1. ¿Tleka tikijtouaj melauak mochiuaskia tlen Abrahán okichiaya?

 JEHOVÁ okilui Abrahán kipiaskia se ikone uan ijkon kinteochiuaskia okseki altepemej (Gén. 15:5; 22:18). Abrahán okineltokaya mochiuas tlen okiluijkej porque okineltokaya toTajtsin Dios. Pero ijkuak Abrahán yokipiaya cien xiuitl uan isiua 90 xiuitl ayamo okipiayaj se konetl (Gén. 21:​1-7). Pero Biblia kijtoua: “Abrahán okichiaya uan okineltokaya yetos tepapa itech miakej altepemej maski omotaya amo ijkon panoskia. Ye okineltokak tlen toTajtsin Dios okilui” (Rom. 4:18). Tlen okichiaya melauak ijkon opanok. Abrahán uan Sara okipixkej inkonetsin tlen okitokayotijkej Isaac. ¿Tleka Abrahán okineltokaya Jehová melauak kichiuaskia tlen okilui?

2. ¿Tleka Abrahán okineltokaya melauak mochiuaskia tlen okilui Jehová?

² Abrahán kuali okixmatiaya Jehová ikinon “okineltokak ika nochi iyolo [...] uelis kichiuaskia tlen okilui” (Rom. 4:21). Jehová okitak Abrahán okatka yolkuali uan okiseli porque otlaneltokaya (Sant. 2:23). Romanos 4:18 kijtoua Abrahán okimatiaya mochiuas tlen okichiaya porque otlaneltokaya. Axkan matikitakan tlen okijto Apóstol Pablo itech Romanos capítulo 5 ijkuak okijto matikchiakan mamochiua tlen tikchiaj.

3. ¿Tlen okiyekijto Pablo?

³ Pablo okiyekijto “tejuan melauak tikneltokaj tlen  tikchiaj” (Rom. 5:5). Noijki otechpaleui matikajsikamatikan uelis okachi tikneltokaskej mochiuas tlen tikchiaj. Axkan tikitaskej tlen kijtoua Romanos 5:​1-5 ikinon matimokuayejyekokan tlen techpaleuis okachi matikneltokakan tlen tikchiaj. Tlen axkan timomachtiskej okachi techpaleuis matikneltokakan tlen tikchiaj. Achto matikitakan tlen okijto Pablo. Ye okijto kualtsin tlen tikchiaj uan amo san nenka tikchiaskej.

4. ¿Tlen kijtosneki tlen kijtoua Romanos 5:​1, 2?

⁴ (Xiktlajtolti Romanos 5:​1, 2). Pablo okintlajkuilili tokniuan tlen omonechikouayaj Roma. Yejuan yokixmatiayaj Jehová uan okimatiayaj akin Jesús, otlaneltokayaj uan okichiuayaj ken Cristo. Ikinon toTajtsin Dios okinmitaya yolkualmej porque otlaneltokayaj uan okinpejpenki ika iespíritu santo. Desde ijkuakon yokimatiayaj melauak mochiuas tlen okinmiluijkej.

5. ¿Tlen kichiaj tlapejpenalmej?

⁵ Pablo okinmilui tlapejpenalmej tlen okatkaj Éfeso ken mochiuaskia tlen okichiayaj. Okinyekilui kiseliskiaj se “kualtsin tlateochiuali [...] akinmej yolchipauakej” (Efes. 1:18). Noijki tokniuan tlen okatkaj Colosas okinmilui kanin kiseliskiaj tlen okichiayaj. Okinmilui kinmakaskiaj ‘intetliokolil ompa iluikak’ (Col. 1:​4, 5). Ikinon tokniuan tlapejpenalmej kinyolitiskej, nochipa chantiskej iluikak uan ompa tlanauatiskej iuan Cristo (1 Tes. 4:​13-17; Apoc. 20:6).

6. ¿Tlen okijto se tokni tlen yas iluikak?

