JEHOVÁ otechtliokoli miak tlamantli uan tiktlasojkamatiliaj porque techkauilia matikpejpenakan tlen tikchiuaskej ika non tlamantli. Ye otechtliokoli vino. Biblia kijtoua: “Kichiuaj pan para matipakikan uan vino para kuali matimomachilikan” (Ecl. 10:19; Sal. 104:15). Pero xamo yotikitakej miakej sapanoua konij alcohol. Nochtin tlatlamantli mokuayejyekouaj ijkuak kintlajtlaniaj kox uelis koniskej miak alcohol noso amo. Pero ¿ken moneki timokuayejyekoskej akinmej tikchiuaj ken Cristo?

Ijkuak tikpejpenaskej kox tikoniskej alcohol noso amo, achto moneki tikitaskej ken mokuayejyekoua toTajtsin Dios. Amo matikchiuakan tlen kichiuaj ik kanin tichantij noso kanin otechiskaltijkej. Ijkon okachi tipakiskej tla tikchiuaj ijkon ken kineki toTajtsin Dios.

Miakej sapanoua kinpaktia tlakoniskej uan nochipa ijkon kichiuaj. Sekimej tlakonij para kuali momachiliskej. Oksekimej ijkon kichiuaj para kilkauaskej tlen kinpanoua. Oksekimej yauij kanin miakej tlakonij para kiteititiskej katej chijchikauakej uan amikaj kinnauatia.

Pero toTajtsin Dios techpaleuia kuali matikpejpenakan tlen tikchiuaskej porque techtlasojtla. ITlajtol techiluia tlen techpanos tla sapanoua titlakonij. Proverbios 23:​29-35 kijtoua tlen okipanok akin sapanoua otlauanki. a Se tlayekanki tlen itoka Daniel uan chanti Europa okijto tlen okipanok ijkuak ayamo omochiuaya iTlaixpantijka Jehová. Ye okijto: “Sapanoua onitlakoniaya ikinon onikchiuaya miak tlamantli tlen amo kuali. Noijki onechpanok miak tlamantli tlen axkan sapanoua nechyolkokoua”.

¿Tlen techpaleuis kuali matikpejpenakan tlen tikchiuaskej para amo matitlajyouikan? Techpaleuis tla timokuayejyekouaj ken toTajtsin Dios mokuayejyekoua.

Matikitakan tlen techmachtia Biblia ijkuak tikpejpenaskej kox tikoniskej alcohol noso amo. Noijki tikitaskej tleka miakej konij alcohol.

Biblia amo kijtoua tlajtlakoli tikoniskej tepitsin alcohol. Kijtoua kuali timomachiliskej tla tikoniskej tepitsin vino. Ompa kijtoua: “Xikkua motlakual ika pakilistli uan xikoni movino ika yolpakilistli” (Ecl. 9:7). Biblia kijtoua Jesús uan oksekimej tlen okitekichiuiliayaj toTajtsin Dios okonikej vino (Mat. 26:​27-29; Luc. 7:34; 1 Tim. 5:23).

Matikilnamiktokan amo san se tlamantli kijtosneki tikoniskej alcohol uan titlauanaskej. Biblia kijtoua ‘amo matitlauanakan’ (Efes. 5:18). Noijki kijtoua: “Akinmej tlauanaj […] amo kiseliskej iTekiuajkayo toTajtsin Dios” (1 Cor. 6:10). Jehová amo kipaktia sapanoua matikonikan alcohol nion matitlauanakan. Ikinon timochijchikauaj timokuayejyekoskej ken toTajtsin Dios uan amo ijkon ken oksekimej tlen amo kitlakamatij.

Sekimej kijtouaj: “Ne nikoni miak alcohol uan amo niuinti”. Pero amo kuali mokuayejyekouaj akinmej ijkon kijtouaj. Biblia kijtoua tlakamej uan siuamej tlen konij miak vino uelis tlajtlakolchiuaskej uan ayakmo mouikaskej iuan Jehová (Tito 2:3; Prov. 20:1). Jesús okijto sekimej amo yetoskej itech  xochitlali porque sapanoua tlakonij (Luc. 21:​34-36). ¿Tlen uelis tikchiuaskej para amo titlakoniskej uan titlajyouiskej?

Yotimomachtijkej uelis titlajyouiskej tla titlakoniskej ijkon ken kichiuaj akinmej amo kitlakamatij Jehová. Ikinon timochijchikauaj tikyolpaktiskej Jehová ijkuak titlakuaj uan ijkuak itlaj tikonij. Biblia techiluia: “Tla itlaj nankonij noso nankichiuaj okseki tlamantli, nochi xikchiuakan para nankiueyichiuaskej toTajtsin Dios” (1 Cor. 10:31). Matikitakan tlen uelis timotlajtlaniskej uan tlen principios bíblicos moneki tikinmilnamiktoskej ijkuak tikoniskej alcohol.

¿Tikonij alcohol porque amo tiknekij matechpinauikan? Éxodo 23:2 kijtoua amo matikchiuakan ijkon ken oksekimej. Jehová okinmilui israelitas amo makichiuakan ijkon ken akinmej okichiuayaj tlen amo kuali. Noijki techpaleuia tlen okinmilui. Tla peuas timokuayejyekoskej uan tikchiuaskej ijkon ken oksekimej, xamo satepan ayakmo tiktlakamatiskej Jehová uan ayakmo iuan timouikaskej (Rom. 12:2).

