1. ¿Tlen okinmilui apóstol Pedro tokniuan tlen okatkaj itech achto siglo uan tleka uelis tikijtoskej oui tikchiuaskej?

 AKINMEJ tiaskej iluikak noso akinmej tichantiskej nikan tlaltikpak, uelis techpaleuis tlen apóstol Pablo okinmilui tokniuan tlen okatkaj itech achto siglo. Pedro okijto: “Xinemikah non yolchipawakeh [noso santos], porke Dios Akin onomechnotski, Ye yolchipawak. N tiotlajkuíloli kijtoa: ‘Xiyetokah nonyolchipawakeh, porke Ne niyolchipawak [noso nisanto]’” (1 Ped. 1:15, 16). Non techititia uelis tikchiuaskej ken Jehová, ye nochipa kiteititia santo. Tejuan moneki tiyetoskej tisantos maski titlajtlakolejkej. Apóstol Pedro miak uelta omotlapololti pero omochijchika uan ijkom otechititi tejuan noijki uelis tiyetoskej tisantos.

2. ¿Tlen tiknankiliskej itech nin tlamachtil?

² Axkan tikinnankiliskej eyi tlajtlanilmej: ¿Tlen kijtosneki tiyetoskej tisantos? ¿Ken uelis tikteititiskej tisantos? ¿Tleka moneki tiyetoskej tisantos tla tiknekij timouikaskej iuan Jehová?

3. ¿Miakej tlen mokuayejyekoua kijtosneki ijkuak ika santo pero ken tikmatiskej tlen melauak?

³ Sekimej mokuayejyekouaj akin santo san moyolkokojtok ijkon ken mota itech dibujos tlen sekimej kichijchiuaj. Pero non amo melauak, Biblia kijtoua toTajtsin Dios yolpaki (1 Tim. 1:11, TNM). Biblia noijki kijtoua akinmej kiueyichiuaj noijki yolpakij (Sal. 144:15). Jesús  okinmilui amo kuali tlen okichiuayaj akinmej ueyak omotlakentiayaj porque ijkon okichiuayaj san para oksekimej ma kinmitakan kuali tlen okichiuayaj (Mat. 6:1; Mar. 12:38). Tejuan tikmatij tlen kijtosneki santidad porque Biblia techiluia. Tikmatij Jehová santo uan sapanoua techtlasojtla uan ye nochipa techiluia tlen kema uelis tikchiuaskej. Ik non, Jehová techiluia: “Xiyetokah nonyolchipawakeh [noso nansantos]” non techititia uelis tiyetoskej tichipauakej. Pero achto moneki tikajsikamatiskej tlen kijtosneki ijkuak ikaj santo.

4. ¿Tlen kijtosneki santo uan santidad?

⁴ ¿Tlen kijtosneki ijkuak ikaj santo? Itech Biblia ijkuilitok santo uan santidad, kijtosneki ijkuak ikaj kiueyichiua Jehová ken ye kineki uan kipia chipauak inemilis. Nonmej tlajtolmej noijki uelis moajsikamatis ijkuak ikaj kipejpena kitekichiuilis toTajtsin Dios. Noijki kijtosneki kuali timouikaskej iuan Jehová. Techtlajtlachialtia tikmatiskej maski titlajtlakolejkej uelis timouikaskej iuan Jehová, akin santo.

5. ¿Tlen techititiaj ángeles?

⁵ Jehová nochi kichiua chipauak. Sekimej ángeles tlen kinmiluiaj serafines uan katej ixpan Jehová, okijtojkej: “Santo, santo, santo Jehová akin kinyekana miakej soldados” (Is. 6:3). Yejuan mouikaj iuan Jehová porque santos. Ik non, ijkuak se ángel oualaya nikan tlaltikpak, kanin omoketsaya omochiuaya chipauak. Ijkon opanok ijkuak Moisés omotoki kanin okatka xiuitl tlen oxotlatoka (Éx. 3:2-5; Jos. 5:15).

6, 7. (1) Ijkon ken kijtoua Éxodo 15:1, 11, ¿ken okiteititi Jehová santo? (2) ¿Tlen tlamantli okinmilnamiktiaya israelitas? (Xikita dibujo tlen kajki itech página 1).

