TLAMACHTIL 4
Iespíritu santo toTajtsin Dios kinmatiltia akinmej yaskej iluikak
“Nin Espíritu moseitilia iwan toespíritu iwa techilia tejwah ya ti tepilwah de Dios” (ROM. 8:16).
TLAKUIKALI 25 Iaxkauan toTajtsin Dios
XIKILNAMIKTO *
Sapanoua tetlajtlachialti ken okinmakak iespíritu santo Jehová 120 imachtijkauan Jesús ijkuak omonechikojkej itech Pentecostés. (Xikita párrafo 1 uan 2).
1, 2. ¿Tlen opanok itech Pentecostés xiuitl 33?
ITECH Pentecostés xiuitl 33 se domingo kualkan ompa Jerusalén, omonechikojkej kanaj 120 imachtijkauan Jesús itech se kali (Hech. 1:13-15; 2:1). Jesús yokinmiluijka ompa ma mokauakan porque kiseliskiaj itlaj miak ipati (Hech. 1:4, 5). ¿Tlen opanok ijkuak ompa okatkaj?
2 “San nima owaltlatékuinki kan ilwikak, kemi ijkuak tlaxojpitsa se ejekatl chikaktik, iwa omonawaloti ijtik nochi n kali”. Ijkuakon, imachtijkauan Jesús “okinmonextilijkeh sikimeh kemi nenépilteh milintokeh” ipan intsonteko uan “nochteh okiselijkeh n Espíritu Santo” (Hech. 2:2-4). Sapanoua tetlajtlachialti ken okinmakak iespíritu santo Jehová imachtijkauan Jesús (Hech. 1:8). Yejuan achto okinpejpenki toTajtsin Dios ika espíritu santo * tlen tlanauatiskej iuan Jesús ompa iluikak.
¿TLEN PANOUA IJKUAK IKAJ KIPEJPENAJ PARA YAS ILUIKAK?
3. ¿Tleka tlapejpenalmej okineltokakej toTajtsin Dios okinpejpenki ika iespíritu santo?
3 Tla ompa tiyetoskiaj, amo keman tikilkauaskiaj tlen opanok non tonal. Ipan totsonteko tikpiaskiaj tlitl ken se nenepili uan titlajtoskiaj tlamantli tlajtolmej (Hech. 2:5-12). Tikneltokaskiaj toTajtsin Dios melauak otechpejpenki ika iespíritu santo. Pero ¿toTajtsin Dios nochipa tetlajtlachialtia ijkuak kinpejpena akinmej yaskej iluikak uan nochipa san sekan kinnechikoua? Amo. ¿Ken tikmatij amo ijkon kichiua?
4. Xikijto itech achto siglo ken okinpejpenki toTajtsin Dios akinmej yaskiaj iluikak.
4 Ma tikitakan tlen panoua ijkuak toTajtsin Dios ikaj kipejpena ika iespíritu santo. Amo san yejuan 120 tokniuan okinpejpenki toTajtsin Dios ika espíritu santo itech Pentecostés xiuitl 33. Non tonal okachi yitiotlak kanaj 3,000 okinpejpenki toTajtsin Dios ika espíritu santo ijkon ken Jesús okijto. Yejuan okinpejpenkej ijkuak omoapolaktijkej (Hech. 2:37, 38, 41, TNM). Pero satepan amo nochtin tlapejpenalmej okinpejpenkej ijkuak omoapolaktijkej. Tokniuan tlen ochantiayaj Samaria amo okinpejpenkej ijkuak omoapolaktijkej (Hech. 8:14-17, TNM). San Cornelio uan ifamilia okinpejpenkej ijkuak ayamo omoapolaktiayaj (Hech. 10:44-48).
5. Ijkon ken kijtoua 2 Corintios 1:21, 22, ¿tlen panoua ijkuak toTajtsin Dios ikaj kipejpena ika iespíritu santo?
5 Axkan ma tikitakan tlen panoua ijkuak ikaj kipejpena toTajtsin Dios ika iespíritu santo. Xamo akinmej kinpejpenaj amo san niman kajsikamatij toTajtsin Dios okinpejpenki uan motlajtlaniaj tleka yejuan okinpejpenkej. Oksekimej tlapejpenalmej xamo okseki tlamantli motlajtlaniaj. Maski tlatlamantli motlajtlaniaj, tlatitlanil Pablo okijto tlen kinpanoua akinmej kinpejpenaj. Okijto: “Nomejwah, [...] ononkineltokakeh n Cristo Jesús. Onomechneskayotijkeh * iwan Ye, ika Iespíritu Santo non Ye okisentlali kitemakas. Dios ika n Espíritu Santo kisentlalia techmakas tlan yotechkakitijka techmakas” (Efes. 1:13, 14). Jehová ika iespíritu santo kinmiluia yokinpejpenki. Ik non, iespíritu santo toTajtsin Dios kinmatiltia ma kineltokakan nochipa yetoskej iluikak uan amo chantiskej nikan tlaltikpak (xiktlajtolti 2 Corintios 1:21, 22).
