1, 2. ¿Tleka ualeua tichokaj?

 XAMO yisetonal otichokakej. Ualeua tichokaj porque tipakij uan xamo ijkon otechpanok ijkuak oneski se konetl. Noijki tichokaj ijkuak tikilnamikij itlaj kualtsin otechpanok noso otichokakej porque otikitakej se toyolikni tlen yikipia miak xiuitl amo otikitayaj.

² Pero okachi tichokaj porque titlajyouiaj. Tichokaj porque ikaj otechyolkoko, timokokouaj noso oixpoliuik akin otiktlasojtlayaj. Xamo timomachiliaj ijkon ken Jeremías omomachili ijkuak babilonios okipojpolojkej Jerusalén. Ye okijto: “Itech noixtololouan kisa miak atl […]. Noixtololouan nochipa chokaskej uan amo keman moseuiskej” (Lam. 3:​48, 49).

3. ¿Ken momachilia Jehová ijkuak kita titlajyouiaj? (Isaías 63:9).

³ Jehová kimati keski uelta yotichokakej. ITlajtol kijtoua ye kimati tlen tikijyouiaj uan techkaki ijkuak tikiluiaj matechpaleui (Sal. 34:15). Pero ye amo san techita uan techkaki. Ye kitekipachoua tlen techpanoua uan moyolkokoua ijkuak techitaj tichokaj. Ijkon momachilia porque  ye toTajtsin uan techtlasojtla. Ikinon san niman techpaleuia (xiktlajtolti Isaías 63:9).

4. ¿Tlen tikitaskej uan tlen techmachtia Jehová?

⁴ Biblia kijtoua tlen okichi Jehová ijkuak okitak ochokayaj akinmej okitekichiuiliayaj. Matikitakan tlen okinpanok Ana, David uan tekiua Ezequías. ¿Tleka yejuan ochokakej? ¿Ken okinpaleui Jehová? ¿Ken techpaleuia tlen okinpanok ijkuak tichokaj porque timoyolkokouaj, ijkuak ikaj techkajkayauaj noso ijkuak amo tikmatij tlen tikchiuaskej?

UALEUA TICHOKAJ PORQUE TIMOYOLKOKOUAJ

5. ¿Tlen okipanok Ana?

⁵ Ana sapanoua otlajyoui uan ochokak miak. Inamik okipiaya okse isiua tlen omotokayotiaya Peniná. Non siuatl okitlauelitaya Ana uan okitlajyouiltiaya. Peniná okinpiaya miakej ikoneuan pero Ana amo ueli okinpiaya (1 Sam. 1:​1, 2). Ikinon Peniná okipinauiaya Ana. ¿Ken timomachiliskiaj tla ijkon techtoktiskiaj? Ana “sapanoua omoyolkokouaya”, “ochokaya” uan “ayakmo otlakuaya” (1 Sam. 1:​6, 7, 10).

6. ¿Tlen okipaleui Ana?

⁶ ¿Tlen okipaleui Ana? Ye oyajki kanin okatka tabernáculo kanin okiueyichiuayaj Jehová. Ijkuak oajsito ik kaltempa, ye “okitlatlaujti Jehová porque sapanoua omoyolkokouaya uan ochokaya”. Okitlatlaujti toTajtsin Dios uan okilui makita ken otlajyouiaya (1 Sam. 1:10b, 11). Ana okilui Jehová nochi tlen okipanotoka. ¿Timokuayejyekouaj ken omomachili Jehová ijkuak okitak Ana otlajyouijtoka?

7. ¿Ken omomachili Ana ijkuak okilui Jehová nochi tlen okitekipachouaya?

⁷ ¿Ken omomachili Ana ijkuak okilui Jehová nochi tlen okitekipachouaya uan ken okiyolseui teopixki Elí? Biblia kijtoua: “Oyajki uan opejki tlakua uan ayakmo omotaya itlaj okitekipachouaya” (1 Sam. 1:​17, 18). Ana omoyolseui maski ok otlajyouijtoka. Ye okika imak Jehová nochi tlen okitekipachouaya. Jehová okitak ken otlajyouiaya, okikak ijkuak okitlatlaujti uan okiteochi porque opejki kinpia ikoneuan (1 Sam. 1:​19, 20; 2:21).

