1. ¿Ken okipaleui Yoshiko tlen kijtoa Isaías 41:10?

SE TOKNI itoka Yoshiko okiluijkej itlaj amo kuali. Akin okipajtiaya okilui ayakmo miak metstli yoltoskia. ¿Tlen okichi tokni ijkuak ijkon okiluijkej? Ye san niman okilnamik Isaías 41:10 (xiktlajtolti) nin texto sapanoa okipaktiaya. Tokni okilui akin okipajtiaya amo omomojtiaya porque Jehová nochipa okipaleuiaya. * Nin texto okiyolchika uan okipaleui okachi ma tlaneltoka itech Jehová. Tejuan noijki uelis techpaleuis ijkuak tikixnamikiskej ouijkayotl. Para kuali tikajsikamatiskej ma tikitakan tleka Jehová ijkon okilui Isaías.

2. ¿Akinmej noijki uelis kinpaleuis tlen Jehová okilui Isaías?

² Jehová ijkon okilui Isaías para kinyolchikauaskia tlen okinuikakej Babilonia. Pero noijki okichi ma kijkuilokan para uelis kinpaleuiskia akinmej okitekichiuiliayaj (Is. 40:8; Rom. 15:4). Axkan tikatej itlamian tonalmej uan noijki tiknekij ma techyolchikaua tlen okijkuilo Isaías (2 Tim. 3:1).

3. (1) ¿Tlen okijto Jehová itech texto tlen motekitiltis 2019? (2) ¿Tleka moneki tikmatiskej tlen okijto Jehová?

³ Axkan timomachtiskej eyi tlamantli tlen Jehová okijto itech Isaías 41:10 uan nin techpaleuis ma tikpiakan chikauak totlaneltokilis. Achto tikitaskej, Jehová touan  kajki. Noijki tikitaskej, Jehová ye toDios uan saiktlami tikitaskej ye techpaleuia. ¿Tleka moneki tikmatiskej tlen Jehová okijto? * Porque tinochtin tikixnamikij ouijkayotl ijkon ken tokni Yoshiko. Noijki akinmej amo kitekichiuiliaj Jehová kinekij ma tikchiuakan ken yejuan. Sekimej tekiuajkej kintlajyouiltiaj tokniuan.

4. (1) ¿Tlen tlamantli achto tikitaskej? (Xikita nota). (2) ¿Ken techititia Jehová techtlasojtla? (3) ¿Tlen tikmachiliaj ijkuak Jehová techititia techtlasojtla?

⁴ Jehová techiluia: “Amo ximomojti, ne mouan nika”. * Ye techtlasojtla uan techkaki uan ijkon techititia touan kajki. Noijki techititia techtlasojtla ijkuak techiluia: “Porque onimitspatioitak, ik non, nimitstlakaita uan nimitstlasojtla” (Is. 43:4). Jehová nochipa techtlasojtlas uan amo keman techkauas (Is. 54:10). Techyolchikaua porque iuan timouikaj uan techtlasojtla. Ye nochipa techmaluis ijkon ken okimalui Abrán (Abrahán). Jehová okilui: “Amo ximomojti Abrán. Ne nimitspaleuis ken ika se escudo” (Gén. 15:1).

5, 6. (1) ¿Ken tikmatij Jehová kineki techpaleuis ijkuak tikixnamikiskej ouijkayotl? (2) ¿Tlen techmachtia tlen okichi Yoshiko?

⁵ Jehová kineki techpaleuis ijkuak tikixnamikij ouijkayotl. Ik non, techiluia: “Ijkuak tipanos ijtik atl melauak nimitspaleuis uan amo tiapolakis ijtik aueyatl. Ijkuak tipanos ijtik tlitl amo timotlatis nion timochichinos” (Is. 43:2). ¿Tleka ijkon techiluia Jehová?

⁶ Jehová amo techiluia amo tikixnamikiskej ouijkayotl. Pero amo kitekauilis ma titlajyouikan ijkuak tikixnamikiskej ouijkayotl ken yetoskia timelsimaskej ijtik atl noso ken timotlatiskej ijtik tlitl. Ye  techiluia touan yetos ijkuak tikixnamikiskej ouijkayotl. Noijki techmakas yolseuilistli uan ijkon tiyetoskej tiyolmelajkej maski uelis timikiskej (Is. 41:13). Ijkon okipanok Yoshiko tlen itech yotimotlapouijkej. Ichpoch okijto: “Otechtlajtlachialti nonantsin amo omomojti. Okineltokaya Jehová okiyolseuijtoka. Ijkuak yiixpoliuiskia ok okintlapoui akinmej okipajtiayaj uan noijki oksekimej”. ¿Tlen techmachtia tlen okichi Yoshiko? Tla titlaneltokaj itech Jehová, amo timomojtiskej ijkuak tikixnamikiskej ouijkayotl porque ye techyolchikauas uan touan kajki.

