1. ¿Tlen kijtosneki “iyolsewilis Dios” uan ken techpaleuia? (Filipenses 4:6, 7).

 MIAKEJ amo kimatij tlen kijtosneki “iyolsewilis Dios”. Ikaj moyolseuijtok porque kuali mouika iuan toTajtsin Dios. Tla timoyolseuijtoskej kuali timomachiliskej (xiktlajtolti Filipenses 4:6, 7). Tiyolpakij porque kuali timouikaj iuan “Dios non teyolsewi” uan noijki inmiuan akinmej kitlasojtlaj Jehová (1 Tes. 5:23). Uelis timoyolseuijtoskej tla timouikaj iuan toTajtsin Dios, tikneltokaj uan tiktlakamatij. Ijkon uelis timoyolseuijtoskej maski itlaj techtekipachos.

2. ¿Tleka tikmatij uelis timoyolseuijtoskej?

² ¿Melauak uelis timoyolseuijtoskej ijkuak timotekipachouaj? ¿Uelis timoyolseuijtoskej ijkuak miakej mokokouaj, ijkuak panoua tlen amo kuali, ijkuak sekimej mokualaniaj noso ijkuak techtlajyouiltiaj? Xamo techmojmojtis ijkuak ijkon panos. Pero Jesús okinmilui idiscípulos: “Amo ximosotlawakah nion ximawikah” (Juan 14:27). Miakej tokniuan yokichijkej tlen otechmachti Jesús. Jehová yokinpaleui miakej mamoyolseuijtokan maski tlajyouiaj.

3. ¿Tleka ualeua oui timoyolseuijtoskej ijkuak miakej mokokouaj?

³ Uelis mopatlas tlen tikchiuaj ijkuak itech nochi tlaltikpak miakej mokokouaj. Matimokuayejyekokan ijkuak miakej omokokojkej ika COVID-19. Sekimej okintlajtlanijkej ken omomachilijkej porque okatka COVID-19. Miakej okijtojkej amo ueli okochiayaj, omotekipachouayaj uan omoyolkokouayaj. Sekimej otlauanayaj, okitekitiltiayaj  drogas, okitlajyouiltiayaj infamilia uan oksekimej okinekiayaj momiktiskej. Tla ik kanin tichanti miakej opejkej mokokouaj, ¿tlen uelis tikchiuas para timoyolseuijtos uan amo san timotekipachojtos?

4. ¿Tleka techyolseuia tlen okijto Jesús panoskia itlamian tonalmej?

⁴ Jesús okijto miakej mokokoskiaj itlamian tonalmej (Luc. 21:11). ¿Tleka techyolseuia tikmatiskej non? Tejuan yotikmatiayaj ijkon panoskia ikinon amo techtlajtlachialtia. Axkan tikitaj mochijtok nochi tlen okijto Jesús. Tla tikchiuaj tlen okijto Jesús techpaleuis. Ye okijto: “Amo ximomojtikah” (Mat. 24:6).

5. (1) Ijkon ken kijtoua Filipenses 4:8, 9, ¿tlen uelis tiktlajtlaniliskej Jehová ijkuak miakej mokokouaj? (2) ¿Ken techpaleuis tla tikkakij Biblia ika audio?

⁵ Ijkuak miakej mokokouaj uelis timotekipachoskej uan timomojtiskej. Ijkon okipanok tokni tlen itoka Desi. b Ijkuak itío, iprimo uan akin okinpajtiaya omokokojkej ika COVID-19 uan oixpolikej, omomojti porque amo okinekiaya mokokos uan noijki inantsin tlen yikipia miak xiuitl. Noijki okitekipachouaya ayakmo kipiaskia kanin tekipanos uan ayakmo kipiaskia tomin para kitlaxtlauas renta uan kikouaskia tlen kikuaskiaj. San omotekipachojtoka uan hasta amo ueli okochiaya. ¿Tlen okichi para moyolseuijtos? Okitlatlaujti Jehová makipaleui mamokuayejyeko tlen kuali uan makiyolseui (xiktlajtolti Filipenses 4:8, 9). Ijkuak okikakiaya Biblia ika audio yetoskia ken kikakiskia Jehová. Desi okijto: “Tokniuan tlen okitlajtoltiayaj Biblia omoyolseuijtokaj, non onechpaleui manimoyolseui uan onechilnamiktiaya Jehová nechtlasojtla” (Sal. 94:19).

