1. ¿Tlen moneki tikchiuaskej para okachi titlaneltokaskej?

 TECHTLAJTLACHIALTIA ijkuak tikitaj san niman moskaltia se konetsintli. Mota amo oui ijkuak ikaj moskaltia. Pero amo ijkon panoua ijkuak peua titlaneltokaj porque moneki timochijchikauaskej (1 Cor. 13:11; Heb. 6:1). b Para okachi titlaneltokaskej moneki kuali timouikaskej iuan Jehová. Moneki matechpaleui iespíritu santo toTajtsin Dios tla tiknekij tikpiaskej kuali toyelis uan tla tiknekij tikchiuaskej tlen kuali. Noijki matikchiuakan seki tlamantli tlen techpaleuis satepan (Prov. 1:5).

2. ¿Tlen techmachtia Génesis 1:27 uan tlen timomachtiskej?

² Jehová okinchijchi tlakatl uan siuatl (xiktlajtolti Génesis 1:27). Tlakatl uan siuatl tlatlamantli chijchitokej uan noijki tlatlamantli mokuayejyekouaj. Jehová okinmakak tlatlamantli inteki tlakatl uan siuatl. Para uelis kichiuaskej inteki moneki momachtiskej seki tlamantli uan kipiaskej kuali inyelis (Gén. 2:18). Axkan timomachtiskej seki tlamantli tlen kinpaleuis ichpochmej makiteititikan kichiuaj ken Cristo. Chikome tikitaskej tlen kinpaleuis telpochmej.

3, 4. ¿Tlen kinpaleuis ichpochmej kuali mamouikakan iuan Jehová? (Noijki xikinmita fotos).

³ Biblia kijtoua yiuejkika miakej siuamej okitekichiuilijkej Jehová uan okitlasojtlakej (xiktlajtolti itech jw.org  “¿Qué aprendemos de las mujeres de la Biblia?”). Texto tlen timomachtijtokej kijtoua yejuan ‘okipiayaj innemilis uan nochipa okiteititiayaj okineltokayaj toTajtsin Dios’. Xamo noijki kanin timonechikouaj katej miakej tlen kuali tlaneltokaj uan yejuan uelis techmachtiskej miak tlamantli.

⁴ Tla te tiichpochtli xikita ken uelis tikchiuas ijkon ken siuamej tlen kuali mouikaj iuan Jehová. Xikita ken kipiaj inyelis uan satepan ximokuayejyeko ken uelis tikchiuas ijkon ken yejuan kichiuaj. Axkan tikitaskej eyi tlamantli tlen moneki kichiuaskej siuamej para okachi tlaneltokaskej.

5. ¿Tleka siuamej moneki yetoskej yolyamankej?

⁵ Xiyeto tiyolyamanki. Siuatl tlen yolyamanki kuali mouika iuan Jehová uan inuan oksekimej (Sant. 4:6). Kiteititia yolyamanki uan kitlasojtla Jehová ijkuak kintlakamati akinmej kiyekanaj tlanechikol. Noijki ijkuak kitlakamati akin kiyekana ifamilia (1 Cor. 11:3). c

6. ¿Ken uelis yetoskej yolyamankej ichpochmej ijkon ken okichi Rebeca?

⁶ Matikitakan tlen okichi Rebeca. Ye okatka ixtlamatki uan okimatiaya keman itlaj kichiuas (Gén. 24:58; 27:​5-17). Pero noijki otetlakaitaya uan otetlakamatiaya (Gén. 24:​17, 18, 65). Tla te tiyolyamanki, titetlakaita uan titetlakamati ijkon ken okichi Rebeca, uelis tikinpaleuis tokniuan uan mofamilia.

7. ¿Ken uelis kiteititiskej ichpochmej amo moueyinekij tla kichiuaj ijkon ken Ester okichi?

⁷ Amo ximoueyineki. Biblia kijtoua “ixtlamatilistli kajki inuan akinmej yolyamankej” noso akinmej amo moueyinekij (Prov. 11:2). Ester okiueyichiuaya Jehová uan amo omoueyinekiaya. Ye amo omoueyineki ijkuak okitlalijkej matlanauati.  Noijki okikakiaya tlen okiluiaya Mardoqueo uan okitlakamatiaya (Est. 2:​10, 20, 22). Te noijki uelis ijkon tikchiuas ijkuak tikinmiluis oksekimej mamitsiluikan tlen uelis tikchiuas uan xikchiua ijkon ken mitsiluiaj (Tito 2:​3-5).

