1. ¿Tlen okachi okikuayaj yiuejkika?

 YIUEJKIKA nochtin okipiayaj pan (Gén. 14:18; Luc. 4:4). Ijkuakon nochtin okikuayaj pan ikinon ualeua Biblia kijtoua pan okatka intlakual (Mat. 6:11). Noijki Jesús okinchi ome milagros ika pan ijkuak okimiaktili (Mat. 16:​9, 10). Matimomachtikan se milagro tlen okichi Jesús tlen ijkuilitok itech Juan capítulo 6 uan tikitaskej ken techpaleuia.

2. ¿Keman omonekiaya kintlamakaskej sapanoua miakej?

² Apóstoles otetlapouijkej miak uan omonekiaya moseuiskej. Ikinon Jesús okinuikak itech barco uan opanokej itech mar Galilea uan oajsitoj ik kanin okatka altepetl Betsaida (Mar. 6:​7, 30-32; Luc. 9:10). Pero miakej ompa okinmajsitoj porque okinekiayaj kitaskej Jesús uan ye okinseli. Opejki kintlapouia tlen kijtosneki iTekiuajkayo toTajtsin Dios uan noijki okinpajti akinmej omokokouayaj. Discípulos omotlajtlanijkej tlen kikuaskiaj akinmej ompa okatkaj porque yokatka yitiotlak. Xamo sekimej okiuikayaj tlen kikuaskiaj pero oksekimej omonekiaya kikouatiuij itech okseki altepemej (Mat. 14:15; Juan 6:​4, 5). ¿Tlen okichi Jesús?

JESÚS OKICHI SE MILAGRO UAN MIAKEJ OKINTLAMAKAK

3. ¿Tlen okinmilui Jesús makichiuakan iapóstoles? (Xikita dibujo).

³ Jesús okinmilui iapóstoles: “Amo mayakan, namejuan xikintlamakakan” (Mat. 14:16). Pero oui ijkon kichiuaskiaj porque ompa okatkaj kanaj 5,000 tlakamej. Pero noijki  ompa okatkaj siuamej uan konemej. Ikinon xamo ompa okatkaj kanaj quince mil personas (Mat. 14:21). Andrés okijto: “Nikan kajki se chokotsin tlen kipia makuili pan de cebada uan ome michintsitsintin. Pero non amo kajxilis nochtin tikintlamakaskej” (Juan 6:9). Amo patio okinemakayaj pan tlen okichiuayaj ika cebada uan miakej okikuayaj. Michintsitsintin xamo okatkaj uakej uan sapanoua poyek. Pero non amo kinmajxiliskia para nochtin kintlamakaskiaj.

4. ¿Tlen techmachtia tlen kijtoua Juan 6:​11-13? (Noijki xikinmita fotos).

⁴ Jesús okinekiaya kintlamakas akinmej okikakitoj ikinon okinmilui “sesekan mamonechikokan uan mamotlalikan ipan xijyo” (Mar. 6:​39, 40; xiktlajtolti Juan 6:​11-13). Biblia kijtoua Jesús okitlasojkamatili iTajtsin porque ye okinmakak pan uan michintsitsintin tlen kikuaskiaj. Nin techititia moneki timotlatlaujtiskej ijkuak titlakuaskej maski tiyetoskej toselti noso inuan oksekimej. Satepan Jesús okinmilui idiscípulos makinmakakan tlakuali akinmej ompa okatkaj uan otlakuajkej hasta oixuikej. Pero omoka tlakuali ikinon Jesús okinmilui idiscípulos makololokan uan satepan kikuaskiaj uan ijkon amo ijtlakauiskia. Ijkon Jesús otechititi moneki matikmaluikan tlen tikpiaj. Tetajmej uelis kinmachtiskej inkoneuan mamotlatlaujtikan ijkuak tlakuaskej, kuali makinselikan oksekimej uan makitemakakan tlen kipiaj.

5. ¿Tlen okinekiayaj kichiuaskej judíos ijkuak Jesús okinchi milagros pero tlen okichi ye?