⁶ Ijkuak Moisés okinuikak israelitas itech mar rojo uan okipanouijkej okijto Jehová santo (xiktlajtolti Éxodo 15:1, 11). Akinmej okinueyichiuayaj teotsitsintin ompa Egipto amo okatkaj santos. Noijki amo okatkaj santos akinmej okiueyichiuayaj teotsitsintin ompa Canaán, okinmiktiayaj inkoneuan uan oauilnemiayaj para kinueyichiuaskej teotsitsintin (Lev. 18:3, 4, 21-24; Deut. 18:9, 10). Jehová santo, ik non, amo kichiua ken teotsitsintin porque ye amo techiluia ma tikchiuakan tlen ma techpinati. Jehová okiteititi santo, itech diadema de oro tlen okipiaya ixkuapak ueyi teopixki okijtouaya: “San Jehová santo” (Éx. 28:36-38).

⁷ Tlen okijtouaya diadema, nochtin okinmititiaya Jehová santo. Pero, ¿tla se israelita amo okitaya tlen okijtouaya non tepostli porque amo ueli oyaya inauak teopixki? ¿Uelis kimatiskia tlen okijtouaya non diadema? Kema, porque nochtin israelitas okikakiayaj ijkuak okintlajtoltiliayaj tlanauatil (Deut. 31:9-12). Tla tejuan ompa tiyetoskiaj, tikakiskiaj ninmej tlajtolmej: “Ne Jehová namoDios, uan moneki [...] nanyetoskej nanchipauakej porque ne nichipauak”. “Namejuan moneki nanyetoskej nanchipauakej porque ne nichipauak” (Lev. 11:44, 45; 20:7, 26).

8. ¿Tlen techmachtia tlen kijtoua Levítico 19:2 uan 1 Pedro 1:14-16?

⁸ Ma tikitakan tlen okintlajtoltilijkej israelitas itech Levítico 19:2, Jehová okilui Moisés: “Xikintlapoui nochtin  israelitas tlen monechikoskej uan xikinmilui: ‘Moneki nanyetoskej nanchipauakej porque ne Jehová nimoDios nichipauakʼ”. Xamo apóstol Pedro okijto tlen kijtoua non texto ijkuak okinmilui tokniuan itech achto siglo nin: “Xinemikah non yolchipawakeh” (xiktlajtolti 1 Pedro 1:14-16). Axkan toTajtsin Dios amo techiluia ma tikchiuakan tlanauatil tlen okijkuilo Moisés. Pero Pedro okijkuilo tlen techmachtia Levítico 19:2, ompa kijtoua Jehová santo uan akinmej kitlasojtlaj moneki mochijchikauaskej yetoskej chipauakej. Uan nochtin moneki ijkon tikchiuaskej, akinmej timochixtokej tiaskej iluikak noso akinmej tichantiskej tlaltikpak (1 Ped. 1:4; 2 Ped. 3:13).

9. ¿Tleka moneki timomachtiskej Levítico capítulo 19?

⁹ Tinochtin tiknekij tiyetoskej santos, ijkon tikyolpaktiskej toTajtsin Dios uan ye techiluia tlen moneki tikchiuaskej para tiyetoskej tichipauakej. Non tikajsij itech Levítico capítulo 19. Se ixtlamatki tlen itoka Marcus Kalisch okijto: “Xamo nin capítulo tlen okachi ipati itech amochtli Levítico uan itech nochi amochmej tlen kintokayotiaj Pentateuco”. Ma tikitakan seki versículos tlen techititiskej ken moneki tikpiaskej tonemilis. Ijkuak tikinmojpauiskej ma tikilnamikikan capítulo 19 ijkin peua: “Moneki nanyetoskej nanchipauakej”.

10, 11. ¿Tlen okse tlamantli kiteititia Levítico capítulo 19:3, Jehová santo uan tlen moneki tikchiuaskej?

¹⁰ Ijkuak Jehová okinnauati israelitas omonekiaya yetoskej santos, okinmilui: “Namejuan moneki nankintlakaitaskej namonantsin uan namotajtsin [...]. Ne niJehová namoDios” (Lev. 19:2, 3).

¹¹ Non techmachtia Jehová kineki ma tikintlakaitakan totatajuan. Ma tikilnamikikan se tlakatl okitlajtlani Jesús: “¿Tlan moneki manikchiwa, para nikpias nemílistli non ayik tlami?”. Jesús okinankili uan noijki okilui omonekiaya kintlakaitas itatajuan (Mat. 19:16-19).  Jesús okinmilui fariseos amo kuali tlen okichiuayaj porque amo okinpaleuiayaj intatajuan, ik non, okinmilui ‘okijtlakojkeh itlanawatil Dios’ (Mat. 15:3-6). Tlen Jesús okilui tlakatl noijki poui itech “itlanawatil Dios”, tlen noijki ijkuilitok itech Levítico 19:3 (Éx. 20:12). Ma tikilnamikikan non versículo kijtoua ma tikintlakamatikan totatajuan pero versículo 2 kijtoua: “Moneki nanyetoskej nanchipauakej porque ne Jehová namoDios nichipauak [noso nisanto]”.