6. ¿Ken techpaleuis tla timomachtiaj Biblia uan nochipa timonechikouaj?

⁶ Ijkuak miakej mokokouaj uelis mopatlas tlen mojmostla tikchiuaj. Pero amo matikkauakan timomachtiskej Biblia uan nochipa timonechikoskej. Itech amatlajkuilolmej uan videos tikitaj tlen kichiuaj sekimej tokniuan para nochipa kitlakamatiskej Jehová maski kinpanoua tlen amo kuali (1 Ped. 5:9). Ijkuak timonechikouaj techpaleuia matimokuayejyekokan tlen kijtoua Biblia, noijki uelis tinochtin timoyolchikauaskej (Rom. 1:11, 12). Tla timokuayejyekouaj ken Jehová yokinpaleui itekipanojkauan ijkuak omomojtiayaj noso  omomachiliayaj inselti, okachi tikneltokaskej Jehová techpaleuis.

7. ¿Ken uelis tikchiuaskej ken apóstol Juan?

⁷ Nochipa matikinnotsakan tokniuan. Pero ijkuak miakej mokokouaj amo uelis tikintlajpalotiuij. Xamo timomachiliskej ken apóstol Juan, ye okinekiaya kitati iyolikni tlen omotokayotiaya Gayo (3 Juan 13, 14). Pero ye okijto amo uelis yaskia. Ikinon okititlanili se carta. Tla amo uelis tikintlajpalotiuij tokniuan, uelis tikinnotsaskej ika teléfono, ika videollamada noso tikintitlaniliskej mensajes. Ijkon timoyolseuijtoskej uan amo timomachiliskej toselti. ¿Tlen tikchiuaskej tla sapanoua timotekipachouaj? Matimotlapouikan inmiuan tokniuan tlayekankej uan matikchiuakan tlen yejuan techiluiskej porque techtlasojtlaj (Is. 32:1, 2).

8. ¿Tleka oui timoyolseuijtos ijkuak panoua tlen amo kuali?

⁸ Tla ik kanin tichanti otlaxixinki, otlalolinki noso otlatlatlak xamo timotekipachoua. Tla oixpoliuik akin tiktlasojtla noso otikpolo tlen otikpiaya xamo timoyolkokoua, timotekipachoua uan hasta tikualani. Pero non amo kijtosneki tiktlasojtla tlen otikpiaya noso amo titlaneltoka. Oui tla ijkon omitspanok uan xamo sekimej amo kintlajtlachialtis tla timoyolkokoua (Job 1:11). Maski oui tlen techpanos uelis timoyolseuijtoskej. Matikitakan tlen uelis tikchiuaskej.

9. ¿Ken techpaleuia tlen okijto Jesús panoskia?

⁹ Sekimej mokuayejyekouaj amo kinpanos tlen amo kuali noso amo tlaxixinis ik kanin chantij. Pero tejuan tikmatij Jesús okinmilui idiscípulos itech itlamian tonalmej okachi tlaxixiniskia uan non uelis techtlajyouiltis (Luc. 21:11). Jesús noijki okijto okachi panoskia tlen amo kuali ikinon miakej moteuiaj, tetlajyouiltiaj uan temiktiaj (Mat. 24:12). Jesús amo okijto san akinmej amo kitekichiuiliaj Jehová kinpanos tlen amo kuali. Sekimej itekipanojkauan toTajtsin Dios tlajyouiaj porque tlaxixini (Is. 57:1; 2 Cor. 11:25). Ijkuak panos itlaj amo kuali Jehová amo kichiuas se milagro para techpaleuis, pero uelis kichiuas matimoyolseuijtokan.

10. ¿Tleka tikijtouaj tikneltokaj Jehová techpaleuis tla achto timoyektlaliaj? (Proverbios 22:3).

