SE PRECURSORA tlen itoka Sylviana uan kipia 25 xiuitl okijto: “Noyolikniuan otetlapouitoj kanin okachi moneki uan okijtoayaj sapanoa oyolpakiayaj uan ne noijki oniknekiaya ijkon niyolpakis”. Noijki okijto: “Onikmachiliaya amo uelis niaskia nitetlapouiti kanin okachi moneki”.

¿Noijki ijkon yotimomachili? ¿Mitspaktiskia titetlapouiti kanin okachi moneki? ¿Timotlajtlania kox se tonal uelis tias? Amo ximoyolkoko tla ijkon timotlajtlania. Jehová sapanoa miakej yokinpaleui ma tetlapouitij kanin okachi moneki maski okixnamikej miak ouijkayotl. ¿Ken okichijkej? Para tikmatiskej tlen okichijkej sekimej tokniuan, ma tikitakan tlen kichiuaj ompa Madagascar itech nin isla tlen noijki okachi ueyi.

Kanaj majtlaktli xiuitl tlen yopanok kanaj 70 precursores uan oksekimej tokniuan tlen uitsej itech 11 altepemej * oyajkej ompa otetlapouitoj, kanin miakej kitlakaitaj tlen kijtoa Biblia. Noijki miakej tokniuan tlen ompa inchan otetlapouitoj kanin okachi moneki. ¿Mitspaktiskia tikinmixmatis sekimej tlen ijkon okichijkej?

Louis uan inamik tlen itoka Perrine inchan Francia uan kipiaj kanaj 30 xiuitl, oyajkej otetlapouitoj Madagascar. Miak xiuitl omokuayejyekojtokaj tetlapouitiuij kanin okachi moneki, pero Perrine amo okimatiaya kox uelis yaskiaj. Okijto: “Onimomojtiaya porque amo onitlaixmatiaya. Onechtekipachoaya nikinkajteuas tokalchanejkauan, tokalijtik, tokniuan uan nochi tlen otikchiuayaj. Omonekiaya nimoyolchikauas uan amo nimomojtis”. Pero omoyolchika uan itech 2012 oyajkej Madagascar. ¿Ken momachilia? Okijto: “Okachi chikauak nikpia notlaneltokilis ijkuak nimokuayejyekoa ken techpaleuia Jehová”. Uan Louis okijto: “Otechtlajtlachialti touan omonechikojkej majtlaktli tlen tikinmachtiaj ijkuak otikilnamikej imikilis Jesús”.

 ¿Tlen okinpaleui ompa ma tlapaleuikan maski okixnamikej ouijkayotl? Okitlatlaujtijkej Jehová uan okiluijkej ma kinyolchikaua uan ijkon tlaxikoskiaj. Louis okijto: “Otikitakej Jehová otechnankili uan otechyolseui. Uan opejki okachi tiktekichiuiliaj. Uan toyolikniuan tlen chantij Francia otechtlajkuililijkej uan otechyolchikajkej para ma titlaxikokan” (Filip. 4:6, 7; 2 Cor. 4:7).

Louis uan Perrine otlaxikojkej uan Jehová okinteochi. Louis okijto: “Itech octubre 2014 ompa Francia, otikselijkej Tlamachtil ika Biblia para akinmej kichiuaj ken Cristo tlen yomonamiktijkej. * Non se tetliokolil tlen otechmakak Jehová uan amo keman tikilkauaskej”. Sapanoa oyolpakej porque ijkuak otlanki omomachtijkej okinmiluijkej oksepa ma tetlapouitij Madagascar.

Didier uan isiua tlen itoka Nadine inchan Francia uan itech 2010 ijkuak okipiayaj kanaj 50 xiuitl oyajkej Madagascar. Didier okijto: “Ijkuak ayamo otikinpiayaj tokoneuan otikatkaj precursores uan satepan otikinmiskaltijkej eyi tokoneuan. Ijkuak omoskaltijkej, otikijtojkej tiaskiaj oksekan titetlapouitiuij”. Uan Nadine okijto: “Amo oniknekiaya nikinkajteuas nokoneuan pero yejuan otechiluijkej: ‘¡Sapanoa tiyolpakiskej! Tla nanyaskej nantetlapouitiuij kanin okachi moneki. Non otechyolchika uan otiajkej. Uan maski uejka tikatej, tiyolpakij ijkuak inmiuan timotlapouiaj”.

