1, 2. ¿Tleka moneki timomaluiskej? (Xikita tlaixkopinal tlen ika peua tlamachtil).

MIAKEJ akinmej kinpajtiaj kipiaj kokolistli tlen noijki uelis kinmajxiltiskej akinmej tlapajtiaj. Akinmej tlapajtiaj kinekij kinpaleuiskej pero moneki momaluiskej para amo noijki mokokoskej. Noijki ijkon tiitekipanojkauan Jehová tikatej uan titekitij iuan akinmej amo kipiaj inyelis ken kipaktia toTajtsin Dios. Ik non, moneki timomaluiskej tla amo tiknekij tikchiuaskej ken yejuan.

² Itech ninmej tonalmej miakej amo kintlakamatij itlanauatiluan Jehová tlen kijtoaj tlen kuali uan tlen amo kuali. Itech ojpa carta tlen Pablo okijkuilili Timoteo ompa okijto ken kipiaskiaj inyelis akinmej amo kitekichiuiliaj toTajtsin Dios. Uan okachi miakej ijkon kichiuaskiaj ijkuak yitlamiskia nochi tlen amo kuali (xiktlajtolti 2 Timoteo 3:1-5, ITlajtol toTajtzin Dios [NHY], 13). Amo techpaktia tlen kichiuaj pero uelis techajxiltiskej tlen mokuayejyekoaj, ken tlajtoaj uan peuas tikchiuaskej ken yejuan (Prov. 13:20). Ik non, axkan timomachtiskej mota akinmej kitekichiuiliaj Jehová uan ken kipiaj inyelis akinmej amo kitekichiuiliaj. Noijki tikitaskej ken timomaluiskej para amo tikchiuaskej  ken yejuan uan ken tikinpaleuiskej oksekimej ma kixmatikan toTajtsin Dios.

3. ¿Akinmej kiteititiskiaj kipiaj inyelis ken kijtoa 2 Timoteo 3:2-5, NHY?

³ Ijkon ken yotikitakej, tlatitlanil Pablo okijto saiktlami tonalmej yetoskia “miek tlajyowilistle”. Satepan okijto 19 tlamantli tlen kiteititiaj ken miakej kipiaskiaj inyelis itech ninmej tonalmej. Itech Romanos 1:29-31 noijki moijtoa seki tlamantli tlen Pablo okijto ijkuak okitlajkuilili Timoteo uan tlen ompa moijtoa amo ok kanaj nesi itech Escrituras Griegas Cristianas. Ijkuak Pablo opejki tlajkuiloa achto okijto “tlakaj yeskej...”. Nin tlaxelol tlajtoa itech tlakamej uan siuamej porque nochtin ijkon uelis kipiaskiaj amo kuali inyelis. Pero sekimej amo ijkon kipiaskiaj inyelis. Akinmej kichiuaj ken Cristo kipiaskiaj kuali inyelis (xiktlajtolti Malaquías 3:18).

4. ¿Ken kipiaj inyelis akinmej moueyinekij?

⁴ Ijkuak Pablo otlanki okijto miakej yetoskiaj “tzotzokamej” uan ‘kiwelitaskiaj tomin’ noijki okijto miakej “texijxikoskej” uan “moweyinekiskej”. Akinmej ijkon kichiuaj moueyinekij porque mokuayejyekoaj san yejuan nochi kimatij, kualtsin motaj, kipiaj miak tomin noso nochtin kinmixmatij. Ik non, kinekij ma kintlakaitakan uan ma kinpatioitakan. Se ixtlamatki okijto ijkin kichiuaj akinmej moueyinekij: “Itech inyolo ken kipiaskiaj se altar kanin san ixpan motlankuaketsaj”. Akinmej moueyinekij kinkualania oksekimej tlen noijki moueyinekij.

5. ¿Tlen okinpanok ome tekiuajkej maski okatkaj yolmelajkej?

⁵ Jehová amo kipaktia ikaj ma moueyineki. Biblia kijtoa kikokolia “akin moueyineki” (Prov. 6:16, 17). Akin moueyineki amo uelis motokis itech toTajtsin Dios (Sal. 10:4). Diablo ijkon moueyineki (1 Tim. 3:6). Uan sekimej itekipanojkauan Jehová noijki ijkon okichijkej. Se neskayotl, Uzías akin okatka ueyi tekiua itech Judá. Seki xiuitl okatka yolmelajki pero satepan okipatlak iyelis. Biblia kijtoa: “Pero ijkuak opejki mochiua okachi ueyititok, iyolo opejki moueyineki hasta okichi tlen amo kuali, ik non, ayakmo okatka yolmelajki ixpan Jehová akin okatka iDios uan okalak itech iteokal Jehová uan okitlati kopali itech altar kanin okitlatiayaj kopali”. Satepan ueyi tekiua Ezequías noijki omoueyineki pero satepan omochi yolyamanki (2 Crón. 26:16; 32:25, 26).

