1. ¿Tlen okilui Jesús se tlakatl tlen inakastlan opilkatoka? (Lucas 23:39-43).

 JESÚS uan ome tlakamej tlajtlakolejkej, opilkatokaj uan otlajyouijtokaj (Luc. 23:32, 33). Nonmej ome tlakamej amo okatkaj imachtijkauan Jesús porque okipinauiayaj (Mat. 27:44; Mar. 15:32). Pero se tlakatl omoyolkopki uan okilui: “Jesús techilnamiki ijkuak pewas titlanawatis”. Jesús okinankili: “Axkan melauak nimitsiluia: Tiyetos nouan itech xochitlali” (xiktlajtolti Lucas 23:39-43). Biblia amo kijtoua kox non tlakatl okineltokaya tlen Jesús otetlapoui itech iTekiuajkayo toTajtsin Dios uan ye amo okilui non tlakatl iuan tlanauatiskia iluikak (Mat. 4:17). Jesús okilui tlakatl yetoskia iuan itech xochitlali tlen yetos nikan tlaltikpak. ¿Tleka ijkon tikijtouaj?

2. ¿Ken tikmatij tlakatl tlen omoyolkopki xamo okatka judío?

² Xamo non tlakatl akin omoyolkopki okatka judío, ijkon tikijtouaj porque ye okilui okse tlakatl tlen noijki opilkatoka: “¿Amo tikmawilia Dios, maya ya tikmati san sika timikiskeh?” (Luc. 23:40). Judíos okiueyichiuayaj san se Dios, pero akinmej ochantiayaj itech oksekimej altepemej okinueyichiuayaj miakej teotsitsintin (Éx. 20:2, 3; 1 Cor. 8:5, 6). Tla nonmej tlakamej amo yetoskiaj judíos, tlakatl akin omoyolkopki xamo kijtoskia: “¿Amo tikinmauilia dioses?”. Noijki ijkon tikijtouaj porque Jesús okinpaleuiko israelitas “nonmoixpolojtinemih kemi ichkameh” ikinon amo okachi okintlapouiaya akinmej okatkaj itech oksekimej altepemej (Mat. 15:24). Noijki israelitas okimatiayaj toTajtsin Dios kinyolitis akinmej  yoixpolikej. Xamo non tlakatl okineltokaya Jehová uelis kiyolitiskia uan noijki okimatiaya kiyolitis Jesús para matlanauati itech iTekiuajkayo toTajtsin Dios.

3. ¿Tlen uelis omokuayejyeko tlakatl ika tlen okilui Jesús? (Génesis 2:15).

³ Tla non tlakatl okatka judío, okimatiaya Adán uan Eva okatkaj itech xochitlali tlen Jehová okinmakak. Ikinon ijkuak Jesús okilui iuan yetoskia itech xochitlali xamo omokuayejyeko ijkon panos ijkuak tlaltikpak mokopas se xochitlali (xiktlajtolti Génesis 2:15).

4. ¿Ken techpaleuia tikmatiskej tlen Jesús okilui tlakatl tlen otlajtlakolchi?

⁴ Tlen Jesús okilui tlakatl tlen otlajtlakolchi, techpaleuia matimokuayejyekokan ken tiyetoskej itech xochitlali. Noijki techpaleuis tla tikilnamikij ken omoyolseuijtokaj akinmej okinnauatiaya Salomón. Biblia kijtoua Jesús “okachi weyi ke Salomón”. Ikinon tikmatokej Jesús uan 144,000 okachi kuali tlanauatiskej ipan tlaltikpak (Mat. 12:42). “Oksikimeh ichkameh” moneki mochijchikauaskej tla kinekij nochipa yoltoskej itech xochitlali (Juan 10:16).

5. ¿Ken timokuayejyekoua tiyetoskej itech xochitlali?

⁵ ¿Ken timokuayejyekoua tiyetoskej itech xochitlali? Xamo timokuayejyekoua tiyetos kanin onka miak xochitl, ken okatka xochitlali Edén (Gén. 2:7-9). Xamo tikilnamiki profeta Miqueas okijto: “Motlaliskej itlampa uvas uan itlampa higos” (Miq. 4:3, 4). Noijki tikilnamiki ijkuak textos kijtouaj yetos miak tlakuali (Sal. 72:16; Is. 65:21, 22). Noso timokuayejyekoua tika kanin onka miak xochitl uan noijki miak tlakuali. Ximokuayejyeko tikijnekuis ken ajuiak xiuitl uan xochitl. Noijki tiyolpakis inmiuan moyolikniuan uan mofamiliares. Xamo sekimej yikin kinyolitiskej. Non amo san kualtsin mokaki, melauak mochiuas nikan tlaltikpak. Noijki itech xochitlali yetos miak tekitl tlen techpaktis.