 ⁵ Miakej omotlajtlachialtijkej ken otlamachtiaya Jesús uan ijkuak okinchiuaya milagros. Okijtouayaj xamo Jesús okatka profeta porque Moisés okijto toTajtsin Dios kiualtitlaniskia se profeta (Deut. 18:​15-18). Xamo miakej okineltokayaj Jesús kuali tlanauatiskia porque nochtin kintlamakaskia. Ikinon miakej okinekiayaj “mayeto tekiua” (Juan 6:​14, 15). Ijkuakon otlanauatiayaj romanos uan tla kinkauiliskia makitlalikan tekiua, mokajkalakiskia itech política tlen okipiayaj judíos. Pero ye amo okinkauili ijkon makichiuakan. Biblia kijtoua Jesús san niman “oyajki itech tepetl”. Ye amo keman omokajkalaki itech política maski oksekimej okinekiayaj ijkon makichiua. Sapanoua techpaleuia tlen okichi Jesús.

6. ¿Ken uelis tikchiuaskej ijkon ken Jesús okichi? (Noijki xikita dibujo).

⁶ Amikaj techiluis matikchiuakan se milagro uan matikintlamakakan miakej noso matitlapajtikan. Noijki amikaj techtlalis matiyetokan titekiuajkej. Pero xamo sekimej techiluiskej matikpejpenakan se tekiua noso matikpaleuikan akin kineki yetos tekiua. Jesús otechititi amo matimokajkalakikan itech política porque ye amo keman ijkon okichi. Ye okijto: “NoTekiuajkayo amo poui itech nin tlaltikpak” (Juan 17:14; 18:36). Tejuan noijki moneki matimokuayejyekokan  uan matikchiuakan ijkon ken Jesús okichi. Tejuan tikpaleuiaj non Tekiuajkayotl ikinon titetlapouiaj tlen kichiuas uan tiktlatlaujtiaj toTajtsin Dios mauiki iTekiuajkayo (Mat. 6:10). Matikitakan tlen okseki tlamantli techmachtia ijkuak Jesús okichi milagro uan okimiaktili pan.

¿TLEN KIJTOSNEKI MILAGRO TLEN JESÚS OKICHI IJKUAK OKIMIAKTILI PAN?

7. ¿Tlen okse milagro okichi Jesús uan tlen okichijkej idiscípulos? (Juan 6:​16-20).

⁷ ijkuak otlanki otlakuajkej akinmej ompa okatkaj, Jesús okinmilui idiscípulos mamokopakan Capernaúm itech se barco uan ye oyajki itech tepetl para amo makitlalikan tekiua (xiktlajtolti Juan 6:​16-20). Ijkuak oyayaj itech barco, “atl opejki motlauiteki itech barco” porque sapanoua oejekaya. Ikinon Jesús onejnentia ipan atl uan okinmajsito idiscípulos uan okilui Pedro noijki manejnemi ipan atl (Mat. 14:​22-31). Ayakmo oejekak ijkuak Jesús otlejkok itech barco. Idiscípulos omotlajtlachialtijkej uan okiluijkej: “Te melauak tiiKone toTajtsin Dios” (Mat. 14:33). a Pero yejuan san omotlajtlachialtijkej ijkuak okitakej onejnentia ipan atl uan amo ijkuak miakej okintlamakak. Marcos okijto discípulos ijkon okichijkej “porque amo okimatiayaj tlen kijtosneki milagro tlen okichi ika makuili pan. Okitayaj oui nochi kajsikamatiskej” (Mar. 6:​50-52). Yejuan amo okajsikamatiayaj Jesús okinchiuaya milagros porque Jehová okimakak chikaualistli. Satepan Jesús oksepa okijto tlen opanok ijkuak okimiaktili pan uan ijkon techititiskia okse tlamantli miak ipati.

8, 9. ¿Tleka okitemotoj Jesús? (Juan 6:​26, 27).

⁸ Nochtin tlen Jesús okintlamakak okiteititijkej okachi okipatioitayaj kipiaskej tlen yejuan okinekiayaj uan tlen okinpolouaya. Mostlatika ayakmo okitakej Jesús nion idiscípulos ikinon oyajkej itech seki barcos tlen oualayaj altepetl Tiberíades uan okitemotoj Jesús ompa Capernaúm (Juan 6:​22-24). Yejuan amo okitemotoj porque okinekiayaj makintlapoui tlen kichiuas iTekiuajkayo toTajtsin Dios. Okitemotoj porque okinekiayaj oksepa makintlamaka. ¿Tleka ijkon tikijtouaj?

