1. ¿Ken otechchijchi Jehová?

JEHOVÁ kuali otechchijchi, ik non, ueli tikchiuaj miak tlamantli. Se neskayotl, ueli timokuayejyekoaj, tikyektlaliaj se ouijkayotl uan tikijtoaj tlen tiknekij tikchiuaskej satepan (Proverbios 2:11). Noijki ueli tikchiuaj tlen otikijtojkej tikchiuaskej (Filipenses 2:13). Uan noijki Jehová otechmakak totlalnamikilis tlen techiluia tlen kuali uan tlen amo kuali. Totlalnamikilis techiluia ma tikixtopeuakan tlajtlakoli uan ma timoyolkuepakan (Romanos 2:15).

2. ¿Ken kineki Jehová ma tiktekitiltikan tlen otechmakak?

² Jehová kineki kuali ma tiktekitiltikan tlen otechmakak pampa techtlasojtla uan kineki ma tiyolpakikan. Se neskayotl, itech Escrituras Hebreas, techiluia tla tiixtlamatkej, kuali kisas tlen tikchiuaskej. Noijki techiluia: “Nochi tlen  uelis tikchiuas, xikchiua” (Proverbios 21:5; Eclesiastés 9:10). Uan itech Escrituras Griegas, kijtoa: ‘Ijkuak weletis titlapalewiskeh, matitlapalewikah’ uan noijki techiluia: “Ken sejse onankiselijkej tetliokolil, xiktekitiltikan ijkuak nanmopaleuiskej” (Gálatas 6:10; 1 Pedro 4: 10, TNM). Ken tikitaj, Jehová kineki ma tikinpaleuikan oksekimej uan noijki ma tikchiuakan tlen kuali.

3. ¿Tlen amo ueli tikchiuaj?

³ Maski Jehová kineki ma tiktekitiltikan tlen tikmatij, pero ye kimati amo ueli nochi tikchiuaj. Se neskayotl, amo ueli tikpojpoloaj tlajtlakoli nion mikilistli (1 Reyes 8:46). Noijki amo uelis tikinmiluiskej tlen moneki kichiuaskej oksekimej, pampa tinochtin uelis tikpejpenaskej tlen tikchiuaskej. Uan maski tikmatij miak tlamantli, Jehová nochipa okachi kimati (Isaías 55:9).

4. ¿Tlen timomachtiskej?

⁴ Nochipa ma tikkauilikan Jehová ma techyekana. Noijki ma tikneltokakan techpaleuis uan kichiuas tlen tejuan amo ueli tikchiuaj. Pero Jehová noijki kineki ma timokuayejyekokan ken tikyektlaliskej se ouijkayotl uan ken tikinpaleuiskej oksekimej (xiktlajtolti Salmo 37:3). * Moneki titlaneltokaskej itech Jehová, tikchiuaskej tlen kuali uan tiyetoskej tiyolmelajkej. Pampa tikmatiskej ken tikchiuaskej, axkan tikitaskej ineskayo Noé, David uan oksekimej tlaltikpaktlakamej yolmelajkej akinmej  otlaneltokakej itech Jehová. Tikitaskej ken yejuan amo ueli okichijkej seki tlamantli, pero kema ueli okichijkej seki tlamantli uan omochijchikajkej ijkon kichiuaskej.

5. ¿Tlen okichiuayaj miakej tlaltikpaktlakamej ijkuak okatka Noé?

⁵ Biblia kijtoa ijkuak okatka Noé, miakej tlaltikpaktlakamej okinpaktiaya moteuiskej uan oauilnemiayaj (Génesis 6:4, 9-13). Noé okimatiaya se tonal Jehová kinmixpoloskia akinmej amo yolkualmej. Pero noijki okitekipachoaya nochi tlen okichiuayaj tlaltikpaktlakamej. Noé okimatiaya amo uelis kichiuaskia seki tlamantli, pero okitak seki tlamantli uelis kichiuaskia.