6. ¿Tlen moneki kichiuas akin kipejpenaj para yas iluikak?
6 Tla ikaj yokipejpenki toTajtsin Dios ika iespíritu santo amo kijtosneki yiyaski iluikak. San kijtosneki yokipejpenkej para uelis yas iluikak. Porque moneki kilnamiktos nin tlamantli: “Nokniwah ken Dios yonoméchnotski iwa yonomechpéjpenki, ximochijchikawakah iwa xinemikah ijkó kemi yonomechili, ijkó ayik nonwetsiskeh” (2 Ped. 1:10). Ik non, ijkuak ikaj kipejpenaj moneki yetos yolmelajki uan ijkon uelis yas iluikak (Filip. 3:12-14; Heb. 3:1; Apoc. 2:10).
¿KEN KIMATIJ TOKNIUAN KOX YASKEJ ILUIKAK?
7. ¿Ken kimatij tokniuan kox yaskej iluikak?
7 ¿Ken kimatij tokniuan kox yaskej iluikak? Pablo okinmijkuilili tokniuan tlen okatkaj Roma ‘mayetokah yolchipawakeh’. Ik non, tikajsikamatij yejuan kimatij yaskej iluikak. Okinmilui: “Porke amo ononkiselijkeh se espíritu non teijilpia iwa manomechtokti oksepa ximawikah, yej ononkiselijkeh n Espíritu non ika nonmochiwah ipilwah Dios. Iwa nin Espíritu techkawilia matikijtokah: ‘¡Abba, Totajtsi!’ Nin Espíritu moseitilia iwan toespíritu iwa techilia tejwah ya ti tepilwah de Dios ” (Rom. 1:7; 8:15, 16). Ijkon toTajtsin Dios kiteititia ika iespíritu santo kinpejpena akinmej yaskej iluikak (1 Tes. 2:12).
8. Ijkon ken kijtoua 1 Juan 2:20, 27, ¿tleka tikijtouaj akinmej yaskej iluikak amo moneki ikaj kinmiluis yejuan tlapejpenalmej?
8 Jehová kinmatiltia akinmej kinpejpena ma kineltokakan ika nochi inyolo yaskej iluikak (xiktlajtolti 1 Juan 2:20, 27). Yejuan kimatokej moneki kinmachtis Jehová ijkuak monechikouaj ijkon ken oksekimej tokniuan tlen mokauaskej nikan tlaltikpak. Pero amo moneki ikaj kinmiluis yejuan tlapejpenalmej. Jehová yokinmilui ika iespíritu santo yejuan tlapejpenalmej.
MONEKI ‘OKSEPA NANTLAKATISKEH’
9. Ijkon ken kijtoua Efesios 1:18, ¿tlen kinpanoua akinmej kinpejpena toTajtsin Dios?
9 Miakej tokniuan xamo amo kuali kajsikamatij tlen panoua ijkuak ikaj kipejpena toTajtsin Dios. Amo kajsikamatij porque yejuan amo tlapejpenalmej. Noijki Jehová amo otechchijchi ma tiknekikan tichantiskej iluikak. Ye otechchijchi ma tichantikan nikan tlaltikpak (Gén. 1:28; Sal. 37:29). Pero Jehová okinpejpenki sekimej tokniuan tlen yaskej iluikak. Ik non, ijkuak kinpejpena yejuan kinekij chantiskej iluikak uan okse tlamantli mokuayejyekouaj (xiktlajtolti Efesios 1:18).
10. ¿Tlen kijtosneki tlapejpenali ‘oksepa tlakati’?
10 Ijkuak toTajtsin Dios ika iespíritu santo kipejpena se tokni, ‘oksepa tlakati’. * Jesús noijki okijto amikaj uelis kajsikamatis tlen kimachilia akin kipejpenaj ijkuak ‘oksepa tlakati’ noso ‘tlakatih itech Espíritu’ (Juan 3:3-8).
11. ¿Tlen kipanoua se tokni ijkuak toTajtsin Dios kipejpena?
11 ¿Tleka okse tlamantli mokuayejyekoua akin kipejpena toTajtsin Dios ika iespíritu santo? Nin tokni okinekiaya ika nochi iyolo chantis nikan tlaltikpak. Okichiaya ma ajsi tonal ijkuak toTajtsin Dios kipojpolos nochi tlen amo kuali uan ma kikopa tlaltikpak se xochitlali. Xamo okichiaya kiselis se iyolikni noso se akin iuan ochantiaya ijkuak kinyolitiskej akinmej yoixpolikej. Pero ijkuak okipejpenkej okse tlamantli opejki mokuayejyekoua. ¿Tleka? Nin amo kijtosneki ayakmo kineki chantis nikan tlaltikpak. Noijki amo porque motekipachoua noso amo kipaktia chantis nikan tlaltikpak. Iespíritu santo toTajtsin Dios okichi okse tlamantli ma mokuayejyeko uan noijki opejki kineki yas iluikak.