⁶ Tlapejpenalmej kipatioitaj ika nochi inyolo tlen kichiaj. Matikitakan tleka ijkon tikijtouaj. Itech xiuitl 1991 tokni Frederick Franz ijkin okijto: “Melauak mochiuas tlen tikchiaj. Tinochtin  144,000 tikneltokaj tikseliskej tlen toTajtsin Dios yotechilui techmakas. Sapanoua miak ipati tlen tikseliskej”. Tokni Frederick Franz okitekichiuili miak xiuitl toTajtsin Dios. Ye okijto: “Tejuan amo tikijtouaj amo tikpatioitaj tlen tikchiaj. Ijkuak panoti xiuitl tejuan okachi tikpatioitaj. Miak ipati matikchiakan tlen tikseliskej maski moneki timochiaskej miak xiuitl. Axkan okachi nikpatioita tlen nikselis”.

7, 8. ¿Tlen kiseliskej akinmej kitekichiuiliaj toTajtsin Dios? (Romanos 8:​20, 21).

⁷ Miakej tlen kitekichiuiliaj Jehová kichiaj kiseliskej okse tlamantli. Yejuan kichiaj chantiskej nochipa ipan tlaltikpak uan makinnauati iTekiuajkayo toTajtsin Dios ijkon ken Abrahán okichiaya (Heb. 11:​8-10, 13). Pablo noijki okijkuilo kualtsin tlen tikchiaj (xiktlajtolti Romanos 8:​20, 21). ¿Tlen okachi omitspakti ijkuak opejki timomachtia Biblia? ¿Omitspakti tikmatis se tonal ayakmo tiyetos titlajtlakole? ¿Omitspakti ijkuak otikmatki kinyolitiskej akinmej yoixpolikej uan chantiskej itech xochitlali? ToTajtsin Dios yokijto kualtsin tlen tikchiaj uan sapanoua tiyolpakiskej ijkuak mochiuas.

⁸ Tinochtin tiyolpakij tikseliskej tlen tikchiaj maski tiaskej iluikak noso timokauaskej tlaltikpak. Mojmostla uelis okachi tikneltokaskej mochiuas tlen tikchiaj. ¿Ken uelis ijkon tikchiuaskej? Moneki matikitakan okseki tlamantli tlen okijto Pablo. Tlen okijto okachi techpaleuis matikneltokakan mochiuas tlen tikchiaj uan amo san nenka tikchiaskej.

9, 10. ¿Tlen okijto Pablo techpanos ijkon ken ye okipanok? (Romanos 5:3). (Noijki xikinmita fotos).

⁹ (Xiktlajtolti Romanos 5:3). Pablo okijto ijkuak titlajyouiaj okachi  tikneltokaj mochiuas tlen tikchiaj. Tinochtin akinmej tikchiuaj ken Cristo tikmatij titlajyouiskej. Matimokuayejyekokan tlen okinmilui Pablo tokniuan tlen okatkaj Tesalónica. Ye okinmilui: “Ijkuak namouan otikatkaj, yotimechiluijkaj titlajyouiskiaj uan namejuan nankimatij ijkon panotok” (1 Tes. 3:4). Tokniuan tlen okatkaj Corinto okinmijkuilili: “Tiknekij xikmatikan tlen ouijkayotl otikpixkej [...] uan otikijtouayaj yitiixpoliuiskiaj” (2 Cor. 1:8; 11:​23-27).

¹⁰ Tlen okijto Pablo axkan noijki ijkon techpanoua (2 Tim. 3:12). ¿Tlen yotikixnamik ijkuak opejki tikchiua ken Cristo? Xamo yomitspinauijkej moyolikniuan, mofamiliares noso itlaj yomitstoktijkej. ¿Titlajyouia kanin titekipanoua porque amo titlakajkayaua? (Heb. 13:18). ¿Yomitstlajyouiltijkej tekiuajkej porque tikintlapouia oksekimej tlen tikchia tikselis? Pablo okijto matipakikan maski san tlen tlamantli tikixnamikiskej. ¿Tleka ijkon okijto?

