1. ¿Tlen uelis timotlajtlaniskej ijkuak timokuayejyekouaj ken otlaneltokak Abrahán?

 MIAKEJ kimatij tlen okichi Abrahán pero amo okachi kixmatij. Pero tejuan kuali tikixmatij. Tikmatij Biblia kijtoua: “Ye omochi inpapa akinmej tlaneltokaj” (Rom. 4:11). Xamo timotlajtlaniaj kox uelis tikchiuaskej ijkon ken Abrahán okichi uan kox titlaneltokaskej ijkon ken ye otlaneltokak. Pero uelis ijkon tikchiuaskej.

2. ¿Tleka miak ipati matimomachtikan tlen okichi Abrahán? (Santiago 2:​22, 23).

² Tla timomachtiaj tlen okichi Abrahán techpaleuis matitlaneltokakan ijkon ken ye otlaneltokak. Ye nochipa okitlakamatki toTajtsin Dios. Okitlakamatki ijkuak okilui oksekan machantiti, ijkuak miak xiuitl ochantik itech kaltsitsintin uan ijkuak okinauati makitemaka ikone. Ye okiteititi sapanoua otlaneltokaya. Jehová kuali omouikak iuan Abrahán ikinon okiseli porque ye okiteititi otlaneltokaya uan okichiuaya tlen kuali (xiktlajtolti Santiago 2:​22, 23). Jehová kineki techselis uan kineki tinochtin iuan matimouikakan. Ikinon Jehová okinyekanki Pablo uan Santiago makijkuilokan tlen okichi Abrahán. Axkan tikitaskej itlaj miak ipati tlen okichi Abrahán uan okijkuilojkej itech Romanos capítulo 4 uan Santiago capítulo 2.

3. ¿Tlen okijtojkej Pablo uan Santiago?

 ³ Pablo uan Santiago okijtojkej tlen yiuejkika omoijkuilo itech Génesis 15:6. Ompa kijtoua Abrahán okineltokak Jehová ikinon ye okitak okatka yolkuali. ¿Tlen kijtosneki ijkuak Jehová kita ikaj yolkuali? Ye yolpaki uan kiselia akin kita yolkuali maski tlajtlakole. Techtlajtlachialtia Jehová uelis techselis uan techitas tiyolkualmej maski titlajtlakolejkej. Tejuan noijki tiknekij ijkon matechita uan uelis ijkon tikchiuaskej. Matikitakan tleka Jehová okijto Abrahán okatka yolkuali uan tlen uelis tikchiuaskej para noijki ijkon matechita.

4. ¿Tleka oui tiyetoskej tiyolkualmej?

⁴ Itech carta tlen Pablo okinmijkuilili akinmej ochantiayaj Roma okijto tinochtin titlajtlakolejkej (Rom. 3:23). ¿Tleka tikijtouaj toTajtsin Dios tikyolpaktiaj uan techita tiyolkualmej? Pablo okinekiaya kinpaleuis akinmej okichiuayaj ken Cristo makajsikamatikan non tlamantli ikinon okinmilui tlen okichi Abrahán.

5. ¿Tleka Jehová okijto Abrahán okatka yolkuali? (Romanos 4:​2, 4).

⁵ Jehová okilui Abrahán okatka yolkuali ijkuak ochantiaya Canaán. ¿Tleka okijto okatka yolkuali? ¿Okatka yolkuali porque okitlakamatiaya iTlanauatil Moisés? Amo (Rom. 4:13). Porque non tlanauatil kanaj 400 xiuitl satepan okinmakakej israelitas. Ikinon ¿tleka Jehová okijto Abrahán okatka yolkuali? Jehová okiteititi okitlasojtlaya uan okijto okatka yolkuali porque otlaneltokaya (xiktlajtolti Romanos 4:​2-4).

6. ¿Tleka Jehová kijtoua yolkuali akin tlajtlakole?

⁶ Satepan Pablo okijto “toTajtsin Dios kita yolkuali akin tlaneltoka” (Rom. 4:5). Noijki okijkuilo “David noijki okijto paki tlakatl tlen toTajtsin Dios kita yolkuali maski amo okichi nochi tlen kijtoua tlanauatil. Ye okijto: ‘Pakij akinmej kintlapojpoluiaj tlen amo kuali okichijkej. Noijki pakij akinmej kintlapojpoluiliaj intlajtlakol. Jehová amo kilnamiktok itlajtlakol tlakatl ikinon tlakatl paki’” (Rom. 4:​6-8; Sal. 32:​1, 2). Jehová kintlapojpoluia akinmej kineltokaj uan ayakmo kilnamiki tlen amo kuali okichijkej. Jehová ayakmo kinmita tlajtlakolejkej uan kinmita yolkualmej porque tlaneltokaj.

7. ¿Tleka Jehová okijto okatkaj yolkualmej itekipanojkauan?