Didier uan Nadine omonekiaya momachtiskej tlajtoli malgache. Nadine oixuetskak uan okijto: “Ayakmo tikpiaj 20 xiuitl para san niman timomachtiskej non tlajtoli”. ¿Tlen okinpaleui? Achto oyajkej itech se tlanechikol kanin tlajtoaj francés. Satepan, ijkuak yokitakej uelis momachtiskiaj, oyajkej itech se tlanechikol kanin tlajtoaj malgache. Nadine okijto: “Ijkuak titetlapouiaj tikinmajsij miakej tlen kinekij momachtiskej Biblia uan techtlasojkamatiliaj porque tiauij tikinmachtitiuij. Achto amo onikneltokaya tlen otechpanotoka. Sapanoa nechpaktia nikan nitetlapouis. Ijkuak nimeua, nikijtoa: ‘¡Niyolpaki axkan nitetlapouiti!’”.

Didier ixuetska ijkuak kilnamiki ken opejki momachtia malgache. Okijto: “Se tonal onitlamachtijtoka itech se nechikol uan amo onikajsikamatiaya tlen otlanankiliayaj tokniuan, ik non, san onikintlasojkamatiliaya. Ijkuakon, se tokni otlanankili uan oniktlasojkamatili ijkuak otlanki, tokniuan tlen okatkaj tlakuitlapan ika inmixko onechiluijkej amo kuali otlanankili. Ik non, okse tokni otlanankili uan kuali tlen okijto. Ne nimokuayejyekoa kuali okijto”.

Tokni Thierry uan isiua tlen itoka Nadia oyajkej se ueyi nechikol itech 2005 uan ompa okitakej  tlamauisol Ma tikchiuakan tlen kineki Jehová tlen otlajto itech tlen okichi Timoteo. Nin tlamauisol oajsik itech inyolo uan okinyolini ma tetlapouitij kanin okachi moneki. Thierry okijto: “Ijkuak otlanki tlamauisol otimomatlaxkalojtokaj uan onikilui nosiua: ‘¿Kanin titetlapouitiuij?’. Ye okijto noijki ijkon omokuayejyekojtoka”. Satepan opejki kichiuaj tlen moneki para uelis yaskiaj. Nadia okijto: “Yolik opejki tikkixtiaj tlen amo omonekiaya tikpiaskej. Saiktlami nochi tlen otikpiayaj oakiaya san itech naui maletas”.

Oajsitoj Madagascar itech 2006 uan okinpakti ompa tetlapouiskej. Nadia okijto: “Miakej techkakij, ik non, sapanoa tiyolpakij”.

Pero tlajko xiuitl satepan ninmej tokniuan okixnamikej se ouijkayotl. Inantsin Nadia tlen itoka Marie-Madeleine akin ochantiaya Francia, ouetski, omokuauitek uan omoajkolpostek. Thierry uan Nadia omotlapouijkej iuan akin okipajti Marie-Madeleine. Satepan okitlajtlanijkej Marie-Madeleine kox okinekiaya yas inmiuan ompa Madagascar. Maski yokipiaya 80 xiuitl, ika miak pakilistli okijto yas. ¿Kox momati ompa Madagascar? Marie-Madeleine okijto: “Oui nimomatis, pero maski yinikpia miak xiuitl nikmachilia nitlapaleuia itech tlanechikol. Uan okachi niyolpaki porque nochpoch uan inamik nikan katej kanin miakej techkakij ijkuak tikintlapouiaj”.

Ma timotlapouikan itech tokni tlen itoka Riana, akin kipia kanaj 20 xiuitl uan ichan Alaotra Mangoro. Itech nin altepetl tlamochiua uan kajki ik kanin kisa tonaltsin ompa Madagascar. Ken kuali omomachtiaya, okinekiaya okachi momachtis. Pero ijkuak opejki momachtia Biblia, okse tlamantli omokuayejyeko. Ye okijto: “Totoka onimomachti secundaria uan onikilui Jehová: “Tla kuali nikchiuas saiktlami examen, nimochiuas precursor’”. Ijkuak otlanki omomachti okichi tlen okilui Jehová. Oyajki uan chanti iuan se tokni tlen noijki precursor, okitemo kanin tekitiskia amo miak tonal uan omochi precursor. Okijto: “Non tlen okachi kuali onikchi”.

