1, 2. ¿Ken kitemaka Jehová tlen kipia?

JEHOVÁ kipaktia kitemakas tlen kipia. Nochi tlen tikpiaj ye techmaka. Ye iaxka nochi tlamantli tlen onka itech tlaltikpak uan nochi non techmaka tlen moneki para tiyoltoskej (Sal. 104:13-15; Ageo 2:8). Biblia kijtoa ika nonmej tlamantli okinchi milagros uan ijkon okinmakak itekipanojkauan tlen omonekiaya.

² Se neskayotl, ijkuak israelitas okatkaj 40 xiuitl kanin tlauaki, Jehová nochipa okinmakak maná (Éx. 16:35). Ik non, amo itlaj okinpolo (Neh. 9:20, 21). Jehová okitekitilti teotlajtojki Eliseo uan okimiaktili iaceite se siuatl yolmelajki tlen ayakmo okipiaya inamik. Ik non, siuatl okitlaxtla nochi tlen okiteuikiliaya uan noijki ok okajxili tlen ika mopanoltiskia ye uan ikoneuan (2 Rey. 4:1-7). Noijki Jehová okimakak chikaualistli Jesús ma kimiaktili tlakuali uan noijki tomin ijkuak omonekiaya (Mat. 15:35-38; 17:27).

3. ¿Tlen tlajtlanilmej tikinnankiliskej?

 ³ Jehová uelis kitekitiltis nochi tlen ye kinekis para ma tikpiakan tlen moneki uan nochi tlen okichijchi. Pero kinyoleua itekipanojkauan ma kitemakakan tlen kipiaj uan ijkon kipaleuiskej ialtepe (Éx. 36:3-7; xiktlajtolti Proverbios 3:9). ¿Tleka Jehová kineki ma tikmakakan tlen ye otechmakak? ¿Ken otlapaleuijkej itekipanojkauan Jehová tlen okatkaj yiuejkika? ¿Ken kitekitiltia ialtepe Jehová tomin tlen oksekimej kitemakaj ika nochi inyolo? Axkan tikinnankiliskej ninmej tlajtlanilmej.

4. ¿Ken timomachiliaj ijkuak tikpaleuiaj Jehová?

⁴ ¿Tleka moneki ma tikmakakan Jehová tlen tikpiaj? Porque tiktlasojtlaj uan tiktlasojkamatiliaj nochi tlen yotechmakak. Tiyolpakij ijkuak timokuayejyekoaj itech non. Noijki timomachiliaj ken David ijkuak okiyekijto tlen omonekiaya ijkuak kichijchiuaskia teokali. Ye okijto Jehová techmaka nochi tlen tikpiaj, ik non, tikmakaj tlen ye yotechmakak (xiktlajtolti 1 Crónicas 29:11-14).

5. ¿Tleka tikueyichiuaj Jehová ijkuak tiktemakaj tlen tikpiaj uan amo tikchiaj itlaj tikseliskej?

⁵ Noijki tikmakaj Jehová tlen tikpiaj porque noijki ijkon tikueyichiuaj. Ijkuak okinextilijkej seki tlamantli tlatitlanil Juan, ye okikak tlen okijtoayaj itekipanojkauan Jehová ompa iluikak, okijtojkej: “Toteko Dios, sanwel Tejwatsi moaxka n weyílistli, mawistílistli iwa n weletílistli. Porke Tejwatsi otikchijchi nochi tlan onka, iwa tejwatsi otikmonekilti mayetokah, yika otikinchijchi” (Apoc. 4:11). Jehová kinamiki ma tikueyichiuakan uan ma tiktlakaitakan, ik non, moneki ma tikmakakan tlen okachi kuali tikpiaj. Yiuejkika Jehová okilui Moisés ma kinnauati israelitas eyi uelta ma iluichiuakan sejse xiuitl. Tlanauatil okijtoaya “nochtin akinmej yaskej ixpan Jehová moneki itlaj kiuikaskej” (Deut. 16:16). Axkan noijki tikueyichiuaj Jehová ijkuak tiktemakaj tlen okachi kuali tikpiaj uan amo tikchiaj itlaj tikseliskej. Ijkon tikteititiaj tikpatioitaj uan tikpaleuiaj tlen kichiua ialtepe.

6. ¿Tleka moneki ma tiktemakakan tlen tikpiaj? (Xikita tlaixkopinal tlen ika peua tlamachtil).