¹⁰ Ijkuak panos itlaj amo kuali, uelis timoyolseuijtoskej tla achto tikitaj tlen moneki tikchiuaskej. Non amo kijtosneki amo tikneltokaj Jehová. Tla achto timoyektlaliaj, tikteititiskej kema tikneltokaj Jehová techpaleuis. ¿Tleka ijkon tikijtouaj? Biblia techiluia moneki tikitaskej tlen tikchiuaskej ijkuak ayamo panoua tlen amo kuali (xiktlajtolti Proverbios 22:3). Ialtepe Jehová techiluia ika revistas uan ijkuak timonechikouaj tlen moneki tikchiuaskej ijkuak panos itlaj amo kuali. c ¿Tlen tikchiuaskej tla tikneltokaj Jehová techpaleuis? Moneki tikchiuaskej axkan tlen techiluiaj.

11. ¿Tlen techmachtia tlen okichi tokni Margaret?

¹¹ Matikitakan tlen okipanok se tokni tlen itoka Margaret. Tekiuajkej okiluijkej omonekiaya kisas porque kanin chanti otlatlatoka kuajyo. Pero oui yaskia itech carretera porque miakej okiuikayaj incarro. Noijki sapanoua otlapopokaya,  ikinon Margaret omokaj itech icarro. Ye amitlaj okipanok porque kuali omoyektlali. Okiuikaya se mapa, ijkon okitak ik kanin yaskia. Ye okimatiaya uelis yaskia itech non carretera ijkuak tlaxixiniskia porque achto ompa oyajki. Margaret kuali omoyektlali ikinon okimatiaya tlen kichiuaskia uan non okipaleui.

12. ¿Tleka moneki titetlakamatiskej ijkuak technauatiaj tlen tikchiuaskej?

¹² Tekiuajkej kinekij techmaluiskej ikinon xamo technauatiskej matiyetokan tokalijtik, maticholokan noso techiluiskej matikchiuakan okse tlamantli. Sekimej amo kinekij choloskej porque kipiaj miak tlamantli. ¿Tejuan tlen tikchiuaskej? Biblia techiluia: “Ijkó kemi nomejwah nonkitlakitah Toteko Dios, noiwa xikintlakitakah nochteh n tekiwajkeh itech nin tlaltíkpaktli, iwa amo sanwel non okachi weyijkatitok, yej noiwa n gobernadores non ye kintlalia” (1 Ped. 2:13, 14). Ialtepe Jehová noijki techiluia tlen moneki tikchiuaskej para timomaluiskej. Techilnamiktia moneki tikinmakaskej tonúmero tlayekankej para uelis technotsaskej ijkuak itlaj panos. ¿Ijkon yotikchijkej? Xamo ialtepe Jehová techiluis tlen tikchiuaskej para timokauaskej tokalijtik, ticholoskej, noso kanin tikololoskej tlakuali uan okseki tlamantli tlen techpaleuis. Noijki uelis techiluiskej keman uan ken tikinpaleuiskej oksekimej. Tla amo titetlakamatij, uelis itlaj techpanos uan noijki tlayekankej akinmej nochipa techmaluiaj (Heb. 13:17). Margaret okijto: “Axkan ok niyoltok porque onikintlakamatki tlayekankej uan ialtepe Jehová”.

13. ¿Tlen kichiuaj tokniuan para yolpakiskej uan moyolseuijtoskej maski okikajtejkej inkalijtik?

¹³ Sekimej tokniuan okikajtejkej inkalijtik porque otlaxixinki, moteuiaj noso miakej mokualaniaj. Yejuan mochijchikauaj momatiskej kanin ochantitoj uan san niman monechikouaj uan tetlapouiaj ijkon ken okichijkej tokniuan itech achto siglo, ijkuak ocholojkej porque okintlajyouiltiayaj (Hech. 8:4). Ijkuak tetlapouiaj kinpaleuia makilnamikikan tlen kichiuas iTekiuajkayo toTajtsin Dios  uan amo san mokuayejyekojtokej tlen kinpanotok. Ijkon yolpakij uan moyolseuijtokej.

14. ¿Tleka oui timoyolseuijtoskej ijkuak techtlajyouiltiaj?

¹⁴ Ijkuak techtlajyouiltiaj timoyolkokouaj uan ayakmo timoyolseuijtokej porque ualeua ayakmo techkauiliaj timonechikoskej, titetlapouiskej noso kinekij techtsakuaskej porque tikchiuaj okseki tlamantli tlen techpaktia. Ijkuak ijkon panoua xamo timotekipachouaj uan timotlajtlaniaj tlen panos satepan. Uelis ijkon timomachiliskej. Pero tlen Jesús okinmilui idiscípulos techpaleuia para nochipa matitlaneltokakan (Juan 16:1, 2). ¿Tlen moneki tikchiuaskej para timoyolseuijtoskej ijkuak techtlajyouiltiaj?

