseuiskej porque non techpaleuia. Jesús okimatiaya keman moseuis uan keman tetlapouis. Se tonal, itlatitlaniluan otetlapouitoj uan amo “omajxiliayah tlakuaskeh”. Ik non, okinmilui: “Xiwikih, matimosewitih kan amaka nemi” (xiktlajtolti Marcos 6:30-34). Jesús uan imachtijkauan amo nochipa omoseuiayaj ijkuak okinekiayaj. Pero ye okilnamiktoka imachtijkauan omonekiaya moseuiskej.

7. ¿Ken techpaleuis tla timomachtiskej tlen okichiuayaj israelitas nochi sábados?

⁷ Ualeua moneki timoseuiskej noso moneki tikpatlaskej tlen tikchiuaj. Ijkon kiteititia tlanauatil tlen Jehová okinmakak israelitas. Tlanauatil tlen okijkuilo Moisés okijtouaya israelitas omonekiaya moseuiskej nochi sábados. Axkan ayakmo tiktlakamatij Tlanauatil tlen okijkuilo Moisés pero uelis timomachtiskej tlen okichiuayaj nochi sábados uan non techpaleuis. Techpaleuis ma tikitakan keman titekipanoskej uan keman timoseuiskej.

8. Ijkon ken kijtoua Éxodo 31:12-15, ¿tlen okichiuayaj israelitas nochi sábados?

⁸ ITlajtol toTajtsin Dios kijtoua ijkuak oajsik chikuase tonal, Jehová ayakmo itlaj okichijchi ipan tlaltikpak (Gén. 2:2). Pero Jehová kipaktia tekipanos, ik non, nochipa tekipanoua (Juan 5:17). Tlanauatil okijtouaya tlen kichiuaskiaj nochi sábados omonekiaya kichiuaskej ken ijkuilitok itech Génesis. Ompa kijtoua chikuase tonal otekipanouayaj uan ipan chikome tonal omoseuiayaj. Tonal sábado okiteititiaya israelitas kuali omouikayaj iuan Jehová uan okilnamiktokaj okinkixti Egipto. Nochi se tonal omoseuiayaj uan noijki non tonal Jehová okitaya chipauak noso santo (xiktlajtolti Éxodo 31:12-15).  Amikaj otekipanouaya nion konemej nion tlakeualmej. Noijki amo okintekipanoltiayaj yolkamej (Éx. 20:10). Non okinpaleuiaya israelitas okachi ma kipatioitakan ijkuak okiueyichiuayaj Jehová.

9. ¿Tlen otlanauatiayaj teopixkej?

⁹ Akinmej okitekichiuiliayaj toTajtsin Dios okipatioitayaj tonal sábado. Pero ijkuak Jesús okatka nikan tlaltikpak miakej tlayekankej teopixkej amo okichiuayaj ijkon ken omonekiaya. San tlen amo okinnauatiayaj oksekimej ma kichiuakan. Otlanauatiayaj amo ma miauatekikan nion amikaj ma kipajtikan (Mar. 2:23-27; 3:2-5). Pero Jehová uan Jesús amo okinekiayaj ijkon ma kichiuakan uan Jesús ijkon okinmilui akinmej okikakiayaj.

10. Ijkon ken kijtoua Mateo 12:9-12, ¿ken okitaya Jesús nochi sábados?

¹⁰ Jesús uan imachtijkauan tlen okatkaj judíos omoseuiayaj nochi sábados porque okitlakamatiayaj tlanauatil tlen okijkuilo Moisés. * Pero Jesús okiteititi non tonal uelis kinpaleuiskiaj oksekimej tla omonekiaya. Okijto: “Kema weletis tikchiwaskeh tlan kuali ipan sábado” (xiktlajtolti Mateo 12:9-12). Ye amo okitaya tlajtlakoli tla kichiuaskia itlaj kuali sábado. Jesús okajsikamatiaya tleka Jehová okinmilui amo ma tekipanokan non tonal. Israelitas amo otekipanouayaj non tonal, ik non, uelis okachi  kuali kiueyichiuaskiaj toTajtsin Dios. Akinmej inmiuan ochantiaya Jesús okiueyichiuayaj Jehová nochi sábados. Ijkon kiteititia tlen okichi ompa Nazaret. Biblia kijtoua: “Non sábado okalakito kan sinagoga, kemi nochipa okichiwaya, iwa owalmóketski para kinamapoilis itlajkuilol Dios” (Luc. 4:15-19).

11. ¿Akin okimachti Jesús ma tekipano?

¹¹ José xamo okimachti Jesús ken kita tekitl Jehová ijkuak okimachti ken kuajximas (Mat. 13:55, 56). Jesús okitak ken otekipanouaya itlakpatajtsin uan ijkon kinmakaskia tlen ika mopanoltiskiaj akinmej inmiuan ochantiaya. Ik non, satepan ijkin okinmilui imachtijkauan: “Akin tekiti kiselia itlaxtlawil” (Luc. 10:7). Jesús okimatiaya tekipanos.

12. ¿Tlen textos kiteititiaj moneki ma titekipanokan?