⁶ Ma tiktemakakan tlen tikpiaj ika nochi toyolo uan amo san ma tikchiakan itlaj ma techmakakan (xiktlajtolti Proverbios 29:21). Ximokuayejyeko itech se chokotsin kinkouilia itatajuan se tetliokolil ika tomin tlen yejuan okimakakej. ¿Amo melauak kitlasojkamatiliskej inchokotsin? Noso ma timokuayejyekokan itech se tokni precursor tlen ok chanti iuan itatajuan uan kinmaka tomin para kinpaleuis. Xamo itatajuan amo kitlajtlaniliaj tomin pero kiseliaj porque ijkon intelpoch kiteititia kitlasojkamati nochi tlen okimakakej. Noijki Jehová kimati kuali tikchiuaj ijkuak tikmakaj tlen okachi kuali tikpiaj.

7, 8. (1) ¿Ken otlapaleuijkej itekipanojkauan toTajtsin Dios ijkuak itlaj okichijchiuayaj? (2) ¿Ken okachi otlapaleuijkej oksekimej para kiueyichiuaskej Jehová?

⁷ Biblia kijtoa itekipanojkauan Jehová okitemakayaj tlen okipiayaj. Sekimej otlapaleuijkej ijkuak itlaj okichijchiuayaj. Se neskayotl, Moisés okinmilui israelitas ma tlapaleuikan ijkuak okichijchijkej tabernáculo  uan ueyi tekiua David noijki ijkon okichi ijkuak okichijchijkej teokali (Éx. 35:5; 1 Crón. 29:5-9). Ijkuak okatka ueyi tekiua Jehoás teopixkej okitekitiltijkej tomin tlen oksekimej okitemakakej ika nochi inyolo para kiyektlaliskej teokali (2 Rey. 12:4, 5). Itech achto siglo, tokniuan okimatkej omonekiaya kinpaleuiskej oksekimej porque otlaapistiaya ompa Judea. Biblia kijtoa tokniuan okitemakakej tlen okipiayaj uan ijkon otlapaleuijkej (Hech. 11:27-30).

⁸ Itekipanojkauan toTajtsin Dios noijki okitemakakej tlen okipiayaj uan ijkon okinpaleuijkej akinmej otlayekanayaj itech ialtepe. Tlanauatil tlen okijkuilo Moisés okijtoaya levitas amo itlaj okinkajteuiliayaj ken oksekimej nechikolmej. Ik non, altepetl okitemakaya diezmo. Ijkon levitas amo itlaj okintekipachoaya uan kuali otekitiayaj itech tabernáculo (Núm. 18:21). Seki xiuitl satepan, sekimej siuamej okimakayaj Jesús tlen okipiayaj uan noijki itlatitlaniluan (Luc. 8:1-3).

9. ¿Kanin okisaya nochi tlen okitemakayaj itekipanojkauan toTajtsin Dios?

⁹ Amo san sekan okisaya tlen okitemakayaj. Se neskayotl, ijkuak israelitas okatkaj kanin tlauaki uan omonekiaya kichijchiuaskej tabernáculo, israelitas xamo okitemakakej tlen okiuikakej ijkuak okiskej Egipto (Éx. 3:21, 22; 35:22-24). Itech achto siglo sekimej tokniuan okinnemakakej intlaluan, inkaluan uan tomin okinmakakej tlatitlanilmej. Uan tlatitlanilmej okinxexelilijkej akinmej okinpoloaya (Hech. 4:34, 35). Oksekimej okixeloayaj intomin uan okitemakayaj para ma kiueyichiuakan Jehová (1 Cor. 16:2). Ken tikitaj, nochtin otlapaleuiayaj akinmej okipiayaj tomin uan akinmej amo (Luc. 21:1-4).

10. ¿Ken uelis noijki tiktemakaskej tlen tikpiaj ken yiuejkika okichijkej itekipanojkauan Jehová?

¹⁰ Noijki axkan xamo monekis tiktemakaskej tomin para kichiuaskej tlen moneki. Se neskayotl, xamo tokniuan kiyankuiliskej kanin timonechikoaj noso kichijchiuaskej okse yankuik kali. Noijki xamo moneki tomin para kiyankuiliskej Betel, para mochiuas se ueyi nechikol noso para tikinpaleuiskej tokniuan kanin otlaxixinki. Tomin tlen tiktemakaj ika nochi toyolo noijki motekitiltia para kinpaleuiskej misioneros, precursores especiales, tokniuan akinmej tlayekanaj itech circuito uan akinmej tekitij Betel. Noijki xamo totlanechikol sejse metstli kititlani tomin para ma kinchijchiuakan kalmej kanin timonechikoaj noso kanin tikpiaj ueyi nechikol uan ijkon kinpaleuiaj nochtin tokniuan.