Pero ikalchanejkauan amo okajsikamatiayaj tleka ayakmo oyaya escuela. Riana okijto: “Notajtsin, notío uan nositsin okinekiayaj ma nimomachti universidad. Pero ne oniknekiaya niyetos precursor”. Satepan, Riana oyajki otetlapouito kanin okachi moneki. ¿Tlen okiyolini? Ye okijto: “Ichtekej okalakej nokalijtik uan onechichtekilijkej miak tlamantli. Non okichi ma nimokuayejyeko itech tlen okijto Jesús: ‘Xikoololokah itech ilwikak tlan milák ipati’. Ik non, onimochijchika okachi niktekichiuilis Jehová” (Mat. 6:19, 20). Riana oyajki ik sur kanin tlauaki uan ompa chantij akinmej kintokayotiaj antandroy. Non altepetl uejka mokaua, kanaj 1,300 kilómetros ik kanin kajki ikalijtik. ¿Tleka sapanoa uejka oyajki?

Se metstli achto kitlachtekiskiaj, yokinmachtiaya ome tlakamej tlen kintokayotiaj antandroy. Omomachti ken moijtoa seki tlamantli ika intlajtol uan omokuayejyeko itech akinmej ijkon tlajtoaj uan amo ikaj okintlapouiaya itech Tekiuajkayotl. Ye okijto: “Oniktlatlaujti Jehová ma nechpaleui ma niuia kanin tlajtoaj tandroy”.

Pero ijkuak ompa oajsito, amo okajsiaya tekitl. Se tlakatl okilui: “¿Tleka otiuala? Akinmej nikan chantij yauij itech moaltepe kitemotiuij tekitl”. Kaxtoli tonal satepan, Riana oyajki ueyi nechikol regional. Pero ayakmo okipiaya tomin, ik non, amo okimatiaya tlen kichiuas. Ijkuak yitlamiskia ueyi nechikol, se tokni itlaj okitlalili ijtik ipoxa. Okimakak tomin uan non okajxili para oksepa yaskia kanin chantij antandroy uan peuas kinemakaskia yogur. Riana okijto: “Onikitak Jehová onechpaleui ijkuak okachi omonekiaya. Ijkon nochtin nikintlapouiskia akinmej amo okixmatiayaj Jehová”. Noijki tlapaleuia miak itech tlanechikol. Uan noijki okijto: “Onechiluijkej kakaxtoltika ma niktemaka se tlapoualistli. Jehová nechmachtijtok ika ialtepe”. Axkan Riana  ok kinmachtijtok itech Tekiuajkayotl akinmej tlajtoaj tandroy uan kinekij kixmatiskej Jehová.

Jehová kijtoa kinteochiuas akinmej mochijchikauaj kitekichiuiliskej (Is. 65:16). Ken tikitaj, Jehová techteochiua ijkuak timochijchikauaj tikixnamikiskej ouijkayotl uan okachi titetlapouiaj. Noijki tokni Sylviana, omokuayejyekoaya amo keman uelis yaskia tetlapouiti kanin okachi moneki. ¿Tleka ijkon omokuayejyekoaya? Tokni okijto: “Nokxi tlen nikpia nopochma kipoloa kanaj chiknaui centímetros para yetos ken okse. Ik non, nikoxo uan san niman nisotlaua”.

Maski ijkon kajki, itech 2014, Sylviana oyajki otetlapouito iuan Sylvie Ann, precursora tlen noijki poui itech tlanechikol. Oyajkej itech se altepetsintli tlen kajki 85 kilómetros ik kanin chanti. Maski Sylviana kipia ouijkayotl, okichi tlen okinekiaya kichiuas. Noijki okiseli se tetliokolil: “Se xiuitl satepan, se siuatl tlen itoka Doratine akin onikmachtiaya, omoapolakti itech se ueyi nechikol de circuito”.

Tlen kijtoaj ninmej tokniuan techmachtia tla timochijchikauaskej tikixnamikiskej ouijkayotl uan tiaskej titetlapouitiuij kanin okachi moneki, tikitaskej melauak tlen kijtoa Jehová: “Ne nimitsyolchikauas, kema, ne nimitspaleuis” (Is. 41:10). Non techpaleuis okachi kuali ma timouikakan iuan Jehová. Noijki tla ika nochi toyolo titetlapouitiuij itech okse altepetl, techpaleuis kuali titekitiskej itech xochitlali. Ijkon okijto tokni Didier: “Titetlapouiskej kanin okachi moneki techpaleuis ma timoyektlalikan ken titekitiskej satepan”. Tikchiaj miakej ika nochi inyolo noijki ijkon ma moyektlalikan para kuali tekitiskej.