8. ¿Tlen uelis kichiuaskej siuamej ijkuak kipejpenaskej ken motlakentiskej ijkon ken kijtoua 1 Timoteo 2:​9, 10?

⁸ Matikitakan okse tlamantli tlen okiteititi Ester amo omoueyinekiaya. Ye omotaya sapanoua kualtsin pero amitlaj okichiuaya san para oksekimej makitakan (Est. 2:​7, 15). ¿Ken uelis tikchiuas ijkon ken okichi Ester? Uelis tikchiuas tlen kijtoua 1 Timoteo 2:​9, 10 (xiktlajtolti). Apóstol Pablo okinmilui siuamej kuali mamotlakentikan uan makiteititikan katej yolyamankej uan kuali mokuayejyekouaj. Ika griego kijtosneki siuamej kuali mamotlakentikan uan mamokuayejyekokan ken momachiliskej oksekimej ijkuak kinmitaskej. Tiyolpakij ijkuak tikinmitaj siuamej kiueyichiuaj Jehová porque kuali kipejpenaj intlaken.

9. ¿Tlen techmachtia tlen okichi Abigaíl?

⁹ Xikita tlen kuali uan tlen amo kuali. Nin kijtosneki kuali timokuayejyekos para tikmatis tlen kuali uan tlen amo kuali. Non mitspaleuis xikchiua tlen okachi kuali. Matikitakan tlen okichi Abigaíl. Inamik amo kuali okipejpenki tlen okichi pero Abigaíl san niman omokuayejyeko tlen uelis kinpanoskia akinmej inuan ochantiayaj. Ikinon ye san niman itlaj okichi para oksekimej amitlaj makinpano (1 Sam. 25:​14-23, 32-35). Tla tikitaj tlen kuali uan tlen amo kuali, techpaleuis matikmatikan keman itlaj tikijtoskej. Noijki techpaleuis matikitakan ken tikinpaleuiskej oksekimej uan amo tikinyolkokoskej (1 Tes. 4:11).

10, 11. ¿Ken mitspaleuis tla timomachtis tiktlajtoltis se amatl uan titlajkuilos? (Noijki xikita foto).

¹⁰ Siuamej noijki kinpaleuis tla momachtiaj kichiuaskej seki tlamantli. Seki tlamantli tlen momachtiaj ijkuak ok takotsitsintin satepan kinpaleuis. Matikitakan seki tlamantli tlen uelis tikchiuas.

¹¹ Ximomachti xiktlajtolti se amatl uan xitlajkuilo. Itech seki altepemej amo kuali kitaj tla se siuatl kineki momachtis kitlajtoltis se amatl uan tlajkuilos. Pero nochi non tlamantli techpaleuia akinmej tikchiuaj ken Cristo (1 Tim. 4:13). d Ikinon ximochijchikaua ximomachti xiktlajtolti se amatl uan xitlajkuilo. ¿Ken mitspaleuis tla ijkon tikchiuas? Non mitspaleuis san niman xikajsi kanin titekipanos para tikpias  tlen ika timopanoltis. Noijki mitspaleuis okachi kuali ximomachti Biblia uan kuali tikinmachtis oksekimej. Pero noijki mitspaleuis kuali ximouika iuan Jehová ijkuak tiktlajtoltis Biblia uan timokuayejyekos tlen timomachtia (Jos. 1:8; 1 Tim. 4:15).

12. ¿Tlen mitsmachtia Proverbios 31:26?

¹² Kuali ximotlapoui inuan oksekimej. Non techpaleuia kuali matimouikakan inuan tokniuan. Discípulo Santiago otechilui tlen moneki tikchiuaskej. Okijto: “San niman xitlakakikan pero amo san niman xitlajtokan” (Sant. 1:19). Tikteititiaj tikinmajsikamatij oksekimej ijkuak kuali tikinkakij (1 Ped. 3:8). Tla amo tikajsikamati ijkuak itlaj mitsiluiaj, oksepa xitlajtlani uan xitetlakaita. Satepan kuali ximokuayejyeko tlen uelis tikijtos (Prov. 15:​28, nota). Ximotlajtlani: “¿Melauak tlen nikijtos? ¿Teyolchikauas? ¿Nikteititis nitetlakaita? ¿Nikteititis nitetlasojtla?”. Ximokuayejyeko tlen kichiuaj siuamej tlen kuali mouikaj iuan Jehová uan kimatij motlapouiskej inuan oksekimej. Non mitspaleuis xikchiua ijkon ken yejuan kichiuaj (xiktlajtolti Proverbios 31:26). Kuali xikita tlen kijtouaj uan ken kijtouaj. Ximochijchikaua xikchiua ijkon ken yejuan kichiuaj. Ijkon kuali timouikas inuan oksekimej.