⁹ Matikitakan tlen opanok ijkuak sekimej okajsitoj Jesús ompa Capernaúm. Jesús okinmilui yejuan san okinekiayaj makintlamaka. Okinmilui ‘okikuajkej pan uan oixuikej’ pero okikuajkej “tlakuali tlen ijtlakaui”. Ye okinmilui okachi kuali ‘makimotlanilikan tlakuali tlen uejkaua uan tlen kinpaleuis nochipa mayoltokan’ (xiktlajtolti Juan 6:​26, 27). Noijki okinmilui toTajtsin Dios kinmakaskia tlen kikuaskej. Xamo omotlajtlachialtijkej ijkuak okinmilui non tlakuali kinpaleuiskia nochipa mayoltokan. ¿Tlen tlakuali kinpaleuiskia uan kanin kajsiskiaj?

10. ¿Tlen omonekiaya kichiuaskej judíos tla okinekiayaj nochipa yoltoskej?

¹⁰ Nesi judíos okinekiayaj kimatiskej tlen kichiuaskiaj para kiseliskiaj non tlakuali. Xamo omokuayejyekouayaj omonekiaya kichiuaskej tlen kijtoua iTlanauatil Moisés. Pero Jesús okinmilui: “ToTajtsin Dios namechselis tla nankineltokaj akin ye okiualtitlanki” (Juan 6:​28, 29). Tla okinekiayaj nochipa yoltoskej, omonekiaya kineltokaskej akin okiualtitlanki toTajtsin Dios. Jesús yokinmiluijka tlen omonekiaya kichiuaskej (Juan 3:​16-18, 36). Noijki satepan  oksepa okinmilui tlen omonekiaya kichiuaskej tla okinekiayaj nochipa yoltoskej (Juan 17:3).

11. ¿Ken okiteititijkej judíos san okinekiayaj makintlamaka Jesús? (Salmo 78:​24, 25).

¹¹ Judíos amo okineltokakej tlen Jesús okinmachti omonekiaya kichiuaskej tla okinekiayaj ‘toTajtsin Dios makinseli’. Ikinon okitlajtlanijkej: “¿Tlen milagro techititis uan ijkon timitsneltokiliskej?” (Juan 6:30). Yejuan okiluijkej ijkuak okatka Moisés, toTajtsin Dios okinmakak maná inuejkatatajuan uan non yetoskia ken pan (Neh. 9:15; xiktlajtolti Salmo 78:​24, 25). Yejuan san okinekiayaj kipiaskej tlen kikuaskej. Ikinon amo okitlajtlanijkej Jesús tlen okijtosnekiaya ijkuak ye okijto “pan tlen uits iluikak”. Non pan yetoskia ken maná uan kinpaleuiskia nochipa mayoltokan (Juan 6:32). Yejuan amo okikakej Jesús ijkuak okinmiluijtoka non tlamantli porque san okintekipachouaya kipiaskej tlen okinekiayaj. ¿Tlen techmachtia tlen okichijkej judíos?

MATIKPATIOITAKAN TIMOUIKASKEJ IUAN TOTAJTSIN DIOS

12. ¿Ken okiteititi Jesús okachi miak ipati matimouikakan iuan Jehová?

¹² Tlen ijkuilitok itech Juan capítulo 6 techmachtia moneki okachi tikpatioitaskej timouikaskej iuan toTajtsin Dios. Satanás okiyejyeko Jesús pero ye okiteititi okachi okipatioitaya mouikas iuan Jehová (Mat. 4:​3, 4). Noijki ijkuak Jesús otlamachti itech tepetl okijto okachi miak ipati matimouikakan iuan Jehová (Mat. 5:3). Ikinon matimotlajtlanikan: “¿Nikteititia okachi nikpatioita nimouikas iuan Jehová noso okachi nikpatioita nikpias tlen nikneki?”.

13. (1) ¿Tleka amo tlajtlakoli tla tikiluiaj toTajtsin Dios matechmaka tlen tikkuaskej? (2) ¿Tleka miak ipati matikkakikan tlen okijto Pablo? (1 Corintios 10:​6, 7, 11).