6. ¿Tlen tikchiuaskej itech xochitlali? (Xikita dibujo).

⁶ Jehová otechchijchi para matiyolpakikan ijkuak titekipanouaj (Ecl. 2:24). Ijkuak Jesús tlanauatis mil xiuitl yetos miak tekitl. Akinmej momakixtiskej itech ueyi tlajyouilistli uan akinmej kinyolitiskej monekis tikinmakaskej intlaken, tlen kikuaskej uan kanin chantiskej. Sapanoua titekipanoskej pero tiyolpakiskej. Ijkon ken Adán  uan Eva omonekiaya kimaluiskej xochitlali, tejuan monekis tikkopaskej nochi tlaltikpak se xochitlali. Tiyolpakiskej ijkuak tikinmachtiskej akinmej kinyolitiskej uan akinmej amo kuali okixmatkej Jehová. Noijki tikinmachtiskej akinmej okitekichiuilijkej Jehová ijkuak Jesús ayamo oualaya nikan tlaltikpak.

7. ¿Tlen uelis tikneltokaskej uan tleka?

⁷ Itech xochitlali timoyolseuijtoskej, tikpiaskej tlen ika timopanoltiskej uan tinochtin kuali tiyetoskej. ¿Tleka ijkon tikijtouaj? Ijkuak otlanauati Salomón omoyolseuijtokaj akinmej okinnauatiayaj, ijkon Jehová techpaleuia matimokuayejyekokan ken tiyetoskej ijkuak Jesús tlanauatis.

8. ¿Ken omochi tlen okijkuilo David itech Salmo 37:10, 11, 29? (Xikita tlamachtil tlen itoka “Sekimej techtlajtlaniajl” itech nin revista).

⁸ Jehová okilui David makijkuilo ken yetoskia tlaltikpak ijkuak tlanauatiskia se tekiua ixtlamatki uan yolmelauak (xiktlajtolti Salmo 37:10, 11, 29). Ijkuak tikintlapouiaj oksekimej ken yetos xochitlali tikintlajtoltiliaj Salmo 37:11. Kuali tla ijkon tikchiuaj porque Jesús okijto tlen kijtoua non texto ijkuak otlamachti itech tepetl. Ijkon okiteititi tlen ompa kijtoua mochiuas satepan (Mat. 5:5). Pero tlen okijkuilo David noijki okiteititi ken yetoskiaj ijkuak tlanauatiskia Salomón. Ijkuak ye otlanauatiaya, israelitas omoyolseuijtokaj uan okipiayaj miak tlamantli porque okipiayaj ‘leche uan neujtliʼ. Jehová okijto: “Tla nankichiuaj tlen namechnauatia [...], ne nikchiuas nochi nin altepetl makipia yolseuilistli, kuali nankochiskej porque amitlaj namechmomojtis” (Lev. 20:24; 26:3, 6). Non omochi ijkuak Salomón otlanauatiaya (1 Crón. 22:9; 29:26-28). Jehová okinmilui kinpojpoloskia akinmej okichiuayaj tlen amo kuali (Sal. 37:10). Ken yotikitakej tlen kijtoua Salmo 37:10, 11, 29 yomochi, pero noijki satepan oksepa mochiuas.

9. ¿Tlen okijto siuatl tlen otlanauatiaya Saba ijkuak okitak ken otlanauatiaya Salomón?

 ⁹ Siuatl tlen otlanauatiaya altepetl Saba okimatki israelitas omoyolseuijtokaj uan okipiayaj miak tlamantli tlen ika mopanoltiskiaj ijkuak otlanauatiaya Salomón. Non siuatl maski uejka okatka oyajki hasta Jerusalén para kitaskia kox melauak tlen okiluijkej (1 Rey. 10:1). Ijkuak non siuatl okitak ken otlanauatiaya Salomón, melauak okineltokak tlen okiluijkaj. Ikinon okijto: “¡Yolpakij tlakamej uan motlakeualuan tlen nochipa mouan katej porque kikaktokej moixtlamatilis!” (1 Rey. 10:6-8). Pero ijkuak Salomón otlanauati san okiteititi tlen techmakas Jehová ijkuak Jesús ualtlanauatis.