6. (1) ¿Tleka David uelis moueyinekiskia? (2) ¿Pero tlen okipaleui amo ijkon ma kichiua?

⁶ Sekimej moueyinekij porque kualtsin motaj, miakej kinmixmatij, kualtsin tlakuikaj, sapanoa chikauakej noso miakej kinpatioitaj. David okipiaya nochi nin tlamantli pero nochipa okatka yolyamanki. Se neskayotl, ijkuak okimikti Goliat, ueyi tekiua Saúl okilui uelis monamiktiskia iuan ichpoch. Pero David okijto: “¿Akin ne, nokalchanejkauan uan inkalchanejkauan notajtsin tlen katej Israel para ma niyeto imo ueyi tekiua?” (1 Sam. 18:18). ¿Tlen okipaleui David ma yeto yolyamanki? Maski David okimatiaya kichiuas miak tlamantli, nochipa okilnamiktoka toTajtsin Dios yolyamanki, ik non, nochipa okipaleuiaya (Sal. 113:5-8). David okimatiaya Jehová okimakak nochi tlen okipiaya (xikita ika 1 Corintios 4:7).

7. ¿Tlen techpaleuis ma tiyetokan tiyolyamankej?

⁷ Axkan tiitekipanojkauan Jehová timochijchikauaj tikchiuaskej ken David. Techtlajtlachialtia Jehová amo moueyineki maski ye ueyi tekiua itech nochi semanauak (Sal. 18:35). Ika nochi toyolo tiknekij tikchiuaskej  tlen kijtoa Jehová: “Ximokemelokah ika nochi tlan nomechpalewis iwa xiteiknomatikah, xiktechiwilikah tlan kuali, ximotsikitsintilikah, xiyetokah nonyolyamankeh iwa xitexikokah” (Col. 3:12). Uan tikmatij akin tetlasojtla “amo xankuatl nion moweyilia” (1 Cor. 13:4). Ma tikilnamikikan ijkon ken tlakamej ‘non amo tlaneltokakeh, tlaneltokaskeh ijkuak kinmitaskeh kenijki tetlakitah’ insiuauan, oksekimej kinekiskej kixmatiskej Jehová tla kitaj tiyolyamankej (1 Ped. 3:1).

8. (1) ¿Tetlakamatij konemej itech ninmej tonalmej? (2) ¿Tlen kijtoa Biblia ma kichiuakan konemej?

⁸ Pablo noijki okijto tlen kichiuaskiaj sekimej itlamian tonalmej. Se neskayotl, okijto konemej “mach kintlakitaskej intajwan”. Tlen kijtoaj amochmej, películas uan itech televisión kiteititiaj amo tlajtlakoli ijkon ma kichiuakan konemej. Uan akinmej amo tetlakamatij, inkalchanejkauan amo kuali katej. Miakej kimatij non amo kuali. Se neskayotl, yiuejkika ompa Grecia tla ikaj okinteuiaya itatajuan, ayakmo uelis kichiuaskia seki tlamantli. Uan se tlanauatil tlen okipiaya Roma okijtoaya akin okiteuiaya itajtsin okatka ken okimiktiaya. Escrituras Hebreas uan Escrituras Griegas Cristianas kijtoaj nochtin konemej ma kintlakaitakan intatajuan (Éx. 20:12; Efes. 6:1-3).

9. ¿Tlen kinpaleuis telpokamej uan ichpokamej ma kintlakamatikan intatajuan?

⁹ ¿Tlen kinpaleuis konemej amo ma kichiuakan ken akinmej amo tetlakamatij? Ma mokuayejyekokan ken kinpaleuiaj intatajuan. Ijkuak konemej kajsikamatij toTajtsin Dios kinekij ma titetlakamatikan, kintlasojkamatiliskej intatajuan uan kintlakamatiskej. Ijkuak telpokamej uan ichpokamej kualtsin tlajtoaj itech intatajuan, kinmititiaj oksekimej ma kintlakaitakan intatajuan. Pero tla tetajmej amo kintlasojtlaj inkoneuan, yejuan san kitlauelchiuaskej tlen kinnauatiskej. Pero ijkuak tetajmej kintlasojtlaj inkoneuan, yejuan nochipa tetlakamatiskej maski ualeua yetos oui. Se tokni tlen itoka Austin okijto: “Ualeua oniknekiaya nikchiuas tlen amo kuali, pero notatajuan onechiluiayaj tlen nikchiuaskia uan tlen amo, onechyekiluiayaj tleka ijkon onechnauatiayaj uan noijki onechiluiayaj nochipa uelis timotlapouiskiaj. Nochi non onechpaleui ma nikintlakamati. Onikitaya notech omotekipachoayaj uan non onechyolini ma nikintlakamati”.