11. ¿Ken timomachilia ijkuak tiktemaka tomin para ma mochiua iteki Jehová?

¹¹ Tinochtin uelis titlapaleuiskej ma mochiua iteki Jehová. Miak uelta amo momati akin kitemaka tomin porque san ichtaka tiktlaliaj itech cajas tlen onka itech kalmej kanin timonechikoaj noso tiktitlanij itech jw.org. Amo ma tikijtokan tlen tiktemakaj amo tlapaleuia. Nochi tomin tlen motemaka monechikoa ika tlen miakej kitemakaj maski tepitsin. Hasta tokniuan tlen amo okachi kipiaj tomin, kitemakaj ken tokniuan tlen ochantiayaj ompa Macedonia. Maski yejuan okatkaj “semi próbesteh”, ika nochi inyolo okinekiayaj kitemakaskej intomintsin (2 Cor. 8:1-4).

12. ¿Tlen kichiua ialtepe Jehová para kuali kitekitiltis tomin tlen kitemakaj tokniuan ika nochi inyolo?

 ¹² Cuerpo Gobernante mochijchikaua kuali kitekitiltis tomin tlen kipia ialtepe Jehová (Mat. 24:45, TNM). Tokniuan motlatlaujtiaj uan kuali kitaj ken kitekitiltiskej tomin (Luc. 14:28). Yiuejkika tlakamej tlen okatkaj yolmelajkej okijtoayaj ken motekitiltiskia tomin. Okitayaj san ma motekitilti para kiueyichiuaskej Jehová. Se neskayotl, ijkuak Esdras omokuepki Jerusalén uan okiuikaya miak tlamantli tlen okitemakak ueyi tekiua itech Persia. Okitemakak oro, plata uan okseki tlamantli tlen axkan ipati kanaj 1,700 millones de pesos (100 millones de dólares). Esdras okimatiaya nochi non tlamantli kimakaskia Jehová, ik non, otlanauati ma kimaluikan ijkuak kiuikaskiaj Jerusalén (Esd. 8:24-34). Miak xiuitl satepan, tlatitlanil Pablo okinechiko tomin uan ijkon okinpaleuijkej tokniuan tlen ochantiayaj Judea. Uan otlanauati kuali ma kixejxelokan uan ijkon ‘kisaskiah chipawakeh itech non tekitl, iwa amo sanwel ixpa n Toteko Dios, yej noiwa inmixpah nochteh tokniwah’ (xiktlajtolti 2 Corintios 8:18-21). Axkan ialtepe Jehová noijki ijkon kichiua ken Esdras uan Pablo. Ik non, kijtoa ken motekitiltis tomin tlen tokniuan kitemakaj ika nochi inyolo.

13. ¿Tleka ialtepe Jehová okse tlamantli kitekitiltia tomin?

¹³ Ualeua sekimej tokniuan moneki kitaskej ken kitekitiltiskej intomin uan ijkon amo san kitlamiskej. Noijki kitaj tlen kichiuaskej para ayakmo okachi tekitiskej uan ijkon okachi kitekichiuiliskej Jehová. Ialtepe Jehová noijki ijkon kipanoa. Maski okitak uelis kichiuaskia miak tlamantli, ualeua okitekitiltiaya okachi miak tomin ken tlen okiseliaya. Ik non, ialtepe Jehová kita tlen kikoaskej uan ken tekitiskej uan ijkon amo tlamis tomin. Ijkon tomin tlen tiktemakaj ika nochi toyolo okachi kuali motekitiltis.

14, 15. ¿Ken kitekitiltiaj tomin tlen tiktemakaj ika nochi toyolo?

¹⁴ Miakej tokniuan tlen yimiak xiuitl kitekichiuilijtokej Jehová kijtoaj axkan okachi miak tlamantli kinmaka ialtepe Jehová uan non melauak. Se neskayotl, axkan tikpiaj página jw.org uan JW Broadcasting. Uan Traducción del Nuevo Mundo de las  Santas Escrituras axkan yomotlajtolkuepki ika miakej tlajtolmej. Itech 2014 uan 2015 omochijkej uejueyij nechikolmej internacionales itech 14 altepemej itech uejueyij estadios tlen omotokayoti “Ma tiktemokan achto iTekiuajkayo toTajtsin Dios”. Nochtin akinmej oyajkej sapanoa oyolpakej.