7. ¿Tlen okse tlamantli techiluia Jehová uan tlen kijtosneki?

⁷ Noijki Jehová techiluia: “Amo ximotekipacho, ne nimoDios”. Nin tlajtoli kijtosneki ken ijkuak timomojtiaj uan titlachiaj tlakuitlapan kox ikaj techualtoka.

8. (1) ¿Tleka Jehová okinmilui judíos amo ma motekipachokan? (2) ¿Tlen okijto Jehová itech Isaías 46:3, 4 tlen ika okinyolchika judíos?

⁸ ¿Tleka Jehová ijkon okinmilui judíos tlen okinuikakej Babilonia? Porque Jehová okimatiaya akinmej ochantiayaj Babilonia momojtiskiaj ijkuak soldados tlen oualayaj Medopersia kimoaxkatiskiaj nin altepetl. Nin panoskia itlamian setenta xiuitl ijkuak judíos mokopaskiaj Jerusalén. Jehová okintekitilti ninmej soldados para kinmakixtiskia judíos (Is. 41:2-4). Tlen ochantiayaj Babilonia uan tlen ik ompa ochantiayaj okinmitakej soldados tlen oualayaj Medopersia, omomojtijkej uan okinmiluiayaj oksekimej “ma moyolchikauakan”. Noijki okinmochijchiuilijkej okseki teotsitsintin porque okijtoayaj kinpaleuiskiaj (Is. 41:5-7). Pero Jehová okinyolseui israelitas ijkuak okinmilui: “Te Israel, tinotekipanojka [amo ken okseki altepemej]”. Noijki okijto: “Ne nimoDios” (Is. 41:8-10). Ijkuak Jehová okijto “ne nimoDios”, kijtosneki ye amo kinkauaskia judíos yolmelajkej uan ok pouiskiaj itech ialtepe. Noijki okinmilui kinpaleuiskia uan oksepa mokopaskiaj Jerusalén. Tlen Jehová okinmilui judíos sapanoa okinyolchika (xiktlajtolti Isaías 46:3, 4).

9, 10. Xikijto tleka amo ma timomojtikan.

⁹ Axkan sapanoa miakej motekipachoaj porque panotok tlen amo kuali. Nin tlamantli noijki techtekipachoa. Pero amo ma timotekipachokan porque Jehová noijki techiluia: “Ne nimoDios”. Sapanoa techyolchikaua tlen techiluia Jehová. ¿Tleka ijkon tikijtoa?

¹⁰ Ma timotlapouikan itech ome telpokamej tlen yauij itech autobús. Se itoka Juan uan okse itoka Bruno. Pero san niman peua chichikoyaui autobús porque ojtli amo kuali kajki. Ijkuakon, akin kiuika autobús san niman kijtoa: “Amitlaj xikchiuakan. San moneki tikpanouiskej nin ojtli tlen amo kuali kajki”. Juan sapanoa momojtia. Pero akin kiuika autobús kijtoa: “Amo ximomojtikan”. Juan kita Bruno amitlaj kichiua uan kitlajtlaniaj: “¿Tleka amo timomojtia?”. Ye okinankili ixuetskatok: “Akin kiuika autobús ye notajtsin  uan kuali nikixmati”. Bruno okilui Juan: “Ma nimitstlapoui itech notajtsin. Ijkuak tikixmatis uan tikmatis tlen ueli kichiua, ayakmo timomojtis”.

11. ¿Tlen techmachtia tlen okipanok Juan uan Bruno?

¹¹ ¿Tlen techmachtia tlen okipanok Juan uan Bruno? Ijkon ken Bruno tejuan amo timomojtiaj porque kuali tikixmatij toTajtsin Dios. Kuali tikmatij ye techpaleuis ijkuak tikixnamikiskej ouijkayotl itlamian ninmej tonalmej (Is. 35:4). Akinmej amo kitekichiuiliaj Jehová momojtiaj pero tejuan amo timomojtiaj porque titlaneltokaj itech toTajtsin Dios (Is. 30:15). Ijkon ken Bruno okitlapoui Juan ken iyelis itajtsin, tejuan noijki tikintlapouiaj oksekimej tleka moneki titlaneltokaskej itech toTajtsin Dios. Nin kinpaleuis ma tlaneltokakan itech Jehová uan noijki kinpaleuis ijkuak kixnamikiskej ouijkayotl.

12. (1) ¿Tlen okse tlamantli techiluia Jehová? (2) ¿Tlen kijtosneki ijkuak Biblia kijtoa “ima” Jehová?