10. ¿Ken kipiaj inyelis akinmej amo tetlasojtlaj?

¹⁰ Pablo okijto oksekimej amo tetlasojtlaskiaj. Ijkuak okijto konemej “mach kintlakitaskej intajwan”, noijki okijto “mach kimatiskej motlasojkamatiskej”, ijkon kichiuaj akinmej amo kintlasojkamatiliaj akinmej kinpaleuiaj. Miakej noijki “mach kitlakitaskej in Dios” nion “teiknomatiskej”, kijtosneki amo tetlapojpoluiskej. Noijki “tlawikaltiskej” uan “yeskej traisionerojtin”, porque kijtoskej tlen amo kuali itech oksekimej uan itech toTajtsin Dios. Uan “yeskej tlajtolerojtin” porque kijtoskej tlen amo melauak itech oksekimej uan ijkon amo kuali ma kinmitakan oksekimej. *

11. ¿Akinmej noijki kintlasojtlaskiaj akinmej kichiuaj ken Cristo?

¹¹ Miakej amo tetlasojtlaj pero akinmej kitekichiuiliaj Jehová tetlasojtlaj ika nochi inyolo. Uan nochipa ijkon kichiuaj. Jesús okijto katej ome tlanauatilmej tlen okachi miak inpati tlen okinmijkuilo Moisés, ma tiktlasojtlakan toTajtsin Dios uan ma tikintlasojtlakan  oksekimej uan nin poui itech tlasojtlalistli agápe (Mat. 22:37-39). Noijki motaskia melauak motlasojtlaskiaj akinmej melauak kichiuaskiaj ken Cristo (xiktlajtolti Juan 13:34, 35). Uan noijki kintlasojtlaskiaj akinmej kinkokoliaj (Mat. 5:43, 44).

12. ¿Ken okiteititi Jesús otetlasojtlaya?

¹² Jesús sapanoa otechtlasojtlak. Itech miakej altepemej otetlapouiaya iTekiuajkayo toTajtsin Dios. Noijki okinpajti akinmej amo otlachiayaj, koxomej, akinmej okipiayaj lepra, akinmej amo otlakakiayaj uan noijki okinyoliti mikamej (Luc. 7:22). Uan maski miakej okikokoliayaj, ye okitemakak iyolilis inpatka nochtin tlaltikpaktlakamej. Otetlasojtlak ken Jehová tetlasojtla. Axkan tinochtin tiiTlaixpantijkauan Jehová titetlasojtlaj ken Jesús.

13. ¿Tlen panos tla titetlasojtlaj?

¹³ Tla titetlasojtlaj, oksekimej kinekiskej kixmatiskej toTajtsin Dios. Se neskayotl, ompa Tailandia se tlakatl oyajki itech ueyi nechikol regional uan omotlajtlachialti ijkuak okinmitak tokniuan sapanoa motlasojtlaj. Ijkuak yokatka ikalijtik, okinmilui tokniuan chichikometika ome uelta ma kimachtitij. Okintlapoui itech Jehová nochtin ikalchanejkauan uan tlajko xiuitl satepan, okitlajtolti Biblia itech nechikol. Tla tiknekij tikmatiskej kox titetlasojtlaj, ma timotlajtlanikan: “¿Nimochijchikaua nikinpaleuis nokalchanejkauan, tokniuan uan ijkuak nitetlapouia? ¿Nikinmita oksekimej ken Jehová kinmita?”.

14, 15. ¿Ken kipiaskiaj sekimej inyelis uan ken kipatlaskiaj?

¹⁴ Itlamian tonalmej miakej amo kuali kipiaskiaj inyelis, ik non, moneki ma timoxelokan. Se neskayotl, miakej tlen amo kitekichiuiliaj Jehová “kikokoliskej nochi tlan kuale”. Ken kijtoaj okseki biblias “amo kinpaktis tlen kuali” noso “kixnamikiskej tlen kuali”. Yejuan “mach kimoxikoltiskej de tlan kinekiskej kichiwaskej, kipiaskej mach kuale inyelis”. Uan noijki “mach momawtiskej de tlan kichiwaskej”.  Ika tlajtoli griego nin kijtosneki kichiuaskej tlen yejuan kinekiskej uan amo mokuayejyekoskej kox kinpaleuis oksekimej tlen kichiuaskej noso kintlajyouiltis.

