Jehová okinmilui israelitas omonekiaya yetoskej chipauakej. Ye okinpaleui ijkon ma kichiuakan ijkuak okinnauati: “Amo xikijtojtinemi tlen amo melauak itech moaltepe. Amitlaj xikchiua para ikaj uelis mikis. Ne niJehová” (Lev. 19:2, 16).

Tlajtoli “Amitlaj xikchiua para” ika tlajtoli hebreo kijtosneki “amo xikixnamiki”. Se amochtli judío okiyekijto amochtli Levítico: “Oui tikajsikamatiskej tlen kijtoua non versículo porque amo tikyekmatij tlen melauak kijtosneki ika tlajtoli hebreo, ika non tlajtoli ijkin motlajtolkopa ‘ikaj amo ma moketsa inauak’”.

Sekimej ixtlamatkej kijtouaj non tlajtoli mouika iuan se versículo achto, ompa kijtoua: “Amo xitechikoita ijkuak titlaixkomakas. Amo xikchikoita akin amitlaj kipia uan amo san xikpejpena akin okachi kipia tomin. Ika melajkayotl moneki tikinmixkomakas mokniuan” (Lev. 19:15). Tla melauak tlen kijtouaj ixtlamatkej, versículo 16 kanin kijtoua “amitlaj xikchiua para ikaj uelis mikis” kijtosneki israelitas omonekiaya kuali tlaixkomakaskiaj, noijki omonekiaya kichiuaskiaj tlen kuali ijkuak otlanemakayaj noso iuan infamiliares. Amo omonekiaya tlakajkayauaskej para yejuan okachi kuali yetoskiaj. Tejuan noijki amo ijkon ma tikchiuakan, pero nikan tikitaskej tlen techpaleuis okachi kuali ma tikajsikamatikan tlen kijtoua versículo 16.

Ma tikitakan kanin peua non versículo. ToTajtsin Dios okinmilui israelitas amo ma kijtojtinemikan tlen amo melauak. Ijkuak ikaj itlaj kijtojtinemi uelis kinouijtilis oksekimej pero akin kijtojtinemi tlen amo melauak uelis kintlajyouiltis (Prov. 10:19; Ecl. 10:12-14; 1 Tim. 5:11-15; Sant. 3:6). Ijkuak ikaj kijtoua itlaj okichijkej oksekimej maski amo melauak, ijkon kichiua porque kineki amo kuali ma kinmitakan. Xamo akin kijtoua itlaj okichijkej oksekimej maski amo melauak, amo kitekipachoua tla kinmiktiskej. Ijkon okipanok Nabot. Sekimej tlakamej okijtojkej itlaj amo kuali okichi, ik non, okimojmotlakej uan okimiktijkej maski amitlaj okichi (1 Rey. 21:8-13). Ijkon ken kijtoua kanin tlami Levítico 19:16 ijkuak ikaj kijtoua tlen amo melauak itech oksekimej, kijtosneki kineki ma kimiktikan.

Noijki kinkokoliaj oksekimej ijkuak kijtouaj itlaj amo kuali okichijkej maski amo melauak. 1 Juan 3:15 kijtoua: “Nochi akin kikokolia ikni, se temikti, iwa nomejwah nonkimatih se temikti amo kipias semijkak yolílistli”. Ijkuak toTajtsin Dios okinnauati israelitas tlen kijtoua Levítico 19:16 noijki okijto: “Amo xikkokoli mokni itech moyolo” (Lev. 19:17).

Ik non, tlen kijtoua Levítico 19:16 technejmachtia itlaj miak ipati akinmej tikchiuaj ken Cristo. Amo ma timokuayejyekokan tlen amo kuali uan amo ma tikijtokan itlaj okichijkej oksekimej tla amo melauak. Tla tiknekij ma kinpano tlen amo kuali oksekimej uan tikijtouaj tlen amo melauak porque amo inmiuan timouikaj noso tikinnexikolitaj, kijtosneki tikinkokoliaj. Akinmej tikchiuaj ken Cristo amo non ma tikchiuakan (Mat. 12:36, 37).