¿Uelis tikinnankilis ninmej tlajtlanilmej tlen okiskej itech revistas Akin Tetlapouijtok? Xikita kox uelis tikinnankilis ninmej tlajtlanilmej:

¿Ken techpaleuis tla tikkakij Jehová, timokuayejyekouaj tlen techiluia uan tiktlatlaujtiaj?

Kuali tikpejpenaskej tlen tikchiuaskej, okachi kuali titlamachtiskej, okachi titlaneltokaskej uan okachi tiktlasojtlaskej Jehová (w22.01, páginas 30 uan 31).

¿Tleka moneki tikneltokiliskej Jehová uan akinmej ye okintlali para matechyekanakan?

Axkan moneki tikneltokaskej toTajtsin Dios nochi kuali kichiua. Tikteititiaj ijkon tikneltokaj ijkuak tikintlakamatij tlayekankej. Noijki ijkuak peuas ueyi tlajyouilistli tikchiuaskej tlen technauatiskej maski motas amo techpaleuis (w22.02, páginas 4 hasta 6).

¿Tleka se ángel okilui Zacarías kitaskia se plomo itech ima tekiua Zorobabel? (Zac. 4:8-10).

Tlen ángel okinmilui judíos, kijtosneki kitlamiskiaj teokali ijkon ken Jehová okinekiaya maski sekimej kitaskiaj amo kualtsin (w22.03, páginas 16 uan 17).

¿Tlen moneki tikchiuaskej para makinpaleui oksekimej tlen tikijtouaj? (1 Tim. 4:12).

Matitetlakaitakan ijkuak titetlapouiaj, matitlakuikakan ika nochi toyolo uan matitlanankilikan kanin timonechikouaj. Noijki amo matikijtokan tlen kinyolkokos oksekimej, matikijtokan tlen kinyolchikauas tokniuan uan nochipa matikijtokan tlen melauak (w22.04, páginas 6 hasta 9).

¿Tleka yolkatl temomojti tlen kijtoua Apocalipsis 13:1, 2 okatka ken naui yolkamej (tekiuajkej) tlen kijtoua Daniel capítulo 7?

Yolkatl tlen kijtoua Apocalipsis capítulo 13 amo kineskayotia san se tekiuajkayotl ken Roma. Yolkatl temomojti kinneskayotia nochtin tekiuajkej tlen yotlanauatijkej (w22.05, página 9).

¿Ken tikteititiaj tikneltokaj Jehová kiyektlalis ken moneki tlen otechchiuilijkej?

Tla ikaj otechkualani noso otechchiuili tlen amo kuali, ayakmo matikualantokan uan matikkauilikan Jehová ma kiyektlali tlen techpanotok. Jehová kiyektlalis nochi tlen yotechpanok porque titlajtlakolejkej (w22.06, páginas 10 uan 11).

¿Tlen moneki kilnamiktos se tokni ijkuak motlatlaujtia kanin timonechikouaj?

Tokniuan tlen kinmiluiaj mamotlatlaujtikan teixpan amo moneki kijtoskej tlen moneki kichiuaskej tokniuan nion moneki tlamachtiskej. Ikinon, tokni tlen motlatlaujtis amo moneki kijtos miak tlamantli (Mat. 6:7) (w22.07, páginas 24 uan 25).

¿Tlen kijtosneki “kinyolkuitiskeh [noso kinmixkomakaskej]” “akimeh otlájtlakolchijkeh”? (Juan 5:29).

Yejuan amo kinchiuiliskej tlen amo kuali. Pero Jesús otlamachti moneki kiteititiskej kox kinekiskej kipatlaskej innemilis. Yejuan kinmixkomakaskej, non kijtosneki Jesús kitas kox kipatlaskej innemilis (w22.09, página 18).

¿Tlen okijto tokni Joseph Rutherford itech se ueyi nechikol tlen omochi septiembre 1922?

Itech se ueyi nechikol ompa Cedar Point (Ohio, Estados Unidos), okijto: “¡Xikitakan, toTekiua tlanauatia! Namejuan nankipaleuia. Ikinon, xiktematiltikan, xiktematiltikan, xiktematiltikan tlen kichiuas Tekiua uan iTekiuajkayo” (w22.10, páginas 3 hasta 5).

Ijkon ken kijtoua Isaías capítulo 30 ¿tlen eyi tlamantli techmakatok Jehová para matitlaxikokan?

Ompa kijtoua, se, Jehová techkaki uan technankilia ijkuak tiktlatlaujtiaj, ome, ye techpaleuia uan eyi, ye techteochiua axkan uan satepan (w22.11, páginas 8 uan 9).

¿Tleka uelis tikneltokaskej tlen kijtoua Salmo 37:10, 11, 29 yomochi uan satepan oksepa mochiuas?

Tlen okijto David kiteititia omoyolseuijtokaj akinmej ochantiayaj Israel ijkuak okinnauatiaya Salomón. Jesús okijto tlen ijkuilitok itech versículo 11 uan okijto satepan yetos se xochitlali (Mat. 5:5; Luc. 23:43) (w22.12, páginas 8 hasta 10 uan 14).