¹³ Amo tlajtlakoli matiktlajtlanilikan toTajtsin Dios matechmaka tlen techpoloua uan matipakikan porque tikpiaj non tlamantli (Luc. 11:3). Biblia kijtoua tikpiaj tlen tikkuaskej uan tlen tikoniskej ijkuak chikauak titekipanouaj uan non techyolpaktia porque “uits imak akin melauak toTajtsin Dios” (Ecl. 2:24; 8:15; Sant. 1:17). Pero moneki matimomaluikan uan amo okachi matikpatioitakan tlen tikpiaj. Noijki apóstol Pablo ijkon okinmilui tokniuan. Okinmijkuilili tlen okichijkej israelitas ijkuak okatkaj ik kanin kajki tepetl Sinaí kanin tlauaki. Okinmilui amo makixnekikan “tlen amo kuali” ijkon ken okichijkej israelitas (xiktlajtolti 1 Corintios 10:​6, 7, 11). Jehová okichi se milagro ijkuak okintlamakak israelitas pero yejuan san okintekipachouaya tlen kikuaskej ikinon opejki kitaj “amo kuali” tlen okinmakaya (Núm. 11:​4-6, 31-34). Noijki ijkuak okiueyichijkej torojkonetl tlen ochijchitoka ika oro, okiteititijkej okachi okipatioitaya tlakuaskej, tlakoniskej uan moyolpaktiskej uan amo okipatioitayaj kitlakamatiskej Jehová (Éx. 32:​4-6). Pablo okinmilui omonekiaya momaluiskej tokniuan tlen okatkaj ijkuak yikixixiniskiaj Jerusalén uan templo. Non panoskia itech xiuitl 70. Axkan noijki ayakmo miak poliui tlamis nochi tlen axkan onka ikinon miak ipati matikkakikan tlen okijto Pablo.

14. ¿Tlen yetos ijkuak toTajtsin Dios kikopas tlaltikpak se xochitlali?

¹⁴ Jesús otechmachti matikiluikan toTajtsin Dios ‘matechmaka tlen tikkuaskej nin tonal’. Pero noijki okijto matikiluikan ‘mamochiua tlen kineki ompa iluikak uan noijki  nikan tlaltikpak’ (Mat. 6:​9-11). Matimokuayejyekokan ken yetos non tonal. Biblia kijtoua toTajtsin Dios kineki mayeto miak tlakuali nikan tlaltikpak. Isaías 25:​6-8 kijtoua ijkuak yetos iTekiuajkayo toTajtsin Dios yetos miak tlakuali uelik tlen tikkuaskej. Salmo 72:16 noijki kijtoua: “Yetos miak semilla ipan tlaltikpak, ipan tepemej sapanoua tlamochiuas”. Matimokuayejyekokan ken yetos uelik totlakual ijkuak timotlakualchiuiliskej uan ijkuak tikchijchiuaskej okseki tlamantli tlen tikkuaskej. Noijki matimokuayejyekokan ken tlakis uvas tlen tiktokaskej uan ken tipakiskej ijkuak tikkuaskej (Is. 65:​21, 22). Sapanoua tipakiskej ijkuak toTajtsin Dios techmakas nochi non tlateochiuali.

15. ¿Tlen momachtiskej akinmej kinyolitiskej? (Juan 6:35).

¹⁵ (Xiktlajtolti Juan 6:35). ¿Tlen kinpanos akinmej Jesús okintlamakak san ika seki pan uan seki michimej ijkuak okichi se milagro? Ijkuak Jehová kinyolitis akinmej oixpolikej, xamo tikinmixmatiskej sekimej tlen yiuejkika amo otlaneltokakej (Juan 5:​28, 29). Yejuan monekis momachtiskej tlen kijtosneki ijkuak Jesús okijto: “Pan tlen kitemaka yolilistli ye ne. Akin nonauak uits ayakmo keman apismikis”. Yejuan moneki kineltokaskej Jesús inpatka omotemakak. Tipakiskej miak ijkuak tikinmachtiskej nochtin tlen kinyolitiskej uan konemej tlen nesiskej itech xochitlali. Tipakiskej tikkuaskej nochi tlen ijkuakon yetos. Pero okachi tipakiskej ijkuak tikinpaleuiskej oksekimej mamouikakan iuan Jehová.

16. ¿Tlen timomachtiskej chikome?

¹⁶ Axkan yotikitakej san seki tlamantli tlen kijtoua Juan capítulo 6. Pero Jesús okijto okseki tlamantli tlen kijtosneki ‘nochipa tiyoltoskej’. Non tlamantli okinekiayaj kajsikamatiskej judíos uan tejuan noijki moneki matikajsikamatikan tlen kijtosneki. Chikome timomachtiskej okseki tlamantli tlen kijtoua Juan capítulo 6.