¿Uelis tikinnankilis ninmej tlajtlanilmej tlen okiskej itech revistas Akin Tetlapouijtok 2019?

¿Tlen kijtosneki ijkuak toTajtsin Dios techiluia: “Maski san tlen tepostli ika mitsixnamikiskej, amo mitstlaniliskej”? (Is. 54:17).

Jehová techmaluis ijkon ken se tepamitl techpaleuia ijkuak sapanoa ejeka (Is. 25:4, 5). Akinmej techkokoliaj amo nochipa techtlajyouiltiskej (w19.01, página 6 uan 7).

¿Ken okinmititi Jehová nochi kichiua ika melajkayotl akinmej ochantiayaj Canaán uan israelitas tlen okixnamikej?

ToTajtsin Dios okintlajyouilti akinmej oauilnemiayaj uan okintlajyouiltiayaj siuamej uan konemej. Pero okinteochi ijkuak okatkaj yolmelajkej uan nochi okichiuayaj ika melajkayotl (w19.02, página 22 uan 23).

¿Tlen tikchiuaskej tla ikaj toixpan motlatlaujtis tlen amo iTlaixpantijka Jehová?

San ma tikkakikan uan amo san tlen amo ma tikchijtokan. Amo tikijtoskej “amén” nion timomakitskiskej. Uelis timotlatlaujtiskej pero amo ma mokaki ijkuak tikijtoskej “amén” (w19.03, página 31).

¿Sapanoa tlajtlakoli ijkuak ikaj moteka iuan se konetl?

Sapanoa tlajyouiaj konemej ijkuak ikaj inmiuan moteka. Noijki tlajyouiaj inkalchanejkauan, tokniuan tlen inmiuan monechikoaj uan noijki tlajtlakolchiuaj ixpan toTajtsin Dios. Tlayekankej kiteluiaj inmixpan tekiuajkej tla ijkon kichiuaj kanin chantij (w19.05, página 9 uan 10).

¿Tlen moneki tikchiuaskej para tikpatlaskej tlen timokuayejyekoaj?

Moneki tikchiuaskej eyi tlamantli. Ma timotlatlaujtikan, ma timokuayejyekokan uan kuali ma tikinpejpenakan akinmej inmiuan timouikaj (w19.06, página 11).

¿Tlen moneki tikchiuaskej axkan tla tiknekij titlaxikoskej ijkuak techtlajyouiltiskej?

Moneki kuali ma timouikakan iuan Jehová. Ma tikmatokan ye techtlasojtla uan amo keman techkauas. Mojmostla ma tiktlajtoltikan Biblia uan nochipa ma timotlatlaujtikan. Noijki ma tikneltokakan iTekiuajkayo toTajtsin Dios melauak techteochiuas. Ma timomachtikan textos tlen okachi techpaktiaj uan ma timomachtikan tlakuikalmej tlen ika tikueyichiuaj Jehová (w19.07, página 2 uan 4).

¿Tlen moneki tikchiuaskej tla tiknekij Jehová ma kinmakixti tokalchanejkauan?

Ma tikinmajsikamatikan, ma tikchiuakan tlen timomachtiaj, kualtsin ma tikintlapouikan uan ma tikmatikan timochiaskej (w19.08, páginas 15 a 17).

¿Ken techyolseuia tlen okijto Jesús itech Mateo 11:28?

Tlayekankej kuali techmaluiaj uan techtlasojtlaj, inmiuan tiktekichiuiliaj Jehová porque tikchiuaj se tekitl tlen okachi kualtsin (w19.09, página 23).

¿Ken techpaleuia Jehová ma tikchiuakan tlen ye kineki? (Filip. 2:13).

Ijkuak tiktlajtoltiaj Biblia uan timokuayejyekoaj, Jehová techpaleuia ma timochijchikauakan tikchiuaskej tlen ye kineki. Ika iespíritu santo techpaleuis ma tikchiuakan tlen moneki (w19.10, página 21).

¿Tlen moneki achto ma tikchiuakan ijkuak tiknekij itlaj tikpejpenaskej?

Moneki tikchiuaskej makuili tlamantli. Ma tikiluikan Jehová ma techmaka ixtlamatilistli, achto moneki itlaj ma tikchiuakan, ma tikitakan tleka tiknekij itlaj tikchiuaskej, ma timokuayejyekokan tlen tiknekij tikchiuaskej uan ma tikitakan kox melauak tikchiuaskej tlen yotikijtojkej (w19.11, página 27 a 29).

¿Satanás okilui Eva ijkuak mikiskia ok mokauaskia itlaj ok yoltok?

Nesi amo. Diablo amo okilui Eva mikiskia uan ok mokauaskia itlaj yoltok tlen amo kanaj mota. Ye okilui amo mikiskia. San tikmatij ijkuak otlatenki nikan tlaltikpak omikej akinmej opouiayaj itech religión tlen amo melauak otlamachtiayaj. Xamo satepan ijkuak otlatenki opejki kineltokaj itlaj ok mokaua ijkuak tiixpoliuij. Xamo opejki kineltokaj itlaj mokaua ok yoltok ijkuak tiixpoliuij ijkuak toTajtsin Dios ayamo okichiuaya tlatlamantli ma tlajtokan akinmej okatkaj ompa Babel (w19.12, página 15).