12. Ijkon ken kijtoua 1 Pedro 1:3, 4, ¿tlen kimachilia se tokni ijkuak toTajtsin Dios kipejpena?
12 Tokni tlen okipejpenki toTajtsin Dios xamo kimachilia amo kinamiki yas iluikak pero kuali kimati Jehová yokipejpenki. Yolpaki uan motlasojkamati porque kiselis non tlateochiualistli (xiktlajtolti 1 Pedro 1:3, 4).
13. ¿Tlen mokuayejyekouaj tlapejpenalmej ijkuak kimatij ayakmo chantiskej nikan tlaltikpak?
13 ¿Kijtosneki tlapejpenalmej kinekij ixpoliuiskej? Pablo technankilia ijkuak okineskayoti intlalnakayo tlapejpenalmej ika se mantajkali. Okijto: “Milák ok tiyolitokeh itech nin kuerpo [noso mantajkali], titenna iwa timosotlawah. Amo kijtosneki tiknekih matechkixtilikah tokuerpo non ya wewe, yej tiknekih makiyankuilikah tokuerpo, para mapojpoliwi tokuerpo non mikki iwa matikpiakah se kuerpo non ayik mikki” (2 Cor. 5:4). Nin amo kijtosneki tlapejpenalmej ayakmo kinekij yoltoskej uan kinekij totoka yaskej iluikak. Yejuan yolpakij uan mochijchikauaj kitekichiuiliskej Jehová iuan infamilia uan inyolikniuan. Pero nochipa kilnamiktokej yaskej iluikak maski san tlen kichijtokej (1 Cor. 15:53; 2 Ped. 1:4; 1 Juan 3:2, 3; Apoc. 20:6).
¿TEJUATSIN OMITSPEJPENKI TOTAJTSIN DIOS IKA IESPÍRITU SANTO?
14. ¿Tlen tlamantli amo kiteititia kox se tokni okipejpenki toTajtsin Dios ika iespíritu santo?
14 Xamo timotlajtlania kox toTajtsin Dios omitspejpenki ika iespíritu santo. Ik non, ximotlajtlani: ¿Ika nochi moyolo tikneki tikchiuas tlen kineki toTajtsin Dios? ¿Sapanoua tiyolpaki ijkuak titetlapouia? ¿Sapanoua mitspaktia timomachtis Biblia uan mitspaktia timomachtis tlen okachi oui? ¿Tikita mitsteochiua toTajtsin Dios porque timochijchikaua titetlapouia? ¿Timochijchikaua tikinpaleuis oksekimej kuali ma mouikakan iuan toTajtsin Dios? ¿Tikita Jehová nochipa mitspaleuia? (1 Cor. 2:10). Tla tikijtos tikchiua nochi nin tlamantli, ¿kijtosneki yomitspejpenki toTajtsin Dios ika iespíritu santo? Amo. Porque nochtin itekipanojkauan toTajtsin Dios uelis ijkon kichiuaskej maski tlapejpenalmej noso amo tlapejpenalmej. Jehová ika iespíritu santo kinpaleuia akinmej kitekichiuiliaj maski yaskej iluikak noso mokauaskej nikan tlaltikpak. Tla amo kuali tikmati kox omitspejpenki toTajtsin Dios ika iespíritu santo, kijtosneki amo omitspejpenki. Porque akinmej kinpejpena toTajtsin Dios ika iespíritu santo amo motlajtlaniaj kox yokinpejpenki. Yejuan kineltokaj melauak okinpejpenki uan yaskej iluikak.
Abrahán, Sara, David uan noijki Juan akin oteapolaktiaya okichijkej miak tlamantli tetlajtlachialti porque Jehová okinmakak iespíritu santo. Pero amo okinpejpenki ma yakan iluikak. (Xikita párrafo 15 uan 16). *
15. ¿Ken tikmatij amo nochtin tlen kiseliaj espíritu santo kinpejpenaj ma yakan iluikak?
