“¿NECHIXMATIJ ne nochipa nimotlasojkamati?”. Moneki tinochtin ijkon timotlajtlaniskej. Biblia kijtoua axkan miakej ayakmo motlasojkamatij (2 Tim. 3:2). Xamo tikinmixmatij akinmej kinekij nochi kipiaskej uan kijtouaj amo moneki motlasojkamatiskej. Amikaj kipaktia mouikas iuan akinmej ijkon inyelis.

Pero Jehová kinmiluia itekipanojkauan ‘nochipa mamotlasojkamatikah’ (Col. 3:15; 1 Tes. 5:18). Techpaleuia ijkuak timotlasojkamatij. ¿Tleka? Ma tikitakan ken techpaleuia.

Miak ipati ma timotlasojkamatikan porque kuali timomachiliaj ijkuak ijkon tikchiuaj. Noijki kuali momachiliaj akinmej kintlasojkamatiliaj uan akinmej motlasojkamatij. ¿Tleka kuali timomachiliaj? Ma tikitakan se tlamantli. Ijkuak ikaj techpaleuia mokuayejyekoua technamiki techpaleuis uan techajsikamati. Non kichiua kuali ma timomachilikan. Xamo ijkon okipanok Rut. Boaz okimakak tlen ye okipolouaya, ik non, xamo oyolpakik ijkuak okitak Boaz okinekiaya kipaleuis (Rut 2:10-13).

Pero okachi ma tiktlasojkamatilikan toTajtsin Dios. Ualeua xamo tikitaj nochi tlen Jehová techtliokolia uan nochi tlen techmachtia (Deut. 8:17, 18; Hech. 14:17). Pero amo san ma tikselikan tlen techmaka. Moneki ma timokuayejyekokan nochi tlen Jehová techtliokolia uan ken kinpaleuia akinmej tikintlasojtlaj. Ijkon okachi timotlasojkamatiskej uan tikneltokaskej Jehová techtlasojtla uan techpatioita (1 Juan 4:9).

Ijkuak timokuayejyekouaj Jehová techtliokolia miak tlamantli uan techteochiua, moneki noijki ma tiktlasojkamatilikan porque ye yolkuali (Sal. 100:4, 5). Miakej kijtouaj “sapanoua techpaleuia ma tiyolpakikan ijkuak timotlasojkamatij”.

Noijki ijkuak timotlasojkamatij techpaleuia kuali ma timouikakan iuan oksekimej. Tinochtin kuali timomachiliaj ijkuak oksekimej techpatioitaj. Okachi kuali timouikaj iuan oksekimej ijkuak timotlasojkamatij porque techpaleuiaj (Rom. 16:3, 4). Noijki akinmej ijkon kichiuaj xamo okachi kinpaleuiaj oksekimej. Kinekij kinpaleuiskej oksekimej porque kitaj yejuan noijki kinpaleuiaj. Tiyolpakij ijkuak tikinpaleuiaj oksekimej. Ijkon ken Jesús okijto: “Okachi makipia pakílistli n tlakatl non tlapalewia ika tlan kipia, iwa amo akin kipalewiah” (Hech. 20:35).

Se tlakatl itoka Robert Emmons tlen tlamachtia itech Universidad ompa California, okijto: “Moneki tikitaskej ken techpaleuia ijkuak oksekimej tikintlasojkamatiliaj porque ualeua techpaleuiaj uan ualeua tejuan noijki tikinpaleuiaj oksekimej”. Nin kiteititia moneki techpaleuiskej oksekimej tla tiknekij kuali tiyetoskej. Xamo sekimej techtlamakaj uan sekimej techpajtiaj (1 Cor. 12:21). Akinmej motlasojkamatij kitaj ijkuak kinpaleuiaj. Tejuan ¿noijki ijkon tikchiuaj?

Techpaleuia kuali ma timokuayejyekokan ijkuak timotlasojkamatij. Tokuayejyekol techpaleuia ma tikilnamiktokan seki tlamantli uan okseki ma tikixtopeuakan. Akinmej motlasojkamatij kitaj tlen kuali kinpanoua uan amo san  mokuayejyekojtokej tlen amo kuali kinpanoua. Ijkuak timotlasojkamatij okachi tikitaj tlen kuali techpanoua uan non kichiua okachi ma timotlasojkamatikan. Ijkuak ijkon timokuayejyekouaj, tikchiuaj tlen okijto tlatitlanil Pablo: “¡Xipakikah itech Toteko!” (Filip. 4:4).

Amo san timokuayejyekojtoskej tlen amo kuali techpanoua. Noijki amo titlaixnekiskej, amo timotekipachojtoskej nion san tikilnamiktoskej tlen amo kuali otechchiuilijkej. Akinmej motlasojkamatij, amo san kitemojtokej kipiaskej miak tlamantli. Yejuan yolpakij san ika tlen kipiaj (Filip. 4:12).

Akinmej tikchiuaj ken Cristo, tikmatij Satanás kinekiskia ma timosotlauakan uan ma timoyolkokokan ijkuak titlajyouiaj. Kinekiskia san ma timokuayejyekojtokan tlen amo kuali techpanoua uan san ma timokuejsojtokan. Tla ijkon tikchiuaskej, ayakmo kuali titetlapouiskej. Porque ijkuak timotlasojkamatij mouika iuan nochi tlen poui itech espíritu. Tiyolpakij porque toTajtsin Dios techmaka miak tlamantli uan tikneltokaj tlen kijtoua kichiuas (Gál. 5:22, 23).

Tejuan akinmej tiktekichiuiliaj toTajtsin Dios xamo tikneltokaj nochi tlen yotikijtojkej techpaleuia tla timotlasojkamatij. Noijki tikmatij amo timotlasojkamatij porque ijkon otineskej. Pero amo ma timosotlauakan. Uelis timochijchikauaskej timotlasojkamatiskej. Pero moneki mojmostla ma timokuayejyekokan tlen tiktlasojkamatiskej. Satepan nochipa timotlasojkamatiskej tla timochijchikauaskej ijkon tikchiuaskej. Ijkon tiyolpakiskej uan amo san timoyolkokojtoskej ken akinmej san mokuayejyekojtokej tlen amo kuali kinpanoua. Ma timokuayejyekokan tlen techtliokolia toTajtsin Dios uan tlen techtliokoliaj oksekimej, non techpaleuia ma tiyolpakikan. Uelis mojmostla tikijkuiloskej kanaj ome noso eyi tlamantli tlen tiknekij tiktlasojkamatiskej.

Ixtlamatkej yokitakej tla timotlasojkamatij tokuatitix okse tlamantli tekiti uan okachi kuali timokuayejyekouaj. Okachi yolpakij akinmej motlasojkamatij. Ik non, ma tikitakan tlen kuali tikchiuaj, ma tiyolpakikan ijkuak itlaj kuali techpanoua uan ma timotlasojkamatikan. Ma tikchiuakan tlen kijtoua Biblia: “Xiktlasojkamatilikan Jehová porque ye yolkuali” uan nochipa ximotlasojkamatikan (1 Crón. 16:34; 1 Tes. 5:18).