¿Tikonij alcohol para tikteititiskej tichikauakej? Miakej ayakmo itlaj kijtouaj ijkuak kinmitaj oksekimej sapanoua tlakonij noso tlauanaj (1 Ped. 4:3). Matikitakan tlen kijtoua 1 Corintios 16:13. Ompa kijtoua: “Xiijsatokan, nochipa xitlaneltokakan, xiyetokan nanyolchikauakej uan xiyetokan nanchikauakej”. Kuali tikmatij akinmej konij alcohol amo mochiuaj okachi chijchikauakej. Amo kuali mokuayejyekouaj ikinon amo kuali kipejpenaj tlen kichiuaskej. Akinmej tlakonij kiteititiaj amo ixtlamatkej uan amo chikauakej. Isaías 28:7 kijtoua akin sapanoua tlakoni amo kuali kipejpena tlen kichiuas, moikxitlanuia uan kineki uetsis.

Moneki matikiluikan Jehová matechpaleui okachi matikneltokakan uan matiijsatokan para tikchiuaskej tlen kuali (Sal. 18:32). Ikinon moneki tiijsatoskej uan amo tikchiuaskej itlaj tlen uelis kichiuas ayakmo matimouikakan iuan Jehová. Jesús kuali omouikaya iuan Jehová ikinon miakej okitlakaitayaj porque okatka chikauak uan amo omomojtiaya.

 ¿Tikonij alcohol para tikilkauaskej tlen techpanoua? Se salmista okilui Jehová: “Ijkuak opejki sapanoua nimotekipachoua, te otechyolchika uan otechyolseui” (Sal. 94:19). Tla itlaj techtekipachoua matikiluikan Jehová matechpaleui uan amo matimokuayejyekokan okachi kuali timomachiliskej tla titlakoniskej. Ikinon moneki nochipa matimotlatlaujtikan. Noijki techpaleuis tla tikiluiskej se tokni tlen kipia chikauak itlaneltokilis. Matikilnamikikan amo tikilkauaskej tlen techpanotok tla titlakoniskej uan ayakmo tikchiuaskej tlen kuali (Os. 4:11). Daniel tlen yotechilui tlen okipanok, okijto: “San onimotekipachouaya uan onimoyolkokouaya ikinon opejki nitlakoni. Pero non amo onechpaleui porque opejki okachi nitlajyouia, ayakmo onikinpiaya noyolikniuan uan onikmachiliaya amitlaj nopati”. ¿Tlen okipaleui Daniel? Ye okijto: “Onikajsikamatki omonekiaya nikiluis Jehová manechpaleui uan ayakmo nitlakoniskia. Ye onechpaleui manikixnamiki tlen onechpanotoka uan ijkon onikchi”. Matikilnamiktokan Jehová nochipa techpaleuis maski timokuayejyekoskej amo keman tikpatlaskej tlen techpanotok (Filip. 4:​6, 7; 1 Ped. 5:7).

Tla tejuatsin ualeua tikoni alcohol, ximotlajtlani: “¿Yonechilui se nofamiliar noso se noyolikni kitekipachoua nikoni miak alcohol?”. Xamo non kiteititia yitikoni miak alcohol uan amo tikita yititlauana. “¿Axkan okachi nitlakoni?”. Tla okachi titlakoni satepan okachi tiknekis titlauanas. “¿San nikneki nikonitos alcohol?”. Non kiteititia yimitspaktia titlakonis. Ikinon xamo moneki tikitati se tepajti mamitspaleui ayakmo xitlakoni.

Sekimej tokniuan amo konij nion tepitsin alcohol porque amo kinekij moouijtiliskej. Oksekimej tokniuan amo konij alcohol porque amo kiueliliaj. Tla se tokni amo koni alcohol amo matikteneuakan uan matiktlakaitakan.

Oksekimej tokniuan yokijtojkej san tepitsin koniskej alcohol. Xamo yokijtojkej keman koniskej alcohol uan san tepitsin  koniskej ijkuak tlakuaskej noso san tepitsin koniskej se uelta se semana. Sekimej kipejpenaj tlen alcohol koniskej. Xamo kijtouaj koniskej san tepitsin vino noso cerveza pero amo konij tlen kipia miak alcohol maski kineloskej iuan okseki tlamantli. Tla tikilnamiktokej amo moneki tikoniskej miak alcohol, non techpaleuis amo matitlakonikan miak. Ijkon tikteititiskej tikpiaj chikauak totlaneltokilis uan amo tipinauaskej ijkuak techpinauiskej oksekimej.

Noijki moneki timokuayejyekoskej tlen kijtoskej oksekimej tla tikonij alcohol. Romanos 14:21 kijtoua: “Amo matikkuakan nakatl, amo matikonikan vino nion amo matikchiuakan okseki tlamantli tlen kichiuas mamokxitlanui se tokni”. Non kijtosneki amo matikchiuakan san tlen tejuan techpaktia uan matikteititikan titetlasojtlaj. Amo matikonikan alcohol tla tikitaj se tokni amo kipaktia. Ijkon tikteititiskej tikintlasojtlaj tokniuan uan tikintlakaitaj. Noijki tikteititiskej amo san tikchiuaj tlen tejuan techpaktia (1 Cor. 10:24).

Noijki akinmej tikchiuaj ken Cristo tikintlakamatij tlanauatilmej tlen tekiuajkej kintlaliaj kanin kijtouaj tlen techpanos tla titlakonij. Seki tlanauatilmej kijtouaj amo makonikan alcohol akinmej ayamo kajxitiaj xiuitl para tlakoniskej. Noijki amo makonikan alcohol akinmej kiuikaj se carro noso kintekipanoltiaj máquinas kanin tekipanouaj (Rom. 13:​1-5).

Jehová techkauilia matikpejpenakan tlen tikchiuaskej ika tlen yotechtliokoli. Tinochtin uelis tikpejpenaskej tlen tikkuaskej uan tlen tikoniskej. Nochipa kuali matikpejpenakan tlen tikchiuaskej uan ijkon Jehová kitas tiknekij tikyolpaktiskej.