6, 7. (1) ¿Tlen amo ueli okichiuaya Noé? (2) ¿Tlen panotok axkan ijkon ken opanok ijkuak okatka Noé?

⁶ ¿Tlen amo ueli okichiuaya Noé? Noé okinnejmachti tlaltikpaktlakamej tlen okijto toTajtsin Dios. Pero amo okinchiualti ma kikakikan. Uan amo okichi totoka ma peua apachiuilistli. Omonekiaya ma kineltoka Jehová kitlajtlamiskia nochi tlen amo kuali uan kichiuaskia ijkuak monekiskia (Génesis 6:17).

⁷ Axkan, noijki katej miakej akinmej amo yolkualmej uan tikmatij Jehová yokijto kinmixpolos (1 Juan 2:17). Pero amo tikinchiualtiaj ma kikakikan “kualitlájtoli” itech Tekiuajkayotl. Noijki amo uelis tikchiuaskej totoka ma peua ueyi tlajyouilistli (Mateo 24:14, 21). Moneki tikpiaskej chikauak totlaneltokilis ken Noé uan ma  tikneltokakan toTajtsin Dios san niman kitlajtlamis nochi tlen amo kuali (Salmo 37:10, 11). Kuali tikmatij Jehová amo kitekauilis ma yeto okachi tlen amo kuali (Habacuc 2:3).

8. ¿Tlen okichi Noé? (Xikita tlaixkopinal tlen ika peua tlamachtil).

⁸ ¿Tlen okichi Noé? Noé otlaneltokaya uan otetlapoui tlen Jehová okijto panoskia uan amo omosotla pampa amo ueli okichiuaya seki tlamantli (2 Pedro 2:5). Nin okipaleui ma kipia chikauak itlaneltokilis. Uan amo san otetlapoui, noijki okichijchi akali ijkon ken Jehová okinauati (xiktlajtolti Hebreos 11:7).

9. ¿Ken uelis tikchiuaskej ken Noé?

⁹ Ijkon ken Noé, tejuan noijki tikchijtokej “iteki n Toteko” (1 Corintios 15:58). Se neskayotl, sekimej tokniuan tlapaleuiaj kanin kinchijchiuaj uan kinyektlaliaj kalmej kanin timonechikoaj uan kanin tikinpiaj uejueyij nechikolmej. Oksekimej tlapaleuiaj itech uejueyij nechikolmej noso tlapaleuiaj itech kalmej kanin tekitij iTlaixpantijkauan Jehová noso itech kalmej kanin tlajtolkuepaj. Pero okachi titetlapouiaj uan non kichiua ma tikpiakan chikauak totlaneltokilis. Se tokni siuatl yolmelajki okijto ijkuak tetlapouia kinmita miakej amo kipiaj se chialistli pampa mokuayejyekoaj nochipa kipiaskej ouijkayotl. Pero tejuan tikpiaj se chialistli uan okachi itech titlaneltokaj ijkuak titetlapouiaj. Nin chialistli techpaleuia ma timotlalokan itech ojtli tlen kichiuas nochipa ma tiyoltokan (1 Corintios 9:24).

10. Xikijto ken otlajtlakolchi David.

¹⁰ Tekiua David okipiaya chikauak itlaneltokilis uan Jehová okitlasojtlaya (Hechos 13:22). Pero David otlajtlakolchi ijkuak omotekak iuan se siuatl tlen omotokayotiayaj Bat-seba. Uan noijki, okichi ma kimiktikan Urías itech guerra, akin okatka inamik Bat-seba. Hasta okichi Urías ma kiuika carta kanin okijtoaya ma kimiktikan (2 Samuel 11:1-21). Satepan, itlajtlakol omomatki (Marcos 4:22). ¿Tlen okichi David?

11, 12. (1) ¿Tlen amo ueli okichi David satepan ijkuak otlajtlakolchi? (2) ¿Tlen kichiuas Jehová tla melauak timoyolkuepaj?