11. ¿Tleka moneki matitlaxikokan?

¹¹ Tipakij ijkuak titlajyouiaj porque techpaleuia matikchiuakan itlaj miak ipati. Romanos 5:3 kijtoua: “Ijkuak titlajyouiaj [...] techmachtia matitlaxikokan”. Tinochtin moneki titlaxikoskej porque tikixnamikij miak tlamantli oui. Tikseliskej tlen tikchiaj tla titlaxikouaj. Tejuan amo tiknekij tiyetoskej ijkon ken semilla tlen uetsi kanin teyo ijkon ken okijto Jesús. Yejuan ‘kikakij iTlajtol toTajtsin Dios uan san niman kineltokaj ika pakilistli’. Pero ‘ayakmo tlaneltokaj ijkuak kixnamikij ouijkayotl nion ijkuak kintlajyouiltiaj’ (Mat. 13:​5, 6, 20, 21). Amikaj kipaktia makitlajyouiltikan nion kixnamikis itlaj oui pero techpaleuis tla titlaxikouaj. Matikitakan tleka ijkon tikijtouaj.

12. ¿Ken techpaleuis tla titlaxikouaj?

¹² Discípulo Santiago okijto ken techpaleuia titlaxikoskej. Ye okijkuilo: “Pero tla nochipa nantlaxikoskej, ayakmo nankipiaskej tlajtlakoli, amo nankipiaskej itlaj amo kuali uan amitlaj namechpolos” (Sant. 1:​2-4). Techpaleuis itlaj matikchiuakan tla titlaxikouaj. Techpaleuis matikmatikan timochiaskej, okachi matitlaneltokakan uan okachi matimouikakan iuan toTajtsin Dios. Noijki tla titlaxikouaj techpaleuis matikchiuakan okse tlamantli.

13, 14. ¿Tlen panoua ijkuak titlaxikouaj uan ken techpaleuia? (Romanos 5:4).

¹³ (Xiktlajtolti Romanos 5:4). Pablo okijto: “ToTajtsin Dios techselia ijkuak titlaxikouaj”. Non amo kijtosneki Jehová paki ijkuak titlajyouiaj. Ye paki porque titlaxikouaj. Techyolchikaua tikmatij uelis tikyolpaktiskej Jehová tla amo tikkauaj uan titlaxikouaj (Sal. 5:12).

¹⁴ Matimokuayejyekokan tlen okichi Abrahán. Ye otlaxiko ikinon toTajtsin Dios okiseli. Jehová omouikaya iuan Abrahán uan okitak okatka yolkuali (Gén. 15:6; Rom. 4:​13, 22). Tejuan noijki uelis techitas tiyolkualmej toTajtsin Dios uan techselis tla amo keman tikkauaj uan titlaxikouaj. Ye amo techselis san porque tiktekichiuiliaj miak noso tikpiaj miak tekitl itech tlanechikol. Uelis techselis maski tikpiaskej miak xiuitl noso amo, maski itlaj  mopatlas itech tonemilis uan maski san tlen tlamantli tikmatiskej tikchiuaskej. ¿Tikixnamikij itlaj oui? Matikilnamiktokan Jehová techselis tla titlaxikouaj. Ijkuak tikmatij tikyolpaktiaj Jehová, techpaleuia okachi matikneltokakan mochiuas tlen tikchiaj.

15. ¿Tlen okse tlamantli okijto Pablo uan tlen uelis timotlajtlaniskej?

