1. ¿Tlen moneki kichiuaskej tlakamej para kuali makisa tlen kichiuaskej?

 TEKIUA David okilui Salomón: “Ximoyolchikaua uan xikteititi titlakatl” (1 Rey. 2:​1-3). Nochtin tokniuan tlakamej moneki mochijchikauaskej ijkon kichiuaskej. Pero moneki kintlakamatiskej itlanauatiluan Jehová para kuali kisas tlen kichiuaskej. Noijki ijkuak itlaj kipejpenaskej kichiuaskej mamoyekanakan ika principios bíblicos (Luc. 2:52). ¿Tleka moneki okachi matlaneltokakan telpochmej?

2, 3. ¿Tleka miak ipati okachi matlaneltokakan telpochmej?

² Tokniuan tlakamej kipiaj miak tekitl. Yejuan kinmaluiaj infamilia uan tlapaleuiaj kanin monechikouaj. Tla titelpochtli xamo timokuayejyekoua tlen tikchiuas satepan. Xamo tikneki tiyetos precursor, siervo ministerial noso tiyetos titlayekanki. Xamo noijki tikneki timonamiktis uan tikinpias mokoneuan (Efes. 6:4; 1 Tim. 3:1). Moneki kuali titlaneltokas tla tikneki kuali makisa tlen tikchiuas. b

³ ¿Tlen mitspaleuis okachi xitlaneltoka? ¿Tlen tlamantli moneki timomachtis tikchiuas? ¿Tlen uelis tikchiuas axkan para kuali makisa tlen tikchiuas satepan? Matikitakan.

4. ¿Kanin uelis tikitas tlen kuali okichijkej oksekimej? (Noijki xikinmita fotos).

⁴ Xikchiua ken akinmej kichiuaj tlen kuali. Biblia kijtoua tlen okichijkej tlakamej tlen okitlasojtlayaj toTajtsin Dios  uan okimaluiayaj ialtepe. Xamo sekimej mofamiliares uan tokniuan kanin timonechikoua kiteititiaj kuali tlaneltokaj uan uelis tikchiuas ijkon ken yejuan kichiuaj (Heb. 13:7). Noijki uelis tikchiuas ijkon ken okichi Jesús (1 Ped. 2:21). Ijkuak tikitas tlen okichijkej, ximokuayejyeko tlen okachi mitspaktia tlen yejuan okichijkej (Heb. 12:​1, 2). Satepan ximokuayejyeko ken uelis tikchiuas ijkon ken yejuan okichijkej.

5. ¿Tlen uelis tikchiuas para kuali timokuayejyekos uan tleka miak ipati ijkon xikchiua? (Salmo 119:9).

⁵ Ximochijchikaua “xikmalui […] mokuayejyekolis” (Prov. 3:21). Tlakamej tlen ijkon kichiuaj achto mokuayejyekouaj tlen kipejpenaskej kichiuaskej. Ikinon nochipa ximochijchikaua kuali ximokuayejyeko. ¿Tleka? Axkan miakej telpochmej san kichiuaj tlen yejuan kinekij uan tlen kinpaktia (Prov. 7:7; 29:11). Noijki uelis mitsijtlakos tlen tikita itech televisión, películas, internet uan itech redes sociales. ¿Tlen uelis tikchiuas para kuali timokuayejyekos? Achto moneki timomachtis principios bíblicos uan timokuayejyekos tleka Jehová mitsiluia itlaj xikchiua. Satepan xikita tlen otimomachti uan xikpejpena tikchiuas tlen Jehová kipaktia (xiktlajtolti Salmo 119:9). Ijkon okachi titlaneltokas tla timochijchikaua kuali timokuayejyekos (Prov. 2:​11, 12; Heb. 5:14). Matikitakan ken mitspaleuis tla kuali timokuayejyekoua. Kuali ximouika inuan tokniuan siuamej uan kuali ximoyektlakenti.

6. ¿Ken kiteititis se telpochtli tlen kuali mokuayejyekoua kintlakaita siuamej?

