1, 2. (1) ¿Tlen otikitakej itech okse tlamachtil? (2) ¿Axkan tlen timomachtiskej?

 ITECH okse tlamachtil otimomachtijkej Levítico capítulo 19 uan otikitakej tlen moneki tikchiuaskej. Itech versículo 3 Jehová okinauati israelitas ma kintlakaitakan intatajuan. Noijki otikitakej uelis tikchiuaskej tlen ompa kijtoua tla tikinpaleuiaj totatajuan ma mouikakan iuan Jehová, kuali ma momachilikan uan ma kipiakan tlen ika mopanoltiskej. Noijki non versículo kiteititia toTajtsin Dios okinmilui israelitas omonekiaya moseuiskiaj sábados. Maski amo techyekana tlanauatil tlen okijkuilo Moisés, otimomachtijkej okachi miak ipati ma tikitakan ken tiktekichiuiliaj Jehová. Ik non, timochijchikauaj tiyetoskej tichipauakej ijkon ken kijtoua Levítico 19:2 uan 1 Pedro 1:15.

² Ok timomachtiskej okseki versículos tlen katej itech Levítico capítulo 19. Non capítulo kijtoua ma tikinpaleuikan akinmej mokokouaj, amo ma titlakajkayauakan ijkuak titlanemakaj uan ma titetlasojtlakan. Tiknekij tiyetoskej tichipauakej ken toTajtsin Dios, ik non, ma tikitakan tlen techmachtia Levítico capítulo 19.

3, 4. Ijkon ken kijtoua Levítico 19:14, ¿ken omonekiaya kinchiuiliskej akinmej amo otlakakiayaj uan akinmej amo otlachiayaj?

³ (Xiktlajtolti Levítico 19:14). Yiuejkika Jehová okinekiaya itekipanojkauan ma kinmiknomatikan akinmej  omokokouayaj. Ma tikitakan ken okichi, ye okinmilui israelitas amo ma kinuijuikaltikan akinmej amo otlakakiayaj; amo ma kinmiluikan kinpanoskia noso kinchiuiliskiaj tlen amo kuali. ¡Tla ijkon kinchiuaskiaj tlajtlakolchiuaskiaj! Ikaj tlen amo otlakakiaya amo uelis mopaleuiskia tla oksekimej okiuijuikaltiayaj.

⁴ Itech versículo 14 kijtoua toTajtsin Dios okinmilui israelitas amo ma kitsakuilikan ika itlaj akin amo otlachiaya. Se amochtli kijtoua tlen okintoktiayaj akinmej ijkon omokokouayaj, ompa kijtoua: “Yiuejkika itech Oriente Medio okintlajyouiltiayaj”. Xamo ikaj okitlaliaya itlaj para mokojkoskia kanin nejnemiskia noso para kipinauiskiaj. ¡Amo kuali ijkon okinchiuiliayaj! Tlen kijtoua itech Levítico 19:14 kiteititia Jehová okilui ialtepe omonekiaya kinmiknomatiskej akinmej amo otlachiayaj.

5. ¿Ken uelis tikinmiknomatiskej akinmej mokokouaj?

⁵ Jesús okinmiknomatki akinmej omokokouayaj. Ma tikilnamikikan ijkuak okintitlanki imachtijkauan ma kiluitij Juan akin oteapolaktiaya: “Non amo otlachiayah, ya tlachiah, non amo onejnemiah, ya nejemih; non okipiayah lepra, yopajtikeh; non amo otlakakiah, ya tlakakih. Non yomikkeh, moyolitiah”. Ijkuak okitakej milagros tlen okichi Jesús “okiweyijkachijkeh Dios” (Luc. 7:20-22; 18:43). Tejuan tiyolpakij tikchiuaskej ken Jesús, tiyolkualmej iuan akinmej mokokouaj uan tikinmiknomatij. Jehová amo techmaka ichikaualis para ma tikinchiuakan milagros. Pero techpaleuia ma tikinmatiltikan akinmej amo tlachiaj Biblia kijtoua yetos se xochitlali, ompa amikaj mokokos uan nochtin mouikaskej iuan toTajtsin Dios (Luc. 4:18). Miakej yikimatij tlen kichiuas toTajtsin Dios uan kiueyichiuaj.