10. ¿Tleka Jesús okachi kuali tlanauatia amo ken Salomón?

¹⁰ Jesús amo ken Salomón. Porque Salomón okatka tlajtlakole uan okichi miak tlamantli amo kuali, ikinon israelitas otlajyouijkej. Pero Jesús amo tlajtlakole uan amo keman motlapololtia ikinon kuali tlanauatia (Luc. 1:32; Heb. 4:14, 15). Noijki Jesús otlaxiko ijkuak Satanás okinekiaya matlajtlakolchiua. Okiteititi amo keman kichiuas itlaj para matlajyouikan akinmej kinnauatis. ¡Sapanoua tiyolpakij porque ye toTekiua!

11. ¿Akinmej kipaleuiskej Jesús matlanauati?

¹¹ Jesús uan 144,000 tlanauatiskej, yejuan san sekan kinmaluiskej akinmej chantiskej tlaltikpak uan tlapaleuiskej para mamochiua tlen Jehová kineki (Apoc. 14:1-3). Nonmej tlakamej uan siuamej yotlajyouijkej ijkon ken tejuan ijkuak okatkaj nikan tlaltikpak ikinon techajsikamatiskej. ¿Tlen tekitl kichiuaskej?

12. ¿Tlen tekitl kinmakas Jehová 144,000 tlapejpenalmej?

¹² Jesús uan 144,000 tlapejpenalmej sapanoua miak tekitl kichiuaskej amo ken Salomón. Ye san otlanauatiaya itech se ueyi altepetl kanin miakej ochantiayaj. Pero Jesús uan akinmej kipaleuiskej kinnauatiskej sapanoua miakej itech nochi tlaltikpak. ¡Jehová melauak kinteochiuas 144,000 tlapejpenalmej ika non tekitl!

13. ¿Tlen tekitl kichiuaskej tlapejpenalmej?

¹³ Tlapejpenalmej yetoskej tekiuajkej uan teopixkej ijkon ken Jesús (Apoc. 5:10). Tlanauatil tlen okijkuilo Moisés okijtouaya teopixkej omonekiaya kinmaluiskej israelitas para amo mamokokokan uan kuali mamouikakan iuan Jehová. “Itlanawatil Moisés sanwel itlasekawilo tlan satepa walaskia”, ikinon uelis tikijtoskej Jesús uan 144,000 techpaleuiskej amo matimokokokan uan kuali matimouikakan iuan Jehová (Heb. 10:1). Ayamo tikmatij ken nonmej tekiuajkej uan teopixkej motlapouiskej inmiuan akinmej chantiskej nikan tlaltikpak, pero kuali tikmatij Jehová kuali tlayekanas para amitlaj makinpolo akinmej yetoskej itech xochitlali (Apoc. 21:3, 4).

14. ¿Tleka tikijtouaj san sekan tekipanouaj “oksikimeh ichkameh” uan tlapejpenalmej?

¹⁴ Jesús okijto akinmej amo ‘miakej ichkamejʼ iuan tlanauatiskej (Luc. 12:32). Noijki okijto onka okse grupo, yejuan “oksikimeh ichkameh”. Nonmej ome grupos san sekan kiueyichiuaj Jehová (Juan 10:16). Axkan san sekan yitekipanouaj uan ijkuak tlaltikpak  mochiuas se xochitlali ok san sekan tekipanoskej. Ijkuak ajsis non tonal akinmej amo ‘miakej ichkamejʼ yetoskej iluikak uan “oksikimeh ichkameh” nochipa chantiskej nikan tlaltikpak. Pero “oksikimeh ichkameh” ok moneki kichiuaskej okseki tlamantli para uelis chantiskej nikan tlaltikpak.

15. (1) ¿Ken tikinpaleuiaj tlapejpenalmej? (2) ¿Ken uelis tikchiuas ken tokni tlen mota itech foto?