¹² Jehová noijki techiluia: “Ne nimitsyolchikauas, kema, ne nimitspaleuis”. Isaías noijki okijkuilo ken Jehová kinyolchikauaskia judíos. Okijto: “ToTeko Jehová akin Ueyititok uits ika miak chikaualistli uan ima tlanauatis” (Is. 40:10). Biblia ualeua kitekitiltia tlajtoli ima para kineskayotis chikaualistli. Nin techititia Jehová se ueyi Tekiua tlen kipia miak chikaualistli. Yiuejkika toTajtsin Dios okitekitilti ichikaualis para kinpaleuis uan kinmakixtis itekipanojkauan. Axkan noijki  ok kinyolchikaua uan kinmaluia akinmej itech tlaneltokaj (Deut. 1:30, 31; Is. 43:10).

13. (1) ¿Keman kijtoa Jehová techyolchikauas? (2) ¿Tlen tlamantli techiluia Jehová techyolchikaua?

¹³ Jehová techiluia techyolchikauas ijkuak oksekimej techtlajyouiltiskej. Itech seki altepemej amo kinkauiliaj tokniuan ma tetlapouikan noso ayakmo kikauilia ialtepe Jehová itlaj ma kichiuaj. Pero amo techtekipachoa nochi tlen kichiuaj. Jehová yotechilui techyolchikauas uan itech titlaneltokaj. Ye kijtoa: “Maski san tlen tepostli ika mitsixnamikiskej, amo mitstlaniliskej” (Is. 54:17). Tlen okijto Jehová techilnamiktia eyi tlamantli tlen miak ipati.

14. ¿Tleka amo techtlajtlachialtia techkokoliskej akinmej amo kitekichiuiliaj Jehová?

¹⁴ Se tlamantli, moneki tikilnamiktoskej techkokoliskej akinmej amo kitekichiuiliaj Jehová (Mat. 10:22). Jesús okijto itlamian tonalmej imachtijkauan sapanoa kintlajyouiltiskiaj (Mat. 24:9; Juan 15:20). Okse tlamantli, Isaías okijkuilo akinmej techkokoliskej kitekitiltiskej miak tlamantli para techtlajyouiltiskej. Sekimej kijtoaj amo kuali tlen tikchiuaj, techteneuaj uan techtlajyouiltiaj (Mat. 5:11). Jehová kinkauilia akinmej amo kitekichiuiliaj ijkon ma kichiuakan (Efes. 6:12; Apoc. 12:17). Pero amo ma timomojtikan. ¿Tleka?

15. ¿Tlen okse tlamantli moneki tikilnamiktoskej uan ken techpaleuia tlen kijtoa Isaías 25:4, 5?

¹⁵ Okse tlamantli tlen moneki tikilnamiktoskej Jehová kijtoa amo techtlaniliskej maski sapanoa techtlajyouiltiskej. Jehová techmaluis ijkon ken se tepamitl techpaleuia ijkuak sapanoa ejeka (xiktlajtolti Isaías 25:4, 5). Akinmej techkokoliaj  amo nochipa techtlajyouiltiskej (Is. 65:17).

16. Ijkon ken kijtoa Isaías 41:11, 12, ¿tlen kinpanos akinmej techtlajyouiltiaj?

¹⁶ Jehová techiluia tlen kinchiuilis akinmej techkokoliaj uan non techyolchikaua (xiktlajtolti Isaías 41:11, 12). Maski mochijchikauaskej sapanoa techtlajyouiltiskej, Jehová sepa kinmixpolos.

17, 18. (1) Xikijto ken techpaleuia Biblia okachi ma titlaneltokakan itech toTajtsin Dios. (2) ¿Tleka moneki timokuayejyekoskej itech texto tlen motekitiltis 2019?

¹⁷ Okachi titlaneltokaj itech Jehová ijkuak okachi tikixmatij. Tla tiknekij ijkon tikchiuaskej moneki tiktlajtoltiskej Biblia uan moneki timajxiliskej itech timokuayejyekoskej. Biblia techiluia yiuejkika Jehová okimalui ialtepe uan non techpaleuia ma tikneltokakan noijki techmaluis.

¹⁸ Isaías okijkuilo Jehová techmaluia ken se tlajpixki kinmaluia ichkauan. Okijto: “Ye kinmololos ichkauan uan kinnapalojtias” (Is. 40:11). Kuali timomachiliaj ijkuak Jehová techmaluia uan yetoskia ken technapaloa. Ik non, tlakeuali yolmelajki uan ixtlamatki okijto itech 2019 motekitiltis Isaías 41:10: “Amo ximomojti, ne mouan nika”. Ma timokuayejyekokan itech nin texto tlen sapanoa techyolseuia. Tla ijkon tikchiuaskej, timoyolchikauaskej uan uelis tikixnamikiskej ouijkayotl.