6. ¿Ken techpaleuia tlen kijtoua Levítico capítulo 19?

⁶ Seki versículos tlen kipia Levítico capítulo 19 kijtoua okseki tlamantli tlen  techpaleuia ma tikajsikamatikan majtlaktli tlanauatilmej. Tlanauatil chikueyi kijtoua: “Amo xitlachteki” (Éx. 20:15. Ikaj uelis kijtoskia okitlakamatiaya non tlanauatil tla amo okikitskiaya tlen amo iaxka pero xamo okichiuaya okseki tlamantli uan ijkon otlachtekiaya.

7. ¿Ken okiteititiaya akin otlanemakaya amo okichiuaya tlen kijtoua chikueyi tlanauatil?

⁷ Se akin otlanemakaya uelis kijtoskia amo okimokauiaya itlaj tlen amo iaxka. Pero ¿amo okintlachtekiliaya akinmej okintlanemakiltiaya? Itech Levítico 19:35, 36 Jehová kijtoua: “Amo xitlakajkayauakan ijkuak itlaj nankitamachiuaskej ik ueyak, ken ueyi uan ken etik. Nochi tlen ika nantlatamachiuaj kuali xiktekitiltikan uan kuali xiktamachiuakan itlaj tlen uajki noso itlaj tlen yetoskia ken atl”. Tla se akin otlanemakaya amo kuali okitlatamachiuiliaya akin okitlanemakiltiaya, kijtosneki okikajkayauaya. Non okachi moajsikamati itech seki versículos tlen katej itech Levítico capítulo 19.

8. ¿Ken okinpaleui judíos tlen kijtoua Levítico 19:11-13 uan ken techpaleuia tejuan?

⁸ (Xiktlajtolti Levítico 19:11-13). Levítico 19:11 kijtoua: “Amo xitlachtekikan” uan versículo 13 kiteititia ikaj tlachteki ijkuak akin tlanemaka kinkajkayaua akinmej kintlanemakiltia, ik non, Biblia kijtoua: “Amikaj xikajkayaua”. Tla akin tlanemaka tlakajkayaua noso ijkon kichiua itech okseki tlamantli, kijtosneki tlachteki. Tlanauatil chikueyi kijtoua amikaj omonekiaya tlachtekis pero Levítico capítulo 19 kijtoua okseki tlamantli tlen okinpaleui judíos ma kajsikamatikan ken uelis kichiuaskiaj principio tlen okijtouaya non tlanauatil. Ma timokuayejyekokan ken kita Jehová ijkuak ikaj tlakajkayaua noso tlachteki. Ma timotlajtlanikan: “Ijkon ken kijtoua Levítico 19:11-13, ¿moneki nikpatlas nonemilis ijkuak nitlanemaka noso ijkuak nitekipanoua?”.

9. ¿Ken okinpaleui tlakeualmej tlen kijtoua Levítico 19:13?

⁹ Onka okse tlamantli tlen moneki tikchiuaskej akinmej tikchiuaj ken Cristo, moneki tikitaskej tla ijkuak titlanemakaj amo titlakajkayauaj. Levítico 19:13 saiktlami kijtoua: “Amo xikmokaui itlaxtlauil motlakeual uan moneki xikmaka non tonal”. Miakej israelitas otlatokayaj uan akinmej okintlakeuayaj okintlaxtlauiayaj itlamian se tonal. Tla se tlakeuali amo okitlaxtlauiayaj non tonal, ifamilia amo okipiayaj tlen kikuaskiaj. Jehová okijto: “Amo kipia tomin, [...] san non kipia para ika mopanoltis uan ijkon uelis yoltos” (Deut. 24:14, 15; Mat. 20:8).

10. ¿Tlen techmachtia Levítico 19:13?