8, 9. ¿Tleka miak ipati matimonechikokan ijkon ken kijtoua Hebreos 10:​24, 25? (Noijki xikita foto).

⁸ ¿Tlen techmachtia tlen okichi Ana? Xamo tichokaj porque itlaj otechpanok. Xamo tichokaj porque oixpoliuik se tofamiliar noso se toyolikni. Ikinon amo tiknekij ikaj matechkuejso. Pero matikilnamiktokan tlen okichi Ana. Ye oyajki kanin okatka tabernáculo uan Jehová ompa  okiyolchika. Tejuan noijki techyolchikauas Jehová tla timonechikouaj maski timoyolkokouaj uan amo toyolika (xiktlajtolti Hebreos 10:​24, 25). Ompa techintlajtoltiliaj textos tlen techyolchikauaj uan ijkon Jehová techpaleuia ayakmo matimokuayejyekokan tlen amo kuali. Kuali timomachiliskej maski amo san niman moyektlalis tlen techpanotok.

⁹ Ijkuak timonechikouaj, kuali timomachiliaj porque tokniuan techyolchikauaj uan techtlasojtlaj (1 Tes. 5:​11, 14). Matikitakan tlen okijto se precursor especial tlen oixpoliuik isiua. Okijto: “Ok nikchokilia nosiua. Ikinon ualeua nikneki noselti niyetos porque sapanoua nichoka. Pero ijkuak nimonechikoua nechpaleuia amo san manimoyolkokojto. Nechyolseuia tlen tlanankiliaj tokniuan uan tlen nechiluiaj. Sapanoua nimoyolkokoua ijkuak niajsiti kanin timonechikouaj pero satepan kuali nimomachilia”. Jehová techyolchikaua ijkuak timonechikouaj porque kinyolinia tokniuan matechpaleuikan.

10. ¿Ken uelis tikchiuaskej ijkon ken Ana okichi ijkuak sapanoua timoyolkokoskej?

¹⁰ Ana kuali omomachili ijkuak okilui Jehová tlen okipanotoka. Noijki uelis tikchiuaskej tlen kijtoua 1 Pedro 5:7 uan matikiluikan Jehová nochi tlen techtekipachoua uan ye techkakis. Matikitakan tlen okipanok se tokni. Sekimej ichtekej okimiktijkej inamik. Ye okijto: “Sapanoua onimoyolkoko uan onikmachiliaya ayakmo keman kuali niyetoskia”. ¿Tlen okipaleui tokni? Ye okijto: “Oniktlatlaujti toTajtsin Dios uan onikmachiliaya ken onechyolseuiaya ijkuak oniktlatlaujtiaya. Ualeua amo onikmatiaya ken nikyekiluis tlen onechpanouaya pero ye onechajsikamatiaya. Onikiluiaya manechyolseui ijkuak sapanoua onimoyolkokouaya uan ijkuak amo onikmatiaya tlen nikchiuas. San niman onimoyolseuiaya uan onimoyolchikauaya”. Ijkuak tikiluiaj Jehová tlen techpanoua, ye kajsikamati tlen tikmachiliaj uan tlen techyolkokoua. Jehová techyolseuis maski amo san niman moyektlalis tlen techpanotok (Sal. 94:19; Filip. 4:​6, 7). Noijki techteochiuas tla titlaxikouaj (Heb. 11:6).

UALEUA TICHOKAJ PORQUE IKAJ TECHKAJKAYAUA

11. ¿Ken omomachili David ijkuak oksekimej okikokoliayaj?

¹¹ David okixnamik miak tlamantli ikinon noijki ochokak miak. Okikokoliayaj ifamiliares, iyolikniuan uan oksekimej. Sekimej okikajkayajkej uan okinekiayaj kimiktiskej (1 Sam. 19:​10, 11; 2 Sam. 15:​10-14, 30). Se tonal okijkuilo: “Yonisotlauak porque san nimoyolkokojtok; nochi youak sapanoua nichoka; ijkuak nichoka hasta siaua notlapech”. Ijkon omomachiliaya porque miakej okikokoliayaj (Sal. 6:​6, 7). Sapanoua okitlajyouiltijkej David ikinon ochokaya.