¹⁵ Axkan yimochijtok itlaj tlen yiuejkika omoijto panoskia: miakej akinmej kipiaskiaj inyelis ken yolkamej ayakmo ijkon kipiaskiaj (xiktlajtolti Isaías 11:6, 7). Ninmej tlaxelolmej kijtoaj lobo uan león yetoskej ika yolseuilistli uan noijki ichka iuan torojkonetl. Uan itech nochi tlaltikpak yetos yolseuilistli, “porque tlaltikpak tentos ika itlamatilis Jehová” (Is. 11:9). Yolkamej amo uelis kixmatiskej Jehová, ik non, nin tlaxelol kiteititia kipatlaskej inyelis tlaltikpaktlakamej.

16. ¿Ken kinpaleuia Biblia sekimej ma kipatlakan innemilis?

¹⁶ Miakej tlen okatkaj ken lobos axkan katej ika yolseuilistli iuan oksekimej. Inneskayo uelis tikinmajsiskej itech www.pr418.com/ncx, kanin kijtoa “Biblia okinpatili innemilis”. Akinmej kixmatij toTajtsin Dios uan kitekichiuiliaj amo kichiuaj “kej tlaneltokakej, pero mach kineltokaskej ipan inyolo tlan kikakiskej”. Akinmej kijtoaj kiueyichiuaj toTajtsin Dios amo melauak ijkon kichiuaj porque innemilis kiteititia okse tlamantli. Sekimej tokniuan tlen amo kuali okipiayaj inyelis axkan ‘omotzotzoltijkej ika yankuik nemilistle para nemiskej ken Dios kineki. Yolchipawkanemij iwan melajkanemij porke Dios otechchij para ma tiekan ken Yej” (Efes. 4:23, 24, NHY). Ijkuak momachtijtiuij itech toTajtsin Dios kitaj moneki kintlakamatiskej itlanauatiluan. Nin kinyolinia ma kipatlakan tlen kineltokaj, tlen mokuayejyekoaj uan tlen kichiuaj. Oui kipatlaskej inyelis pero espíritu santo kinpaleuia akinmej ika nochi inyolo kinekij kichiuaskej tlen kineki toTajtsin Dios.

17. ¿Tlen techpaleuis amo ma tikchiuakan ken akinmej amo kitekichiuiliaj toTajtsin Dios?

¹⁷ Mojmostla okachi mota akinmej kitekichiuiliaj Jehová uan akinmej amo. Akinmej tiktekichiuiliaj toTajtsin Dios moneki ma timomaluikan para amo tikchiuaskej ken akinmej amo kitekichiuiliaj. Tiknekij tiktlakamatiskej Jehová ijkuak technauatia amo ma timokalakikan iuan akinmej kipiaj inyelis ken kijtoa 2 Timoteo 3:2-5, NHY. Nin amo kijtosneki amo inmiuan timotlapouiskej, porque xamo inmiuan titekitij, timomachtiaj noso inmiuan tichantij. Pero amo timokuayejyekoskej nion tikchiuaskej ken yejuan. ¿Tlen techpaleuis? Moneki nochipa ma timomachtikan Biblia uan ma timouikakan iuan akinmej noijki kinekij kitekichiuiliskej Jehová uan ijkon okachi kuali iuan timouikaskej.

18. ¿Ken kinpaleuis oksekimej tlen tikijtoaj uan tlen tikchiuaj?

¹⁸ Noijki moneki timochijchikauaskej tikinpaleuiskej oksekimej ma kixmatikan Jehová. Ik non, nochipa ma titetlapouikan uan ma tiktlatlaujtikan Jehová ma techpaleui ma tikijtokan tlen moneki ijkuak moneki. Ma tikinmiluikan oksekimej tejuan tiiTlaixpantijkauan Jehová. Ijkon ijkuak kitaskej tikpiaj kuali toyelis kitlakaitaskej Jehová uan amo san tejuan. Biblia technauatia “matikkawakah nochi tlan amokuali techyoltilanah itech nin tlaltíkpaktli. Nochipa matinemikah ika totlalnamikilis chipawak, matinemikah ika yolsewílistli iwa matikmopantikah Dios” (Tito 2:11-14). Tla tikchiuaj ken Jehová uan tiktlakamatij, xamo sekimej techitaskej uan kijtoskej: “Namouan tiaskej porque otikkakej Dios kajki namouan” (Zac. 8:23).