¹² Tlatitlanil Pablo noijki okimatiaya tekipanos. Omochijchika okitematilti akin okatka Jesús uan tlen otlamachti. Pero noijki okimotlaniliaya tlen ika mopanoltis. Tokniuan tlen ochantiayaj Tesalónica okimatiayaj Pablo otekipanouaya ‘tlajka iwan yúak, para amaka kitekimakaskia’ (2 Tes. 3:8; Hech. 20:34, 35). Ijkuak Pablo okijkuilo ye otekipanouaya, xamo otlajtojtoka tlen okichi ompa Corinto. Ye omokaloti ikalijtik Áquila uan Priscila uan inmiuan “okinchijchiwaya manteadojkalmeh”. Ijkuak okijto otekipanouaya “tlajka iwan yúak” amo kijtosneki amo keman omoseuiaya. Ye noijki nochi sábados okintlapouiaya judíos porque yejuan noijki omoseuiayaj non tonal (Hech. 13:14-16, 42-44; 16:13; 18:1-4).

13. ¿Tlen techmachtia tlen okichi Pablo?

¹³ Pablo okiteititi okimatiaya tekipanos. Okipiaya miak tekitl pero omochijchika tetlapouis “kuali tlájtoli” tlen kitematiltia toTajtsin Dios (Rom. 15:16; 2 Cor. 11:23). Noijki okinyolchika oksekimej ijkon ma kichiuakan. Ik non, Áquila uan Priscila ‘noijki okitekitilijkeh Cristo Jesús ijkó kemi ye’ okichi (Rom. 12:11; 16:3). Pablo okinmilui tokniuan tlen ochantiayaj Corinto nochipa ‘makimopantikah iteki n Toteko’ (1 Cor. 15:58; 2 Cor. 9:8). Noijki toTajtsin Dios okinauati ma kijkuilo: “Tla aka amo kineki tekitis, amo matlakua” (2 Tes. 3:10).

14. ¿Tlen kijtosneki tlen okijto Jesús itech Juan 14:12?

¹⁴ Itlamian ninmej tonalmej okachi ipati ma titetlapouikan uan ma titlamachtikan. Jesús okijto imachtijkauan kichiuaskiaj okachi miak tlamantli (xiktlajtolti Juan 14:12). Ye amo okijto tikinchiuaskej milagros ken ye okichi. Ye okijto okachi uejkika titetlapouiskiaj, uejka titetlapouiskiaj uan miakej tikinmachtiskiaj.

15. ¿Tlen moneki timotlajtlaniskej uan tleka?

¹⁵ Tla titekipanouaj, ma timotlajtlanikan: “¿Kitaj oksekimej kuali nitekipanoua? ¿Totoka nitekipanoua uan kuali nikchiua?”. Tla ijkon techixmatij, xamo akinmej otechtlakejkej kineltokaj tikchiuaskej kuali tlen technauatiaj uan akinmej inmiuan titekipanouaj xamo techkakiskej ijkuak tikintlapouiskej tlen kijtoua iTlajtol toTajtsin Dios. Pero noijki ijkuak titetlapouiaj uan tikinpaleuiaj oksekimej ma mochiuakan imachtijkauan Jesús, ma timotlajtlanikan: “¿Kitaj oksekimej nimochijchikaua kuali nitetlapouis? ¿Kuali nimomachtia ijkuak nitetlajpaloti? ¿Nio nikintlajpaloti akinmej  kinekij kimatiskej tlen tlamachtia Biblia? ¿Nimochijchikaua tlatlamantli nitetlapouis?”. Tla ijkon tikchiuaj, tiyolpakiskej titetlapouiskej uan titlamachtiskej.

16. ¿Ken okitaya Jesús uan itlatitlaniluan ijkuak omoseuiayaj uan axkan ken kitaj miakej?

¹⁶ Jesús okimatiaya itlatitlaniluan ualeua omonekiaya moseuiskej. Pero yiuejkika miakej omokuayejyekouayaj ken se tlakatl tlen okijto Jesús okipiaya tomin uan axkan noijki miakej ijkon mokuayejyekouaj. Nin tlakatl ijkin okijto: “Axa, sa ximosewi, xitlakua, xikoni, iwa xipaki” (Luc. 12:19; 2 Tim. 3:4). Non tlakatl san okachi okinekiaya moseuis uan moyolpaktis. Pero Jesús uan itlatitlaniluan amo san omoyolpaktiayaj.

17. ¿Tlen tikchiuaj ijkuak timajxiliaj?

¹⁷ Timochijchikauaj tikchiuaj ken Jesús uan amo san timoseuiaj. Noijki titetlapouiaj uan timonechikouaj. Sapanoua tikpatioitaj titetlapouiskej uan timonechikoskej, ik non, nochipa ijkon tikchiuaj (Heb. 10:24, 25). Nochipa timonechikouaj uan timochijchikauaj titetlapouiskej ijkuak amo titekipanouaj noso ijkuak kanaj tiauij (2 Tim. 4:2).

18. ¿Tlen kineki Jesucristo ma tikchiuakan?

¹⁸ Tiktlasojkamatiliaj Jesucristo porque techajsikamati uan techpaleuia ma tikitakan keman titekipanoskej uan keman timoseuiskej (Heb. 4:15). Kineki ma timoseuikan. Pero noijki kineki ma titekipanokan uan ijkon tikpiaskej tlen ika timopanoltiskej. Noijki ma timochijchikauakan ma tikinmachtikan oksekimej. Itech okse tlamachtil tikitaskej tlen yokichi Jesús para techmakixtis.