⁶ Tikintlakaitas siuamej tla kuali timokuayejyekoua. Se telpochtli xamo kipaktis se ichpochtli uan kinekis kixmatis. Amo tlajtlakoli tla ijkon kineki kichiuas. Pero tla kuali mokuayejyekoua amo kauiltis se ichpochtli tla ayamo kineki monamiktis. Nin kijtosneki amitlaj kiluis nion kitlajkuililis uan amo kichiuas okseki tlamantli tlen kiteititis kitlasojtla (1 Tim. 5:​1, 2). Tla yimoixmatok iuan se ichpochtli, amo keman inselti mayetokan uan ijkon  ichpochtli amo kiteneuaskej (1 Cor. 6:18).

7. ¿Ken kipejpenas moyektlalis telpochtli tla kuali mokuayejyekoua?

⁷ Noijki uelis kiteititis telpochtli mokuayejyekoua ken Jehová ijkuak kuali motlakentia uan moxiluia noso motsikauasuia ken moneki. Akinmej kichiuaj tlakemitl amo kitlakaitaj Jehová uan auilnemij. Ikinon tlakemitl tlen kinemakaj sapanoua tilintok noso kichiuaj tlakemitl para tlakamej mamotakan ken siuamej. Se telpochtli tlen mochijchikajtok kuali tlaneltokas moneki moyekanas ika principios bíblicos. Noijki makinmita tokniuan tlen kuali motlakentiaj uan non kipaleuis kuali mamotlakenti uan mamoyektlali. Uelis motlajtlanis: “¿Nikteititia kuali nimokuayejyekoua uan nikintlakaita oksekimej ika tlen nikpejpena nikchiuas? ¿Ken nimotlakentia nikteititia niktekichiuilia toTajtsin Dios?” (1 Cor. 10:​31-33; Tito 2:6). Jehová kintlakaita telpochmej tlen kuali mokuayejyekouaj uan tokniuan noijki kintlakaitaj.

8. ¿Ken uelis kiteititis se telpochtli kichiua tlen kiluiaj?

⁸ Xikchiua tekitl tlen mitsmakaj. Non kijtosneki timochijchikauas tikchiuas tlen mitsnauatiaj (Luc. 16:10). Ximokuayejyeko tlen okichi Jesús. Ye nochipa okichiuaya tlen okiluiayaj. Okichi nochi tlen Jehová okinauati maski ualeua okitaya oui. Nochtin okintlasojtlaya pero okachi okintlasojtlaya idiscípulos uan hasta inpatka omikik (Juan 13:1). Xikchiua ken Jesús okichi uan ximochijchikaua kuali xikchiua tekitl tlen mitsmakaj. Tla amo tikmati ken tikchiuas seki tlamantli, xiyeto tiyolyamanki uan xiktlajtlani okse tokni tlen kuali tlaneltoka. Nochipa ximochijchikaua kuali xitekipano (Rom. 12:11). Nochipa xiktlami tekitl tlen mitsmakaj uan ‘xikchiua ika nochi moyolo ken yetoskia para Jehová uan amo para tlakamej’ (Col. 3:23). Pero xikilnamikto timotlapololtis porque titlajtlakole ikinon xiyeto tiyolyamanki uan xikijto ijkuak ijkon panos (Prov. 11:2).

9. ¿Tleka moneki telpochtli momachtis kichiuas seki tlamantli?

⁹ Para okachi titlaneltokas moneki timomachtis tikchiuas seki tlamantli. Non mitspaleuis okachi xitlapaleui itech tlanechikol, tikpias kanin titekipanos uan ijkon tikpias tlen ika timopanoltis uan tikpaleuis mofamilia. Noijki mitspaleuis kuali timouikas inuan oksekimej. Matikitakan tlen uelis tikchiuas.

10, 11. ¿Tleka miak ipati se telpochtli mamomachti makitlajtolti se amatl uan matlajkuilo? (Salmo 1:​1-3; noijki xikita foto).

¹⁰ Ximomachti xiktlajtolti se amatl uan  xitlajkuilo. Biblia kijtoua akin nochipa kitlajtoltia iTlajtol toTajtsin Dios uan mokuayejyekoua tlen kitlajtoltia, yolpaki uan kuali kisa tlen kichiua (xiktlajtolti Salmo 1:​1-3). Ijkon kajsikamati ken mokuayejyekoua Jehová uan non kipaleuia kuali mamokuayejyeko tlen kichiuas (Prov. 1:​3, 4). ¿Tleka moneki ijkon kichiuaskej tlakamej tlen tlapaleuiaj itech tlanechikol?