¹⁵ Tlakatl tlen opilkatoka inakastlan Jesús omoyolkopki pero ayakmo ueli itlaj okichi para kiteititis okitlasojkamatiaya tlen okichi ipatka. Pero akinmej tipouij itech “oksikimeh ichkameh” kema uelis itlaj tikchiuaskej. Tikteititiaj tiktlasojtlaj Jesús ijkuak tikinpaleuiaj tlapejpenalmej. Ye okijto motas kox tiyolkualmej tla tikinpaleuiaj tlapejpenalmej uan kitas non ijkuak tlaixkomakas (Mat. 25:31-40). Tikteititiskej tikinpaleuiaj ikniuan Cristo tla timochijchikauaj titetlapouiskej uan tikinmachtiskej oksekimej (Mat. 28:18-20). Ikinon tiknekij titlamachtiskej ika Biblia uan amatlajkuilolmej tlen tikinpiaj ken amochtli Uelis nochipa tiyoltos uan tiyolpakis. Tla amikaj tikmachtia ximochijchikaua para ikaj tikmachtis.

16. ¿Tlen uelis tikchiuaskej para tikteititiskej tiknekij tiyetoskej itech xochitlali?

¹⁶ Axkan moneki timochijchikauaskej para tikchiuaskej tlen kuali, ijkon tikteititiskej tiknekij tiyetoskej itech xochitlali. Noijki moneki matimochijchikauakan para amo titlakajkayauaskej ika tlen tikijtouaj uan tlen tikchiuaj. Noijki nochipa matiktlakamatikan Jehová, matiktlasojtlakan tonamik noso tosiua uan tokniuan. Axkan timochijchikauaj tiktlakamatiskej toTajtsin Dios maski onka miak tlamantli tlen amo kuali. Ijkon itech xochitlali amo tikitaskej oui tikintlakamatiskej itlanauatiluan Jehová. Noijki axkan uelis tikchiuaskej seki tlamantli tlen kiteititis yitimoyektlalijtokej para tichantiskej itech xochitlali, ijkon ken kijtoua tlamachtil tlen itoka “¿Timoyektlalijtok  para tichantis itech xochitlali?” tlen kajki itech nin revista.

17. ¿Tleka amo san matimoyolkokojtokan tla achto otitlajtlakolchijkej?

¹⁷ Noijki moneki timochijchikauaskej para amo san matimoyolkokojtokan ika tlajtlakoli tlen achto otikchiuayaj. Amo matimokuayejyekokan porque Jesús omotemakak topatka uelis “titlajtlakolchijtinemiskeh” (Heb. 10:26-31). Pero tla melauak yotimoyolkopkej, yotiktlatlautijktej Jehová, yotikimiluijkej tokniuan tlayekankej uan ayakmo ijkon tikchiuaj, uelis tikneltokaskej Jehová yotechtlapojpolui (Is. 55:7; Hech. 3:19). Matikilnamikikan tlen Jesús okimilui fariseos: “Porke amo onikinnotsako n yolchipawakeh, yej n tlajtlakolejkeh para ayakmó matlajtlakolchiwakah” (Mat. 9:13). Jehová techtlapojpoluia porque Jesús omotemakak topatka.

18. ¿Tlen uelis timotlapouis iuan tlakatl tlen okatka tlajtlakole?

¹⁸ Ximokuayejyeko tika itech xochitlali uan timotlapouijtok iuan tlakatl tlen okatka tlajtlakole. Namejuan nankitlasojkamatij tlen Jesús okichi namopatka. Xamo tejuatsin tikneki tikmatis tlen okachi okipanok Jesús ijkuak yimikiskia uan ken omomachili tlakatl tlen okatka tlajtlakole ijkuak okilui ye noijki yetos itech xochitlali. Pero xamo ye noijki kineki kimatis tlen opanok itech itlamian tonalmej ijkuak Satanás ok otlanauatiaya. ¡Sapanoua tiyolpakiskej tikinmachtiskej tlen kijtoua Biblia akinmej kinyolitiskej! (Efes. 4:22-24).

19. ¿Tleka nochipa tiyolpakiskej itech xochitlali? (Xikita dibujo tlen kajki itech página 1).

¹⁹ Itech xochitlali nochipa tiyolpakiskej. Nochipa yetos ikaj akin tikixmatiskej uan tiyolpakiskej ijkuak titekipanoskej. Tiyolpakiskej porque okachi timouikaskej iuan Jehová uan tikitaskej ken techtlasojtla. Noijki timomachtiskej nochi tlen okichijchi Jehová. Mojmostla okachi tiktlasojtlaskej toTajtsin Dios. ¡Sapanoua tikintlasojkamatiliaj Jehová uan Jesús porque okijtojkej uelis tichantiskej nochipa itech xochitlali!