13. ¿Tlen mitspaleuis kuali xikmalui mokalijtik? (Noijki xikita foto).

¹³ Ximomachti ken tikmaluis mokalijtik. Itech miakej altepemej siuamej kichiuaj miak tekitl inkalijtik. Xamo momama uelis mitsmachtis ijkon xikchiua noso se tokni tlen yikimati tlen tekitl mochiua kalijtik. Se tokni tlen itoka Cindy, okijto: “Sapanoua nikpatioita tlen onechmachti nomama. Ye onechiluiaya kuali nimomachilis tla chikauak nitekipanoua. Onechmachti nitlakualchiuas, nitlachipauas, nitlajtsomas uan kanin nitlakouas. Non onechpaleui kuali maniyeto uan okachi maniktekichiuili Jehová. Nomama noijki onechititi manikinmaka oksekimej tlen nikpia. Ijkon onikinmixmatki oksekimej tokniuan tlen noijki onechpaleuijkej” (Prov. 31:​15, 21, 22). Siuamej kinpaleuiaj infamilia uan tlanechikol porque kimatij tekipanoskej, kitemakaj tlen kipiaj uan kimaluiaj inkalijtik (Prov. 31:​13, 17, 27; Hech. 16:15).

14. ¿Tlen mitsmachtia tlen okijto Crystal uan tlen moneki tikchiuas?

¹⁴ Xikmotlanili tlen ika timopanoltis. Tinochtin moneki timomachtiskej kuali titekipanoskej uan tiyolpakiskej san ika tlen tikpiaj (Filip. 4:11). Se tokni tlen itoka Crystal, okijto: “Ijkuak onikatka niichpochtli uan onimomachtijtoka, nopapanuan onechiluijkej manimomachti se tekitl tlen nechpaleuiskia. Nopapa onechilui manimomachti contabilidad uan non  sapanoua onechpaleui”. Amo san moneki titekipanos para tikpias tlen ika timopanoltis. Noijki moneki xikita tlen tikchiuas para amo san timotomintlamis (Prov. 31:​16, 18). Okachi tiktekichiuilis Jehová tla amo tiktlaneuis tomin uan tiyolpaki san ika tlen tikpia (1 Tim. 6:8).

15, 16. ¿Tleka tikinpatioitaj siuamej tlen ayamo monamiktiaj? (Marcos 10:​29, 30).

¹⁵ Sapanoua mitspaleuis tla timochijchikaua tikpias moyelis ijkon ken Jehová kipaktia uan timomachtia tikchiuas seki tlamantli. Matikitakan seki tlamantli tlen uelis tikchiuas.

¹⁶ Xamo tikijtos ayamo timonamiktis. Jesús okijto miakej kipejpenaskiaj amo monamiktiskej maski kanin chantij kinmiluiskej mamonamiktikan (Mat. 19:​10-12). Oksekimej amo monamiktiaj porque kipejpenaj kichiuaskej okseki tlamantli. Tla ayamo timonamiktia non amo kijtosneki Jehová uan Jesús amo mitspatioitaj. Nochtin siuamej tlen ayamo monamiktiaj sapanoua tlapaleuiaj itech tlanechikol uan tikinpatioitaj. Yejuan kiteititiaj tetlasojtlaj uan kintekipachoua tlen kinpanoua oksekimej ikinon sapanoua tikinpatioitaj (xiktlajtolti Marcos 10:​29, 30; 1 Tim. 5:2).

17. ¿Tlen kinpaleuis ichpochmej para okachi kitekichiuiliskej Jehová?