¹¹ Tokniuan kinekij makinpaleuikan uan makinmachtikan tlen kijtoua Biblia (Tito 1:9). Tla tikmati tiktlajtoltis se amatl uan kuali titlajkuiloua, uelis timoyektlalis para titlamachtis uan titlanankilis kanin timonechikoua. Ijkon uelis tikinpaleuis tokniuan okachi matlaneltokakan. Noijki mitspaleuis xikijkuilo tlen okachi omitspakti ijkuak tikkaki se tlamachtil itech nechikol uan itech uejueyij nechikolmej. Non mitspaleuis okachi xitlaneltoka uan uelis tikinyolchikauas tokniuan ika tlen otikijkuilo.

12. ¿Tlen mitspaleuis kuali ximotlapoui inuan oksekimej?

¹² Kuali ximotlapoui inuan oksekimej. Tlakamej moneki mochijchikauaskej ijkon kichiuaskej. Nin kijtosneki moneki kinkakiskej oksekimej uan kinmajsikamatiskej ken mokuayejyekouaj uan ken momachiliaj (Prov. 20:5). Te uelis tikinmajsikamatis oksekimej tla tikinkaki ken tlajtouaj, tla tikinmita inmixko uan tla tikinmita ken moliniaj. Ijkon uelis tikchiuas tla timochijchikaua tiyetos inuan oksekimej. Okachi oui inuan timotlapouis tla san tikintitlanilia correos noso mensajes. Ikinon ximochijchikaua inuan xiyeto ijkuak timotlapouis inuan oksekimej (2 Juan 12).

13. ¿Tlen moneki momachtis se telpochtli? (1 Timoteo 5:8; noijki xikita foto).

¹³ Ximomachti kuali titekipanos. Akin kuali tlaneltoka moneki kimatis momaluis uan kimaluis ifamilia (xiktlajtolti 1 Timoteo 5:8). Sekimej telpochmej momachtiaj tekitl tlen kichiuaj inpapanuan noso okse infamiliar. Pero oksekimej telpochmej xamo momachtiaj se tekitl itech escuela noso oksekan. Moneki ximomachti se tekitl maski san kanin tichanti porque mitspaleuis xikpia tlen ika timopanoltis (Hech. 18:​2, 3; 20:34; Efes. 4:28). Ximochijchikaua nochipa kuali xitekipano uan xiktlami tekitl tlen tikpeualtia. Ijkon oksekimej kitaskej kuali titekipanoua uan non mitspaleuis tikpias  nochipa kanin titekipanos. Tlen yotimomachtijkej noijki mitspaleuis satepan xikchiua okseki tlamantli. Matikitakan tlen uelis tikchiuas.

14. ¿Tlen kipaleuis se telpochtli para okachi kitekichiuilis Jehová?

¹⁴ Uelis okachi tiktekichiuilis Jehová. Miakej tokniuan tlen kuali tlaneltokaj, omochijkej precursores ijkuak okatkaj telpochmej. Tla timochiuas precursor, tikmatis titekipanos inuan tokniuan tlen kipiaj tlatlamantli inyelis. Noijki tikmatis ken tikmaluis motomin (Filip. 4:​11-13). ¿Tleka amo timochiua precursor auxiliar? Non mitspaleuis satepan timochiuas precursor regular. Satepan uelis titlapaleuiti kanin kinchiuaj kalmej kanin timonechikouaj noso titlapaleuis Betel.

15, 16. ¿Tlen moneki kichiuas telpochtli tlen kineki tlapaleuis ken siervo ministerial noso tlayekanki?

¹⁵ Uelis titlapaleuis ken siervo ministerial noso tlayekanki. Nochtin tlakamej moneki mochijchikauaskej para uelis tlapaleuiskej ken tlayekankej. Biblia kijtoua akinmej kinekij kinpaleuiskej tokniuan ‘kinekij kichiuaskej se kuali tekitl’ (1 Tim. 3:1). Para uelis tlapaleuiskej ken tlayekankej moneki achto tlapaleuiskej ken siervos ministeriales. Siervos ministeriales sapanoua kinpaleuiaj tlayekankej. Tlayekankej uan siervos ministeriales kinpaleuiaj tokniuan porque yolyamankej uan pakij tetlapouiaj. Uelis tlapaleuiskej ken siervos ministeriales maski ok telpochmej. Se siervo ministerial uelis tlapaleuis ken tlayekanki ijkuak yikipia kanaj 20 xiuitl.