12. ¿Tlen okineltokaya David ijkon ken kijtoua Salmo 56:8?

¹² David okimatiaya Jehová okitlasojtlaya maski otlajyouiaya. Okijto Jehová okikakiaya ijkuak ochokaya (Sal. 6:8). Ye okijkuilo itlaj miak ipati tlen moajsi itech Salmo 56:8 (xiktlajtolti). Non kualtsin tlajtoli kiteititia Jehová techtlasojtla uan kitekipachoua ken timomachiliaj.  David okijto Jehová yetoskia ken kinechikoua toixayo itech kontsin tlen chijchitok ika kuetlaxtli noso yetoskia ken ijkuilitok itech se amochtli. Ye okineltokaya toTajtsin Dios okimatiaya tlen okijyouiaya uan noijki okilnamiktoka. Noijki okilnamiktoka Jehová okimatiaya ken omomachiliaya uan amo san okimatiaya tlen okixnamikiaya.

13. ¿Tlen techyolchikauas tla ikaj otechkajkaya noso ikaj otechyolkoko? (Noijki xikita foto).

¹³ ¿Tlen techmachtia tlen okichi David? Xamo otechyolkoko akin tiktlasojtlaj noso ikaj otechkajkaya. Ikaj uelis moyolkokos porque isiua noso inamik ayakmo iuan kajki noso ayakmo kipia inovia noso inovio. Noijki xamo timoyolkokouaj porque akin tiktlasojtlaj ayakmo kitekichiuilia Jehová. Matikitakan ken omomachili se tokni tlen isiua okikajkaya uan okikajte. Ye okijto: “Amo keman onimokuayejyekouaya ijkon nechpanoskia. Onikmachiliaya amitlaj nopati, onimoyolkokouaya uan onikualaniaya”. ¿Tlen techyolchikauas tla ikaj otechkajkaya noso ikaj otechyolkoko? Matikilnamiktokan Jehová amo keman techkauas toselti. Tokni okijto: “Onikajsikamatki Jehová amo keman techkauas toselti maski oksekimej techkauaskej. Jehová yetoskia ken se tepejxitl kanin uelis timopaleuiskej maski san tlen techpanos porque ye amo kinkaua inselti akinmej kitekichiuiliaj” (Sal. 37:28). Matikilnamiktokan san Jehová okachi techtlasojtla. Xamo otechtoktijkej miak tlamantli pero non amo kijtosneki Jehová amo techtlasojtla (Rom. 8:​38, 39). Jehová techtlasojtla maski oksekimej techtlajyouiltiaj.

14. ¿Tlen techiluia Salmo 34:18?

¹⁴ Tla ikaj otechkajkaya, techyolchikauas tlen okijkuilo David itech Salmo 34:18 (xiktlajtolti). Se amochtli kijtoua tlajtoli “akinmej sapanoua moyolkokouaj” noijki uelis motlajtolkopas ken “amo kichiaj makinpano tlen kuali”. ¿Ken kinpaleuia Jehová akinmej ijkon momachiliaj? Non texto noijki kijtoua Jehová kajki inuan akinmej moyolkokouaj porque ikaj okinkajkaya noso ikaj okinyolkoko. Jehová yetoskia ken se teta tlen kinapaloua ichokotsin ijkuak choka uan kiyolseuia. Ye kimachilia tlen tikijyouiaj uan san niman techpaleuia. Techyolseuia uan techpaleuia ayakmo matimomachilikan amitlaj topati. Noijki techiluia ye techmakas miak tlamantli  satepan uan non techpaleuia matikxikokan nochi tlen techpanoua (Is. 65:17).

UALEUA TICHOKAJ PORQUE AMO TIKMATIJ TLEN TIKCHIUASKEJ

15. ¿Tleka tekiua Ezequías ochokak miak?