⁷ Abrahán, David uan oksekimej itekipanojkauan Jehová okatkaj tlajtlakolejkej pero ye okinmitaya yolkualmej. Yejuan otlaneltokayaj ikinon toTajtsin Dios okinmitaya yolkualmej. Pero okinmitaya tlajtlakolejkej akinmej amo otlaneltokayaj (Efes. 2:12). Itech carta tlen Pablo okinmijkuilili Romanos okijto moneki titlaneltokaskej tla tiknekij timouikaskej iuan Jehová. Abrahán uan David otlaneltokakej ikinon omouikakej iuan Jehová. Tejuan noijki uelis iuan timouikaskej tla tikchiuaj ijkon ken yejuan okichijkej.

8, 9. ¿Tlen mokuayejyekouaj miakej uan tleka?

⁸ Akinmej kinyekanaj religiones yimiak xiuitl kijtouaj se tlamantli kijtosneki titlaneltokaskej uan okse tlamantli kijtosneki tikchiuaskej tlen kuali. Sekimej  kijtouaj san moneki kineltokaskej Jesús uan ijkon uelis momakixtiskej. Xamo yotikkakej sekimej kijtouaj: “Xikneltoka Jesús uan timomakixtis”. Xamo ijkon kijtouaj porque Pablo okijto: “ToTajtsin Dios kita yolkuali maski amo okichi nochi tlen kijtoua tlanauatil” (Rom. 4:6). Oksekimej kijtouaj para uelis momakixtiskej moneki uejka nejnemiskej para kinueyichiuatiuij indioses uan kichiuaskej tlen kuali. Yejuan mopaleuiaj ika tlen kijtoua Santiago 2:24: “Ikaj kitaj yolkuali porque kichiua tlen kuali uan amo porque san tlaneltoka”.

⁹ Tlatlamantli tlamachtiaj ikinon sekimej ixtlamatkej kijtouaj amo san se tlamantli omokuayejyekouayaj Pablo uan Santiago ijkuak okijtojkej titlaneltokaskej uan tikchiuaskej tlen kuali. Yejuan kijtouaj Pablo okijto san moneki titlaneltokaskej uan ijkon techselis toTajtsin Dios. Pero Santiago san okijto moneki tikchiuaskej tlen kuali. Se ixtlamatki okijto: “Santiago amo okajsikamatiaya tleka Pablo okijto ikaj yetoskia yolkuali tla tlaneltoka uan amo porque kichiua tlen kuali”. Pero Jehová okinmilui tlen kijkuiloskiaj Pablo uan Santiago (2 Tim. 3:16). Amo oui tikajsikamatiskej tlen yejuan okijtojkej. Pero matimomachtikan okseki tlamantli tlen okijkuilojkej para tikajsikamatiskej.

10. ¿Tlen kijtosneki tlen okijkuilo Pablo? (Romanos 3:​21, 28). (Noijki xikita dibujo).

¹⁰ ¿Tlen kijtosneki tlen okijkuilo Pablo itech Romanos 3 uan 4 ijkuak okijto itlaj matikchiuakan? Ye okijto tlen okichiuayaj ijkuak ‘okitlakamatiayaj tlanauatil’ tlen toTajtsin Dios okinmakak israelitas (xiktlajtolti Romanos 3:​21, 28).  Xamo sekimej tokniuan judíos okitayaj oui kiseliskej omopatlak Tlanauatil uan ayakmo omonekiaya kitlakamatiskej. Ikinon Pablo okinmilui Abrahán otlaneltokak uan ijkon toTajtsin Dios okiseli. Ye amo okiseli porque okitlakamatki tlanauatil. Techyolchikaua tlen okinmilui porque techititia toTajtsin Dios uelis techselis tla tikneltokaj uan noijki tla tikneltokaj Cristo.

11. ¿Tlen tlamantli okinekiaya kijtos Santiago?

¹¹ Tlen ijkuilitok itech Santiago capítulo 2 amo kijtosneki matiktlakamatikan tlanauatil tlen okijto Pablo. Tlen okijto Santiago kijtosneki tlen tejuan nochipa tikchiuaj. Tlen tikchiuaj kiteititis kox melauak tikneltokaj toTajtsin Dios. Matikitakan ome tlamantli tlen okijto Santiago.

12. ¿Ken okiyekijto Santiago titlaneltokaskej uan tlen tikchiuaj? (Noijki xikita dibujo).

¹² Santiago achto okijto amikaj matikchikoitakan tejuan tlen tikchiuaj ken Cristo. Ye okinmilui amo melauak tlaneltokaj tla kichikoitaj akin amitlaj kipia uan kuali kinotsaj akin kipia miak tomin. Ikinon tlen okichiuayaj okiteititiaya techikoitaj (Sant. 2:​1-5, 9). Noijki okijto ijkuak ikaj kita se tokni amo kipia itlaken noso tlen kikuas, amo okipaleuiaya porque amo okimakaya tlen kipoloua. Amitlaj ipati kijtos tlaneltoka porque amo kitemaka tlen kipia. Santiago okijkuilo: “Tla titlaneltokaj pero amo tikchiuaj tlen kuali kijtosneki totlaneltokilis miktok” (Sant. 2:​14-17).