¹¹ ¿Tlen amo ueli okichiuaya David? David amo uelis kipojpoloskia itlajtlakol. Uan otlajyoui itech nochi inemilis ijkuak otlajtlakolchi (2 Samuel 12:10-12, 14). Ik non, tla moyolkuepaskia, omonekiaya ma kineltoka Jehová kitlapojpoluiskia uan kipaleuiskia ma kixiko ouijkayotl tlen kipiaskia satepan.

¹² Tinochtin titlajtlakolejkej, ik non, titlajtlakolchiuaj. Pero seki tlamantli tlen  tikchiuaj okachi tlajtlakoli. Ualeua amo uelis tikpojpoloskej tlen otikchijkej. Uelis titlajyouiskej satepan pampa otitlajtlakolchijkej (Gálatas 6:7). Pero tikneltokaj Jehová techpaleuis ijkuak titlajyouiskej tla melauak timoyolkuepaj. Ye techpaleuis maski titlajyouiskej pampa otitlajtlakolchijkej (xiktlajtolti Isaías 1:18, 19; * Hechos 3:19).

13. ¿Tlen okichi David pampa oksepa kuali mouikaskia iuan Jehová?

¹³ ¿Tlen okichi David? David okikauili Jehová ma kipaleui, ik non, oksepa kuali iuan omouikak. Se neskayotl, David okikauili teotlajtojki Natán ma kiyektlali (2 Samuel 12:13). David noijki okilui Jehová tlen okichi. Ijkon okiteititi okinekiaya oksepa ma kiseli (Salmo 51:1-17). Amo san omoyolkokojtoka, okajsikamatki ayakmo oksepa ijkon kichiuaskia. Uan ayakmo oksepa ijkon okichi. Satepan omikik ken se tlakatl akin otlaneltokaya itech Jehová uan ye ijkon kilnamiki (Hebreos 11:32-34).

14. ¿Tlen techmachtia tlen okipanok David?

¹⁴ ¿Tlen techmachtia tlen okipanok David? Tla otitlajtlakolchijkej, moneki ma timoyolkuepakan ika nochi toyolo, ma tikiluikan Jehová tlen otikchijkej uan ma tikiluikan ma techtlapojpolui (1 Juan 1:9). Noijki moneki ma timotlapouikan iuan tlayekankej yejuan techpaleuiskej oksepa ma timouikakan iuan Jehová (xiktlajtolti Santiago 5:14-16). Ijkuak tikkauiliaj Jehová ma techpaleui, tikteititiaj tikneltokaj ye techtlapojpoluia. Ayakmo ma titlajtlakolchiuakan uan ma tiktekichiuilikan ika nochi toyolo (Hebreos 12:12, 13).

15. ¿Tlen techmachtia tlen okipanok Ana?

¹⁵ Uelis tikilnamikij oksekimej itekipanojkauan toTajtsin Dios tlen itech otlaneltokakej uan omochijchikajkej ijkuak okipixkej ouijkayotl. Ma tikitakan tlen okipanok Ana. Ye amo ueli okinpiaya ikoneuan. Maski amo uelis kiyektlaliskia non ouijkayotl, Ana okineltokaya Jehová kiyolseuiskia. Ik non, oyaya itech tabernáculo uan ompa okiueyichiuaya Jehová uan okiluiaya ken omomachiliaya (1 Samuel 1:9-11). Ana techmaka se kuali neskayotl. Ualeua timokokoaj noso tikpiaj okse ouijkayotl uan amo uelis tikyektlaliskej. ¿Tlen uelis tikchiuaskej? Ma tikiluikan Jehová nochi tlen techtekipachoa uan ma tikneltokakan totech motekipachoa (1 Pedro 5:6, 7). Ma timoyolchikauakan itech nechikolmej uan ma timopaleuikan ika nochi  tlen techmaka ialtepe Jehová (Hebreos 10:24, 25).

16. ¿Tlen kinmachtia tetajmej tlen okipanok Samuel?