¹⁵ Axkan yotikitakej Pablo okijto toTajtsin Dios techselis tla titlaxikouaj. Matikitakan okse tlamantli tlen okijto: “Ijkuak toTajtsin Dios techselia, okachi tikchiaj tlen satepan tikseliskej. Tejuan melauak tikneltokaj tlen tikchiaj” (Rom. 5:​4, 5). Itech Romanos 5:2 Pablo yokijtojka tokniuan tlen okatkaj Roma ‘okichiayaj makinueyitlali toTajtsin Dios’. Xamo timotlajtlaniaj: “¿Tleka Pablo oksepa okijto tlen okichiayaj nonmej tokniuan tla yejuan yokimatiayaj tlen kiseliskiaj?”.

16. Xikijto ken uelis okachi tikneltokaskej mochiuas tlen tikchiaj. (Noijki xikinmita fotos).

¹⁶ Uelis tikajsikamatiskej tlen okijto Pablo tla tikilnamiktokej uelis okachi tikneltokaskej mochiuas tlen tikchiaj. Matikitakan tleka ijkon tikijtouaj. Matikilnamikikan ijkuak ikaj otechtlapoui uelis nochipa tiyoltoskej ipan tlaltikpak, xamo otikijtojkej sapanoua kualtsin yetoskia pero amo san niman otikneltokakej. Pero okachi otikneltokakej melauak ijkon mochiuas ijkuak okachi otikixmatkej Jehová uan tlen kijtoua Biblia.

17. ¿Ken okachi tikneltokaj mochiuas tlen Jehová yokijto maski yotimoapolaktijkej?

¹⁷ Maski yotimoapolaktijkej uelis okachi tikneltokaskej mochiuas tlen tikchiaj. Porque yotimomachtijkej miak tlamantli uan okachi tikpiaj chikauak totlaneltokilis (Heb. 5:​13–6:1). Xamo yotechpanok ijkon ken kijtoua Romanos  5:​2-4. Porque yotikitakej Jehová techselia maski tikixnamikij seki tlamantli oui. Okachi tikneltokaj Jehová kichiuas tlen yokijto porque techtlasojtla uan kipaktia tlen tikchiuaj. Axkan okachi tikneltokaj mochiuas tlen Jehová yokijto kichiuas. Non techpaleuia kuali matimouikakan iuan tofamilia, kuali matikpejpenakan tlen tikchiuaskej uan amo matimotonalpolokan.

18. ¿Tleka tikneltokaj melauak mochiuas tlen Jehová yokijto kichiuas?

¹⁸ Pablo okijto okachi tikneltokaj mochiuas tlen tikchiaj ijkuak tikmatij toTajtsin Dios techselia. Pero noijki okijto okse tlamantli miak ipati. Ye okijto melauak mochiuas tlen tikchiaj tikseliskej. ¿Tleka ijkon okijto? Porque Pablo okijto nin tlamantli ipatka toTajtsin Dios: “Tejuan melauak tikneltokaj tlen tikchiaj, porque toTajtsin Dios techmaka iespíritu santo uan ijkon kiteititia techtlasojtla” (Rom. 5:5). Ikinon tikneltokaj melauak mochiuas tlen tikchiaj tikseliskej.

19. ¿Tlen tikneltokaj tikseliskej?

¹⁹ Matikilnamiktokan tlen okichi Abrahán. Jehová okilui kiteochiuaskia, okiseli uan kuali iuan omouikaya. Omochi tlen Abrahán okichiaya. Biblia kijtoua: “Abrahán omochixki uan satepan okiseli tlen okiluijkej” (Heb. 6:15; 11:​9, 18; Rom. 4:​20-22). Tejuan noijki tikseliskej tlen tikchiaj ijkon ken Abrahán okichi tla amo tikkauaj Jehová uan tla tikmatokej amo san nenka tlen tikchiaj. Non kichiua matipakikan porque melauak mochiuas (Rom. 12:12). Pablo okijkuilo: “ToTajtsin Dios tlen techpaleuia matimochiakan, manamechpaleui xipakikan uan xikpiakan yolseuilistli porque nankineltokaj. Ijkon espíritu santo namechpaleuis ximochiakan ika nochi namoyolo” (Rom. 15:13).