12. ¿Ken uelis tikchiuaskej tlen kijtoua Levítico 19:3?

¹² Tinochtin moneki timotlajtlaniskej: “¿Nikintlakaita notatajuan?”. Tla amo tikchijtokej ken moneki, ma timochijchikauakan ma tikintlakaitakan. Tla achto amo ijkon otikchijtokaj axkan ma timochijchikauakan ma tikinpaleuikan totatajuan. Xamo moneki okachi inmiuan ma tiyetokan. ¿Uelis tikinpaleuiskej ma mouikakan iuan Jehová, kuali ma momachilikan noso ma tikinpaleuikan tla itlaj kinpoloua? Tla ijkon tikchiuaj, tiktlakamatij Levítico 19:3.

13. (1) ¿Tlen okse tlamantli techititia Levítico 19:3? (2) ijkon ken kijtoua Lucas 4:16-18, ¿ken uelis tikchiuaskej ken Jesús?

¹³ Levítico 19:3 noijki techmachtia okse tlamantli ken moneki tiyetoskej tichipauakej. Ompa kiteititia amitlaj omonekiaya kichiuaskiaj sábados. Tejuan amo techyekana tlanauatil tlen okijkuilo Moisés, ik non, amo moneki timoseuiskej sábados. Pero uelis timomachtiskej miak tlamantli tlen okichijkej israelitas non tonal uan ken okinteochiuaya Jehová. Omonekiaya moseuiskej sábado uan ijkon kiueyichiuaskiaj Jehová. * Jesús ijkon okichiuaya, ik non, okitlajtoltiaya iTlajtol toTajtsin Dios itech sinagoga (Éx. 31:12-15; xiktlajtolti Lucas 4:16-18). Tlanauatil tlen kajki itech Levítico 19:3 okiteititi israelitas omonekiaya moseuiskej sábados, non techititia moneki okachi tikpatioitaskej tikueyichiuaskej Jehová. ¿Moneki nimochijchikauas okachi ijkon nikchiuas? Tla okachi tikueyichiuaj Jehová, okachi iuan timouikaskej uan non techpaleuis ma tiyetokan tichipauakej.

14. ¿Tlen okachi miak uelta kijtoua Levítico capítulo 19?

¹⁴ Itech Levítico capítulo 19 kijtoua itlaj miak ipati tlen techpaleuis ma tiyetokan tichipauakej. Versículo 4 kijtoua: “Ne niJehová namoDios”. Non ijkuilitok 16 uelta itech non capítulo. Non tlajtoli noijki kijtoua ijkuak peuaj majtlaktli tlanauatilmej, ompa ijkin peua: “Ne niJehová nimoDios [...]. San ne nimoDios amo xikinpia teotsitsintin” (Éx. 20:2, 3). Tinochtin akinmej tikchiuaj ken Cristo tla tiknekij tiyetoskej tichipauakej moneki tikpatioitaskej timouikaskej iuan Jehová. Timotokayotiaj tiiTlaixpantijkauan Jehová, ik non, amo tikchiuaj itlaj tlen uelis kichiuas ayakmo ma kitlakaitakan itoka (Lev. 19:12; Is. 57:15).

15. ¿Tlen techyolinis ma tikchiuakan tlen kijtoua Levítico 19:5-8, 21, 22?

¹⁵ Altepetl Israel okiteititiaya iDios okatka Jehová ijkuak okitlakamatiayaj.  Levítico 18:4 kijtoua: “Xikchiuakan tlen namechnauatia. Ne niJehová namoDios”. Capítulo 19 kijtoua tlen ye okinnauati ma kichiuakan israelitas. Versículos 5-8, 21, 22, kijtouaj ken omonekiaya kitlamaniliskiaj Jehová, nochi tlen iaxka omonekiaya yetos chipauak. Tlen kijtouaj nonmej versículos techyolinis ma tikyolpaktikan uan ma tikueyichiuakan Jehová ijkon ken kijtoua Hebreos 13:15.

16. ¿Tlen principio techiluia Levítico 19 akinmej tiktekichiuiliaj Jehová?