15 Biblia kijtoua miakej itekipanojkauan toTajtsin Dios tlen yolmelajkej okiselijkej espíritu santo pero yejuan amo oyajkej iluikak. Ma tikitakan akinmej amo oyajkej iluikak. David omoyekanaya ika iespíritu santo toTajtsin Dios (1 Sam. 16:13). David omopaleui ika iespíritu santo toTajtsin Dios uan ijkon okajsikamatki miak tlamantli tlen oui uan noijki okipaleui ma kijkuilo seki tlamantli tlen ijkuilitok itech Biblia (Mar. 12:36). Pero Pedro okijto: “David amo otlejkok ilwikak” (Hech. 2:34). Noijki Juan akin oteapolaktiaya ‘otentoka de Espíritu Santo’ (Luc. 1:13-16). Jesús okijto: “amo onka ok se tlakatl kemi Juan Bautista”. Pero noijki okijto Juan amo iuan tlanauatiskia ompa iluikak (Mat. 11:10, 11). Jehová okinmakak iespíritu santo nonmej tlakamej uan ijkon okichijkej seki tlamantli tetlajtlachialti. Pero amo okinpejpenki ma yakan iluikak. ¿Kijtosneki amo okatkaj yolmelajkej ken tlapejpenalmej tlen tlanauatiskej iuan Jesús ompa iluikak? Amo, san kijtosneki Jehová kinyolitis uan chantiskej nikan tlaltikpak itech xochitlali (Juan 5:28, 29; Hech. 24:15).
16. ¿Kanin kinekij chantiskej miakej tlen kitekichiuiliaj toTajtsin Dios?
16 Axkan miakej kitekichiuiliaj toTajtsin Dios pero amo nochtin yaskej iluikak. Ijkon ken Abrahán, Sara, David, Juan akin oteapolaktiaya uan oksekimej tlakamej uan siuamej tlen yiuejkika okatkaj. Yejuan kinekij chantiskej nikan tlaltikpak uan kinekij ma kinnauati iTekiuajkayo toTajtsin Dios (Heb. 11:10).
17. ¿Tlen tlajtlanilmej tikinnankiliskej itech okse tlamachtil?
17 Sekimej ok katej nikan tlaltikpak tlen okinpejpenki toTajtsin Dios ika iespíritu santo. Ik non, ualeua timotlajtlaniaj seki tlamantli (Apoc. 12:17). ¿Ken moneki mokuayejyekoskej akinmej kinpejpena toTajtsin Dios ika iespíritu santo? ¿Ken moneki tikitaskej tla se tokni tlen touan monechikoua kikua pan uan koni vino ijkuak tikilnamikij imikilis Jesús? ¿Moneki timotekipachoskej tla sejse xiuitl okachi momiaktiliaj akinmej kijtouaj yaskej iluikak? Itech okse tlamachtil tikinnankiliskej ninmej tlajtlanilmej.
^ párr. 5 Itech Pentecostés xiuitl 33, Jehová opejki kinpejpena sekimej tokniuan tlen tlanauatiskej iuan iKone ompa iluikak. Pero ¿ken kimatij tokniuan kinpejpenaj para kiseliskej non tlateochiualistli? ¿Tlen panoua ijkuak kinpejpenaj? Nin tlamachtil uan tlen okiski itech revista Akin Tetlapouijtok enero 2016, techpaleuis ma tikinnankilikan ninmej tlajtlanilmej.
^ párr. 2 TLEN OKACHI IPATI: Ijkuak kinpejpenaj ika espíritu santo. Jehová ika iespíritu santo kinmatiltia akinmej kinpejpena para tlanauatiskej iuan Jesús ompa iluikak. Ijkon ika iespíritu santo ‘kisentlalia kinmakas’ tlen kichiaj (Efes. 1:13, 14). Ik non, akinmej kinpejpenaj kijtouaj iespíritu santo toTajtsin Dios kinmiluia chantiskej iluikak. Nin kijtosneki iespíritu santo toTajtsin Dios kinmatiltia melauak yetoskej iluikak (Rom. 8:16).
^ párr. 5 TLEN OKACHI IPATI: Ijkuak ikaj kineskayotiaj amo kijtosneki yiyaski iluikak. Kijtosneki yetos yolmelajki hasta ijkuak ixpoliuis noso hasta ijkuak yipeuas ueyi tlajyouilistli (Efes. 4:30; Apoc. 7:2-4; noijki xikita Tlamachtilmej para Toteki akinmej tikchiuaj ken Cristo tlen okiski abril 2019 página 7 uan 8).
^ párr. 10 Tla tikneki tikmatis okachi, xikita revista Akin Tetlapouijtok 1 de abril 2009 itech páginas 3-4, 5, 5-6, 7-8, 8-9, 10-11, 11-12.
TLAKUIKALI 27 Tlapejpenalmej tlanauatiskej iuan Jesús
^ párr. 57 FOTO: Maski sekimej tokniuan kintsakuaj porque tlaneltokaj noso techkauiliaj ma titetlapouikan uan ma titlamachtikan iTlajtol toTajtsin Dios, tinochtin tikchiaj ika nochi toyolo ma ajsiki tonal ijkuak technauatis iTekiuajkayo toTajtsin Dios.