15. ¿Tleka amo moneki timomojtiskej ijkuak techtlajyouiltiskej? (Juan 15:20; 16:33).

¹⁵ Biblia kijtoua: “Nochteh akimeh kinekiskeh kimosenmakaskeh Cristo Jesús, san kan yaskeh kintlaijyowiltiskeh” (2 Tim. 3:12). Se tokni tlen itoka Andréi omoyolkoko ijkuak tekiuajkej ayakmo okinkauilijkej matetlapouikan kanin chanti. Ye okijto: “Amo uelis tinochtin techtsakuaskej porque nikan katej miakej iTlaixpantijkauan Jehová”. Pero ye nochipa omotekipachouaya uan amo omoyolseuiaya. Oksekimej tokniuan omokuayejyekouayaj uelis kintsakuaskiaj pero okineltokayaj Jehová kinpaleuiskia, ikinon amo sapanoua omotekipachouayaj. Andréi opejki kichiua ken tokniuan uan okachi okineltokak toTajtsin Dios. Axkan yolpaki uan moyolseuijtok maski ok tlajyouia. Tejuan noijki uelis ijkon timomachiliskej. Jesús okijto techtlajyouiltiskej pero noijki okijto uelis nochipa tiktekichiuiliskej Jehová (xiktlajtolti Juan 15:20; 16:33).

16. ¿Tlen moneki tikchiuaskej ijkuak techtlajyouiltiaj?

¹⁶ Ijkuak ayakmo techkauiliskej matitetlapouikan uan matimonechikokan, tokniuan tlen tlapaleuiaj Betel noso tlayekankej techiluiskej tlen moneki  tikchiuaskej para timomaluiskej, para tikinpiaskej amatlajkuilolmej uan titetlapouiskej. Maski ualeua amo tikajsikamatiskej tleka ijkon techiluiskej moneki tikintlakamatiskej tokniuan (Sant. 3:17). Amo matikinmiluikan oksekimej tlen kichiuaj tokniuan noso tlen tikchiuaj itech tonechikol tla amo moneki kimatiskej (Ecl. 3:7).

17. ¿Ken uelis tikchiuaskej ken apóstoles?

¹⁷ Satanás kintlajyouiltia akinmej kitekichiuiliaj toTajtsin Dios porque tetlapouiaj (Apoc. 12:17). Amo matechmomojtikan Satanás uan akinmej kinyekana. Ijkuak titetlapouiaj uan titlamachtiaj, tiyolpakij uan timoyolseuiaj maski techtlajyouiltiaj. Itech achto siglo, akinmej okinyekanayaj judíos okinmiluijkej apóstoles ayakmo matetlapouikan, yejuan nochipa okitlakamatkej toTajtsin Dios uan ok otetlapouijkej ikinon oyolpakiayaj (Hech. 5:27-29, 41, 42). Ijkuak ayakmo techkauiliskej matitetlapouikan, moneki tiyetoskej tiixtlamatkej ijkuak titetlapouiskej (Mat. 10:16). Tla timochijchikauaj nochipa titetlapouiskej, timoyolseuijtoskej porque tikyolpaktiskej Jehová uan tikinpaleuiskej oksekimej mamomakixtikan.

18. ¿Akin uelis techyolseuis?

¹⁸ Uelis timoyolseuijtoskej maski titlajyouiskej. Ijkuak ijkon techpanos matikilnamikikan san toTajtsin Dios techyolseuijtos. Matikneltokakan Jehová techpaleuis ijkuak miakej mokokouaj, ijkuak panoua tlen amo kuali noso techtlajyouiltiaj. Matiktlakamatikan ialtepe toTajtsin Dios uan matikilnamikikan tlen ye yokijto tikseliskej satepan. Tla ijkon tikchiuaj, toTajtsin Dios “Akin kichiwa matikpiakah yolsewílistli” touan yetos (Filip. 4:9). Itech okse tlamachtil tikitaskej ken uelis tikinpaleuiskej tokniuan mamoyolseuijtokan ijkuak tlajyouiaj.