¹⁶ Biblia kijtoua tlen moneki kichiuaskej akinmej kinekij tlapaleuiskej ken siervos ministeriales uan tlayekankej. Nonmej principios bíblicos kiteititia Jehová techtlasojtla, kitlasojtla tofamilia uan noijki tokniuan (1 Tim. 3:​1-13; Tito 1:​6-9; 1 Ped. 5:​2, 3). Ximochijchikaua xikchiua tlen kijtoua Biblia uan xikilui Jehová mamitspaleui. c

17. ¿Tlen kipaleuis se telpochtli kuali makimalui isiua uan kuali makiyekana ifamilia? (Noijki xikita foto).

¹⁷ Xamo timonamiktis uan tikyekanas mofamilia. Sekimej tokniuan tlen kuali tlaneltokaj kijtouaj amo monamiktiskej ijkon ken Jesús okijto (Mat. 19:12). Pero tla timonamiktis moneki tikmaluis mosiua  uan tikyekanas mofamilia (1 Cor. 11:3). Jehová kineki xiktlasojtla mosiua, xikmaka tlen moneki, kuali mamomachili uan kuali mamouika iuan Jehová (Efes. 5:​28, 29). Axkan yotimomachtijkej tla kuali timokuayejyekoua, mitspaleuis tikmaluis mosiua. Noijki mitspaleuis kuali tikyekanas mofamilia tla tikintlakaita siuamej uan tla timochijchikaua tikchiuas tlen tikijtoua.

18. ¿Tlen kipaleuis se telpochtli mamomachti ken kinmiskaltis ikoneuan?

¹⁸ Xamo tikinpias mokoneuan. Tla timonamiktis xamo tikinpias mokoneuan. Tlen okichi Jehová uelis mitspaleuis kuali xikinmiskalti mokoneuan (Efes. 6:4). Jehová nochipa okilui Jesús kuali tlen okichiuaya uan okitlasojtlaya (Mar. 1:11). Tla tikinpias mokoneuan, ximochijchikaua nochipa xikinmilui tikintlasojtla uan xikinmilui kuali tlen kichiuaj. Tetajmej tlen kichiuaj ijkon ken Jehová kichiua, kinpaleuiaj inkoneuan okachi matlaneltokakan. ¿Tlen uelis tikchiuas axkan para satepan kuali tikinmiskaltis mokoneuan? Xikinmititi tikintlasojtla uan tikinpatioita mofamilia uan noijki tokniuan (Juan 15:9). Ijkon mitspatioitas Jehová, mofamilia uan tokniuan. Noijki mitspaleuis ijkuak timonamiktis uan ijkuak tikinpias mokoneuan.

19, 20. ¿Tlen moneki kichiuas se telpochtli para okachi tlaneltokas? (Xikinmita fotos tlen katej página 1).

¹⁹ Tla ok titelpochtli xikilnamikto moneki timochijchikauas para okachi titlaneltokas. Xikchiua ken akinmej kichiuaj tlen kuali, kuali ximokuayejyeko, xikchiua tlen mitsnauatiaj, ximomachti seki tlamantli uan ximoyektlali para kuali tiyetos satepan.

²⁰ Xamo timosotlauas ijkuak timokuayejyekos nochi tlen moneki tikchiuas. Pero ximoyolchikaua porque te uelis ijkon tikchiuas. Xikilnamikto Jehová kineki mitspaleuis (Is. 41:​10, 13). Noijki uelis mitspaleuiskej tokniuan tlen katej kanin timonechikoua. Ijkuak kuali timouikas iuan Jehová, tiyolpakis uan kuali kisas tlen tikchiuas. ¡Sapanoua timitstlasojtlaj! Tiknekij Jehová mamitsteochiua porque timochijchikaua okachi titlaneltokas (Prov. 22:4).