¹⁰ Axkan miakej amo kintlaxtlauiaj mojmostla, kintlaxtlauiaj ome uelta itech se metstli. Pero ok techpaleuia tlen kijtoua Levítico 19:13. Sekimej amo kitlaxtlauiaj intlakeualuan ken moneki. Xamo kineltokaj ok tekipanoskej maski amo okachi kintlaxtlauiskej porque amo kipiaj okse tekitl. Akinmej ijkon kichiuaj ‘kimokauiaj intlaxtlauil intlakeualuan’. Tla se itekipanojka Jehová tlanemaka uan kipia itlakeualuan, moneki kilnamiktos non principio. Ma tikitakan tlen okseki techmachtia Levítico capítulo 19.

11, 12. ¿Ken okiyekijto Jesús tlen ijkuilitok itech Levítico 19:17, 18?

¹¹ Jehová amo san techiluia amo ma tikinchiuilikan tlen amo kuali oksekimej.  Ijkon kiteititia tlen kijtoua Levítico 19:17, 18 (xiktlajtolti) ompa kijtoua: “Moneki titetlasojtlas ken timotlasojtla”. Non moneki tikchiuaskej tiitekipanojkauan Jehová tla tiknekij tikyolpaktiskej.

¹² Ma tikitakan ken okiyekijto Jesús tlanauatil tlen ijkuilitok itech Levítico 19:18. Se tonal se fariseo okitlajtlani: “¿Katlie tlanawátili okachi weyi kijtosneki?”. Jesús okilui tlanauatil okachi ueyi kijtoua moneki tiktlasojtlaskej Jehová ika nochi toyolo, toalma uan ika nochi tlen timokuayejyekouaj. Uan satepan okijto tlen ijkuilitok itech Levítico 19:18, okijto: “Moneki titetlasojtlas ken timotlasojtla” (Mat. 22:35-40). Uelis tikchiuaskej miak tlamantli uan ijkon tikintlasojtlaskej oksekimej, itech Levítico capítulo 19 timomachtiskej seki tlamantli.

13. ¿Ken okichi José tlen kijtoua Levítico 19:18?

¹³ Tikteititiskej titetlasojtlaj tla tikchiuaj tlen kijtoua Levítico 19:18. Ompa kijtoua: “Amo moneki timomakopas nion amo xikilnamikto tlen omitschiuilijkej ikoneuan moaltepe”. Tinochtin tikixmatij ikaj tlen amo san niman kilkaua tlen okichiuili akin iuan tekipanoua, momachtia noso se ifamiliar uan xamo hasta miak xiuitl non kilnamiktok. Ma tikilnamikikan, majtlaktli itlakpaikniuan José okikokolijkej, ik non, okichiuilijkej tlen amo kuali (Gén. 37:2-8, 25-28). Pero José amo ijkon okinchiuili, ijkuak uelis momakopaskia okinmiknomatki. Ye okichi tlen satepan okijkuilojkej itech Levítico 19:18 (Gén. 50:19-21).

14. ¿Tleka tikmatij ok moneki tikchiuaskej tlen kijtoua Levítico 19:18?

¹⁴ Tlen okipanok José techititia akinmej tikchiuaj ken Cristo, tla tiknekij tikyolpaktiskej toTajtsin Dios moneki tikintlapojpoluiskej oksekimej uan amo timomakopaskej. Itech padrenuestro Jesús noijki okijto moneki tikintlapojpoluiskej akinmej techchiuiliaj tlen amo kuali (Mat. 6:9, 12). Apóstol Pablo noijki okinmilui tokniuan itech achto siglo amo ma momakopakan (Rom. 12:19).  Noijki okinmilui: “Xitexikokah iwa ximotlapojpolwikah. Iwa tla se nomokni onomechchiwili itla amo kuali, xiktlapojpolwikah” (Col. 3:13). Jehová techmaka principios bíblicos tlen amo mopatla. Axkan ok moneki tikchiuaskej principios tlen ijkuilitok itech Levítico 19:18.

15. ¿Tlen techpaleuia ma tikajsikamatikan moneki timotlapojpoluiskej uan tikilkauaskej tlen otechchiuilijkej?