¹⁷ Uelis okachi tiktekichiuilis Jehová. Siuamej okachi tetlapouiaj ipan nochi tlaltikpak (Sal. 68:11). ¿Uelis timochijchikauas para okachi titetlapouis? Xamo uelis titlapaleuis ken precursora, kanin kinchiuaj kalmej kanin timonechikouaj noso titlapaleuis Betel. ¿Tlen mitspaleuis okachi xitlapaleui? Xikilui Jehová mamitspaleui. Noijki ximotlapoui inuan tokniuan tlen okachi yikitekichiuilijtokej Jehová uan xikintlajtlani tlen moneki tikchiuas. Satepan xikijkuilo tlen moneki tikchiuas. Tla timochijchikaua okachi tiktekichiuilis Jehová uelis tikchiuas miak tlamantli itech ialtepe.

18. ¿Tleka siuamej moneki kuali makitakan akin iuan monamiktiskej? (Noijki xikita foto).

¹⁸ Xamo tikijtos timonamiktis. Sapanoua tikpaleuis monamik tla tikpia kuali moyelis uan tikchiua tlen yotikitakej. Pero tla tikneki timonamiktis moneki kuali xikita akin iuan timonamiktis. Porque non sapanoua miak ipati. Xikilnamikto  mitsyekanas akin iuan timonamiktis (Rom. 7:2; Efes. 5:​23, 33). Ximotlajtlani: “¿Kuali mouika iuan Jehová? ¿Kipatioita kitekichiuilis Jehová? ¿Kuali kipejpena tlen kichiuas? ¿Kijtoua ijkuak motlapololtia? ¿Kintlakaita siuamej? ¿Nechpaleuis kuali manimouika iuan Jehová? ¿Nechmakas tlen ika nimopanoltis, nechmaluis uan kajsikamatis ken nimomachilia? ¿Kuali kichiua tekitl tlen kimakaj? Ximotlajtlani: ¿Tlen tekitl kipia itech tlanechikol uan kox kuali kichiua?” (Luc. 16:10; 1 Tim. 5:8). Tla tikneki monamik makichiua nochi nin tlamantli, moneki timochijchikauas noijki tikpaleuis.

19. ¿Tleka yetos se kualtsin tekitl tla tikpaleuis monamik?

¹⁹ Biblia kijtoua siuatl tlen yomonamikti moneki kipaleuis inamik (Gén. 2:18). ¿Kijtosneki siuatl amitlaj ipati? Amo. Porque nin se kualtsin tekitl tlen Jehová kimaka. Biblia kijtoua Jehová tlapaleuia (Sal. 54:4; Heb. 13:6). Siuatl sapanoua kipaleuia inamik ijkuak kichiua seki tlamantli para kuali makisa tlen ye okipejpenki itech ifamilia. Noijki siuatl kitlasojtla Jehová ikinon kipaleuia inamik kuali makitakan oksekimej (Prov. 31:​11, 12; 1 Tim. 3:11). Tla timokuayejyekoua yitimonamiktis, achto uelis okachi tikixmatis Jehová uan timochijchikauas okachi titlapaleuis itech tlanechikol uan noijki xikpaleui mofamilia.

20. ¿Ken uelis titlapaleuis mayolpaki mofamilia?

²⁰ Xamo tikinpias mokoneuan. Tla timonamiktis xamo nankinpiaskej namokoneuan (Sal. 127:3). Ikinon uelis timokuayejyekos ken tikinmiskaltis mokoneuan. Tlen axkan otimomachtijkej mitspaleuis kuali xikchiua non tekitl. Tikpaleuis mofamilia mayolpaki tla titetlasojtla, tiyolkuali uan tikmati timochias. Noijki kuali tikinmiskaltis mokoneuan porque yejuan kitaskej tikinmaluia uan tikintlasojtla (Prov. 24:3).

21. ¿Tleka tikinpatioitaj siuamej? (Xikinmita fotos tlen katej página 1).

²¹ Timechtlasojtlaj miak ichpochmej porque nankichiuaj miak tlamantli para nankitekichiuiliskej Jehová uan nankipaleuiaj ialtepe (Heb. 6:10). Nanmochijchikauaj kuali nanmouikaskej iuan Jehová, nanmomachtiaj nankichiuaskej seki tlamantli para nanmopaleuiskej uan nankinpaleuiskej oksekimej. Noijki nanmoyektlaliaj para kuali nankipiaskej namonemilis satepan. ¡Ialtepe Jehová sapanoua namechpatioita!