¹⁵ Miakej tokniuan kitlasojkamatij nochi tlen techmaka ialtepe Jehová. Se neskayotl, se tokni uan isiua tlen katej Asia, ijkin okijtojkej itech Broadcasting: “Ualeua tikmachiliaj uejka tikatej uan totoka tikilkauaj nochi tlen kichijtok Jehová. Pero ijkuak tikitaj Broadcasting tikilnamikij tikinpiaj miakej tokniuan itech nochi tlaltikpak. Nikan tokniuan sapanoa kinpaktia Broadcasting. Kijtoaj tlen kisa sejse metstli, kichiua okachi ma kinmixmatikan tokniuan tlen pouij itech Cuerpo Gobernante. Yolpakij pouij itech ialtepe toTajtsin Dios”.

16. (1) ¿Tlen okseki tlamantli kichiuaj ika tomin tlen tiktemakaj ika nochi toyolo? (2) ¿Ken mitspaleuia nochi tlen techmaka ialtepe Jehová?

¹⁶ Itech nochi tlaltikpak kinchijchitokej noso kinyektlalijtokej kanaj 2,500 kalmej kanin timonechikoaj. Se neskayotl, ompa Honduras sekimej tokniuan ijkuak opejki kitekitiltiaj kali kanin monechikoaj okijtojkej: “Sapanoa tiyolpakij tipouij itech ikalchanejke Jehová uan tikinpiaj tokniuan itech nochi tlaltikpak. Tokniuan melauak otechpaleuijkej uan tikpiaj kanin timonechikoskej”. Miakej noijki ijkon yolpakij ijkuak kiseliaj Biblia uan amatlajkuilolmej ika intlajtol, ijkuak kinpaleuia ijkuak mochiua se tlaxixinilistli noso ijkuak kitaj ken titetlapouiaj ika carritos.

17. ¿Ken tikmatij Jehová kipaleuia ialtepe?

¹⁷ Akinmej amo kitekichiuiliaj Jehová oui kinchiuiliaj kineltokaskej miak tlamantli tikchiuaj ika tomin tlen nochtin tiktemakaj ika nochi toyolo. Se tlakatl tlen tlayekana itech se tekitl tlen miak ipati oyajki kanin tikinchijchiuaj amatlajkuilolmej uan omotlajtlachialti ijkuak okitak nochtin akinmej ompa tekitij amo kintlaxtlauiaj uan amo itlaj kichiuaj para kinechikoskej tomin. Kijtoa nochi non amo san ijkon uelis mochiuas. Pero ijkon tikchiuaj porque Jehová techpaleuia (Job 42:2).

18. (1) ¿Ken techteochiua Jehová porque tikpaleuiaj iTekiuajkayo? (2) ¿Tlen kinyolinis tokoneuan uan akinmej tikinmachtiaj ma kitemakakan tlen kipiaj?

¹⁸ Jehová techkauilia ma tikpaleuikan iTekiuajkayo. Uan techiluia techteochiuas tla ijkon tikchiuaskej (Mal. 3:10). Noijki kijtoa akin ika nochi iyolo kitemaka tlen kipia kuali kisas tlen kichiuas (xiktlajtolti Proverbios 11:24, 25). Uan noijki tiyolpakiskej porque “okachi yolpaki akin itlaj kitemaka uan amo akin kiselia” (Hech. 20:35, TNM). Tlen tikijtoaj uan tlen tikchiuaj kinyolinis tokoneuan uan akinmej tikinmachtiaj noijki ma kitemakakan tlen kipiaj uan Jehová kinteochiuas.

19. ¿Ken mitsyolchikaua nin tlamachtil?

¹⁹ Jehová techmaka nochi tlen tikpiaj. Ijkuak tikmakaj tlen tikpiaj tikteititiaj tiktlasojtlaj uan tiktlasojkamatiliaj nochi tlen topatka kichiua (1 Crón. 29:17). Ijkuak israelitas okitemakakej tlen okipiayaj ijkuak okichijchijkej teokali, nochtin “oyolpakej porque ika nochi inyolo okimakakej Jehová tlen okipiayaj” (1 Crón. 29:9). Tejuan noijki ma tiyolpakikan porque tikmakaj Jehová tlen ye techmaka.