13. ¿Akin okichi tlen kuali ijkon ken okijto Santiago? (Santiago 2:​25, 26).

¹³ Santiago okijto Rahab okichi tlen  kuali uan ijkon okiteititi otlaneltokaya (xiktlajtolti Santiago 2:​25, 26). Rahab okimatiaya tlen okichi Jehová uan okimatiaya okinpaleuijtoka israelitas (Jos. 2:​9-11). ¿Ken okiteititi Rahab okineltokaya Jehová? Okintlati ome israelitas para amo makinmiktikan porque yejuan oichtakatlachiatoj itech non altepetl. Ikinon non siuatl okitakej yolkuali ijkon ken Abrahán maski otlajtlakolchiuaya uan amo okatka israelita. Tlen okichi techmachtia miak ipati matikchiuakan tlen kuali tla titlaneltokaj.

14. ¿Tleka tikijtouaj tlatlamantli tlen okijtojkej Pablo uan Santiago?

¹⁴ Axkan yotikitakej Pablo uan Santiago tlatlamantli okijtojkej tlen kijtosneki titlaneltokaskej uan tikchiuaskej tlen kuali. Pablo okinmilui tokniuan judíos, Jehová amo kinseliskia tla san kitlakamatiskiaj tlen okijtouaya Tlanauatil. Pero Santiago okiyekijto nochtin akinmej kichiuaj ken Cristo kiteititiaj tlaneltokaj ijkuak kichiuaj tlen kuali.

15. ¿Tlen uelis tikchiuaskej para tikteititiskej titlaneltokaj? (Noijki xikinmita fotos).

¹⁵ Ijkuak Jehová okijto matitlaneltokakan ijkon ken Abrahán para techselis, amo kijtosneki tikchiuaskej nochi tlen ye okichi. Porque uelis tikchiuaskej miak tlamantli para tikteititiskej titlaneltokaj. Jehová kipaktia matiyolpakikan ijkuak tikinseliskej akinmej yikin monechikouaj, matikinpaleuikan tokniuan tlen kinpoloua seki tlamantli uan matikpaleuikan tofamilia (Rom. 15:7; 1 Tim. 5:​4, 8; 1 Juan 3:18). Okachi tikteititiaj titlaneltokaj ijkuak tiyolpakij titetlapouiaj  (1 Tim. 4:16). Tinochtin uelis tikteititiskej ika tlen tikchiuaj tikneltokaj Jehová kichiuas tlen yokijto. Noijki tikneltokaskej nochi kuali kisa tlen ye kichiua. Tla ijkon tikchiuaj toTajtsin Dios techitas tiyolkualmej uan touan mouikas.

16. ¿Tlen okichiaya Abrahán mapano uan tlen okineltokaya?

¹⁶ Romanos capítulo 4 techmachtia moneki matikneltokakan mochiuas tlen tikchiaj ijkon ken okichi Abrahán. Jehová okilui Abrahán kinteochiuaskia ixuiuan. ¡Kualtsin tlen okiluijkej Abrahán panoskia! (Gén. 12:3; 15:5; 17:4; Rom. 4:17). Pero ijkuak Abrahán yokipiaya 100 xiuitl uan Sara 90, ayamo okipiayaj inkone. Xamo ikaj uelis kijtoskia ayakmo mochiuaskia tlen okiluijkej. Maski Abrahán okitaya oui, ye “okineltokaya yetos tepapa itech miakej altepemej maski omotaya amo ijkon panoskia” (Rom. 4:​18, 19). Satepan omochi tlen okichiaya porque okipixki ikone tlen omotokayotiaya Isaac (Rom. 4:​20-22).

17. ¿Ken tikmatij toTajtsin Dios uelis techselis uan touan mouikas?

¹⁷ Jehová noijki uelis techselis uan touan mouikas ijkon ken okiseli Abrahán. Ikinon Pablo okijto: “Ninmej tlajtolmej: ‘Okitakej okatka se tlakatl yolkuali’ amo omoijkuilo san para ye. Noijki okijkuilojkej para tejuan porque titlaneltokaj uan techitaskej tiyolkualmej. Tejuan tikneltokaj toTajtsin Dios akin okiyoliti toTeko Jesús” (Rom. 4:​23, 24). Moneki titlaneltokaskej, tikchiuaskej tlen kuali uan tikchiaskej mamochiua tlen yotechiluijkej ijkon ken okichi Abrahán. Itech okse tlamachtil tikitaskej Romanos capítulo 5 kanin Pablo okijkuilo matikchiakan mamochiua tlen yotechiluijkej.