¹⁵ Tekiua Ezequías tlen otlanauatiaya Judá sapanoua omokoko ijkuak okipiaya 39 xiuitl. Jehová okilui profeta Isaías makilui tekiua Ezequías mikiskia porque sapanoua omokokouaya (2 Rey. 20:1). Omotaya Ezequías amo keman pajtiskia. Sapanoua ochokak ijkuak okimatki tlen kipanoskia uan san niman okitlatlaujti Jehová makipaleui (2 Rey. 20:​2, 3).

16. ¿Ken omomachili Jehová ijkuak Ezequías okitlatlaujti uan ken okipaleui ijkuak okitak ochokaya?

¹⁶ Jehová okikak ijkuak Ezequías okitlatlaujti makipaleui uan okitak ken ochokaya. Ikinon okiknomatki uan okilui Isaías makiluiti: “Onikkak ken otimotlatlaujti uan ken yotichokak. Nimitspajtis”. Jehová okiknomatki Ezequías ijkuak okilui amo san niman ixpoliuiskia. Noijki okilui kinmakixtiskia israelitas inmak asirios (2 Rey. 20:​4-6).

17. ¿Ken techpaleuia Jehová ijkuak timokokouaj maski tikitaj amo keman tipajtiskej? (Salmo 41:3; noijki xikita foto).

¹⁷ ¿Tlen techmachtia tlen okichi Ezequías? ¿Tlen tikchiuaskej tla timokokouaj uan mota amo keman tipajtiskej? Matikiluikan Jehová tlen techpanoua maski tichokaskej. Biblia kijtoua: “Ye toTajtsin Dios tlen sapanoua techiknomati uan nochipa techyolseuia” ijkuak titlajyouiaj (2 Cor. 1:​3, 4). Pero non amo kijtosneki Jehová san niman kiyektlalis tlen techpanotok. Ye techpaleuis matikxikokan tlen techpanotok (xiktlajtolti Salmo 41:3). Techpaleuia ika espíritu santo, techmaka chikaualistli, techpaleuia matiyetokan tiixtlamatkej uan techyolseuia (Prov. 18:14; Filip. 4:13). Noijki techiluia kachiuas nochi kokolistli (Is. 33:24).

18. ¿Tlen texto yomitspaleui ijkuak itlaj otikixnamik? (Xikita recuadro “ Textos tlen techyolchikauaj ijkuak tichokaj”).

¹⁸ Ezequías okiyolchika tlen okilui Jehová. ToTajtsin Dios noijki techyolseuia ika iTlajtol. Otlanauati makijkuilokan tlen techpaleuiskia ijkuak itlaj tikixnamikiskiaj (Rom. 15:4). Matikitakan tlen okipaleui se tokni tlen chanti África Occidental. Ye sapanoua ochokaya porque okiluijkej okipiaya cáncer. Ye okijto: “Sapanoua nechyolchikaua tlen kijtoua Isaías 26:3. Amo tikmatij tlen uelis techpanos pero nin texto techmachtia Jehová techyolseuis ijkuak itlaj tikixnamikiskej”.  ¿Tikilnamikij se texto tlen otechyolchika ijkuak amo otikmatiayaj tlen tikchiuaskej?

19. ¿Tlen kichiuas Jehová satepan?

¹⁹ Axkan okachi titlajyouiaj uan tichokaj porque tikatej itlamian tonalmej. Jehová kita ijkuak tichokaj uan timoyolkokouaj. Ijkon tikijtouaj porque okitak ken omomachiliaya Ana, David uan tekiua Ezequías. Ye kilnamiktok keski uelta yotichokakej. Ikinon matikiluikan Jehová ken timomachiliaj ijkuak itlaj techpanoua. Nochipa matimonechikokan porque tokniuan techtlasojtlaj. Nochipa matiktlajtoltikan iTlajtol toTajtsin Dios uan non techpaleuis matimoyolseuikan. Matikilnamiktokan Jehová techteochiuas tla titlaxikoskej. Ayakmo miak poliui uan Jehová techixayouajuatsas (Apoc. 21:4). Itech xochitlali tichokaskej porque tipakiskej.