¹⁶ ¿Tlen uelis kichiuaskej tetajmej tla inkoneuan ayakmo kitekichiuiliaj Jehová? Ineskayo Samuel kinpaleuis. Ye amo okinchiualti ikoneuan tlen yokipiayaj miak xiuitl ma yetokan yolmelajkej ixpan toTajtsin Dios (1 Samuel 8:1-3). Ye okikauili Jehová ma kiyektlali non ouijkayotl. Pero omochijchika yetos yolmelajki uan kiyolpaktiskia Jehová (Proverbios 27:11). Axkan, miakej tetajmej ijkon kinpanoa. ¿Tlen kichiuaj? Kineltokaj Jehová oksepa kinselis akinmej moyolkuepaj, ijkon ken se teta oksepa okiseli ikone tlen okauilti itomin, itech tlapoualistli tlen okijto Jesús (Lucas 15:20). Ninmej tetajmej mochijchikauaj yetoskej yolmelajkej ixpan Jehová uan kinekij inneskayo ma kinpaleui inkoneuan ma mokuepakan itech tlanechikol.

17. ¿Tleka techyolchikaua tlen okipanok iknosiuatl tlen amo itlaj okipiaya?

¹⁷ Noijki techmaka se kuali neskayotl se iknosiuatl tlen amo itlaj okipiaya, akin oyoltoka ijkuak okatka Jesús (xiktlajtolti Lucas 21:1-4). Ye amo uelis kinpatiliskia inyelis tlaltikpaktlakamej amo yolkualmej tlen okatkaj itech teokali. Noijki amo itlaj uelis kichiuaskia pampa kipiaskia tomin (Mateo 21:12, 13). Pero nin iknosiuatl otlaneltokaya itech Jehová, ik non, okipaleuiaya tlaneltokalistli tlen melauak. Okitemakak “ome tomintsitsinteh” nochi tlen okipiaya. ¡Sapanoa otlaneltokaya itech Jehová! Iknosiuatl okimatiaya tla kitekichiuiliskia Jehová, ye kimakaskia tlen ika mopanoltiskia. Tejuan noijki tikneltokaj Jehová techmakas tlen ika timopanoltiskej tla tiktekichiuiliaj (Mateo 6:33).

18. ¿Tlen okijto tokni Malcolm ma tikchiuakan?

¹⁸ Axkan miakej tokniuan noijki tlaneltokaj itech Jehová uan amo san moyolkokojtokej ijkuak amo ueli kichiuaj seki tlamantli, okachi kuali, kichiuaj tlen uelij. Ma tikitakan tlen okipanok tokni Malcolm, akin okatka yolmelajki uan omikik itech xiuitl 2015. Miak xiuitl ijkuak ye uan isiua okitekichiuilijkej Jehová oyolpakej pero noijki okipixkej ouijkayotl. Ye okijto: “Amo tikmatij tlen panos itech tonemilis uan uelis tikpiaskej ouijkayotl, pero Jehová kinteochiua akinmej itech tlaneltokaj”. ¿Tlen okijto tokni Malcolm ma tikchiuakan? Ye okijto: “Ma tikiluikan toTajtsin Dios nochipa ma techpaleui ma tiktekichiuilikan. Ma tikchiuakan tlen uelis tikchiuaskej uan amo ma techtekipacho tlen amo uelis tikchiuaskej” * (xikita tlajtoli tlen kiualika tlakxitlan).

19. (1) ¿Tleka kinamiki ma tiktekitiltikan Salmo 37:3 itech xiuitl 2017? (2) ¿Ken uelis tikchiuaskej tlen kijtoa Salmo 37:3?

¹⁹ Ken momiaktilia tlen amo kuali, tikpiaskej okachi ouijkayotl (2 Timoteo 3:1, 13). Amo ma techmomojti ouijkayotl tlen onka. Okachi kuali, ma titlaneltokakan itech Jehová uan ma tikchiuakan nochi tlen uelis tikchiuaskej. Kinamiki ma tiktekitiltikan Salmo 37:3 itech xiuitl 2017, ompa kijtoa: “Xitlaneltoka itech Jehová uan xikchiua tlen kuali”.