¹⁵ Ma tikijtokan ijkuak ikaj moyolkokoua yetoskia ken ijkuak timokojkouaj san tepitsin noso sapanoua. Ijkuak titlakualchiuaj uan tiktejtekij itlaj ika se cuchillo xamo se tepitsin timotekij. Xamo sapanoua techkokos pero amo miak tonal panos uan tipajtiskej uan ayakmo tikilnamikiskej. Noijki ijkon xamo ikaj tlen iuan timouikaj kijtoua noso kichiua itlaj tlen techyolkokoua maski amo ijkon okinekiaya pero amo tikitaj oui tiktlapojpoluiskej. Tla uejkatlan timotekij xamo akin tepajtia kijtsomas. Tla tikitskiaj kanin otechijtsonkej okachi techkokos uan amo tipajtiskej. Ijkon uelis techpanos tla sapanoua timoyolkokouaj porque ikaj otechchiuili tlen amo kuali. Tla amo tikilkauaj tlen otechchiuilijkej, non kichiuas san ma timoyolkokojtokan. Ik non, okachi kuali ma tikchiuakan tlen kijtoua Levítico 19:18.

16. Ijkon ken kijtoua Levítico 19:33, 34, ¿tlen omonekiaya kichiuaskej israelitas uan tlen techmachtia?

¹⁶ Ijkuak Jehová okinmilui israelitas omonekiaya tetlasojtlaskej amo kijtosneki san kintlasojtlaskiaj oksekimej israelitas. Okinmilui noijki omonekiaya kintlasojtlaskiaj akinmej okatka oksekan inmialtepe pero inmiuan ochantitoj. Ijkon kijtoua Levítico 19:33, 34 (xiktlajtolti). Omonekiaya kinmitaskiaj ken ompa inmialtepe uan omonekiaya kintlasojtlaskiaj. Omonekiaya kinkauiliskiaj ma motijtixitij uan noijki akinmej amitlaj okipiayaj (Lev. 19:9, 10). Akinmej tikchiuaj ken Cristo noijki moneki tikchiuaskej non principio: tikintlasojtlaskej akinmej oksekan inmialtepe (Luc. 10:30-37). ¿Ken uelis tikchiuaskej? Miakej chantitiuij itech okseki altepemej. Ik non, ma tikintlakaitakan; tlakamej, siuamej uan konemej.

17, 18. (1) ¿Tlen techyoleua ma tikchiuakan Levítico 19:2 uan Pedro 1:15? (2) ¿Tlen okijto apóstol Pedro moneki tikchiuaskej?

¹⁷ Itech Levítico 19:2 uan 1 Pedro 1:15 kijtouaj akinmej tiktekichiuiliaj Jehová moneki tiyetoskej tichipauakej. Itech Levítico capítulo 19 kipia miak versículos tlen kijtouaj ken uelis tikyolpaktiskej Jehová. Yotimomachtijkej seki versículos tlen techititiaj tlen moneki tikchiuaskej uan tlen amo. * Uan yotikitakej itech Escrituras Griegas Cristianas nonmej principios ok moneki tikchiuaskej. Pero apóstol Pedro ok okijto tlen moneki tikchiuaskej.

¹⁸ Tejuan tikchiuaj miak tlamantli para tikueyichiuaskej Jehová uan tikinpaleuiaj oksekimej. Apóstol Pedro otechyole ma tiyetokan tichipauakej pero achto okijto: “Xikyektlalikan namotlalnamikilis” (1 Ped. 1:13, 15, Itlajtol totajtzin Dios [NHY]). ¿Tlen okinekiaya kijtos? Ye okijto tlapejpenalmej tetlapouiskiaj tlen kichiuaskia toTajtsin Dios (1 Ped. 2:9). Axkan tejuan noijki moneki tikintlapouiskej oksekimej porque non okachi kinpaleuis. Se ueyi tlateochiuali tlen toTajtsin Dios techkauilia: titetlapouiskej uan tikinmachtiskej oksekimej ika pakilistli (Mar. 13:10). Otimomachtijkej moneki tikchiuaskej principios tlen kijtoua Levítico capítulo 19. Ijkon tikteititiskej tiktlasojtlaj Jehová, tikintlasojtlaj oksekimej uan tikpiaj chipauak tonemilis.