Kema. Tlen okijkuilo David melauak mochiuas.

Matimokuayejyekokan tlen okijkuilo itech non versículo uan itech okseki. David okijto: “Ikinon nochipa nikueyichiuas motoka ika tlakuikalmej para mojmostla nikchiuas tlen onikijto”. “Nimitsueyichiua Jehová noDios ika nochi noyolo uan nochipa nikueyichiuas motoka”. Noijki okijto: “Melauak nikueyichiuas motoka nochi tonalmej, para nochipa” (Sal. 61:8; 86:12; 145:1, 2).

Tlen okijto David melauak. Ye kuali okimatiaya se tonal mikiskia porque okipiaya tlajtlakoli (Gén. 3:3, 17-19; Sal. 51:4, 5). Noijki kuali okimatiaya oixpolikej akinmej okitekichiuilijkej Jehová ken Abrahán, Isaac uan Jacob. Ikinon okajsikamatki noijki ixpoliuiskia (Sal. 37:25; 39:4). Pero tlen kijtoua itech Salmo 61:8 okiteititi okinekiaya nochipa kiueyichiuas toTajtsin Dios ijkuak yoltoskia (2 Sam. 7:12).

Ualeua David okijkuilouaya tlen okipanouaya, ken kijtoua kanin peua Salmo 18, 51 uan 52. Itech Salmo 23 David okijto Jehová yetoskia ken se tlajpixki tlen kinyekana uan kinmaluia ichkauan. David ijkon okinmaluiaya ichkauan uan okinekiaya nochipa kitekichiuilis Jehová (Sal. 23:6).

Matikilnamikikan tlen okijkuilo David iaxka toTajtsin Dios. Noijki okinmijkuilo seki profecías tlen mochiuaskej satepan. Ken kijtoua Salmo 110 David okijkuilo ajsis tonal ijkuak Toteko motlaliskia iyekma toTajtsin Dios ompa iluikak uan tlanauatis. Ijkuak ye tlanauatis kinmixpolos akinmej kikokoliaj toTajtsin Dios. David opouiaya itech ifamilia Mesías tlen tlanauatis ompa iluikak uan nochipa yetoskia Teopixki (Sal. 110:1-6). Jesús okijto profecía tlen ijkuilitok itech Salmo 110 satepan mochiuaskia ika tlen ye kichiuaskia (Mat. 22:41-45).

Ken yotikitakej, Jehová okipaleui David makijkuilo seki tlamantli ijkuak oyoltoka uan tlen mochiuas satepan ijkuak kiyolitiskej, ijkon uelis nochipa kiueyichiuas Jehová. ¿Ken techpaleuia non tlamantli matikajsikamatikan tlen kijtoua Salmo 37:10, 11, 29? Nonmej versículos kijtouaj ken okatkaj israelitas uan ken tiyetoskej satepan itech nochi tlaltikpak ijkuak toTajtsin Dios kichiuas tlen yokijto. (Noijki xikita tlamachtil tlen kajki itech nin revista itech párrafo 8, itoka “Tiyetos nouan itech xochitlali”).

Tlen kijtoua Salmo 61:8 uan okseki versículos tlen otikitakej, techpaleuiaj matikajsikamatikan David okinekiaya kiueyichiuas Jehová ijkuak ok oyoltoka. Noijki techmachtia tlen kichiuas David ijkuak kiyolitiskej.