¹⁶ Tiyetoskej tichipauakej tla amo tikchiuaj ken oksekimej. Ualeua akinmej inmiuan timomachtiaj itech escuela, tofamiliares tlen amo iTlaixpantijkauan Jehová noso oksekimej uelis kichiuaskej amo ma tiktekichiuilikan Jehová. Ijkuak ijkon kichiuaj moneki tikitaskej tlen tikchiuaskej. ¿Tlen techpaleuis kuali ma tikpejpenakan tlen tikchiuaskej? Levítico 19:19 kipia se principio, ompa kijtoua: “Nion xiktlalikan se namotlaken tlen chijchitok ika ome tlatlamantli hilo”. Non okiteititi israelitas amo okichiuayaj ken akinmej ochantiayaj itech okseki altepemej. Axkan amo tlajtlakoli tla totlaken okichijkej ika ichkatsojmitl, algodón noso ika okseki tlamantli. Pero titlajtlakolchiuaskej tla tikchiuaj tlen Biblia techiluia amo ma tikchiuakan, ken kichiuaj akinmej inmiuan titekipanouaj, timomachtiaj noso tofamiliares. Ijkuak itlaj tikpejpenaskej tikchiuaskej, moneki motas tiiTlaixpantijkauan Jehová. Tla tiknekij tiyetoskej tiyolchipauakej moneki tikchiuaskej tlen toTajtsin Dios kineki (2 Cor. 6:14-16; 1 Ped. 4:3, 4).

17, 18. ¿Tlen techmachtia tlen kijtoua Levítico 19:23-25?

¹⁷ Tlajtoli “Ne niJehová namoDios” xamo okinmilnamiktiaya israelitas okachi ipati mouikaskej iuan Jehová. Itech Levítico 19:23-25 (xiktlajtolti) ma tikitakan ken israelitas okichijkej tlen ompa kijtoua ijkuak opanokej itech tlali tlen Jehová okinmilui kinmakaskia. Tla okitokayaj se kuauitl ijkuak okitemakaya itlakilo amo uelis kikuaskiaj eyi xiuitl uan okse xiuitl okiuikayaj itech teokali. Hasta ijkuak oajsiaya makuili xiuitl israelitas uelis kikuaskiaj itlakilo non kuauitl. Non okinpaleui israelitas ma kajsikamatikan amo achto kitaskiaj tlen kikuaskiaj. Omonekiaya okachi kitekichiuilijtoskiaj Jehová uan noijki kineltokaskej kinpaleuiskia ma kipiakan tlen kikuaskiaj. Uan toTajtsin Dios okinyole  israelitas ma kitemakakan intomin itech teokali.

¹⁸ Tlanauatil tlen ijkuilitok itech Levítico 19:23-25 techilnamiktia tlen okijto Jesús itech tepetl. Ye okijto: “Amo ximotekipachokah por tlan nonkimomajsewiskeh noso tlan nonkoniskeh”. Noijki okijto: “Nomotajtsi non kajki ilwikak, iwa Ye ya kimatok tlan nomechpoloa”. Ijkon ken toTajtsin Dios kinmaka tlen kikuaskej tototsitsintin, noijki techpaleuis ma tikpiakan tlen tikkuaskej (Mat. 6:25, 26, 32). Tikneltokaj Jehová techmaluis. Noijki tikinpaleuiaj tokniuan tlen itlaj kinpoloua uan tiktemakaj totomin ika nochi toyolo kanin timonechikouaj. Jehová kita tiktemakaj tlen tikpiaj uan ye techteochiuas (Mat. 6:2-4). Tla tiktemakaj tlen tikpiaj, kijtosneki tikajsikamatij tlen kijtoua Levítico 19:23-25.

19. ¿Ken mitspaleuia seki versículos tlen otimomachti itech amochtli Levítico?

¹⁹ Otimomachtijkej seki versículos itech amochtli Levítico capítulo 19, otikitakej tlen uelis tikchiuaskej para tiyetoskej tichipauakej. Ijkuak timochijchikauaj tiyetoskej tichipauakej tikteititiaj tikchiuaj ken Jehová (1 Ped. 1:15). Miakej tlen amo kitekichiuiliaj Jehová yokitakej kuali tikpiaj tonemilis (1 Ped. 2:12). Levítico capítulo 19 ok ijkuilitok okseki tlamantli tlen uelis techmachtis. Itech okse tlamachtil tikitaskej okseki versículos uan tikitaskej tlen okseki tlamantli kichiuas ma tiyetokan tichipauakej ijkon ken okijto apóstol Pedro.